Jɔɔn 8

1Yeezu yaa basi dula jigini ale cheŋ ga jueli Olivi Guuku zuk. 2Vari ale veenti la saluik wa yaa ŋman siŋ ga jo Wen yenni po. Nuru boari yaa ŋman tigsi gilim wa ate wa yaa kala a sak ba. 3Sinsak sagrɔma ale Farisiima yaa yik nipok ale wa boro a nye kaboŋ a ta wa jam zaan ba suŋsuŋ. 4Ba weeni Yeezu ayen, <<Sagrɔ, tama yik nipowa de ale wa boro a nye ka kaboŋ. 5Sinsaŋŋa po Moosis a weeni ti kama ayen ti yuk kula choa nyɔnɔ ale tana a ko. Fi ale weeni wa ayen ka boa?>>#8:5 Kaabka 20:10; Teerika 22:22 6Ba bek wa dila kama ayen ba chamsi wa nya ate wa dan tulisi bɛ abe ba weeni ayen wa kaasi ya. Alege Yeezu an jam tulisi ba a yaa le ge a koori tɛŋ a pai wa nandub a ŋmarisi tɛŋ. 7Ba le diem za a bek wa la, wa yaa yiti nya ba ale weeni ayen, <<Nuru waai dek ale seba ayen wa an diem maa tom tuimbiok nya la, wala dek abe liŋ a pai tintain a yuk nipowa.>> 8Wa le weeni dila la, wa yaa ŋman koori tɛŋ a ŋmarisi. 9Ba le wom wa wieŋa la, ba yaa waaŋ chaab wanyi wanyi, ŋankpagsaŋa a dɛ niŋ ate mbala a pai saŋ. Ba yaa jam tali ka Yeezu ale nipowa nyiini dula jigini. 10Yeezu yaa ŋman yiti ŋmai a nya nipowa ale bek wa ayen, <<Ba bo ka be? Nuru waai a karo ayen wa bo mini fu?>> 11Nipowa yaa weeni Yeezu ayen, <<M Nyɔnɔ, waai karo.>> Yeezu yaa weeni wa ayen, <<Mi mɛ a kan bo mini fu. Be cheŋ a kuli abe fi kan ŋman tom tuimbaata.>>

12Yeezu yaa ŋman biisi ale ba ayen, <<Mi ale tɛŋzuk de Bolimu. Baai meena ale a va mi la a kan ŋman a cheŋŋi legi po. Ba ale ta ka Bolim buui ale a te nyuvuri la.>> 13Farisiima yaa weeni wa ayen, <<Fi a biisi ka fidek wie fi ale a biisi diila daa wensie.>> 14Yeezu yaa weeni ba ayen, <<Mi a daa biisi ka m dek wie ku ka wensie dii nyiŋla m seba m le nyini juijui la kama ale a ŋman seba m le a cheŋ juijui la mɛ. Nama zɛ mi ale nyini juijui la yaase m le a cheŋ juijui la. 15Nama a nya ka nyiŋ lammu a bo buusa, mi kan nye dila. 16Ase mi dan poom a bo nuru waai buusa, m buusaŋa ka wensie, dii nyiŋla daa mi nyiini ale a bo buusaŋa, m Kowa waai ale tom mu la a bo ale mu kama. 17Ba ŋmarisi ni sinsaŋŋa po kama ayen nuruba baye a dan siak a ta nɔiyeŋ ale chaab wari nyiŋ, ba wanni ka wensie.#8:17 Teerika 17:6 18Mi a biisi ka m dek wari, m Kowa waai ale tom mu la mɛ a biisi ka mi wari.>> 19Ba yaa bek wa ayen, <<Fi Kowa bo ka be?>> Yeezu yaa weeni ba ayen, <<Ni zɛ mi yaase m Kowa, ni dan seba mi ni seba m Kowa mɛ kama.>> 20Yeezu a jam kala ka Wen yenni po a moata juijui ate nuruma a nyiem a pai ba ligraŋa a ta jam a nyoro a te Wen la a sak nuru boanni wieŋa de meena. Nuru waai an jam yik wa dii nyiŋla wa yikka danni an diem paari ya.

21Yeezu a ŋman weeni ba ayen, <<Mi a gomsi kama ayen m cheŋ jigi. M daa cheŋ, ni kan baga a va mu a cheŋŋi. Nama ale nyiem a gisi mu, alege ni le kpi ale ni tuimbaataŋa.>> 22Juuma yaa weeni chaab ayen, <<Wa a yaali ayen wa ko ka wa dega? Wa a le weeni tama ayen ti kan baga a cheŋ wa ale a cheŋ juijui la.>> 23Yeezu yaa weeni ba ayen, <<Nama ka tɛŋzuk de nuruba, alege mi nyini ka wenŋmazuk, nama nyini ka tɛŋzuk de alege mi an nyini tɛŋzuk de. 24Dila ale soa ate mi a weeni ayen ni le kpi ale ni tuimbaataŋa la. Ni le kpi ni tuimbaataŋa po ka nama a nin ta siaka ale mi le weeni ayen mi ka waai la.>>#8:24 Nyinika 3:14 25Ba yaa bek wa ayen, <<Fi ka wana?>> Yeezu yaa weeni ba ayen, <<Mi poom a liŋ weeni ni mi ale ka waai la kama. 26M ta ka wie yegayega m weeni ayen ni kaasi ya. Waai ale tom mu la ka wensie nyɔnɔ, mi me a sak tɛŋzuk de nuruma ka dii nyiini ate m wom m Kowa jigi la.>> 27Juuma an diem a jam miŋ ayen Yeezu a jam a sak ba ka wa Kowa Wen wie. 28Wa yaa ŋman weeni ba ayen, <<Ni dan jam yik Mi Saalɔbiika a kpi jabarimu nyiŋ, ni le miŋ mi ale a weeni ayen mi ka waai la, ate ni seba ayen mi a kan nye wari ale m dek pagrimoa. Alege mi a biisi ka m Kowa ale sak mu diila. 29Waai ale tom mu la dek a bo ale mu kama wa an basi mu m dek m nyiini dii nyiŋla m kasim a tom ka dii ale a peenti wa sui la.>> 30Yeezu ale biisi nueri la, nuruba yega yaa jam ta siaka ale wa.

31Yeezu yaa ŋman weeni Juuma ale jam ta siaka ale wa la ayen, <<Ni dan va mi wensie sinsaŋŋa de, ni le chim mi ŋaaŋviirɔ maŋsa. 32Ni le seba wensieŋa ate wensieŋa a vari ni basi.>> 33Ba yaa weeni wa ayen, <<Tama ka ti kokpieŋka Abrayam ŋaaŋbisa, alege ti an diem a chim nuruba yɔm a nya ya. Fi ale a weeni ti dii ayen fi wensieŋa ale vari ti yɔntiri po a basi la kiri ale boa?>>

34Yeezu yaa jam tulisi ba ayen, <<Wensie ate mi a weeni ni ayen waai ale a nye biem la, a chim ka yɔma a te biem. 35Yɔma a kan bo yeri po taam wuu, alege yenni nidoabinni a bo di po kama taam wuu. 36Mi, Wen Nidoabinni, a dan vari fu a basi fi sum a nya varibasika kama. 37Mi seba ayen ni ka Abrayam ŋaaŋbisa, alege ni a yaali ayen ni ko mu, dii nyiŋla ni kan yaali ayen ni wom m sinsaŋŋa. 38Mi a biisi ka mi ale nya dii m kowa jigi la alege nama a biisi ni kowa ale weeni diila.>>

39Ba yaa weeni wa ayen, <<Ka Abrayam ale tama ko.>> Yeezu yaa weeni ba ayen, <<Abrayam a dan sum ka nama ko, ku te a fɛ kama ayen ni va wa wamaŋsaŋa. 40Nama a yaali kama ayen ni ko mu, dii nyiŋla mi ale a sak ni wensie wie ŋaai ate Wen a sak mu la. Abrayam an jam baga a nye nya kude. 41Ba yaa weeni wa ayen, <<Fi a nye ka fi kowa ale jam nye diila. Tama daa baai ale a goa ale nipooba a basi du la ale biak tama, tama ta ka ko yeŋ, wala ale Wen.>> 42Yeezu yaa weeni ba ayen, <<Ase Wen a dan sum ka nama Ko, nama a te a yaali mi kama, dii nyiŋla mi nyini ka wa jigi. Mi an jam ka m dek nyiŋŋa, alege ka Wen ale tom mu. 43Ka boa ate nama an baga a wom mi sinsaŋŋa? Dii nyiŋla ni zɛri ŋa womka kama. 44Ni ka ni kowa jabioku bisa ate ni a yaali ayen ni a va wa yaalika. A nyini piilimka po wa ka nuru koorik. Wa an maa va wensie siuwa dii nyiŋla wensie ka wa jigi ya. Wa daa velim wa a nye dila kama diila venta a piilim ka wa jigi ale chim venta ko. 45Mi a sak ni ka wensie, alege nama ka siaka ale mi ale a weeni ni diila. 46Nama waai a ka dela a baga a sak mu wa dii ate mi a nye kaasi la. Ase mi a dan kasim a sak ni ka wensie, ka boa abe le soa ate nama a kan ta siaka ale dii ate mi a sak ni la? 47Baai ale ka Wen bisa la a wom wa ale a weeni ba diila kama. Nama ale kan a yaali ayen ni wom Wen wieŋa diila a sak kama ayen ni daa wa bisa.>>

48Juuma yaa weeni Yeezu ayen, <<Tama ale weeni ayen fi ka Samaria denɔ ate chichirik biok a bo fi zukku po la, daa wensie?>> 49Yeezu yaa weeni ba ayen, <<Chichirik biok a ka mi zukku po. Mi a te m Kowa zula kama, alege nama a kan te mi zula. 50Mi a kan yaali zula a te m dega, alege ka m Kowa nyiini, wa abe ni wa bo baai ale zɛri mu la buusa. 51Wensie ate mi a weeni ni, waai ale a va mi sinsaŋŋa la num kan tu kummoa.>> 52Juuma yaa weeni wa ayen, <<Yɔgyɔgla de ti sum seba kama ayen chichirik biok ale bo fi po, ti kokpieŋka Abrayam ale Wen biisiteerɔma meena a kpi kama. Alege fi a weeni ti ayen baai meena ale a va fi sinsaŋŋa la a kan maa kpi. 53Ti kokpieŋka Abrayam kpi kama. Fi a poli ayen fi zuak a gaam wa kama. Wen biisiteerɔma mɛ a kpi, fi a poli ayen fi ka wana?>> 54Yeezu yaa weeni ba ayen, <<Ase mi a dan yaali ka zula a te m dek zula ŋala a kan ta kiri ya. Waai ale a te mi zula la ale m Kowa waai dek ate nama a wi ayen ni Wen la. 55Nama a zɛ wa, alege mi a seba wa kama. Mi a dan weeni ayen m zɛ wa, m ka velimvendik ase nama la. M seba wa kama ale a va Wa sinsaŋŋa. 56Nama kokpieŋka Abrayam ale jam nya mu ale m cheena tɛŋzuk de la, wa sui a jam peenti kama nna yegayega.>> 57Juuma yaa weeni wa ayen, <<Fi an diem a paari bena pisinu ale nye ka sɛ a seba Abrayam?>> 58Yeezu yaa weeni ba ayen, <<Ni wom dii ate mi a yaali ayen m weeni a sak ni la nalimnyiini. Mi poom jam liŋ boro kama ale ge ate ba biak Abrayam.>> 59Juuma ale ga wom nya kude la, ba yaa pisi tintana ayen ba yuk wa, alege Yeezu suk taam nyini Wen yenni po a nyini.

Currently Selected:

Jɔɔn 8: BWU

Highlight

Copy