Jɔɔn 7

1Nya kude ŋaaŋnyiŋ, Yeezu yaa nyiem a gilim Galili tɛŋka. Wa jam cheŋ Judia tɛŋka dii la Juuma a gisi ka suik ayen ba ko Wa. 2Juuma Kusuŋta Tigini a jam moata kama.#7:2 Kaabka 23:33-36, 39-43; Teerika 16:13-15 3Wa suataŋa yaa jam weeni wa ayen, <<Basi dula jigini abe fi cheŋ Judia tɛŋka po, ate fi ŋaaŋviirɔma baai ale bo dula la mɛ a nya fi tuimkperikaliisaŋa sii ate fi a tom la. 4Nuru a kan suk wie ŋaai ate wa a tom la ase wa ale a yaali ayen ba seba wa. Fi abe le a tom wieŋa de la, basi ate tɛŋka meena a seba fu.>> 5Yeezu suataŋa an jam ta siaka ale wa. 6Yeezu yaa weeni ba ayen, <<Ku an diem magsi ayen mi cheŋ dula yɔgyɔgla de, alege nama a baga a cheŋ diipo meena ate ni a yaali la kama. 7Tɛŋka demma an kisi nama alege ba kisi mi kama, dii nyiŋla mi kasim a weeni ba ale a tom tuimbaata la. 8Nama a cheŋ Jerusalem a ga dɛ Tigini, dii nyiŋla ku an magsi ayen mi cheŋ dula jigini yɔgyɔgla de.>> 9Yeezu ale weeni nya kude la, wa yaa wari bo Galili tɛŋka po.

10Wa suataŋa ale jam basi wa ale cheŋ Tigini la, Yeezu mɛ yaa magi va ba ŋaaŋ a cheŋ. 11Juuma a jam a gisi wa kama ale a bek chaab wa boka jigi. 12Nuruba yegayega yaa jam waasi a biisi wa wie. Ba gela a jam a weeni ayen wa ka nuru maŋ, alege baai mɛ a weeni ayen wa a paasi ka nuruba. 13Ba meena a jam a chali ka Juuma kpaŋŋa yɔgsum. Ka dila ale soa ate ba an jam a biisi wa wie ate ku a jueli la.

14Tigini daaŋa ale jam a chalisi a soa se chaab la, Yeezu yaa ga jo Wen yenni po a sak nuruma. 15Wa sinsaŋŋa yaa cha Juuma kpaŋŋa baai ale jam bo dula la. Ba yaa weeni chaab ayen, <<Nuruwa de a ka sagrɔ ate wa sak wa, ale nye ka sɛ a seba wieŋa de meena a sak tama?>> 16Yeezu yaa weeni ba ayen, <<Mi sinsaŋŋa ka Wen ale tom mi la wie, ŋa daa mi dek wie. 17Baai meena ale a yaali ayen ba va Wen yaalika la, ale miŋ ase mi sinsaŋŋa a nyini ka Wen jigi yaa mi dek. 18Nuru waai ale a biisi wadek wie la a yaali kama ayen nuruba a te wa zula. Nuru waai ale a yaali ayen wa a te waai ale tom Wa la zula la, wala ka wensie nyɔnɔ. Venta a ka wa jigiya. 19Moosis an te ni Wen Sinsaŋŋa? Alege ni waai a kan zuli ŋa. Ka boa ale soa ate ni a yaali ayen ni ko mu?>>

20Nuru yaa weeni wa ayen, <<Fi ta ka chichirik, kaai ale a yaali ayen ka ko fu?>> 21Yeezu yaa weeni ba ayen, <<Mi tom ka wakperikaliik kanyi ate ku cha ni nna yegayega. 22Moosis a sak ni kama ayen ni a gebi ni bisaŋa yoaŋa alege ka ni kokpieŋsaŋa ale a piilim ku, ate nama a gebi biik yoari Vuusum Danni po. 23Nama abe dan nye dila Vuusum Danni po alege an nye kaasi Moosis Sinsaŋŋa ka boa ale soa ate nama sue a puuri ale mi, m le tebi nuruwa Vuusum Danni la?#7:23 Kaabka 12:3 24Ni kan nya nuruba nyeela a bo buusa, alege ni a bo wensie buusa.>>

25Nuru baai ale jam bo Jerusalem tɛŋka po la, ba gela yaa weeni chaab ayen, <<Daa nuruwa de ate kpaŋŋa a yaali ayen ba ko la? 26Ni be nya, wa le la a za peelimmu po a sak nuruma alege ti kpaŋŋa an nye wa wari ya. Ba baga a seba ayen wa sum ka Kirisitawa? 27Kirisitawa a dan jam, waai a kan seba wa ale nyini juijui la. Alege tama meena seba nuruwa de ale nyini juijui la kama.>> 28Yeezu ale diem jam bo Wen yenni po a sak nuruma la, wa yaa weeni ate ku jueli ayen, <<Nama a seba mi ale nyini juijui la? Mi an jam daa m dek nyiŋŋa. Waai ale tom mu la ka wensie nyɔnɔ. Ni abe zɛ wa, 29alege mi ale seba wa. Mi ale wa a jam bo ka jigi yeŋ ale ge ate wa tom mi ni jigi.>> 30Nuruma gela ale wom dii ate wa weeni la, ba yaa jam a yaali ayen ba yik wa alege nuru an pai nisa a tiri wa diila wa yikka danni an diem paari ya. 31Nuru boanni po yega a jam ta siaka ale wa, a yaa weeni chaab ayen, <<Ase Kirisitawa a dan poom jam, wa le baga a tom wakperikaliisa a gaam nuruwa de?>>

32Farisiima ale wom nuru boanni ale a waasi Yeezu wie diila, ba le kaabteerɔ kpaŋŋa a yaa wi chaab a biisi alege a tom badek nuruba ayen ba ga yik Yeezu. 33Yeezu yaa weeni ba ayen, <<Mi le bo ale ni daa maga dega abe m ge a ŋman cheŋ waai ale tom mu la jigi. 34Ni le nyiem a gisi mi boka jigi, alege ni kan ŋman nya mu dii nyiŋla ni kan baga a cheŋ juijui ate mi a cheŋ la.>> 35Juuma yaa bek chaab ayen, <<Wa ti a yaali ayen wa cheŋ ka Girik tɛŋsaŋa ate tama nuruma a maa boro la a sak Girik demma yaa? 36Wa weeni ti ayen ti le nyiem a gisi wa boka jigi, alege ti kan ŋman nya wa. Wa ŋman weeni ti mɛ ayen ti kan baga a cheŋ juijui ate wa a cheŋ la. Nya kude kiri ale boa?>>

37Juuma Tigini dai dii dai dek ale jam a kpeglim la, dai kpien dila Yeezu yaa yiti a zaani nuru boanni niŋ a weeni ate ku jueli ayen, <<Baai meena ate nyanyuila a ta ba la, a jam mi jigi ate m te ba nyiam ate ba nyu. 38Ba ŋmarisi Wen Gbaŋka po ayen, <Nyiam ale nyini baai ale ta siaka ale mi la suiniima po a kasim chali a nyini.> >>#7:38 Azaya 55:1 39Yeezu ale biisi ale ba dii nyiamu jigi la, a magsi chaab ale ka Wen Chiika. Wen an diem a pai wa Chiika a te baai ale ta siaka ale Yeezu la, dii nyiŋla Yeezu an diem yiti jueli Wen jigi ya.

40Nuru boanni ale wom dii ate Yeezu a weeni la, ba gela yaa weeni chaab ayen, <<Nuruwa de a sum ka Biisiteerɔwa.>>#7:40 Teerika 18:15 41Ba gela mɛ a weeni ayen, <<Ka wala ale Kirisitawa.>> Mbala mɛ a weeni ayen, <<Kirisitawa an baga a chim Galili denɔ. 42Ba ŋmarisi Wen Gbaŋka po ayen, <Kirisitawa ale chim ka Deevid ŋaaŋbiik. Ba le biak wa ka Betiliyem, tɛŋ kaai ate Deevid nyini la.> >>#7:42 Maika 5:2 43Nya kude meena yaa jam basi ate nuru boanni a poori chaab nna tɔgatɔga. 44Ba gela a jam a yaali kama ayen ba yik wa, alege nuru waai an jam a tiri wa.

45Kpaga ŋaai ate ba jam tom la yaa ŋman cheŋ kaabteerɔ kpaŋŋa ale Farisiima jigi ate ba bek ba ayen, <<Ka boa ate ni an ta wa jam ya?>>

46Nuruma yaa weeni ba ayen, <<Nuruwa de biika, tama an diem maa wom ka choa.>> 47Farisiima yaa weeni ba ayen, <<Wa sum a maa paasi nama mɛ kama? 48Nama diem a wom ale kpaŋŋa yaase Farisiima wanyi a ta siaka ale wa. 49Alege nuru boanni baai ale kan seba Moosis Sinsaŋŋa la, kikaasa ale bo ba zuk.>> 50Nikodimusi waai ale jam liŋ biisi ale Yeezu la a jam maa ka Farisiima po wanyi. Wa yaa weeni wa vaanchaama ayen, 51<<Tama Sinsaŋŋa a sak ti kama ayen ti dan kan dɛ niŋ a bo nuru buusa a wom wadek nɔi po ti an baga a weeni ayen wa biisi lo ya.>> 52Ba yaa bek wa ayen, <<Fi mɛ a nyini ka Galili tɛŋka? Be nya Wen Gbaŋka po ate fi miŋ ayen biisiteerɔ an nyini Galili tɛŋka.>> 53Ba meena yaa yiti a waaŋ chaab a kuli ba yeeŋa.

Currently Selected:

Jɔɔn 7: BWU

Highlight

Copy