Jɔɔn 6

1Kude ŋaaŋnyiŋ, Yeezu yaa taam Galili Nyakpiemu kauk kunkula juijui ate ba a wi ayen Tiberiasi la. 2Nuru boari yaa va wa, dii nyiŋla ba nya Yeezu ale jam a tom wakperikaliik sii ale yuarɔma tebika la. 3Yeezu ale wa ŋaaŋviirɔma yaa ga jueli kala guuk kunyi zuk. 4Gaambasika Tigini a jam moata kama. 5Yeezu yaa zak nya nuru boanni a cheena ate wa yaa bek Filip ayen, <<Ti ti nya ŋandiinta ka be a te nuru boanni nna ate ba dɛ?>> 6Wadek a jam seba dii ate wa ayen wa nye la kama, alege wa jam a yaali kama ayen wa chamsi Filip a nya. 7Filip yaa weeni wa ayen, <<Ti dan kan pai ligra a gaam ŋaai ate ti ta la a da ŋandiinta ku kan paari a dɛ ba ale magadek mɛ.>> 8Wa ŋaaŋviirɔma wanyi, Simon Piita yuawa Andiru, yaa weeni Yeezu ayen, 9<<Nidoabili wanyi ale bo dela a ta borobotta tinu ale juma ŋaye, alege ŋantaŋa de a kan paari nuruma de meena.>> 10Yeezu yaa weeni ba ayen, <<Ni basi ate nuru boanni a kali tɛŋ.>> Wuuk yegayega ale jam bo dula jigini. Nuruma yaa kali tɛŋ. Ba nidoama nyiini a jam ka tusa ŋanu (5,000). 11Yeezu yaa pai borobottaŋa ale jumaŋa a puusi a te Wen jiam ayen wa niak ŋandiintaŋa ale ge a pai chari nuruma ate ba ŋɔbi. Ba ale chari waai meena a ga nueri la, ba meena yaa ŋɔbi chak. 12Yeezu yaa weeni wa ŋaaŋviirɔma ayen, <<Ni cheŋ a ga pisi ŋandiin talaŋa ate bala a kan kaasi.>> 13Ba yaa pisi ŋandiin tii ate nuru boanni a dɛ ale tali la a sueri busisa pi ale siye. 14Nuruma ale nya wakperikaliik kaai ate Yeezu a tom la, ba yaa weeni chaab ayen, <<Nuruwa de a sum ka Biisiteerɔ ale wa siŋ jam tɛŋzuk de la.>>#6:14 Teerika 18:5

15Yeezu ale ga miŋ ayen ba bobi wa naab la, wa yaa yiti dula jigini a cheŋ jo guutaŋa po wadek wa nyiini.

16Wenni ale jam a siŋ la, wa ŋaaŋviirɔma yaa cheŋ nyakpiemu nɔi, 17a ga jo ŋaaruŋ po ayen ba taam kunkɔŋni ndila a ga paari Kapernaum tɛŋka. Tɛŋka ale jam a sobri la, Yeezu an diem jam ba jigi ya. 18Va kpioŋ a yaa deri yiti a fɔbi ba ŋaaruŋku ale a nye ate nyiamu a choa nna yegayega. 19Wa ŋaaŋviirɔma ale dam ba ŋaaruŋku a cheŋ ga paari mɛɛla ŋata yaase ŋanaansi la, ba yaa nya Yeezu ale wa bo nyiamu zuk a cheŋ cheena ba jigi. Ba le ga nya wa la, yɔgsum yaa deri yik ba. 20Yeezu yaa weeni ba ayen, <<Ka mi. Ni kan chali yɔgsummoa.>> 21Wa le ga paari ba ŋaaruŋku la, ba meena sue yaa peenti ate ba weeni wa ayen wa jo ŋaaruŋku po. Yeezu ale ga jo a gum ba po la, ba yaa deri paari kunkɔŋni kauk kuui ate ba a cheŋ la.

22Vari ale veenti la, nuru baai ale tali wari nyakpiemu kunkɔŋi dindila la yaa nya ayen ka ŋaaruŋ yeŋ nyini ale bo dula, Yeezu mɛ abe ka ŋaaruŋku po ale wa ŋaaŋviirɔma, wa ŋaaŋviirɔma a cheŋ ka badek ba nyiini. 23Ale ge ŋaaruŋta ale nyini Tiberiasi jam moata juijui ate ba jam de ŋandiintaŋa ti Nyɔnɔwa Yeezu Kirisita a te jiamu la ŋaaŋnyiŋ. 24Nuru boanni ale nya ayen Yeezu ale wa ŋaaŋviirɔma a ka dula la, ba yaa jueli ŋaaruŋ fiisa a jam Kapernaum tɛŋka a gisi Yeezu. 25Nuruma ale ga nya Yeezu la, ba yaa bek wa ayen, <<Ti Sagrɔ, fi jam dela ka dimpo?>>

26Yeezu yaa weeni ba ayen, <<Wensie ate mi a weeni ni ayen ŋandiin tii ate mi diem a te ni ate ni dɛ a chak la ale basi ate ni a gisi mu. Ni kan gisi mu ka m tuimkperikaliisaŋa miŋka nyiŋŋa. 27Ni kan basi ate ni yam meena, a bo ale ŋandiin tii ale ti jam a kaasi la, alege ni basi ate ni yam meena a bo ale ŋandiin tii ale a te nyuvuri dii ale kan ta kpeglimka la. Tii ate Saalɔbiika ale te ni la. Ka dila ale soa ate mi a baga a pai nyuvuri dila a te ni. Wen dii ale ka mi Ko la a za ka mi ŋaaŋ ayen mi ka wa Nidoabili.>> 28Ba yaa bek wa ayen, <<Tama ayen ti nye ka sɛ a tom Wen tuini?>> 29Yeezu yaa weeni ba ayen, <<Ni dan a yaali ayen ni nye ate Wen sui a peenti, ni ta siaka ale mi waai ate wa tom ni jigi la.>> 30Ba yaa weeni wa ayen, <<Boan wakperikaliik ate fi ale tom ate ti nya abe ti ge a ta siaka ale fu? 31Fi seba ayen ti kokpieŋsaŋa a jam dɛ ka ŋandiinta ate ba wi ayen manna la sagni po ase ba le ŋmarisi Wen Gbaŋka po ayen, <Moosis a jam nya ka ŋandiinta wenŋmazukku po a te wa nuruma ayen ba dɛ.> >> (Yiila 78:24) 32Yeezu a ŋman weeni ba ayen, <<Wensie ate mi a weeni ni ayen Moosis an jam nya ŋandiintaŋa ka wenŋmazukku po a te ni kokpieŋsaŋa, alege ka mi Kowa Wen ale pai te ba. 33Ŋandiin tii ate Wen a te la a nye se ka waai ale nyini wenŋmazuk a jam ayen wa te tɛŋka demma nyuvuri dii ale kan ta kpeglimka la.>> 34Ba yaa weeni wa ayen, <<Nyɔnɔ, be kasim a te ti ŋandiintaŋa de.>>

35Yeezu yaa weeni ba ayen, <<Mi ale nyuvuri ŋandiintaŋa, waai ale a jam mi jigi la kɔm kan yik wa, waai mɛ ale ta siaka ale mu la nyanyuila a kan yik wa. 36Mi poom liŋ weeni ayen ni nya mu kama alege ni diem ka siaka ale mu. 37Baai ate m Kowa a pai te mu la, ale jam m jigi ate m tuesi ba. Mi kan zɛri baai meena ale ba jam mi jigi la diipo diipo. 38Dii nyiŋla mi an nyini wenŋmazuk a jam ayen m tom ka mi dek ale a yaali diila alege ka Waai ale tom mu la ale a yaali diila. 39Waai ale tom mu la yaalika ale nna. Baai ate wa pai te mu la, m le nya ba zuk ate ba kan bɛ. Wa ale basi ate ba yiti kum po abe wa pai nyuvuri dii ale kan ta kpeglimka la a te ba. 40M Kowa yaalika ale nna ayen waai ale nya Nidoabinni ta siaka ale Wa la, ale te nyuvuri dii ale kan ta kpeglimka la. Wa ale basi ate wa yiti kum po kpeglimka danni.>>

41Nuruma ale ga wom Yeezu ale a biisi dii ayen, <<Wa ale nyuvuri ŋandiin tii ale nyini wenŋmazuk la, ba yaa ŋuuni.>> 42Ba yaa weeni chaab ayen, <<Daa Yeezu ale nna, Josefi nidoabinni? Ti seba wa kowa ale wa mawa kama. Ka boa ale soa ate wa a weeni ayen wa nyini ka wenŋmazuk a jam?>> 43Yeezu yaa weeni ba ayen, <<Ni basi ni ŋuunika. 44Nuru waai an baga a jam Mi jigiya ka m Kowa waai ale tom mu la, dek a nin dari wa a ta jam mi jigi, ate m basi ate wa yiti kum po kpeglimka danni ate wa nya nyuvuri dii ale kan ta kpeglimka la. 45Ku ŋmarisi biisiteerɔma gbaŋka po ayen, <Naawen ale sak ba meena.> (Azaya 54:13) Baai meena ale a wom dii ate m Kowa a weeni ale a va wa sinsaŋŋa la, wa le ta ba jam Mi jigi. 46Nuru waai an diem nya mi Kowa. Mi waai ate wa tom ni jigi la, nyiini ale nya Wa. 47Wensie ate mi a weeni ni ayen baai meena ale ta siaka ale Mi la a poom tuesi nyuvuri dii ale kan ta kpeglimka la kama. 48Mi ale ŋandiin tii ale a te nyuvuri la. 49Ni kokpieŋsaŋa a jam dɛ ka ŋandiin tii ate ba a wi ayen manna la sagni po ale ge kpi, 50alege baai meena ale a dɛ nyuvuri ŋandiin tii ale nyini wenŋmazuk la, bala a kan kpi. 51Mi ale nyuvuri ŋandiin tii ale nyini wenŋmazuk a jam la. Baai meena ale a dɛ ŋandiintaŋa de la ale boro taam wuu. Ŋandiin tii ate mi ayen m pai te ba la ale M nyiŋka, ate tɛŋka demma a nya nyuvuri dii ale kan ta kpeglimka la.>>

52Juuma yaa ta nanpaga ale chaab ayen, <<Nuruwa de ale nye ka sɛ a pai wa nyiŋka a te tama ate ti ŋɔbi?>> 53Yeezu yaa weeni ba ayen, <<Wensie ate mi a weeni ni, fi dan kan ŋɔbi Saalɔbiika nyiŋ lammu ale nyu wa ziimu, fi ka nyuvuri ya. 54Baai meena ale a ŋɔbi mi nyiŋka ale a nyu m ziimu la a poom tuesi wa nyuvuri dii ale kan ta kpeglimka la kama. M dan jam ayen m bo tɛŋzuk meena demma buusa, m le nak ba kum po a yiti. 55Mi nyiŋka ale ŋandiin maŋsaŋa dek ate M ziimu mɛ a chim nyu maŋka. 56Baai meena ale a ŋɔbi Mi nyiŋka ale a nyu Mi ziimu la a bo ale Mi kama ate Mi mɛ a bo ale ba. 57M Kowa waai ale ka nyuvuri nyɔnɔwa la, ale tom mu ni jigi. Wala nyiŋ ale soa ate mi boro. Suik kula po mɛ baai meena ale a ŋɔbi mi la, ale boro mi nyiŋ. 58Nyuvuri ŋandiintaŋa ale ŋandiin tii ate Moosis a jam pai te ni kokpieŋsaŋa ate ba dɛ ale kpi la, daa wayeŋŋa. Wen ale tom wa nyuvuri ŋandiintaŋa ate ti nyini wenŋmazuk a jam, ate baai meena ale ba dɛ ti la, a ta nyuvuri dii ale kan ta kpeglimka la.>>

59Yeezu a jam bo ka Juuma tuka dɔkku kuui ale bo Kapernaum tɛŋka po la, a sak wieŋa de meena.

60Yeezu ŋaaŋviirɔma yega ale jam wom dii ate wa sak la, a yaa weeni chaab ayen, <<Wa sinsaŋŋa a pagra kama. Waai an baga ŋa a va.>> 61Alege Yeezu ale miŋ ayen wa ŋaaŋviirɔma a ŋuuni la, wa yaa weeni ba ayen, <<Ka ni sue ale a puuri kude nyiŋŋa? 62Ase ni dan nya Mi Saalɔbiika ale m ŋmani a jueli wenŋmazuk po, ni ale poli kase? 63Waai ale a te nyuvuri la ale Wen Chiika alege nurubiik pagrim an baga a nye kude. Mi ale biisi wie ŋaai a te ni la ale a basi ate Wen Chiika a jam ni jigi. 64Alege ni gela a ka siaka ale mi ale a sak diila.>> Yeezu ale piilim a sak wa ŋaaŋviirɔma la, wa jam seba baai ale ba kan ta siaka ale wa la kama ale waai ale wa ta wa a ga bobri a sak la. 65Dula jigini Yeezu yaa ŋman weeni ba ayen, <<Ka dila ale soa ate mi a liŋ sak ni ayen nuru waai an baga a jam mi jigi ya ka M Kowa a nin dari wa a ta jam mi jigi la.>>

66Wa ŋaaŋviirɔma ale ga wom dila la, ba yega yaa deri basi wa ŋaaŋ vaka. 67Yeezu ale ga nya ba le nye diila, wa deri cheem wa ŋaaŋviirɔma pi ale bayewa jigi a bek ba ayen, <<Nama mɛ ayen ni basi mi kama?>> 68Simon Piita yaa weeni wa ayen, <<M Nyɔnɔ Yeezu Kirisita, ka wana jigi ate ti a yaali ayen ti cheŋŋi? Fi ale waai ale ta Wen nyuvuri dii ale kan ta kpeglimka la sinsaŋŋa a sak ti. 69Tama abe ta siaka ale ŋa kama ale seba ayen ka fi ale Wen Nuru Weleŋka.>> 70Yeezu yaa weeni ba ayen, <<Mi a lueri ni ka nuruba pi ale baye ayen ni chim mi ŋaaŋviirɔba, alege ni po wanyi ka jabiok.>> 71Wa jam a biisi ka Judas, Simon Iskariot nidoabinni wie. Yeezu a jam seba ayen wa le wa bobri wa a sak.

Currently Selected:

Jɔɔn 6: BWU

Highlight

Copy