Piilimka 49

1Ate Jekob a wi wa nidoabilisaŋa a weeni ba ayen, <<Ni tigsi jam jigi yeŋ ate m weeni ni dii ale za di nye da ŋaai ale cheen la. 2<<Jekob nidoabilisaŋa, ni tigsi a wom. Ni wom ni kowa Izirali.

3<<Aruben fi ale m bi kpagi, m zuaka, waai ale dɛ niŋ a sak m pagrimu, fi ale m zula ale m pagrim. 4Fi a nye ase ka nyiam la, fi an za jigi yeŋŋa, fi a kan ŋman baga wari a nye cheŋ niŋŋa, diila fi goa ale ka m pok a taŋ m gaduokku.

5Simeyon ale Livai ka suata, ba gebisaŋa ka wɔkwɔk kpaliŋ kɔlima. 6Kan te m ta m dek a ga gum ba po, diila ba ko ka nuruba ale suipuurum ale a baliŋ lalisa a pai a nye dii ale a yɔk ba sue la. 7Kikaasa abe va ba, ba suipuurumu ale ba gaasaŋa nyiŋ, diila ku bie ka nna yegayega. M le kati ba ŋaaŋbisaŋa a waaŋ Izirali tɛŋka meena, abe m kati ba a waaŋ ba le bo juijui meena ate Izirali buuni a bo la.

8Juda, fi suataŋa ale pak fu. Fi nisa ale yik fi dachaasaŋa ŋie. Fi kowa bisaŋa ale koori tɛŋ fi niŋ. 9Juda, fi a nye ase ka gbeŋli la, fi a nyini peelim kama a ŋman jam a jo fi goomu jigini, m dek biiga. Ase gbeŋli la, fi nyiem tienti fidek kama a duagi, ase gbeŋ sari la, ka wana ale wa baga a daani wa? 10Juda ale kasim yik naam dachekka a tara. Ate wa ŋaaŋbisaŋa ale kasim a dɛ naam. Tɛŋsa ale jam a puusi wa. Abe ba koori tɛŋ wa niŋ. 11Wa le bobi wa bonika tiimu nyiŋ. Wa le a yaali tiib naŋ kaai la ate wa le bobi wa bonpaalika. Wa ale pai daam a chim nyiam a sugri wa kɔlima, wa garuk woŋtaŋa ale bo da buui ale muni ase ziim la po. 12Wa ninaŋa ale sobri a gaam daam, ate wa nyinaŋa ale peenti a gaam biisim.

13<<Zebulun ale kali nyakpiemu nɔi la, wa jigini ale chim ŋaaruŋta zaani ka jigi. Wa banaŋa ale teeri cheŋ paari Saidon.

14Isaka a nye ase ka boniŋ pagrik ale dua piisa ŋaye suŋsuŋ po ale ka jibta la. 15Wa ale nya ayen vuusumu jigini a nala la, ate tɛŋka mɛ nalimu ale ka diila, wa yaa siak a te jibta ale siak a te fifiok tuima.

16<<Dan ale ta wensie boteka a te wa nuruma, ase Izirali buuni po wanyi la. 17Dan ale chim ka waab a bo suiku nɔi ate waapiik a bo suiku po, ate ŋa ale dom wusumaŋa naŋkpaaŋa, ate baai ale do ŋa la a lɔ ŋaaŋnyiŋ. 18<<Naawen yaa, m zak zuk a nya ka fi varibasika.

19<<Zueba ale vi Gad, alege wa ale viriŋ a vi ba.

20<<Asɛ ŋandiinta ale chim ŋandiin maŋsa. Wa ale nye ŋandiinta a magsi naab dɛka.

21<<Nafitali a nye ase ka kab ate ba foli bu a basi, ate bu a biak bi naliŋsa la.

22<<Josefi a nye ase ka tiib buui ale ta yɔna la, tiib buui ale a yɔni a moata beli naŋ la, ate bu naŋsaŋa teeri a jueli parik zuk la. 23Wa dachaasaŋa a kisi wa kama nna tuatuaga. Ba a tɔŋ wa peema. 24Alege wa tommu a kan yeeri. Wa nisaŋa a ta pagrim ale valima. Waai Ale Ka Jekob Pagrim Nyɔnɔwa La ale Naapeerika waai ale ka Izirali Piuŋku la nyiŋ, 25fi kowa Wen dii ale a maari fu la nyiŋ ale Wen Dii Ale A Niak La, waai ale a niak fu la nyiŋ ale wenŋmazukku niauŋku ale niauŋ kuui ale bo tɛŋka liuŋku po la, abe wa niak fi bisaŋa ale fi biamu luikku. 26Fi kowa niauŋku a gaam dipodipo guutaŋa ale gu kpagsaŋa meena kama. Te ate ŋade meena a jam Josefi zuk waai ale ka nabiik a bo wa suataŋa po la.

27<<Benjamin a nye ase ka piuk la. Saluik wa nyiem yik ka wa dachaasaŋa a nɛ, ate junɔi wa lab ŋan baai ale tali la.>>

28Izirali buuni pi ale ŋayewa meena ale nna, ale ba kowa ale weeni dii a niak ba la ale nna, wa te waai meena ka niauŋ kuui ale magsi la.

29Ate wa weeni ba wanni de ayen, <<M za m ga gum ka m nuruma po. Ni abe gu mu ale m koma vɔrup buui ale bo Efron Yit denɔwa talimu po la, 30vɔrup buui ale bo Makpela laŋka po, a moata Mamre a bo Keenan tɛŋka po la, ate Abrayam a jam da a magsi chaab ale nuruba guka, a nyini Efron ale ka Yit denɔ jigi la, wa jam da talimu mɛ a gum du kama. 31Dula ate ba gu Abrayam ale wa powa Saara, dula mɛ ate ba gu Aizik ale wa powa Aribeka, dula ate m gu Leya. 32Ba jam da talimu ale vɔrumu a nyini ka Yit denɔwa jigi.>>

33Ase Jekob ale pai sinsaŋŋa a te wa bisaŋa a nueri la, wa yaa vuuri wa naŋsaŋa a vi wa gaduokku zuk a yaa vuusi a kpeglim ale gum wa nuruma po.

Currently Selected:

Piilimka 49: BWU

Highlight

Copy