Piilimka 50

1Josefi yaa lɔ wa kowa zuk ale kum wa nyiŋ ale gbaari wa. 2Josefi yaa weeni tiim nyama ayen ba pai tiim a nye wa kowa Izirali nyiŋka ate ka kan poagi. Dila tiim nyama a yaa pai tiim a nye wa nyiŋka, 3ba jam pai ka da puma pisinaansi a gomsi wa nyiŋka ayen ka kan poagi. Ate Ejipiti demma a pai daa pisiyopɔi a kum wa.

4Kumsaŋa daaŋa ale taam la, Josefi yaa weeni Faaro nisɔmma ayen, <<Ase m dan sum nya ka ŋmanteka a nyini ni jigi, ni abe weeni Faaro a te mu, ni weeni wa ayen, 5<M kowa a jam nye kama ate m pɛ ale wa ayen, <<M moata ka kum. Be gu mu vɔrup buui ate m tu Keenan tɛŋka po a magsi ayen ba gu mu la.>> Yɔgyɔgla de te mu suik ate m cheŋ a ga gu m kowa abe ŋman pilim jam.>> >

6Faaro yaa weeni ayen, <<Cheŋ a ga gu fi kowa wa ale nye ate fi pɛ la nyiŋ.>>

7Ate Josefi yaa jam cheŋ ayen wa gu wa kowa. Faaro kpaŋŋa ale wa nisɔmma ale Ejipiti kpaŋŋa meena 8ale Josefi yenni dem ale wa suataŋa ale wa kowa yenni dem. Ka ba bisaŋa ale ba duŋsaŋa ale ba naapeerisaŋa nyiini ale jam tali a bo Gosen. 9Wusuma ale ŋa torokoba ale wusum duerɔba ale jam cheŋ ale wa. Ba jam piisi ka nna yegayega.

10Ase ba le ga paari juijui ate ba a fɔbi ba ŋankpaantaŋa Atad po, a moata Jodan la, ba yaa jam kum ate ku jueli nna tuatuaga. Dula jigini ate Josefi yaa jam pai daa ŋayopɔi a kum wa kowa. 11Ase Keenan dem baai ale bo dula jigini la, ale ga nya ayen ba bo Atad juijui ate ba a fɔb ŋanta a kum la, ba yaa weeni ayen, <<Ninmuna kumsa ale nna ate Ejipiti demma a tara.>> Dila ale soa ate ba a wi jigi dila ale moata Jodan la ayen, Abel Mizraim la.

12Ate Jekob bisaŋa a jam sum nye dii dek ate wa weeni ba la. 13Ba jam ji wa kama a ta cheŋ Keenan tɛŋka a ga gu wa vɔrup po ale bo Makpela talimu po la, a moata Mamre, ate Abrayam jam da bu ale talimu a magsi nuruba guka a nyini Efron Yit denɔwa jigi la, wa jam maa da talimu a gum du kama. 14Wa ale ga gu wa kowa a nueri la, Josefi yaa jam ŋman pilim cheŋ Ejipiti ale wa suataŋa ale baai meena ale jam va wa a cheŋ ayen wa gu wa kowa la.

15Josefi suataŋa ale ga nya ayen ba kowa a kpi kama la, ba yaa weeni ayen, <<Josefi abe nin jam ta chaab ale ti ayen wa tuni ti a magsi chaab ale kaasuŋ kuui meena ate tama a pai nye wa la ti le nye ka sɛ?>> 16Dila ba yaa tom a weeni Josefi ayen, <<Alege ate fi kowa a kpi la, wa jam weeni ka wanni de ayen. 17<Kude ale dii ate nama ale weeni Josefi, mi a yaali kama ayen fi vɔŋ fi suataŋa wabaataŋa ate ba nye kaasi fu la a te ba.> Yɔgyɔgla de ti a saalim fu ayen fi vɔŋ fi kowa Wenni tomteerɔma wabaataŋa a te ba.>> Ase ba tontomiŋka ale ga paari Josefi la, Josefi yaa jam kum.

18Wa suataŋa yaa jam lo wa niŋ a weeni ayen, <<Tama ka fi yɔm.>>

19Alege Josefi a jam weeni ba kama ayen, <<Ni kan chali yɔgsummoa. Mi ka Wen ya? 20Nama poli ayen ni nye mi ka biem, alege Wen a basi ate ku chim nalim ayen dii meena ale nye la, ku jam vari nuruba nyuvoa a basi. 21Dila, ni be kan yɔgsa. M ale pai jaab meena ate nama ale ni bisaŋa a yaali la a te ni.>> Ale biisi bi masik a te ba ale ŋman te ate ba miŋ ayen wa ale weeni diila, wa ale sum a nye a te ba.

22Josefi a jam kali Ejipiti ale wa kowa dɔkdemma meena kama. Wa jam boro paari ka bena kook ale pi 23a nya Ɛfraim bisa gaŋsa buta. Wa jam maa nya Makir ale ka Manasa biik la bisa biam kama, ate ba pai ba a vi wa naŋsa zuk.

24Ate Josefi yaa weeni wa suataŋa ayen, <<M moata ka kum. Alege Wen dek ale maari ni a ta ni a nyini tɛŋka de po, a ta ni a cheŋ tɛŋ kaai dek ate wa puulim a pɛ ale Abrayam ale Aizik ale Jekob la.>> 25Ate Josefi a jam basi ate Izirali nidoabinni a nye pɛka ayen, <<Wen dek ale jam maa maari ni, ate ni ji m kobaŋa a ta nyini dela.>>

26Josefi yaa jam ta ka bena kook ale pi ale kpi. Ate ba ale jam pai tiim a nye wa nyiŋka ayen ka kan poagi la, ba yaa jam pai wa a nyo dakari po Ejipiti tɛŋka po.

Currently Selected:

Piilimka 50: BWU

Highlight

Copy