Piilimka 48

1Ku ale ga nye magadek la ba yaa weeni Josefi ayen, <<Fi kowa a yuak kama.>> Ate wa yaa pai wa nidoabilisaŋa bayewa Manasa ale Ɛfraim ate ba cheŋ ale wa. 2Ba ale weeni Jekob ayen, <<Fi biika Josefi a jam ka fi jigi la,>> Izirali yaa yik wadek a nya nyiŋ pagra a yiti kali wa gaduokku zuk.

3Jekob yaa weeni Josefi ayen, <<Wen Dii Ale A Niak La a jan jam mi jigi Luz ale bo Keenan tɛŋka po la, ate dula wa jam a niak mi 4ale weeni mi ayen, <M le te ate fi biak bisa abe m nye ate ni piisi. M le nye ate ni chim tɛŋ dem, ate m le pai tɛŋka de a te ase taam wuu nitalim la ate nama ŋaaŋnyiŋ ni ŋaaŋbisa a jam soa.>

5<<Yɔgyɔgla de fi nidoabilisaŋa bayewa ate fi biak Ejipiti po alege ate mi a jam la, Ɛfraim ale Manasa ka mi ale soa ba, ase m le soa Aruben ale Simeyon diila. 6Bi sii meena ate fi a biak ba ŋaaŋ nyiŋla, ka fi ale soa ba. Tɛŋ sii ate ba za ba soa la ale nyini ka ba suataŋa Ɛfraim ale Manasa jigi. 7Ase m le ŋmani nyini Paddan a cheŋ la, Arekel a jam kpi kama Keenan tɛŋka po ate ku jam chim niniga wari a te mu suiku po. Juijui ate wa kpi la an jam yalima ale Efrat. Ate m gu wa suiku ale a cheŋ Efrat la nakpiak>> Betiliyem ale la.

8Ase Izirali ale ga nya Josefi nidoabilisaŋa la, wa yaa bek ayen, <<Bade ka bana?>>

9Josefi yaa weeni wa kowa ayen, <<Ba ka nidoabilisa ate Wen a pai ba a te mu dela.>> Ate Izirali yaa weeni ayen, <<Ta ba jam te mu ate m niak ba.>>

10Yɔgyɔgla de Izirali an ŋman jam nya a paari, dii nyiŋla wa jam kpaŋ kama ate nyaasim a tua a te wa. Dila nyiŋ Josefi yaa ta wa nidoabilisaŋa a cheŋ paari wa, ate wa kowa a gbaari ba.

11Izirali yaa weeni Josefi ayen, <<Mi kan yiili ayen m le nya fi nimbidiaka ŋmana, alege Wen a basi kama ate m poom nya fi bisa.>>

12Ate Josefi yaa pai ba nyini Izirali dunaŋa zuk ale pai wa zuk a su tɛŋ. 13Ate Josefi a pai ba nɔi bayewa ate Ɛfraim a bo wa juga a tuaga Izirali gala nisa geŋ, ale ta Manasa wa gala a tuaga Izirali juga nisa geŋ a ta ba a ga moata wa. 14Alege Izirali yaa yik wa nisaŋa a bari ate wa juga nisaŋa a ga vi Ɛfraim zukku zuk waai ale ka baaŋ la. Alege te wa gala nisaŋa a ga vi Manasa zukku zuk waai ate wade niŋ a biak la.

15Ate wa niak Josefi ale weeni ayen, <<Wen dii ate m koma Abrayam ale Aizik a cheŋ wa niŋ la, Wen dii ale chim m naapeerik m boka po meena la, 16Wen maarɔwa waai ale yeeri mi a nyini daanika po meena la, abe niak nidoabilisaŋa de. Ba abe te ate m yuenni ale m koma Abrayam ale Aizik yueŋa a kan bɛ, ba abe piisi nna yegayega tɛŋka de zuk.>>

17Ase Josefi ale ga nya ayen wa kowa a pai wa nisa a vi Ɛfraim zukku zuk la, wa sui an jam peenti ya. Ate wa pai wa kowa nisaŋa a nyini Ɛfraim zukku zuk a ta ga vi Manasa zukku zuk. 18Josefi yaa weeni wa ayen, <<Aaya, m koa wade ale bikpagni. Pai fi juga nisaŋa a vi wala zuk.>>

19Alege wa kowa a jam zɛri kama ale weeni ayen, <<M seba kama, m biiga, m seba kama. Wa mɛ ale chim nuruba, wa mɛ le chim tɛŋ kpieŋ. Alege wa yoawa ale chim nuru kpioŋ a gaam wa, ate wa ŋaaŋ bisaŋa ale chim tɛŋ kpieŋsa.>> 20Wa yaa niak ba da dila danni ale weeni ayen, <<Fi yuenni nyiŋ ate Izirali ale mooli niauŋku de. <Wen abe nye fu ase Ɛfraim ale Manasa la.> >> Dila wa yaa te Ɛfraim a de Manasa niŋ.

21Ate Izirali yaa weeni Josefi ayen, <<M tuaka kum, alege Wen ale bo ale fu a ŋman ta fu a cheŋ fi koma tɛŋka. 22Ate fi waai ale ŋman gaam fi suataŋa la, m pai tɛŋ kaai ale ka guuk ate m pai m gebik woŋka ale m tommu a vari nyini Amori demma jigi la a te fu.>>

Currently Selected:

Piilimka 48: BWU

Highlight

Copy