Piilimka 47

1Josefi yaa cheŋ a ga weeni sak Faaro ayen, <<M kowa ale m suataŋa a jam ale ka ba piisaŋa ale ba duŋsaŋa ale jaab meena ate ba soa la, ba abe nyini ka Keenan tɛŋka po, ba abe bo ka Gosen tɛŋka po yɔgyɔgla de.>> 2Wa jam lueri ka wa suataŋa banu a ta ba a ga sak Faaro.

3Faaro yaa bek wa suataŋa ayen, <<Nama a tom ka boan tuima?>> Ba yaa tulisi Faaro ayen, <<Fi tomteerɔma ka naapeerisa ase ti koma ale jam ka diila.>> 4Ba ŋman jam weeni wa ayen, <<Ti jam ayen ti kali dela ka nna maga, dii nyiŋla kɔmmu a pagra kama Keenan ate fi tomteerɔma duŋsaŋa a kan nya wuuk a ŋɔbi. Dila nyiŋ ti a saalim fu ayen fi basi ate ti kali Gosen tɛŋka po.>>

5Faaro yaa weeni Josefi ayen, <<Fi kowa ale fi suataŋa a jam ka fi jigi, 6Ejipiti tɛŋka abe dua ka fi niŋ. Basi ate fi kowa ale fi suataŋa a kali tɛŋka juijui ale nala la. Basi ate ba bo Gosen. Fi abe dan seba ayen ba waai a seba wari nyeka, te ate wa a nya mi dek duŋsaŋa zuk.

7Ate Josefi yaa ta wa kowa Jekob a ga sak Faaro. Ku ŋaaŋnyiŋ Jekob yaa niak Faaro, 8Faaro yaa bek wa ayen, <<Fi ta ka bena ŋa dina?>>

9Ate Jekob yaa weeni Faaro ayen, <<M nyeerimu po benaŋa ka bena kook ale pisita. M benaŋa ka nna maga dega ale tua, ŋa le m koma nyeerimu benaŋa abe daa bunyi.>> 10Ate Jekob yaa niak Faaro ale cheŋ alege wa.

11Dila Josefi yaa jam te wa kowa ale wa suataŋa a kali ale pai tɛŋka nitalim maŋka a te ba, Arameses kabini ase Faaro ale poom a dak diila. 12Josefi a jam te wa kowa ale wa suataŋa ale wa kowa yenni demma meena ka ŋandiinta a ta va chaab ale ba bisaŋa ale piisi a soa diila.

13Ŋandiinta a jam ka, tɛŋka meena po dii nyiŋla kɔmmu a jam pagra kama. Dila yaa basi ate Keenan ale Ejipiti demma a wobsa kɔmmu nyiŋ. 14Josefi a jam tuesi ligraŋa meena ate ba jam nya Ejipiti ale Keenan po la ate ba pai a tuni ŋandiinta ate ba jam a da la, a yaa ta jam Faaro yenni po. 15Ejipiti ale Keenan demma ligraŋa ale ga nueri la, Ejipiti demma meena a jam ka Josefi jigi a weeni wa ayen, <<Te ti ŋandiinta. Boan nyiŋ ate tama a baga a kpi fi nimbie po? Ti ligraŋa a nueri kama. >>

16Josefi yaa weeni ayen, <<Ni abe ta ni duŋsaŋa a jam, m le pai ŋandiinta a te ni abe m tuesi ni duŋsaŋa, ni ligraŋa ale nueri la nyiŋ.>> 17Dila ba yaa ta ba duŋsaŋa a jam te Josefi, ate wa te ba ŋandiinta ale tuesi ba wusumaŋa ale ba piisaŋa ale ba booŋa ale ba niiŋa ale ba bonsaŋa. Ate wa te ba ŋandiinta ben dila meena po, ba ale pai ba duŋsaŋa a te a magsi chaab ale ŋandiinta nyiŋla.

18Ben dila ale ga nueri la, ba ŋman jam wa jigi kama ben dii ale pai a saŋ la a weeni wa ayen, <<Ti kan pai wensieŋa a suk ti nyɔnɔwa diila ti ligraŋa a nueri, ate fi yaa soa ti duŋsaŋa la, jabuui nyiini ale tali a boro la ale ti nyiŋsaŋa ale ti tɛŋka.>> 19Ka boan nyiŋ ate tama ale ti tɛŋka a kpi fi niŋŋa? Da ti ale ti tɛŋka abe fi te ti ŋandiinta, ate tama ale ti tɛŋka ale bo Faaro nisima po. Te ti ŋandiinta ate ti vuugi alege ti kan kpi, ate tɛŋka a kan doa jassi.

20Ate Josefi yaa da tɛŋka meena a te Faaro. Ejipiti demma ba wanyi wanyi meena, a pai ba laŋsaŋa a jam da kama, diila kɔmmu a jam pagra kama a te ba. Faaro ale jam soa tɛŋka, 21ate Josefi yaa jam nye ate nuruma a chim yɔm Ejipiti tɛŋka banaŋa meena. 22Alege wa an jam maa da kaabteerɔma tɛŋsaŋa, diila ba jam nya ba charuku a nyini ka Faaro jigi, ate ba jam ta ŋandiinta a magsi chaab ale ba charuku ate Faaro a jam te ba la. Dila ale soa ate ba an pai ba tɛŋka a da ya.

23Josefi yaa weeni nuruma ayen, <<Yɔgyɔgla de ate m da ni ale ni tɛŋka jinla a te Faaro la, ŋanbie ale nna ni baga a bori ŋa tɛŋka zuk kama. 24Alege ni dan che ni ŋankpaantaŋa a ta jo dɔk, ni lab puula bunu a pai bunyi a te Faaro, abe ni pai puula bunaansiwa ase ŋanbuura la a bori ni laŋsaŋa po ale nidek ale ni yenni demma ale ni bisaŋa dɛka.>>

25Ba yaa weeni ayen, <<Fi vari ti nyuvoa a basi. Ti abe nya ŋmanteka a nyini ti nyɔnɔwa jigi. Ti ale bo Faaro nisa po.>> 26Ate Josefi yaa jam nye ate ku chim wari a bo Ejipiti tɛŋka zuk a jam paari jinla de ayen ba ŋankpaantaŋa ate ba a che la, ba lab puula bunu ate puuni dinyi a chim Faaro jaab. Ka kaabteerɔma tɛŋsaŋa nyiini ate Faaro an maa soa.

27Yɔgyɔgla de Izirali demma a jam kali ka Gosen tɛŋka zuk. Ba jam nya ka paaruŋ dula ale jam biak bisa a piisi nna yegayega.

28Jekob a jam bo Ejipiti a paari ka bena pi ale ŋayopɔi, ate wa bena ŋaai ate wa pai bo tɛŋzuk de la, a jam ka bena kook ale pisinaansi ale ŋayopɔi. 29Ku ale jam moata diipo ayen Izirali a kpi la, wa yaa wi wa biika Josefi a weeni wa ayen, <<Ase m dan nya ŋmanteka a nyini fi jigi, pai fi nisa a tabri m kɔsukku tɛŋ abe fi puulim ayen fi ale sak nyemagsika ale wensie ale mu. Kan gu mu Ejipiti tɛŋka po, 30alege m dan vuusi ale m koma, ji mu a ta nyini Ejipiti tɛŋka po a ta a ga gu juijui ate ba gu ba la.>> Wa weeni ayen, <<M le nye fi ale weeni diila.>>

31Wa weeni wa ayen, <<Wa nye pɛka ale wa.>> Ate Josefi a nye pɛka ale wa, ate Izirali ale doa wa gaduokku zuk la, wa yaa puusi Wen.

Currently Selected:

Piilimka 47: BWU

Highlight

Copy