Piilimka 46

1Dila nyiŋ Izirali yaa jam nyini ayen wa cheŋ ale wa ŋantaŋa meena, ate wa ale jam ga paari Beerseba la, wa yaa jam nye kaabka a te wa kowa Aizik Wenni. 2Ate Wen yaa biisi ale Jekob gɔdaasima po yok a weeni ayen, <<Jekob, Jekob.>> Ate wa tulisi ayen, <<Mi ale nna.>>

3Wen yaa weeni ayen, <<Mi ka Wen, ni kowa Wenni. Kan chali yɔgsum ale Ejipiti cheŋka, diila m le basi ate fi chim tɛŋ kpieŋ dula. 4M le cheŋ Ejipiti ale fu, abe m sum ta fu a pilim ŋmani. Ate Josefi dek ale yik fu ate fi kpi.

5Jekob yaa basi Beerseba, ate Izirali nidoabilisaŋa a pai ba kowa Jekob ale ba bisaŋa ale ba pooma a nyo torokoma po ate Faaro a tom ayen ba pai a pai ba la. 6Ba jam maa pai ba duŋsaŋa ale ba ŋantaŋa meena ate ba jam nya Keenan la kama, ate Jekob ale wa buuni meena a jam cheŋ Ejipiti. 7Wa jam ta ka wa nidoabilisaŋa ale wa liema ale wa ŋaaŋbisaŋa ale wa buuni meena a cheŋ Ejipiti.

8Izirali nidoabilisaŋa ale jam cheŋ Ejipiti la yue ale nna wa ale wa ŋaaŋbisaŋa ale jam cheŋ. Aruben wa bikpagni. 9Aruben nidoabilisaŋa ale nna: Yanok ale Pallu ale Ayeziron ale Karmi. 10Simeyon nidoabilisaŋa ale nna: Jemuel ale Jamin ale Oyad ale Jakin ale Zoyar ale Sɛyaul ale ka Keenan nipok biik la. 11Livai nidoabilisaŋa ale nna: Gerson ale Koyat ale Merari. 12Juda nidoabilisaŋa ale nna: Ɛri ale Onan ale Sɛla ale Perezi ale Zera alege Ɛri ale Onan a jam kpi ka Keenan tɛŋka po. Perezi nidoabilisaŋa ale nna: Ayeziron ale Yamul. 13Isaka nidoabilisaŋa ale nna: Tola ale Pua ale Jasub ale Simron. 14Zebulun nidoabilisaŋa ale nna: Sered ale Elon ale Jaleel. 15Nidoabili sii ate Leya a jam biak a te Jekob Paddan Araam po la ale la. Wa liewa Daina an maa gum du. Wa nidoabilisaŋa ale wa liema meena a jam ka pisita ale bata.

16Gad nidoabilisaŋa ale nna: Zefon ale Aggi ale Suni ale Ezbon ale Eri ale Arodi ale Areli. 17Asɛ nidoabilisaŋa ale nna. Imnaya ale Isva ale Isvi ale Beriya. Ba toawa a jam le Seraya. Beriya nidoabilisaŋa ale nna: Ɛba ale Malkiel.

18Zilpa ale biak bi sii a te Jekob la ale nna, waai ate Laban a pai te wa liewa Leya la. Ba meena a jam ka pi ale bayuebi.

19Jekob powa Arekel nidoabilisaŋa ale nna: Josefi ale Benjamin. 20Ejipiti po ate Josefi ale Potifera kaabteerɔwa ate wa bo On tɛŋka la liewa Asenat a jam biak Manasa ale Ɛfraim. 21Benjamin nidoabilisaŋa ale nna: Bela ale Beker ale Asbel ale Gera ale Naaman ale Eyi ale Aros ale Muppim ale Yuppim ale Ard.

22Arekel nidoabilisaŋa ate wa biak a te Jekob la ale nna: Ba meena a jam ka pi ale banaansi. 23Dan nidoabinni ale Yusim. 24Nafitali nidoabilisaŋa ale nna: Jaziel ale Guni ale Jezer ale Sillem.

25Bilya waai ate Laban a pai te wa liewa Arekel ate wa biak nidoabili sii a te Jekob la ale nna. Ba meena a jam ka bayopɔi.

26Baai meena ale cheŋ Ejipiti ale Jekob ate ba chim wadek ŋaaŋsa la ale nna, ba jam ka nuruba pisiyuebi ale bayuebi. Ba an jam maa chiini wa sampooma nidoabilisaŋa a gum du. 27A jam pai nidoabilisaŋa bayewa ate ba biak a te Josefi Ejipiti tɛŋka po la, Jekob dɔkdemma baai ale jam cheŋ Ejipiti la meena a jam ka pisiyopɔi.

28Jekob a jam de ka niŋ a tom Juda ayen wade wa niŋ a cheŋ Josefi jigi ate wa sak Gosen ale bo juijui la. Ba ale ga paari Gosen tɛŋka la, 29Josefi a jam poom gomsi wa wusuma torokoma a yaa cheŋ Gosen a ga tu wa kowa Izirali. Josefi ale ga na nyini wa niŋ la, wa yaa pai wa nisa a vi wa kowa zuk ale kum ate ku beni nna yegayega.

30Izirali yaa weeni Josefi ayen, <<Yɔgyɔgla de mi yaa gomsi a magsi m kpi kama, mi ale toalim a nya fu ayen fi diem vua la.>>

31Josefi yaa weeni wa suataŋa ale wa kowa yenni demma ayen, <<M le cheŋ jueli ga weeni Faaro ayen, <M suataŋa ale m kowa yenni demma baai ale jam bo Keenan tɛŋka po la, a jam ka m jigi. 32Nuruma abe ka naapeerisa ba be jam ale ka ba ale wuug ŋan baai la. Ba ta ba piisaŋa ale ba niiŋa ale ŋan baai meena ate ba soa la a jam kama. 33Faaro a dan wi ni a ta ni jo a bek ni ayen, <Ni a tom ka boan tuima?> 34Ni tulisi wa ayen, <Fi tomteerɔma a nya ka duŋsa zuk a nyini diipo ate ti chim nidoabilisa la, ase ti kowa ale jam a nye diila.> Ate wa ale siak ate ni kali Gosen tɛŋka po. Diila naapeerisa meena a chim ka kisuk a te Ejipiti demma.

Currently Selected:

Piilimka 46: BWU

Highlight

Copy