Piilimka 45

1Josefi an jam baga a yik wadek wa tuimtomdisaŋa meena niŋŋa a yaa kaari ayen, <<Waai meena a cheŋ abe ba ge mu.>> Waai a ŋman karo ale Josefi ate wa yaa basi ate wa suataŋa a miŋ wa. 2Wa jam kum ate ku jueli ka nna yegayega ate Ejipiti demma ale Faaro yenni meena jam a wom wa.

3Josefi yaa weeni wa suataŋa ayen, <<Mi ka Josefi, m kowa a diem vua?>> Alege wa suataŋa an jam baga a tulisi wa, dii nyiŋla ba kpaziita ale jam a nak wa niŋ.

4Josefi jam weeni wa suataŋa ayen, <<Ni jam a moata mu.>> Ba le cheŋ paari wa la, wa weeni ba ayen, <<Mi ka ni suoku Josefi waai ate ni yik da te Ejipiti tɛŋka la. 5Yɔgyɔgla ni kan te ku a daani ni abe ni kan basi ate ni sue a puuri ale ni dega ni ale pai mi a da dela la, dii nyiŋla ka nyuvoa varibasika nyiŋ ate Wen a tom ayen m de ni niŋ. 6Bena ŋaye ale nna kɔm ale bo tɛŋka po, bena ŋanu ale bo ŋaaŋ a cheen la kpari ale cheka a kan boro. 7Alege Wen a dɛ niŋ a tom mu ayen m gomsi ate ni buuni a tali a bo tɛŋka zuk, abe m vari ni nyuvooŋa a basi.

8Dila nyiŋla, daa nama ale tom mi dela ka Wen. Wa nye kama ate mi chim Faaro ko, a chim nyɔnɔ a te wa yenni meena abe mu a nya Ejipiti tɛŋka meena zuk. 9Yɔgyɔgla de ni kpabi nwuli a cheŋ m kowa jigi a weeni wa ayen, <Fi nidoabinni Josefi ale weeni diila ale nna. Wen a basi kama ate m chim kpagi Ejipiti tɛŋka meena po. Jam m jigi kan beni. 10Ni ale kali ka Gosen po a moata mi, nama ale ni bisaŋa ale ni ŋaaŋ bisaŋa ale ni piisaŋa ale ni duŋsaŋa meena ate ni ta la. 11M le te ni ŋandiinta dula dii nyiŋla kɔm bena ŋanu ale diem bo ŋaaŋ a cheena, Dan kan daa di nama ale ni yenni demma ale baai meena ale bo ale ni la ale viiri.>

12Nama dek baga a nya kama, m suoku Benjamin mɛ ayen ku sum ka mi ale a biisi ale ni la. 13Ni weeni m kowa zula ŋaai ate ba te mu Ejipiti tɛŋka po la ale dii meena ate ni nya la. Abe ni ta m kowa a jam dela nwuli.>>

14Wa yaa gbaari wa suoku Benjamin ale a kum, ate Benjamin mɛ a gbaari wa ale a kum. 15Wa jam gbaari wa suataŋa meena kama ale a kum. Ku ŋaaŋnyiŋ wa suataŋa yaa biisi ale wa.

16Faaro ale jam wom ayen Josefi suataŋa a jam la, Faaro ale wa kpaŋŋa meena sue yaa jam peenti. 17Faaro yaa weeni Josefi ayen, <<Weeni fi suataŋa ayen, <Ni nye nna. Ni pai ni jimmu a vi ni duŋsaŋa zuk a ŋman cheŋ Keenan tɛŋka, 18ga ta ni kowa ale ni dɔkdemma a jam mi jigi, m le pai Ejipiti tɛŋ maŋ a te ni, ate nama ale de tɛŋka masim.>

19<<Fi abe magsi fi ŋman weeni ba kama ayen, <Ba nye nna, ni pai torokoba a ta nyini Ejipiti ate ni pai a pai ba bisaŋa ale ni pooma ale ni kowa ate ba jam. 20Ni kan te ni niŋ a bo ni ŋantaŋa po, dii nyiŋla Ejipiti ŋanmaŋsaŋa meena ale chim ka nama ŋanta.>>>

21Ate Izirali nidoabilisaŋa a sum a nye dila. Josefi a jam te ba torokoba kama ase Faaro ale weeni wa ayen wa nye diila, a ŋman te ba ŋanta a magsi ba suiku chelimu. 22Wa jam te waai meena ka garuk paaluk alege wa jam te Benjamin ka kpana kobsita ale gatta joka a paari bunu. 23Wa ale jam te wa kowa ŋan baai la ale nna. Wa jam te ka bonsa pi ate si ji Ejipiti ŋan maŋsa ale bon saari pi ate si ji ŋanbie ale boroborok ale ŋanta gela a magsi suiku chelimu. 24Ate wa yaa basi wa suataŋa suik, ba ale a cheŋ la, wa yaa weeni ba ayen, <<Ni kan kpaliŋ chaab suiku po.>>

25Ate ba yaa cheŋ nyini Ejipiti po a ga paari ba kowa Jekob Keenan tɛŋka po.

26Ba jam weeni wa kama ayen, <<Josefi a diem vua kama. Wensie nyiŋ wa ka kpagi Ejipiti meena zuk.>> Jekob yaa jam cha vuusum. Wa jam ka siaka ale ba ale weeni wa diila. 27Alege ba ale jam a weeni dii meena ate Josefi a weeni ba la, ate wa ŋman nya torokoma ate Josefi a te ayen ba pai a pai wa a ta jam la, ba kowa vuusumu a yaa ŋman pilim a jam wa jigi. 28Ate Izirali yaa weeni ayen, <<Mi sum a siak kama ayen, m nidoabinni Josefi a diem vua kama, m le cheŋ a ga nya wa abe m ge a kpi.>>

Currently Selected:

Piilimka 45: BWU

Highlight

Copy