Piilimka 44

1Josefi yaa weeni wieŋa de a te waai ale a nya wa yenni zuk la ayen, <<Nye ŋandiinta a sueri nuruma boorisaŋa a paari dii ate ba baga a ji la, abe fi pai nuru meena kpana a nyo wa boorika po. 2Abe fi pai m kpana beerika a nyo baaŋka boorika po a gum chaab ale wa kpanaŋa.

3Vari ale moata veentika la, ba yaa basi nuruma suik po ale ba bonsaŋa. 4Ba an diem a basi tɛŋka a ga niŋŋa ate Josefi yaa weeni waai ale a nya wa yenni zuk la ayen, <<Saŋ nuruma de ŋaaŋ, fi dan paari ba weeni ba ayen, <Ka boa ate nama a pai biem a tuni nalimmoa? 5Daa beeri kaai ate ni zu pai la ale m kpagni a ta a nyu ale a porisi la? Ni nye ka biem nna yegayega.>>>

6Wa ale jam a paari ba la wa yaa ŋman weeni wie ŋala dek a te ba. 7Alege ba yaa weeni wa ayen, ka boa ate m nyɔnɔwa a biisi wieŋa de? Kude abe yalima ale fi tomteerɔma ate ti nye wanni de choa. 8Ti be pilim ta kpanaŋa ate ti nya ti boorisaŋa po Keenan la, a jam te fu kama. Ka boa ale soa ate tama ale zu kpana yaase ligmɔniŋ a nyini fi kpagni yenni po? 9Ase fi dan nya ka fi tomteerɔma wanyi, wa le kpi. Ate tama baai ale tali la a chim m nyɔnɔwa yɔm.>>

10Ate wa tulisi ayen, <<Ku nala ku abe nye ase fi ale weeni diila. Waai ate ta a nya ale wa ta ka la ale chim m yɔma. Nama baai ale tali la, m kan ŋma ni.>>

11Ba meena yaa tuili ba boorisaŋa nwuli a lak si. 12Ate waai ale a nya yenni zuk la yaa piilim gisika, a nyini kpagni a ta ga paari baaŋka. Ba jam nya beerika ka Benjamin boorika po. 13Kude nyiŋ ba meena yaa jam cheeri ba gattaŋa. Ba meena yaa jam pai ba ŋantaŋa a do ba bonsaŋa a ŋman cheŋ tɛŋka po.

14Josefi a jam diem bo ka yenni po ate Juda ale wa suataŋa a jam jo la, ba jam lo ka tɛŋ wa niŋ. 15Josefi yaa weeni ba ayen, <<Ka boa ale la ate ni nye? Nama a zɛ ayen nuru ase mi la a baga a miŋ wasusuga?>>

16Juda yaa tulisi ayen, <<Ti le weeni m nyɔnɔwa ayen ka boa? Ti le weeni ayen ka boa? Ti le nye ka sɛ a sak ayen ti an nye a kaasi ya? Wen a lak wa tomteerɔma a zaani. Ti yaa ka m nyɔnɔwa yɔm, tama dek ale waai ate ba yik ale beerika la.>>

17Alege Josefi a weeni ayen, <<Kude abe yalima ale mi ate m nye wanni de choa. Ka nuru waai nyiini ate ba nya beerika wa jigi la ale wa chim m yɔma. Nama baai ale tali la, a ŋman cheŋ ni kowa jigi ale suiyɔgni.>>

18Ase Juda ale ŋman cheŋ wa jigi ayen, <<Mi a saalim, m nyɔnɔ basi ate fi yɔmawa a biisi. Kan te fi sui a puuri ale fi tomteerɔwa, fi ale Faaro dek ka bunyi. 19M nyɔnɔwa a bek wa tomteerɔma kama ayen, <Ni ta koa yaase suokwa?> 20Ate ti tulisi ayen, <Ti ta ko kpak ale yoa baaŋ ate ba biak a te wa, wa kpaŋsaŋa po. Wa suoku a kpi kama, wa la nyiini ale wa mawa biik a tali ate wa kowa a yaali wa.>

21<<Ate fi yaa weeni fi tomteerɔma ayen, <Ni ta wa a jam ate m nya wa.> 22Ate ti yaa weeni m nyɔnɔwa ayen, <Nidoabinni a kan baga a basi wa kowa, wa dan basi wa, wa kowa le kpi.> 23Alege fi weeni fi tomteerɔma ayen, <Nin ka ni yoa baaŋka a nin va ni jam, ni kan te m nya ni dela.> 24Ase ti ale ŋman kuli fi tomteerɔwa m kowa jigi la, ti weeni wa m nyɔnɔwa ale weeni diila kama.

25<<Ate ti kowa a weeni ayen, <Ni ŋman cheŋ a ga da ŋandiinta maga.> 26Ate tama a weeni wa ayen, <Ti kan baga a cheŋŋi. Nin ka ti yoa baaŋka a nin va ti cheŋ. Ti kan baga a nya nuruwa nina, nin ka ti yoa baaŋka a nin va ti.>

27<<Fi tomteerɔwa m kowa a weeni ti ayen, <Ni seba kama ayen m powa a biak ka bisa baye a te mu. 28Ba wanyi yaa cheŋ alege mu, ate m weeni ayen, <<Ba sum dari wa a passi kama bunabuna.>> Di nna mi an diem a nya wa. 29Ni dan ta wade mɛ a cheŋ ate wari a nye wa, ni ale gu mi zuk peelukku nyɔnɔ ale niniga.>

30Ase nidoabinni a dan kan va ti ate ti ŋman kuli fi tomteerɔwa m kowa jigi, waai chiik ale kasim a jo nidoabinni la, 31a nya ale nidoabinni a karo, wa ale kpi. Fi tomteerɔma ale gu m kowa zuk peelukku nyɔnɔ ale niniga. 32Fi tomteerɔwa a zaani ka m kowa niŋ a weeni ayen m za nidoabinni ŋaaŋ. M weeni ayen, <M dan kan ta wa a ŋman jam te fu, pai kude a ji mu m koa m boka po meena.>

33<<Yɔgyɔgla de mi a saalim basi ate fi tomteerɔwa a wari dela ase m nyɔnɔwa yɔma la a zaani nidoabinni naŋkula po, abe fi basi ate nidoabinni a va wa suataŋa a kuli. 34Mi ale nye ka sɛ a kuli m kowa jigi ase nidoabinni a nin kan va mu? Aaya, kan basi ate m nya niniŋŋa ale ŋa jam m kowa zuk la.>>

Currently Selected:

Piilimka 44: BWU

Highlight

Copy