Piilimka 43

1Kɔmmu a diem jam pagra ka nna yegayega tɛŋka po. 2Ase ba le jam de ŋandiintaŋa ate ba ta nyini Ejipiti a jam la a nueri la, ba kowa yaa weeni ba ayen, <<Ni cheŋ a ga da ŋandiinta maga a ta jam.>>

3Alege Juda a weeni wa ayen, <<Nuruwa a kaam ti a paari kama ayen, <Ni kan te m nya ni, ka ni suoku a nin va ni a jam.> 4Fi dan basi ate ti suoku a va ti, ti le cheŋ a ga da ŋandiinta a ta jam te fu. 5Alege fi dan kan basi ate wa va ti, ti kan cheŋŋi, dii nyiŋla nuruwa a weeni ti kama ayen, <Ni kan te m nya ni, ka ni suoku a nin va ni a jam.>>>

6Izirali yaa bek ayen, <<Ka boa ate ni ta daanika de a jam m zuk ase ni ale weeni nuruwa ayen ni ta suok ku choa la?>>

7Ba yaa tulisi ayen, <<Nuruwa a bek ti a paari kama ayen wa miŋ ti ale ti dɔkdemma a paari. Wa bek kama ayen, <Ni kowa a diem vua? Ni ta suok ku choa?> Tama tulisi ka wa le bek diila. Tama ale nye ka sɛ a seba ayen, <Wa le weeni ayen ti ta ti suoku a jamu?> >>

8Juda yaa weeni Izirali wa kowa ayen, <<Basi ate nidoabinni a va mi ate ti cheŋ bunyi ate tama ale fi ale ti bisaŋa a boro. Ti kan kpi. 9Mi dek ale zaani wa ŋaaŋ, wari abe dan nye wa fi va mi. M dan kan ta wa a jam a nyo fi nisa po, pai wari meena a seeri mi m boka po meena. 10Ase ku le ka diila ti dan kan beni kama, tama ti cheŋ paari ka buye.>>

11Ba kowa Izirali yaa weeni ba ayen, <<Ku be dan ka dila, ni nye nna. Ni pai tɛŋka kpari ŋan maŋsaŋa gela a nyo ni boorisaŋa po ale ŋan baai ate ba dan pai sa jaab wa kan kaasi la ale siita ale ŋan baai nyum ale masa la ale tiib sim ale ŋan baai ale a nye ase sumkpaam la a ta ga te nuruwa ase tiirim la. 12Ni pai kpana ŋaai ate ni daam ta cheŋ la a paari ku naŋtuok nɔi buye a ŋman ta cheŋ ga te, da dii dai ba nye bɛ kama. 13Ni maa ta ni suoku a ŋman cheŋ nuruwa jigi. 14Wen Dii Ale A Niak La abe te ni jiirim a nyini nuruwa jigi, ate wa basi ate ni suok kunkula ale Benjamin a va ni jam. Be dan ka mi, ku dan ko mu, ku ko mu kama.>>

15Ate Nuruma yaa pai tiiritaŋa ale kpanaŋa ku naŋtuok nɔi buye ale Benjamin mɛ. Ba yaa kpabi cheŋ Ejipiti a ta badek a ga sak Josefi. 16Josefi ale ga nya Benjamin ale ba la, wa yaa weeni waai ale a nya wa yenni zuk la ayen, <<Ta nuruma de a cheŋ m yenni a ko duŋ a nye ŋandiinta a te ba. Ba magsi ba dɛ ale mu kantueŋ.>>

17Nuruwa a yaa nye dii ate Josefi a weeni wa la, a ta nuruma a kuli Josefi yenni. 18Nuruma kpaziita ale jam a nak ba ale ta ba a cheŋ Josefi yenni la. Ba jam a poli kama ayen, <<Ba ta ti a jam dela ka kpanaŋa ate ba daam a pai nyo ti boorisaŋa po la nyiŋ. Wa a yaali ayen wa nye ka kpaliŋ ale ti, a nya pagrim ti zuk a ta ti ase yɔm la, abe wa ta ti bonsaŋa.>>

19Ba yaa jam cheŋ Josefi yenni nyaarɔwa jigi, a biisi ale wa yenni nansuiŋku nɔi. 20<<Ba weeni ayen, <<Ti a saalim, tama jam dela piilimka po ayen ti da ka ŋandiinta. 21Alege tɛŋka ale sobi ate ti jam ga zaan juijui la, ti lak ti boorisaŋa ate ti wanyi meena a nya ti kpanaŋa ŋa denni ti boorisaŋa po. Ate ti ŋman ta a jam. 22Ti be ŋman ta ka kpana a gum du a jam ayen ti da ŋandiinta. Ti zɛ waai ale pai ti kpanaŋa a nyo ti boorisaŋa po la.>>

23Wa yaa tulisi ba ayen, <<Ku meena a nala kama, ni kaa chali yɔgsummoa. Ka ni Wenni, ni koma Wenni ale te ŋanta ni boorisaŋa po. M be tuesi ni kpanaŋa.>> Ate wa yaa ta Simeyon a nyini a te ba.

24Yenni nyaarɔwa yaa jam ta nuruma a kuli Josefi yenni a te ba nyiam a te ba sugri ba naŋsaŋa ale yaali ŋandiinta a te bonsaŋa. 25Ba jam gomsi ba tiiritaŋa a magsi Josefi ale cheen kantueŋ ka la dii nyiŋla ba wom kama ayen ba a yaali ayen ba dɛ ka dula.

26Josefi ale jam yeri la, ba yaa pai tiiritaŋa ate ba ta jam wa yenni la a te wa ale koori tɛŋ wa niŋ. 27Wa yaa jam bek ba nyiŋ po ale weeni ba ayen, <<Ni ko kpakka ate ni weeni mu wa wie la a diem vua?>>

28Ate ba yaa tulisi ayen, <<Fi tomteerɔwa tama kowa a diem vua kama ale ŋman ta nyiŋyɔgsa.>> Ate ba koori tɛŋ a te wa zula.

29Wa le nya wa suoku Benjamin wa mawa biika la, wa yaa bek ayen, <<Ka ni yoa baaŋka waai ate ni weeni mi wa wie la ale la?>> Ate wa weeni ayen, <<M biiga, Wen abe niak fu.>> 30Josefi ale weeni dila la, wa yoa baaŋka jiirim yaa dari wa ate wa boro a yaali wa kum. Ate wa yaa nye mwuli a jo dɔk yoŋ po a kum dula.

31Wa le puuri wa ninaŋa la ŋaaŋnyiŋ, wa yaa yik wadek a nyini peelim ayen, <<Ba chari ŋandiintaŋa.>>

32Ba yaa te Josefi ŋandiintaŋa wa tɔga ale te wa suataŋa mɛ ba tɔga. Ate Ejipiti demma a dɛ ale Josefi. Dii nyiŋla Ejipiti demma an jaa yaali Yiburu demma wari ya ate ba an poom a dɛ ale ba a nya ya. 33Josefi suataŋa a jam kala ka wa niŋ a ta va ba benaŋa ale ka diila a nyini kpagni a ga paari baaŋka. Ku jam cha ba kama ate ba kala a nya chaab. 34Ba le nye ŋandiintaŋa Josefi jigi a te ba la, Benjamin ŋantaŋa a jam a lab mbala ŋantaŋa ka naŋtuok nɔi bunu. Ate ba dɛ ale nyu ale wa.

Currently Selected:

Piilimka 43: BWU

Highlight

Copy