Mâk 8

Jisòs yəhî à ghɨ̂t kamsù kìk

(Mat 15.32-39)

1À hì mô tuk lefu a mu tuk afû ghɨta fî ben yûŋtì a Jisòs a ngwùŋ, shyə hì bu shyəma ghɨna yə, wù toŋti jùmtìbàmsu wunsu jis ha ghɨna na, 2“Seni kwolalò mu ha ghɨt ghɨ̂n. Ghɨna ti chyə̂ ghàh à ghɨna a mu tuk mù tât chîn, hi fê kəta wi shyə hi yə̂. 3Mu ki jîs na ghɨna lô hi kole yê kə ha jiŋ, ma ghɨna nê fwo bot ma fen wu lûm, beka ghɨna lo a tu lùk tu dâ tù.”

4Jùmtìbàmsu wunsu buf ha wun nâ, “Wùt ni mò hi lyè afa mwə̀ mù yə̂mù wu lùk wu ghə̀nù te wûn hi yəhe à ghɨ̂t atɨ̂n ghɨ dô ni agha?”

5Jisòs buf ha ghɨna na, Ghàn kəta tuku ban wù sek afâ? Ghɨna kaha fîsì na, “Ghàh kəta tuku banu sàmba.”

6Wù jis ha ghɨt ghe na ghɨ ndoko a chyə̂; ki fye tuku ban we sàmba ki fo àyòŋnà ha Yènfù hì bəkte tuku ban we fo yênà ha jùmtìbàmsu wunsu na su hi tomte yênà a ghɨt atɨna ashyə̂. 7Ghɨna ndùku kəta kə yìlâ mu sek ni. À hì mô te Jisòs fo yòŋnà ha Yènfù wù jis jùmtìbàmsu wunsu jyâtì ha ghɨt atɨ̂na. 8-9Ghɨt mɨ ghɨ̂n ndùku kwoka yênà kamsù kìk, nâbi nde yə kwût, jùmtìbàmsu kumti bəklà me mù faŋa mù lun sùkà sàmba. 10Jisòs jis na ghɨna lô hi kolê. Ghɨna shihi kolô, wù lye a ngwùk ghê jùmtìbàmsu wunsu daŋ yen a Dàlàmànutà.

Ghɨt a Falàsî jis na Jisòs chwuti chwena

(Mat 16.1-4)

11Ghɨt a Falàsî bên hì gufnà a ghâ ghê Jisòs, lanti hi kwo wûn, jis na wù ni gha kanana ale hi chwùtè chwena na jyaka wuna bènà kə nâ ha Yènfù. 12Jisòs dûmlì chamlò jis na, “njwô ghə te mbye chîn yîn khɨŋa hi yen a chwena Fùyènà? Mu jìsà ha ghàn hamok na yì nè yena wijə chwena ale.”

13Te wù jìsa ni, de ghɨna kahi lye a ngwùk ghe jùmtìbàmsù wunsu daŋ yi jin yi lwi yile.

Chɨmlana ghɨt a Falàsî fù nì fu Helòd

(Mat 16.5-12)

14À ndùku mô ni, ma jùmtìbàmsù ti yità hi lyè a bân ghɨ kpene ha ghɨna à jɨ̀m, a mô kə a tuk a bana à mòk ghe ghɨna ndùku kəta a ngwùk. 15Jisòs jis ha ghɨna na, “Ghàn hi tôknè kum nì shìk fe ghɨt a Falàsî nì Helòd kəta a ghɨna fùtɨ̂n.”

16Ghɨna hì bitè gha tɨni a ghɨna sù ngɨŋ jîsà na, “Wù jìsà ni beka ghàhnà kəta wijə bana.”

17Jisòs khɨli gha ye ghɨna jìsà buf ha ghɨna na, “njwô ghə te ghàn jìsà na ghàn kəta wijə bana agha? Nâbi ya, mò na ghàn tà yê baha khɨli jə gha agha? Təm ghana ta ghə ni? 18Njwô ghə te ghàn kəta se yena wi, kəta wu tûŋlu ywo wi agha? Ghàn baha kwâktè wijə gha nâ hakoh! 19À ndùku mô te mu tì bəkte tuk wu ban we wù tân yəhi à ghɨ̂t kam sù tân, ghàn ti kumti bəklà me mù lun kà sù sek?”

Ghɨna jis na, “À ndùku mô sùkà njwòsù bà.”

20Jisòs fî buf na, “À hì fê mô kəbi te mu bəkte tuk we sàmba jyâtì ha ghɨta kamsù kìk, ghàn tì kumti bəklà mù lun kàsù sek?”

Ghɨna jis na, “À ndùku mô sùkà sàmba.”

21Jisòs buf ha ghɨna na, “Ghàn tà baha yu khɨle?”

Jisòs chwuk wùt wù fefana a Bèsadà

22Jisòs ghê jùmtìbàmsu wunsu ben a Bèsadà, ghɨt ale bên nì wùt ha wûn ma wù ti fêf hi chyati na wù kum wûn. 23Jisòs khɨti wun a wu kpên ghe wûn fwu yi tèk afû, à hì mô ni te wù chwute chwâmù a wun a sê lem a wô a wun a tû, buf ha wun na, “Wò ti yen nâ shyə ale?”

24Wù ki kokhî a nyə̂ jis na, “Mu ti yen ghɨta te ghɨna gbê kə ni te mkâk.”

25Jisòs fî lem kpenhi a wô a wùt wù fèfa we sê, kə wu yu se wuna yâhì. Wù fati kî hì yena tu luk kə yi ghəl. 26Jisòs jis na wù kahà hi kolê, biyani kə wù nè lye yi tèk.

Bità fôktì wùt we Jisòs ndùku mô wûn

(Mat 16.13-20; Lûk 9.18-21)

27Jisòs ghê jùmtìbàmsu wunsu lo hì yênà a tu tèk yi lak yi Sìsaliyà Fìlibây. À hì mò te ghɨna gbè yênà wu lum wù buf ha ghɨna na, “Ghɨta jìsà na mu mò nde?”

28Ghɨna jis ha wun na, “Ghɨta jìsà na wò mò Jon Fo Mòlû, ale jîsà na wò mò fòktì Ìlajà, ghɨ le jîsà na wò mò fòktì wù chìk wùlè.”

29Jisòs buf ha ghɨna na, “Nâ ghàn jìsà na mu mò nde?”

Bità jis ha wun na, “À mò wò Klistù we Yènfù chwoka lema.”

30Jisòs ki kân na kə ghɨna nè fôktè gha mi yina ha wùt.

Jisòs jis kum jɨ̂ŋ yi wuni nì kpu wuni

(Mat 16.21-28; Lûk 9.22-27)

31Jisòs jis yâ ki yîmì hi yike jùmtìbàmsu wunsu na, “Wâ wùt kəta kə nâ hi yena ngə̂k yì chìk na chəhsu nì ngàŋsù ndâ Fùyènsu chiksu nì chichà su saksu mana wûn ma ywi wûn, ma à nê hi mô a mu tuk mù tât ma wù kahà lote a yi kpû.” 32Jisòs jis banhi ha ghɨna ni, kə wu yu Bità gûftì wûn a yi bàm hì njaŋa ha wûn jîsà na kə wù hi jîsà wu lum afân. 33Wù bɨ̂nhì ki jùmtìbàmsu wunsu, njaŋ ha Bità jis na, “Kahi a mu yi bàm a Satàn! Wò kəta wi kwâktì Fùyènì, wò kwàktè kə te wùt.”

34Jisòs toŋa à ghɨ̂t ghê nì jùmtìbàmsù wunsu jis ha ghɨna na, À hì kôŋà nâbi nde hi jùmtè mu, wu mâkà ngɨŋ à wûn wu bêkà kâkfùtàfù wun fu wu jûmtì mu. 35Beka à mòmhi nâbi nde hi bònhè ngɨŋ à wûn ma wù kpu, ma kpu nâbi nde kum mu nì tum à mì yì jùŋ ma wù chyə̂ faŋ. 36Wùt mò hi kwote mbè ghə wu yu afa wù khɨte mbyî yì jɨ̀m biyani lesì a yohnà wuna? 37Wùt ni mò hi yun a to wuna nâ nì ghə? 38Nâbi nde hì wumê kum mu nì yiki mi a ghɨt a mbye ashyə̂ gha be afân ye yì fânà wi Yènfù ni, ma Wâ Wùt bê wumi kum wûn te wù bè kaha bênà atɨ̂n ban yi bè wuni yi chiki nì anjèlsu wunsu yulesu.

Currently Selected:

Mâk 8: bmv

Highlight

Copy