Mâk 9

1Jisòs fî jis ha ghɨt ghe na, “Mu jìsà ha ghàn hamok na, ghɨt ale mò kə nâ afân chîn, bu hi bè kpû teka ghɨ yen te Yènfù saka Fə̂n wu wunu nì jyaka.”

Kə̂k yi Jisòs kwuna a kun

(Mat 17.1-13; Lûk 9.28-36)

2À hì mô yi bàm yi mu tuk tufa Jisòs lyi Bità nì Jêms nì Jon ghê ghɨna kwok yen a tô kùn yì chìk yìlè yi dâfà kə ni, wùt bu afû, wù yen tan afû kə̂k yi wuni bûŋhì kwuna kə ni a ghɨna ashyə̂. 3Njusu wunsu kahi hì fufa kə ni, fê njêntè ma wùt wi hi sù njusu a mbye afân na su yulè hi fufâ yâ. 4Kə ni Ìlajà ghê Musìs fwo a wun ashyə̂ hì jîsà ha wûn. 5Bità ki jîs ha Jisòs na, “Yi jwôfàlò a chichà te ghàhnà mò afân. Ghàh ti balò wì mù tât, ma wò nê hì kəta a mòk, Musìs kəta a mòk, Ìlajà kəta ale.” 6Wù ndùku jîsà ni ma à bu kə nâ yi gha hi jìs beka yi ndùku mô ma yi ti bəm ghak ghɨna.

7Kə ni mbàksù chwo baŋ ghɨna, jyə̀ fwu atɨ̂n jîsà na, “Wùna mò wâ mù wù kòŋ. Ghàn hi ywo ha wûn.” 8Ghɨna bûŋhì shihi kî te fê yena jə̀ wut, a mô kə Jisòs.

9Ghɨna shihi kaha chwo a kun Jisòs chîhì na kə ghɨna nè fôktè gha ye ghɨna yena ha wùt hì bè tàn wu tuk afa Wâ Wùt bè lôtè a yi kpû.

10Ghɨna yu gha ye Jisòs jìsa biyani hì kante kə ghɨna sù ngɨŋ na, “Wùt ni mò hi lòtì yàni a yi kpû?” 11Ghɨna buf ha Jisòs na, “Njwô ghə te chichà su saksu jìsà na, à kə te hi bèn Ìlajà ashyə̂ agha?” 12Wù fîsì ha ghɨna na, “Yi mô kə nâ hamok na Ìlajà nè bênàlò ashyə̂, ma wù bakti nâ gha à jɨ̀m. Biyani njwô ghə te ghɨ nyaka a ŋwàklù Fùyèn na Wâ Wùt nè yenalò ngə̂k nâ haŋaŋ, ma ghɨ fê tunhi na wù wi a shyə ale agha? 13Mu jìsà ha ghàn hamok na Ìlajà ti bên, ghɨta ti nî nâbi ghə ghɨna kòŋà ha wûn ni ha wûn kə yi ghəl te ghɨ tì nyàka a ŋwàklù Fùyèn kum wûn.”

Jisòs chwuk wan wù lɨmà wu kəta yohnà be

(Mat 17.14-21; Lûk 9.37-43a)

14À hì mô te ghɨna kaha bena chinte nì jùmtìbàmsù Jisòs su lesu, yen nôn à ghɨta nì chichà su saksu nâ hidù te ghɨna bèna jiŋ kat ghɨna hì gufnà a ghâ ghê ghɨna. 15Nôn à ghɨt mɨ ghɨ̂n yen Jisòs kə wu yu hì mô nì kani, nyiŋ yen toŋti ha wûn. 16Jisòs buf ha jùmtìbàmsu wûn mu se na, “Ghàn gùfnà ghə nì ghɨt ghɨ̂n?”

17Wùt lè atɨ̂n à nòn afû jis na, “Chichà, mu ben nì wâ mù wù lɨmà wunâ ha wò, wu kəta yohnà be ghɨ nê na wù hi jîsà wi. 18Ghɨ kwola nâbi yini wûn ghɨ tum wun a chyə̂, wu nântì hi ta kə ni fwufwutu hi fwo a wun yi jwô, wu hi kuta a soŋ. Mu ye ben chyati jùmtìbàm sasu na su jûmà fihi yohnà be atɨna ghɨ ti ghak ghɨna.”

19Jisòs jis ha ghɨna na, “À mò yini ngwàk ni yì ta hi bimî ni? Mu nè chyə tânà yàni nì ghàn shyəma ghàn bimi? Bî nì wan àtɨ̂n ha mu.” 20Ghɨna lyi ben nì wan àtɨ̂n ha Jisòs.

Te yohnà be ghe yena be nì Jisòs mak wan àtɨ̂n a chyə̂, wù hì bɨŋlê fwufwutu fwo a wun yi jwô. 21Jisòs buf ha bè wan àtɨ̂n na, “Yaf yîn ti chyə a wun wu wùn yàni agha?”

Wù jis na, “Kə ha wan wù bot. 22Ghɨ faŋa wi hi màkà wûn wu wùs makə atɨ̂n à mòlû kə hi ywe wûn. Biyani, à hì mô na wò làhi nè yi ghâ wo kwohi seni ha ghàh wo gâmtì ghàh.”

23Jisòs buf ha ghɨna na, “Njwô ghə te wò jìsa na mu mò hi nè yi ghâ agha? À bimi nâbi nde ghɨ làhi nì nâbi ghə ha wûn.”

24Kə te wù jìsa mihe ni, bè wan àtɨ̂n bwat jis na, “Mu ti bimî biyani gàmti mu ma mu tòkà bimi.”

25À hì mô te Jisòs yena ghɨta ghɨ yûŋtè bênà nâ hidù, wù kântì yohnà be ghê jis na, “Chyà fwu a jìsà bênà mu ha wò yohnà be ghɨ̂n, wò nè na kə wan wûn hi jîsà fê ywo a ghâ. Wò fwu ni kə wò bè fê kaha lye.”

26Yohnà be atɨna khək jyə̂, shik wan àtɨ̂n nâ haŋaŋ fwu lò, wan àtɨ̂n hì kə̂kà kə te kpo wûtà ghɨta dona hì jîsà na, “Wù ti kpû.” 27Biyani Jisòs khɨti a wo wuna tôktì wûn wù lôtì timî.

28À hì mô te Jisòs lye a ndâ, jùmtìbàmsu wunsu nyamti buf ha wun na, “Njwô ghə te yi ye hì ta ghaka ghàh hi jùm à fihe yohnà be atɨna agha?”

29Wù jis ha ghɨna na, “Ghɨ̂n meti ghɨ mô hi jùm à fihi kə nì jə̂mì.”

Jisòs jis kum kpu yi wuni

(Mat 17.22, 23; Lûk 9.43-45)

30Ghɨna lo afû gbi tohna a bàh à lak a Galìlî, Jisòs hì kôŋà wi na wùt khɨli na yi mò afû, 31beka à ndùku mô ya wu yike jùmtìbàmsu wunsu jîsà ha ghɨna na, “Ghɨ nè folò Wâ Wùt ha ghɨta ma ghɨ ywi wûn, ma à nê hi mô a mu tuk mù tât ma wù kahà loti a yi kpû.”

32Biyani ghɨna tà yu khɨli jə gha mi yîn hì fânà ghaka hi buf.

Jisòs yiki kum wùt we wù ngaŋte chyâ wùlè

(Mat 18.1-5; Lûk 9.46-48)

33Ghɨna yen tan a Kàbanùm hì mô a ndâ, Jisòs buf ha ghɨna na, “Ghàn yê hì gufnà bênà nì yìni gha wu lum yâ?”

34Biyani, ghɨna china kə moŋ beka a ndùku mô wu lum gufnànì mô na, à mò nde wù ngaŋte chyâ a ghɨna fùtɨ̂n agha? 35Jisòs ndokò a chyə̂ jis ha jùmtìbàmsu wun se njwòsù bà na, ghɨna khɨŋtè bakhe ben ha wûn. Jis ha ghɨna na, nâbi nde we wù kòŋà hi tè mo ashyə̂ wu lem ngɨŋ à wûn a ghɨta yi bàm à jɨ̀m ma wù hi fê mô wut yi fèt ha ghɨt à jɨ̀m. 36Te wù jìsa ni gûftì wan wù tetana tom a ghɨna ashyə̂, fî tuti wan àtɨ̂n ki jîs ha ghɨna na, 37“a tòknà nâbi nde nì walà te wùna, kum mu ma à hi mô na wù ti tôknà nì mu, we wù tòknà nì mu, wù hi khə na wù ti tôknà nì we wù tuma mu.”

Wùt we wù mò a ghàhnà bàh

(Lûk 9.49, 50)

38Jon jis ha Jisòs na, “Chichà, ghàh che yen wùt wu jûmà fihe yohnù be a wo yi yet, ghàh jis na kə wù fî mom beka wù wijə wùt lè a ghàhnà fùtɨ̂n.”

39Biyani, Jisòs jis ha ghɨna na, “Kə ghàn nè fê tâmtè wûn, beka nâbi nde wù ne gha kanani a mu yi yet wù wi hi kaha bɨ̀nlì hi tè jìsà gha be kum mu. 40Nâbi nde wù nò wi ghàhnà, wu mò a ghàhnà bàh. 41Mu jìsà ha ghàn hamok na, nâbi nde we wu fo bòm à mòlû na ghàn nyu beka ghàn jùmtè mu ma wù bê tè faŋa jə̀ hi kwote maktu wunu.”

Gha ghe ghɨ nê na wùt ni be

(Mat 18.6-9; Lûk 17.1, 2)

42À ki nê nâbi nde na wan wù mòk atɨ̂n à mwəlà afân a ghɨ bime ha mu ni, na wù ni be, ma yi hi jwôfà na ghɨ chuŋ ti a wun wu mɨ̀ ma tum a jwô yì chìk. 43-44Wo gha ki nî na wò ni be, wo kat fihilò. Yi jwôfà na wò khɨti chyəna ghe ghɨ bè mê wi wo mòk bu, chyâ na wò hi kəta wo wù jɨ̀m ma ghɨ bê mak wò wu wùs wu bamê lɨmne wi. 45-46Wu gha ki nî na wò ni be wo kat fihilò. Yi jwôfà na wo khɨti chyəna ghe ghɨ bè mê wi wula mòk bu, chyâ shyəma wò hi kəta wulu wa wù jɨ̀m ma ghɨ bê mak wò wu wùs. 47Se ya ki nî na wò ni be wo boklì fihilò. Yi jwôfà na wò lyi wù lùk wu Fə̀n wù Fùyènù nì se yì mòk chyâ shyəma mak wò wù lùk wu wusu nì se bà. 48Ma mak yâ a mô wù lùk we gutsu kuta gbê a wùt wù wùn kpo wi, wusu bame afû ghɨ bu hi lɨmhî.

49“Beka mbaŋ fe ghɨ bè fate nâbi nde atɨ̂n bè hì mô kə wu wùs.”

50Mbaŋfu jwôfàlò, biyani fu hì fê tofa wi ma ghɨ nê ni yàni nì funfu na fu fê tof agha?

Ghàn hi kəta mbaŋfu a ghàn a wu wùn. Nâbi nde hi chyə nì yutìnì ghê wâ nè wûn.

Currently Selected:

Mâk 9: bmv

Highlight

Copy