Mâk 10

Jisòs yikî kum jyâhì malâ

(Mat 19.1-12; Lûk 16.18)

1Jisòs lo wu lùk afû daŋ yen a bàh à Jùdiyà yi jin yi Jodàn. Nôn à ghɨ̂tà fî ben kə yi bên ha wûn, wù hì yike ghɨna kə te wù yè yike.

2Ghɨt a Falàsî ghɨ le hi yute jwo wuni, ki buf na, “Saki bimelò na wùt jum ywê wuna?”

3Wù fîsì buf ha ghɨna na, “Musìs tì jis na ghə ha ghàn?”

4Ghɨna jis na, “Musìs tì bimî na wùt làhi jùm à ywê wûn ma wù nyak ŋwàklù ma wù fo ha wûn, yi chwûtè na yi ti jum wûn.”

5Jisòs jis ha ghɨna na, “Musìs tì nyak yi sak mi yîn ha ghàn beka ghɨ yiki gha təm ghana ta hi yû.” 6Biyani, ma ndùku mô a yìmi mbyî, Yènfù fati wùt lɨmà nì wùt ywên, ki jîs na, 7kum ni, wùt lɨmà bê lô a bè wûn a ngwùŋ nì nè wûn, wu yen chîntì nì ywê wûn, 8ghɨna à bà hi mô kə ha shyə̀ à mòk, wùt bu hi fè khɨte gha wuni yi ngɨŋi. 9Yi chwûtè na Yènfù kwut nâbi ghə kə wùt nè yêntè.

10À hì mô te ghɨna kaha kolo a ndâ, jùmtìbàmsu wunsu fî jis ha wun na wù jis a banhi tu ghɨna kum gha malâ mi yîn. 11Wù jis ha ghɨna na, “À ki jûm nâbi nde ywê wûn, ki lyê wùlè ma à hi mô na wù ti ni be ha wùt ywen wù shyə̂, 12ma wùt ywên ki fwo lɨm, yen lyi wùlè ma à hi mô na wù ti khɨm sak yi malâ.”

Jisòs bonhi mwəlà

(Mat 19.13-15; Lûk 18.15-17)

13Ghɨta hì lye bênà nì mwəlà ha Jisòs tuk lefu na wù kum ghɨna ma wù bonhi ghɨna, biyani jùmtìbàmsu wunsu yen yâ hì njaŋa ha ghɨt atɨ̂na. 14À hì mô te Jisòs yena ghɨna nê ni, wù bâŋhì wu lâ jis ha ghɨna na, “Ghàn de ma mwəlà ben ha mu. Kə ghàn fi tamti ghɨna beka Fə̂n wù Fùyènù kəta à ghɨ̂t ghe ghɨ mô te ghɨna. 15Mu jìsà ha ghàn hamok na, à faŋ nâbi nde hi bime Fə̂n wù Fùyènù te walà ma wù bê tê lye jə̀ wù lùk wu Fə̀n wù Fùyènù.” 16Wù jis ni, hì tuti ghɨna lem a wo a ghɨna tû bonhi ghɨna.

Wùt wù chìk ben hi yena Jisòs

(Mat 19.16-30; Lûk 18.18-30)

17Te Jisòs lo hì yênà wu lûm, wùt lè nyiŋ ben tum sù ngwuk a wun ashyə̂ buf ha wun na, “Chichà wù jùŋ, mu mò hi nì nâ ghə hi bè kwote chyəna ghe ghɨ bè mê wi?”

18Jisòs buf ha wun na, “Njwô ghə te wò toŋte mu na wùt wù jùŋ agha? Nâ wùt wù jùŋ wi a bu kə Fùyèn.” 19Wò hì khə tu sak tɨ̂n tu jîsà na, ‘Kə wùt ywi, kə wùt chyə nì ywê wùt makə lɨm à wùt, kə wùt chwoŋ, kə wùt timi bɨ̀n à sak yì fə̂m, kə wùt yə wùt wu tof, ngumli bâ nì nâ!’

20Wùt àtɨ̂n fîsì ha wun na, “Chichà mu tì lem sak tɨna nâ tù jɨ̀m kə hi yìmi ha wan wù bot.”

21Jisòs ki wun ni hì kôŋà, ki jîs ha wun na, “Gha làwû yì mòk teka wò ni. Ndù bəkli mwə̀ mâ nâ mù jɨ̀m me wò kəta ma wò fo ka tɨnu ha ghɨt a fufana, ma wò khɨti ghaki a nyə̂. Wò ni ni, wò ben jûmtì mu.” 22Te wù ywo jîs yi Jisòs yina ni, kə̂kì bef a wun a tû, wù lo saŋle wi beka wù ndùku kəta mwə̀lû mu dô kə ni.

23Jisòs ki tala nì ghɨta a wun a ngwùŋ ni, ki jîs ha jùmtìbàmsù wunsu na, “Yi bè hì talò nâ haŋaŋ shyəma ghɨt a chika bê lye a lak yi Fə̀n wù Fùyènù.”

24Jwo yim jùmtìbàmsù wunsu. Jisòs ki fê jìs na, “ Mwəlà mâmù yi ta nâ ni hi lye lak yi Fə̀n wù Fùyènù. 25Yi bonelò ha nyàm à kwaŋ hi tohna a bùk à saka chyâ shyəma wùt wù chìk lye lak yi Fə̀n wù Fùyènù.”

26Gha tɨni bəm ha jùmtìbàmsù wunsu, su hì bufa ha ngɨŋsu ghɨna su na, “Yi hì mô ni ma à bê bon nâ nde agha?”

27Jisòs ki ghɨna ni ki jîs na, “Gha yina ta ghaka kə à ghɨ̂t, biyani ta ghaka wi Yènfù beka gha jɨ̀m bone kə ni ha Yènfù.”

28Bità jis ha Jisòs na, “Ba wò ti yen na ghàh ti de nâbi ghə ghaha hì jûmtè kə wò?”

29Jisòs jis ha ghɨna na, “Mu jìsà ha ghàn hamok na, wùt wijə we wù de bɨn a wuna, makə wù de wana ne wuna makə jâmtìsù makə nì, nì bì, makə wana makə fùkmù kum mu nì tum yì jùŋ, 30ma wù nê tê faŋ hi khɨti a ghan wu wə, binû, wana ne, jâmtìsù, nì ne, nì mwəlà nì fùkmù kəbi yâ. Wù nè khɨtelò mwə̀ munâ a mbyî afân chîn, ma ghɨta hi fê nyâblè nì wûn, ma tuku bê ben ma wù kwoti chyəna ghe ghɨ bè mê wi. 31Ghɨt a dona mò chîn mò ashyə̂ biyani, mô hi bè tè mò a yi bàm, ma ghɨt a dona ghe ghɨ mô yi bàm ma ghɨ bê hi mô ashyə̂.”

Jisòs fî jis kum kpu wuni

(Mat 20.17-19; Lûk 18.31-34)

32Jisòs lo ghê ghɨta hì kwoka yênà a Jèlusalèm, Jisòs yênà ashyə̂, jùmtìbàmsù wun se njwòsù bà kante yê nì gha, ma fânì ti boŋ kwo ghɨt ghe ghɨ ndùku jûmtè ghɨna. Jisòs fî gûftì jùmtìbàmsù wunsu njwòsù bà yi bàm fôktì gha ye yi nè gânà ha wûn. 33Wù jis na, “Ghàn hi khə na ghàhnà kwoka yênà a Jèlusalèm chin ni, ghɨ kəta hi yè fo Wâ Wùt ha ngàŋsù ndâ Fùyènsu chiksu nì chichàsu saksu na ghɨna chyahi saki na wù kəta hi kpû, ma fê lyê fo wun ha tumu, 34ma ghɨna nyikhi wûn ma chwuli chwâmù a wun wu wùn ma sam wûn nì wànsù ma fê kwô ywi wûn, ma à hi mô yi bàm yi mu tuk mù tât ma wù kahà lòti a yi kpû.” (Mat 20.20-28)

35Jêms ghê Jon, a wana Sebedì fwuti ben ashyə̂ jis ha Jisòs na, “Chichà, ghàh khɨŋa na wò ni nâbi ghə ghê ghàh bufa ha wò.”

36Jisòs buf ha ghɨna na, “Ghàn khɨŋa na mu ni ghə ha ghàn?”

37Ghɨna fîsì na, “Bimi na a bè hì mô a tuk afa wò hì saka fə̂n wa wu yulenu ma ghàhnà hi mô hamok, wùlè mô a wo kpen wu wo ta, wùlè mô a wo kpen wu wo nkôwì.” 38Biyani, Jisòs jis ha ghɨna na, “Ghàn khə wi gha ye ghàn bufa”. Fî ki buf ha ghɨna na, “Ghàn làhi yen a ngə̂k ye mu kəta hi yen hi fè kpo?”

39Ghɨna bimî. Jisòs jis ha ghɨna na, “Hamok ghàn nè yenalò ngə̂k ye mu mò hi yên hi fè kpû. 40Biyani, à wijə luk wu mu hi jìs na wùt ndoko a mu kpen wu wo ta makə kpen wu wô nkôwì. Luktu tɨntu mò, a kəta à ghɨ̂t ghe ghɨ tì fate lema ha ghɨna.”

41Te jùmtìbàmsù wunsu lesu ìwûm ywo gha tɨni hì bâŋhè wu lâ ha Jêms ghê Jon. 42Jisòs yûŋtì ghɨna jis ha ghɨna na, “Ghàn hi khə na fə̂ntù mbyi tu kətalò jyaka saka yikte yi yiktî, ghɨta ghɨna. 43Biyani, yi kəta wi hi tè mò ya ha ghàn. Nâbi nde we wù khɨŋa hi tè mò te wùt wù ngaŋtena a ghàn a fùtɨ̂n kəta hi tè mò wut wù fètana ha ghàn, 44nâbi nde mò hi te mò te wut wù tihena a ghàn a fùtɨ̂n kəta hi tè bɨlà mò te a kwôs ha ghɨt à jɨ̀m. 45Beka Wâ Wùt tà tì ben na ghɨ hi fêtà ha wûn. Wù tì ben hi tè fèt ha ghɨta, hi fè fo ngɨŋ à wûn hi kpû hi yun a tu ghɨt a dona.”

Jisòs chwuk wùt wù fèfana wùlè ghɨ toŋte na Bàtìmayòs

(Mat 20.29-34; Lûk 18.35-43)

46Te ghɨna bè tana à Jèlikù, à hì mô te Jisòs ghê jùmtìbàmsù wunsu bakhi nì nôn à ghɨt a dona ale hì lô, wùt wu fèfana wùlè ghɨ toŋte na Bàtìmayòs a mô wâ Tìmayùs wu mô yi bi lumi lonâ. 47Te wù ywo na à mò Jisòs wù Nasalì te wù chyàlà bwat jis na, “Jisòs, Wâ fə̀n Defìt, kwohi seni ha mu!”

48Ghɨt a dona hì kântè wûn jyâna wù china moŋ, wù fî bɨlì bwat yen kə ashyə̂ jîsà kə na, “Jisòs Wâ fə̀n Defìt, kwohi seni ha mu!” 49Jisòs timî ki jîs na, “Ghàn toŋà ben nì wûn ha mu.” Ghɨna toŋa wùt wù fèfana àtɨ̂n jis ha wun a yu mefû na, “Kə wò fan. Lòti bî. Jisòs toŋa wò.” 50Wù yât mâkà njusu wun se wù tì wafte nyiŋ yen ha Jisòs. 51Jisòs buf ha wun na, “Wò khɨŋa na mu ni ghə ha wò?” Wu fîsì na, “Chichà, nì ma mu hi yena luktu.” 52Jisòs jis ha wun na, “Kaha kolo. Bimi ya ti ni wò ti tâ.” Kə wu yu, wù yen tu luk lo hì jûmtè yênà nì Jisòs wu lûm.

Currently Selected:

Mâk 10: bmv

Highlight

Copy