Mâk 7

Yi yikî ghɨt a mwo

(Mat 15.9)

1Ghɨt a Falàsî ale nì chichàsu sak sulesu tî lô a Jèlusalèm ben yûŋtì kat a Jisòs à ngwùŋ, 2shihi kî, yen te jùmtìbàmsu Jisòs su yə teka ghɨ su wo, wu lum afa chyənà ghɨna yi lak chwùtè na ghɨna hi sô atɨ̂n 3-4Ghɨt a Falàsî, nâ nì ghɨt a Jûs à jɨ̀m tî chyə chyənà ghɨna yì lak kə te be ghɨna ndùku chyə. Ghɨna ndùku kolo wù lùk wu bəklenu, ghɨna tà shyə yə teka su wunu kə te chyəna yi laka ghɨna chwùtè, yə wi nâ shyə ale teka su wo wu lum afân, fê lêmà tu sak te tu jîsà na ghɨ hi sô bomsu, sô a khɨŋ, sô wu kâŋ kə te chyəna yi lak chwùtè.

5Ghɨt ghe ghɨ tì yena te ghɨt a Jisòs yə teka ghɨ su wo ki buf ha wun na, “Njwô ghə te jùmtìbàm sasu chyə wi chyənà be ghàhnà, yə nì wo tu fiŋu agha?”

6Jisòs njâŋ jis ha ghɨna na, “Ghɨt ghɨna ghɨ kam kama nê ni. Fôktì Ìsayà tì fôktì kə nâ tum à Fùyèn kum ghàn hamok na,

‘Ghɨt ghɨ̂n kokhe kə mu nì jwo,

biyani lyê wi mu ha shyə̀ ale.

7Ghɨna yena ngə̂k halô jyâna ghɨ kokhe mu,

beka ghɨna yike agha ma à fate à ghɨ̂t

lemlò na à mò tu sak tamtu.’

8Ghàn ti mâkà chyəna Fùyènà bɨlì khɨti lô chyənà su ghɨ̂t sù.”

9Wù fî jis na, “Ghàn teta sak yi Fùyènì wu lum wu tofu shyəma ghàn khɨli hi khɨte chyənà yanì yì lak.” 10Beka Musìs tì nyàka sak yi Fùyènì jîsà na, ‘Ngumli ba wâ nì nìni wâ,’ fî jis na, ‘À sùli kəbi nde bè wûn makə nè wûn ma ghɨ hi kəta hi ywe wûn.’ 11Biyani yi ni yike na wùt shìki kəta a shyə hi fo ha bè wûn makə ha nè wûn fî ki kaha jìs na a shyə tɨna kəta Kobàn, ma wù ya ni jìs na ‘Yi chehì mô ma yi ti chwûnà hi fo shyə tɨna ha Yènfù,#7.11 À ndùku mô wu lum a ghɨt a Jûs a chyəna laka hi chwùtì na ghɨta ti fo ka na ghɨ ni fêt yi Fùyènì atɨ̂n. 12ma wù hi kəta wi hi fo a shyə tɨna ha bè wûn makə ha nè wûn.’ 13A ni lum we ghàn kùnà gha Fùyènì atɨ̂n wu lum afa ghàn yike gha ghana ghɨ chyəna yi laka ha ghɨta. Ghàn nê nki gha mɨ ghɨ̂n ghɨ dô kə ni.

Gha ghe ghɨ nê ghɨta na ghɨna hì mô nì fiŋtu

(Mat 15.10-20)

14Jisòs jis yâ, fî toŋa a nôn à ghɨ̂t ghe ghɨ tì bèna, jis ha ghɨna na, Ghàn yuti kə nâ ghàn à jɨ̀m ma ghàn hi khə. 15Shyə wijə wùt mò hi yə̂ na ghɨ ni wûn ma wù hi bu nì yulînì. 16À hì kəta nâbi nde tofu wu tok yuti gha mi yîn.

17À hì mô te Jisòs de a nôn à ghɨ̂t mi ghê lye a ndâ, jùmtìbàmsu wunsu jis ha wun na wù fokti gha ye jis yi wuni yê chwûtè. 18Jisòs jis ha ghɨna na, “Ghàn baha mô kə wù ngwò te ghɨt ale agha? Ba yi mô na ghàn yena wi kəbi nâ ghə ghe wùt yə wi hi nì na wùt hi bu nì yulînì agha?” 19“Yi mô ni beka wùt yə a shyə ghɨ tà yen a wun yi təm, wù yə ghɨ yen a wun wu là, yen ya, ghɨ chya fwu kə yi fwô a wun wu wùn.” Wù ndùku jîsà hi chwùtì na kəbi ghɨ̀ni shyə yəna yule kpenelò hi yə̂.

20Wù jis yani ki jîs na, “À mò kə yi gha ye yi fwo a wùt wù wùn a yi nê na wùt hi bu nì yulînì. 21Kwâktì yi be fwo kə wùt wù wùn, kə nâ a wun yi təm nê na wù hi momà gha be, nê na wù hi jûmtè ywena, chwoŋâ, ywe à ghɨ̂t, 22chyə nì ywena ghɨ̂tà, nâ kəbi nì lɨma ghɨ̂tà, kəta se fwona, kəta təm a be, lehe à ghɨ̂t, wume wi, ghə̂kà à ghɨ̂t, lêmà kowòŋ, ghaŋhe wu wun, fê jîŋtè. 23Nâ gha mɨ ghɨ̂n à jɨ̀m fwo kə wùt wu wùn, nê na wù hi bu nì yulînì.”

Bimî wùt ywên wùlè

(Mat 15.21-28)

24Te Jisòs lòte lo afû yen a bàh a lak afa tèk yi Tayà nì Sidòn ndùku mô atɨ̂n, yen be a ndâ yìlè kôŋà wi na wùt khɨli, ghɨta fî khɨli kə yi khɨlî. 25-26Wùt ywên wùlè afû kəta wan wu kəta a yohnà be. Te wùt ywên we ywo na Jisòs mò a ndâ afû, ben fen kə wun ashyə̂ hì chyate wun na wù jum à fihi yohnà be ghê. À mô ya wùt ywên àtɨ̂n bu wùt à Jûs, à mô wùt à Fònisìyà a Siliyà. 27Te wù jìsa ni, Jisòs jis ha wun na “De ma ghɨ yəhi mwəlà laŋ beka yi jwôfà wi na ghɨ lyi mwə̀ mù yə̂mù mwəlà ma maka ha busu.”

28Wùt ywên àtɨ̂n bimî jis ha wun na, “Mu khəlò ni a bâ, biyani khə kəbi na busu ndòkò bakhe lò wu lùk wu yənu su hi boŋte yə chyàksù mwə̀ mù yə̂mù mwəlà su!”

29Kum nì jîs yi wuni, Jisòs jis na wù hi kolê, yohnà be tɨna ti de wâ wûn.

30Wu kolo yen yen wan wu mô wu khɨ̀ ma yohnà tɨna ti fwu a wun wu wùn.

Jisòs chwuk wùt wu ywo wi, jîsà wi

31Jisòs lô a bàh a Tayà tohna a Sidòn, yen chya lumu a bàh à Tèksù Ìwûm, yen fwu yi bi lwi Galìlî. 32Ghɨ ben nì wùt ha wûn afû ma to ti kpû, wu khə wi hi tòkà jìs ghɨ hì chyate wûn na wu kum wùt àtɨ̂n ma wù ta. 33Jisòs lyi fwu nì wûn atɨ̂n à nòn, wù lihî a wana wo wuna a wùt àtɨ̂n wu tûŋlu, fî chwu chwâmù kum chwûlù wùt àtɨnu atɨ̂n, 34ki kokhe a nyə̂ dumlìlò, ki jîs ha wûn na, “Efatà,” ma wù jis na, “Yàhî!”

35Tûŋlu wunu yâhì, chwûlù wunu boŋ yâhì wù hì jîsà kə nâ a jûŋ. 36Jisòs hì jîsà ha ghɨta na kə ghɨna nè fôktè ha wùt, ghɨna bɨlì fôktì yen kə yi yên. 37A ywo nâbi nde yâhè kə yi jwô, ghɨ hì jîsà yê kə na wù ne gha à jɨ̀m kə jûŋ, nê ghɨt ghe to kpo ghɨ ywo a ghâ, kwùkù jîsà.

Currently Selected:

Mâk 7: bmv

Highlight

Copy