Lûk 2

Yi bwɨ Jisòs

(Mat 1.18-25)

1À ndùku mô mu tuk afû fə̀n à Lûm Àgustùs fihi yi sak yile na ghɨ nyak nâbi yet yi nde. 2Yìna ndùku mô yu shyə hi nyàk a yet te Kwilinùs kwoka ha bì yì tèk a Siliyà. 3Nâbi nde kahi yen a wun a yi lak hi nyàk yi yet yi wuni.

4-5Josèf fwu a yi tèk yi Nasalì a Galìlî kwok a Betùlùhêm a Jùdiyà a mô yi tèk yi fə̀n Defìt beka wù ndùku mô a wut a Defìt yi sah yi nda. Wù tì yen hi nyàk yi yet yi wuni ghê Mèli we wù ndùku gbê ha ywi. À ndùku mô yani Mèli mô wu lâ. 6À hì mô te ghɨna baha mô afû, yu kpên shyəma wù bwɨ 7Wù bwɨ wâ wûn wù ngòn, a mô wan wù lɨmà, lim wûn nì kôm wù sùnju, nîŋhì a ngwùk afa nyamsu ndùku yə atɨ̂n, beka luku ndùku wi a nda afa ghɨt a benana ndùku bênà chyə atɨ̂n.

Anjèlsù Fùyènsu tî fôktì bwɨ wani ha ghɨt ghe ghɨ ndùku chînà bwusu

8À hì mô kəbi wu tuk afû, ghɨt ale mô a bàh à yi lak afû chînà bwusu ghɨna su a ghə̀n ntuksu. 9Kə ni, anjèl à Bâba yìlè fwu a ghɨna yi kə̀k, ban yi chiki Fùyènì jiŋ kat ghɨna, ghɨna hì mô nì fânì nâ haŋaŋ. 10Anjèl à Bâba yê jis ha ghɨna na, “Kə ghàn fan, mu ti ben nì tum yì jùŋ ha ghàn, a ye yi nè fo saŋlînì ha ghɨt à jɨ̀m. 11Ghɨ ti bwɨ̂ Bònhì ha ghàn wu tuk wu lân a Defìt yi tèk, a mô Bâba we ghɨ chwoka lema. 12Chwena ghe ghàn nè yena mò ni. Wan àtɨ̂n mò ma ghɨ ti lîm wun nì kôm wù sùnju, nîŋhì a ngwùk ye nyamsu yə atɨ̂n.”

13Kə wu yu nôn à anjèlsù Fùyènsu lesu fwu ben bakha hì kokhe Yènfù jîsà na:

14“Kokhi Fùyènì tan nâ wu lùk wu ngaŋtenu a nyə̂,

bonanì mô a chyə̂ ha ghɨt ghe wù saŋle nì ghɨna!”

15Te anjèlsu Fùyènsu tì lo de ghɨna kaha kwok a nyə̂, ghɨna ndokò hì jîsà ha ngɨŋsu ghɨna su na, “Ghàhnà daŋ à yen a Betùlùhêm ma yê yen gha ye yi gana te Bâba ne na ghàhnà khɨli.”

16Ghɨna jis ni, lo kə yi lô yen yen Mèli nì Josèf nì wan àtɨ̂n ma ghɨ ti nîŋhì a ngwùk. 17Ghɨna yen ni, hì fòktè gha ye anjèl à Fùyèn ye tì fòkte ha ghɨna kum nì wan àtɨ̂n. 18À hì ywo nâbi nde gha ye ghɨt ghe ghɨ ndùku chînà bwusu ndùku jîsà hì kante kə yi kantî. 19Biyani Mèli fati lem gha ghɨ̂n a wun a tû ghɨ faŋ kə yi fâŋ. 20Chìnsù bwu sê kahi lô yen hì kokhe Yènfù tuma tukum ha wûn a yi gha afa ghɨna ywo fî yenlò kə te ghɨ tì jìsa ha ghɨna.

Ghɨ chwu yet yi wani

21À ndùku mô te ghɨ fate wan yi bàm mu tuk fama, ghɨ chwu yet yi wani na Jisòs, kə yi ghəl te anjèl à Fùyèn tì be jisa ghɨ baha mô teka ghɨ boŋ wûn.

Ghɨ yen chwùtì wan a ndâ Fùyèn

22Tuku tì kpên shyəma ghɨna yê su ngɨŋsu ghɨna su kə te sak yi Musìs tì chwûtè, ghɨna lyi kwok nì wan a Jèlusalèm hi chwùtì ha Bâba, 23beka sak yi Bâba ndùku chwûtè na, “À fwu nâbi wùni wan wù lɨmà wù shyə̂, ghɨ lem na a mò wù Bâba.” 24Ghɨ kwok nì wûn kəbi hi ye lunhe yi sak yi Bâba ye yi ndùku jîsà na, ghɨ kəta hi fo mbwu mù bà makə làtùta mù bà.

25À ndùku mô ni, wùt lè mô a Jèlusalèm ghɨ toŋte na Simùn, wu mô ma wù ti lun nì Yohnà Yulena, chyə chilichili, a wun a chyənà, lyê wu yu hi nì fêt yì Fùyènì. Wù ndùku chyə yute kə tuk we Bâba bè yâhà mihè semù ghɨt a Isalì atɨ̂n. 26Wù ndùku mô ma Yohnà Yulena ti chwûtì ha wûn na wù bè kpo wi bu na wù yen wùt we Bâba chwoka tuma. 27À hì mô te bè Jisòs ghê nè wûn lye Jisòs ben nì wûn a ndâ Fùyèn na ghɨ ni ha wûn te saki ndùku jîsà, Yohnà Yulena chinhi Simùn, wù lô yen afû kəbi wu yu tɨnu. 28Wù fyi wan, khɨti wûn a wô hì kokhe Yènfù jyâna:

29“Nì chîn a Bâba wùt wâ wù fèt làhi lò nì bonanì

kə te wò tì chwùne,

30beka se ma ti yen te wò bè bonhe ghɨt gha

31Te wò fate lema ghɨt à jɨ̀m ti yên.

32Bôn yinâ bè hì mô yi ban ye yi chwûtè lumu ha tumu,

fo yi kokhî ha ghɨt a Isalì, a ghɨt gha.”

33Bè Jisòs ghê nè wûn hi mô nì kani a gha afa Simùn ndùku jîsà kum wâ ghɨna. 34Simùn bonhi ghɨna, ki jîs ha Mèli na, “Wò hi khə na, Yènfù ti lem wan wunâ na wù bê lohi ghɨt a Isalì nâ hidù, kəbi ni ma wù bê fenhi ghɨ dona. Wù bè faŋa te a chwena ghe ghɨta bè hì nyîkhè, 35ma gha ghe ghɨta lètè a ghɨna a təm, ma fwo mihi a ndan. Ma nywifu bê so təm ya kum nì wan wûn.”

36À ndùku mô ni, fòktì wù ywên wù chìk wùlè mô afû ghɨ toŋte na Anà, a mô wâ Fàmùwêl a wut a Ashà yi sah yi ndâ, ma wù ti ləma nâ a jûŋ, a mò ma wù tî malâ chyə kə ghê lɨm à wûn wu lɨ̂m sàmba, 37wù kpû, à hì mô chîn ma wù ti ləmâ hì mò lɨ̂m mfama njwòsù kìk, nâbi yani, mô kə a ndâ Fùyèn kokhe Yènfù, bama yi jwô, chyate nchwì nì ntuksu. 38À ndùku mô wu yu afa ghɨ tì be nì Jisòs a ndâ Fùyèn, wù lyi ben hi fo yòŋnà wana ha Yènfù, nì hi fê fòktì gha wan àtɨ̂n ha nâbi nde we wù ndùku yute na Yènfù bê fihi ghɨt a Jèlusalèm a ngə̂k.

Ghɨ kahi kolo nì wan

39Josèf ghê Mèli mihì nâbi yìni gha te sak yi Bâba ndùku chwûtè, kaha kolo a ghɨna yi tèk, a Nasalì yi lak yi Galìlî. 40Jisòs hì ləmâ kə nâ jûŋ tofu wunu ləma yênà ashyə̂, Yènfù fê bonhi wûn.

Jisòs yen jis a ndâ Fùyèn

41Bè Jisòs ghê nè wûn hì kwoka a Jèlusalèm kə lɨ̂m wù jɨ̀m, hi yè yə tuk wu Daŋa Chyalanu. 42Jisòs ləma tan lɨ̂m njwòsù bà, ghɨna kwok a Jèlusalèm kəbi te ghɨna yè kwoka. 43Te ghɨ tì yə mihe yə Daŋa Chyalani, ghɨna lô hì kolê, Jisòs faŋ yi bàm a Jèlusalèm, biyani bè wûn ghê nè wûn ndùku khə wi, 44kwâktè na wù mò a ghɨna fùtɨ̂n. Ghɨna gbî tuk wu fublùnù kaha hì bufa wûn ha ghɨt a ghɨna ghɨ sah yi nda, nì ha ghɨt ghe ghɨ ndùku khə wûn, 45tê yên, kaha kwok a Jèlusalèm hi khɨŋa wûn afû. 46Ghɨ khɨŋ wûn a mu tuk mù tât yen yen wûn a ndâ Fùyèn, wu mô ghê chichàsù, yute gha ghe ghɨna ndùku jîsà fê bufte ale. 47À ndùku ywo nâbi nde te wù jìsà, wu hi kana kə yi kân nâ, wù lyi afa tofu hi tè fìsì a gha ni agha? 48À hì mô te bè wûn ghê nè wûn yena wun ni, gha tɨni hì bəma ha ghɨna! Nè wûn buf ha wun na, “Wâ mù, njwô ghə te wò ne nki gha yin ha ghàh? Ghàh à ba wâ ti khɨŋ wò hì fânà.”

49Wù buf ha ghɨna na, “Ghàn yê hì khɨŋa yi khɨ̂ŋ mu njwô ghə? Ghàn yê malò na mu kəta hi tè mò a Bom a ndâ agha?” 50Biyani ghɨna tê ywo khɨlî gha ye wù jìsa.

51Wù lô kə wu yu kaha chwo a Nasalì ghê ghɨna, hì ywo ha ghɨna. Nè wûn lem gha ghɨn a wun yi təm nâ à jɨ̀m ghɨ faŋ kə yi fâŋ. 52Jisòs hì ləma kwoka kə nâ a jûŋ, tofu wunu tâ ləma yen kə ashyə̂, Yènfù hì kôŋà wûn, nâ ghɨta boŋa kôŋà wûn.

Currently Selected:

Lûk 2: bmv

Highlight

Copy