Lûk 1

Toŋtînì

1Bèbɨn Tìyofilòs:

Ghɨt a dona tî mômhì hi nyàk gha ghe ghɨ ndùku gàna a ghàhnà fùtɨ̂n. 2Ghɨna nyak gha ma ghàn à jɨ̀m tì ywô ha ghɨt ghe ghɨ tì yena gha tɨna kə yìmi faŋ hì fôktè. 3Mu ti yen na yi jwôfàlò, bèbɨn na mù boŋà nyak à fokti gha atɨna ha wò a mbaŋi a mbaŋi te mu tòka kine kwoka nì ghɨna kə te ghɨ tì yìme hì gânà kwokâ. 4Mu fòktè ni shyəma wù nê hi khə hamok atɨn à gha afân a ghe a ghɨ fokte ha wò.

Ghɨ fôktì na ghɨ bè bwɨlò Jon Fo Mòlû

5Yi mô na, a ndùku mô te Fə̀n Helòd saka lak yi Jùdiyà. Wùt lè mô tuhe mwə̀lû a ndâ Fùyèn ghɨ toŋte na Sàkàliyà a mô wùt a Àbijà yi sah yi nda, ywê wûn mô Èlisabèn ma wù fwu kəbi a Alòn yi sah yi nda. 6Ghɨna à jɨ̀m ndùku chyə chilichili a Yènfù ashyə̂, nê gha ghe Bâba jìsa nâ à jɨ̀m, lêmà saktu Fùyèn tù nâ tù jɨ̀m, kəta wi njahi nâ hakoh. 7Ghɨna ndùku mô ma ghɨna ti ləma nâ jûŋ kəta wi mwəlà beka Èlisabèn ndùku bwɨ wi.

8Tuku yû tuk wule a kəta ghɨt a Sàkàliyà a ndâ hi nè yi fêt a ndâ Fùyèn, Sàkàliyà yen hi yè nè fêt yi wuni te wùt we wù tuhe mwə̀lû a ndâ Fùyèn. 9Ghɨ tum byè kə te ngàŋsù ndâ Fùyènsu ndùku tuma hi kine a yi ghâ, yi fwu na à kəta Sàkàliyà hi lye nyòk yi leŋ a ndâ Fùyèn. 10Yu kpen wù lyi hi nyòk, ghɨt à jɨ̀m ndokò a bɨn hì jə̂mà. 11Kə ni, anjèl à Bâba bûŋhì fwu timi a ngwùŋ à baŋ afa a ghɨ ndùku nyôkà leŋi atɨ̂n, a bàh à kpen wu wo ta. 12Ni te wù yena anjèl ye ni, lɨmalɨma bâh wûn, fânì fî kwo wûn. 13Biyani anjèl à Fùyèn yê jis ha wun na, “Kə wò fan a Sàkàliyà, beka Yènfù ti yu jə̂m yâ. Ywî wâ Èlisabèn nè bwəlò wan wù lɨ̂mà ma wò nê chwu yet yi wuni na Jon. 14Wò nè hì saŋlê nâ jûŋ kum nì bên yì wan àtɨni ma ghɨt a dona nê hi boŋa saŋlê kum nì bên yì wuni. 15Beka wù bè hì koknelò a Bâba ashyə̂, ma wù bê hi nyo wi lùkû nâ hakoh ma wù bê hi mô ma wù ti lun nì Yohnà Yulena a wun yi təm kə nè wun a wù là. 16Wù bè nê ma wana Isalì kahà ben ha Bâba Yènfù ghɨna fu. 17Wù bè hì bênà a Bâba ashyə̂ nì chyəna nì jyaka Fùyènà kəbi yi ghəl te Ìlajà, hi nì na be mwəlà bakti chyəna nì wana ghɨna, hi fè nì na ghɨt ghe a ghɨ ta nì tu kahà bona nì tofu te ghɨt ghe a ghɨ kpene, wù bê nê gha ghɨ̂n hi gàmtì na ghɨta bakti hi fye Bâba.”

18Sàkàliyà ki buf ha anjèl à Fùyèn yê nâ, “Mu mò hi khɨlî yàni na gha yina mù hamok agha? Ma ghàh à ywê mù ti jûn nâ haŋaŋ.”

19Anjèl àtɨ̂n jis na, “À mô mù, Gabliyà a mu we mu mò a Yènfù a ngwùŋ. À tum Yènfù mu na mu bê fokti tum yì jùŋ yìna ha wò. 20Wò hi khə na wò nè kwûkàlò hi bè tàn a wu tuk afa gha yîn bè gânà beka wò tà bimi jə gha ye mu jìsa. Biyani yi bè kpenalò kə wu yu afa ghɨ tì lèma.”

21À ndùku mô ni, ghɨta yute Sàkàliyà a bɨn, kana nâ wù bìti lala ghə a ndâ Fùyèn ni agha? 22Sàkàliyà fwu ben hì fè jîsà wi ha ghɨt ghê, hì jîsà kə nì wo ha ghɨta. Ghɨt atɨna khɨli chin na anjèl ti chwûtì gha a wun a yi kə̀k a ndâ.

23Te tuk mù fèt mù tɨ̂n tì me, wù kaha kolo a wun a bɨn. 24Te tuk mù tɨ̂n tì chyàla, ywê wûn Èlisabèn timi wu lâ let a ndâ a sù njoŋ sù tân jîsà na, 25“A ni kə̀kà nâ mu ni. Bâba ti ni gha kanani ha mu; wù ti ghaŋ gha fihi wumînì a mu a tû. Wùt lè bè fê chyəka wi mù.”

Ghɨ fôktì bwɨ Jisòs

26À ndùku mô te Èlisabèn ndùku mô wu lâ njoŋ tufa, Yènfù fî tum anjèl à wûn Gabliyà na wù yen a yi tèk yi yile a yi lak yi Galìlî, ghɨ toŋte na Nasalì, 27na wù yê yen wan wù ngòn wùlè wu baha mô teka wù khɨli wùt lɨmà, ghɨ toŋte na Mèli, ma wùt ti fo tabaŋa a wun a tû yet yi wuni mô Josèf, a mô wùt a Defìt a yi sah yi nda. 28Wù yen yen wûn jis na, “Mu wu toŋte bênà a nàk tum, Bâba mò ghàn à wûn!”

29Gha tɨni fumhi Mèli nâ haŋaŋ, wù hì kana nâ a mò yìni nki toŋtî ni agha? 30Biyani anjèl mu yê jis ha wun na, “Kə wò fan a Mèli, Yènfù ti fo wò. 31Wò hi khə na wò nè timelò wu lâ ma wò nê bwɨ wan wù lɨmà ma ghɨ nê chwu yet yi wuni na Jisòs. 32Wù bè hì bəma kə ni, ma ghɨ bê hi toŋte wun na Wâ Fùyèn fu ngaŋte fu, ma ghɨ bê toŋti wûn ma fo kpok wu tu fə̀n wù bè wûn ha wûn a mô kpok wu Defìt. 33Yi chwûtè na, wù ti kwok fə̂n wu Jakòb wu nda hi faŋa kə yi fâŋ. Fə̂n wu wunu bè hì kəta wi gokhini.”

34Mèli ki buf ha anjèl à Fùyèn yê na, “Yìna mò hi gàn nâ yàni mu khə wi wùt lɨmà agha?”

35Anjèl à Fùyèn yê fîsì ha wun na, “Yohnà Yulena nè bê lò ha wò ma jyak a Yèn fe a fu ngaŋte kpene ma ghɨ nê ben ha wò, yi chwûtè na wan wunâ bè lô kə nâ ha Yènfù ma wù ben. Ghɨ bè hì toŋte wûn na Wâ Fùyèn. 36Yên lê nâbi wùt wâ wù ndâ Èlisabèn, ti boŋ wan yi jùn nâbi te ghɨ ndùku jîsà na wù mò a kân, chin hì mô njoŋ tufa. 37Yi chwûtè na gha yile wi hi bè ghak a Yènfù.”

38Mèli ki jîs na, “À hi mô na yi kəta hi tè mò te wò jìsa beka mu khə na mu mò kə a Bâba yi dèt yi làŋ.” Anjèl à Fùyèn yê lô.

Mèli yen hi jikte Èlisabèn

39Mèli lô kə mu tuk afû nyâŋhì yen a yi tèk yile a Jùdiyà a yi lak yi sù kuni. 40Wù yen lye a Sàkàliyà a ndâ toŋti Èlisabèn. 41Yu we Èlisabèn tì ywo toŋti wuni, wan shɨŋ a wun wù là. 42Èlisabèn lun nì Yohnà Yulena ki jîs a jyə̂ yì tâ na, “Yènfù ti bonhi wò chyâ ywen à jɨ̀m, fî bonhi wan we wù mò a wo wu là! 43Mu mò nâ nde shyəma nè Bâba mù ben hi jikte mu? 44Yu we mu ye ywo toŋti ya, wan ti shɨŋ a mu wù là nì saŋlînì mu ti yû. 45À mò yi saŋlî ha wò te wò bime na gha ghe Bâba Yènfù jìsa na ghɨ kpen nâ à jɨ̀m.”

Mèli kokhi Bâba

46Mèli yîmì hi tè tuma tukum ha Yènfù jyâna:

“Təm a ma fo yi kokhî ha Bâba,

47fê saŋlê ha Yènfù, Bònhì à mì.

48Beka wù ti chwok mu a wùt a wûn wù fèt nâbi te mu kwok a kpene wi ha shyə̀ ale.

À bè hì kwoka bênà nâbi yìni ngwàk, toŋte mu na yi saŋlî,

49beka Bè jyak à jɨ̀m ti nî gha kanana ha mu.

Nâ wùt lè wijə te wûn.

50Seni kwo lò wûn

nâbi ha nde we wù fânà wûn hi yê tàn nâbi yini.

51Wù ti chwûtì jyak a wuna,

banhi sah a ghɨt ghe a ghɨ kəta ghaŋhi wùni a ghɨna təm.

52Wù ti chwohi fə̂ntù a ghɨna mu kpòk,

tuk a ghɨt a yuma.

53Wù ti yəhi ghɨta jiŋa nì mwə̀ mù jùŋ, ghɨna yə̂ kwut,

biyani jum kə yi jûm ghɨt ghe a gha wi shyə ale.

54Wù ti yɨ̂ŋtì chwunu wunu ha wùt à wûn wù fèt a mô ghɨt a Isalì,

kwohi seni ha ghɨna

55kə yi ghəl te wù tì jìsa ha be ghàhnà ghɨ shyə Ablàhâm,

nì ngwìk à wun yi sah yi nda, na yi nè chwûtèlò seni kwolani ha ghɨna yu mù jɨ̀m.”

56Mèli jis ni, chyə ghê Èlisabèn njoŋsù tât ki kaha kolô.

Èlisabèn bwɨ Jon Fo Mòlû

57Yu bwɨnu Èlisabèn tì kpên, wù bwɨ wan wù lɨmà. 58Ghɨt ghe ghɨ ndùku chyə kûmhè ha wûn nì sah yi nda wuni yu jùŋ a yi gha yi chik ye Bâba ne ha wûn hì boŋa saŋlê.

59Tuk mù chyâ sàmba, à hì mô a mu tuk fama ghɨna ben na ghɨ fati nam a wana hì khɨŋa hi chwù wan a bè wûn yi yet na Sàkàliyà. 60Biyani nè wûn tunhî jis na, “Yet yi wuni mò Jon.”

61Ghɨna jis ha wun na, “Jon wijə yet yani yi sah yi nda.” 62Ghɨ jis ni, ki buf a yet yi wani ha Sàkàliyà kə nì wo beka wù ndùku baha mô ma wu ti kwûkà.

63Wù buf a bâŋà nama nyak atɨ̂n na, “Yet yi wuni mò Jon.” Jwo yum ghɨna. 64Kə wu yu, chwûlù wunu yâhì, wù yîmì hi tè jìs kokhe Yènfù. 65Gha tɨni hì bəmâ ha ghɨta yi tèk afû nâ haŋaŋ, gha tɨni gbî yi lak yi sù kuni Jùdiyà yì jɨ̀m. 66À ndùku ywo nâbi nde gha yìna wu hi mô nì kani, bufa nâ, “Wan wunâ bè kwoka nâ ha ghə?” Ghɨna ndùku mô ma ghɨ ti yên hamok na Yènfù làwû a wan wunâ a tû.

Sàkàliyà jis a jyə̂ a Bâba

67Yohnà Yulena lun a bè wûn yi təm Sàkàliyà, wù jis a jyə̂ Fùyèn jyan na:

68“Kokhînì mò ha Bâba Yènfù ghɨt a Isalì

beka fu ti bên hi kina ghɨt a wuna, fî ben hi yun a ghɨna.

69Fu ti fî fo mbàŋ yì nòna ha ghàhnà

ma yì fwo a Defìt yi sah yi nda a wùt à wûn wù fètana,

70kəta fu tì jìsa ashyə̂ tohne ha fòktìsu chiksu.

71Fu tì jis na, fu bè bônhèlò ghàhnà a bànàsù ghàhnà su a wô sù jɨ̀m,

ma ghɨna bê hi fê kəta wi lumu hi mìhè ghàhnà.

72Fu nê gha ghɨ̂n hi chwùtè seni kwolani wuni ha be ghàhnà ghɨ shyə

nì hi fè chwùtì na, fu baha kwâktè kə yi kwâktì chwunu wunu we wù tì chwùne ha ghɨna.

73A mô mu kân me wù tì yə ghê bè ghàhnà wù shyə̂, Ablàhâm,

74shyəma ghàhnà fwo mihi a bànàsù ghàhnà sù wô nâbi wùni yu

nê fêt yì wuni fê fânà wi,

75yulê mô kə chilichili a wun ashyə̂

nâ shyəma tuk mù ghàhnà bê kwok à yê mi.

76Ha wò wâ mù, ghɨ bè hì toŋte wò na fòktì wù chìk a wù Fùyèn fe fu ngaŋte kpene

beka wò bè hì yênà ashyə̂, fate lumu,

Bâba bênà a wò yi bàm,

77fo wu tof ha ghɨt a wuna shyəma ghɨna bê bon,

a wu yu afa ghɨ lèhìfo besu ghɨna su.

78À bè nê seni kwolani ghakani Yènfù ghàhnà fù

na yuchwî yinâ sat a ghàhnà tû.

79Hi fo yi bân ha ghɨt ghe ghɨ mô a fùtɨ̂n à bɨn a finana, lîŋhè a yi kpo bakhe ha ghɨna,

hì fè chwùtì lumu yutenu ha ghɨna.”

80Wâ Sàkàliyà wùna tî ləmâ hì ta a tu lum tù jɨ̀m. Wù hì chyə yi lak yi sùsi hi bè tàn a wu tuk afa wù tì chwùte ngɨŋ à wûn ha ghɨt a Isalì.

Currently Selected:

Lûk 1: bmv

Highlight

Copy