Mâk 16

Jisòs lôtì yi kpû

(Mat 28.1-8; Lûk 24.1-2; Jon 20.1-10)

1À hì mò te tuk wu laku chyàla, Mèli wù Màtalà nì Sàlmonè nì Mèli nè Jêms yun yûhìsu lɨmtesu hì yênà hi yuhe gun yi Jisòs atɨ̂n. 2Tuku yû wu tuk wu shyə a ngâm, ghɨna bis fwu tan yi jwô yì sì, kə te yuchwî sata bênà. 3À hì mô ni te ghɨna ye tana wu lûm, hì kante na, à nè yê bɨŋhe chyâkhè nde ti ye yi jwô yì sì ha ghɨna. 4Biyani, yen tan afû shihi ke yèn, yen ma ghɨ ti bɨŋhi chyâkhì ti yi tɨni, a mô yâ ti tɨni laha ghaka. 5Ghɨna shihi lye yèn yi sì yen walà wù kpuŋ wùlè wu mô a ghɨna kpen wu wo ta ma wù ti mak njusu fufasu, jwo yum ghɨna.

6Wù jis ha ghɨna na, “Kə jwo yim ghàn. Jisòs we ghàn khɨŋa a mô Wâ Wùt à Nasalì we ghɨ te bante ti lôtì a yi kpû. Wù wijə afân. Ghàn tà yen jə̂ luk we ghɨ tì nìŋhe wun atɨ̂n agha? 7Ghàn yê fokti ha Bità nì ha jùmtìbàmsù wunsu lesu na wu chwo yênà a ghɨna ashyə̂ a Galìlî, ma ghɨna yê yen wûn afû te wù tì fòkte ha ghàn.”

8Ghɨna fwu yi sì afû hì nyiŋa kə yi nyîŋ fê jîsà wi ha wùt beka ghɨna ndùku fânà nâ haŋaŋ chiŋtê.

Jisòs fwu a Mèli wu Màtalà yi kə̀k

(Mat 28.9, 10; Jon 20.11-18)

9Jisòs tì bɨs loti a yi kpû wu tuk wu shyə a ngâm, yitì fwu kə Mèli wù Màtalà yi kə̀k a mô Mèli we Jisòs tì jùma fihe yohnù be we a wun wu wùn sàmba yâ.#16.9-20 Ŋwàklù su mwu su dosu kəta wi luk wûn. 10Mèli yen yen ghɨt ghe ghê Jisòs ghɨ̂n ndùku mô amok, ghɨna kwohe yi sen jyê. Wù fôktì gha ye yi gana ha ghɨna. 11Ghɨna yu nâbi ya na Jisòs ti lôtì a yi kpû, Mèli ti fî yen wûn, biyani tê bime jə̀.

Jisòs fwu a Jùmtìbàmsù wunsu yi kə̀k sùbà

(Lûk 24.13-35)

12Yi bàm atɨ̂n Jisòs fî fwu a jùmtìbàmsu wunsu yi kə̀k sùbà wu lum wule hanɨ̂ŋ wu lûm a ngunsu mu fùksù. 13Ghɨna kaha yen fôktì ha jùmtìbàmsu lesu biyani nâbi ghɨna tê bime jə̀.

Jisòs fwu a jùmtìbàmsù wunsu yi kə̀k njwò yì mòk

(Mat 28.16-20; Fêt 1.6-8)

14À hì mô yi bàm atɨ̂n Jisòs fî chwûtì ngɨŋ à wûn ha jùmtìbàmsu wunsu njwò yì mòk, ghɨna yə̂. Wù njâŋ ha ghɨna beka ghɨna ndùku mô ma ghɨna ti tahi təm a ghɨna hì bime wi gha ye ghɨt ghe ye yena wûn ndùku jîsà. 15Jisòs ki jîs ha ghɨna na, “Ghàn yen luk tù jɨ̀m a mbyî ma ghàn fokti tum yì jùŋ ha ghɨt à jɨ̀m. 16À ki bime nâbi nde fyi mòlû ma wù bê bon. À ki faŋa nâbi nde hi bimî, ma Yènfù bê bobhi wûn. 17Ghɨt ghe ghɨ bime, ma Yènfù bê fo jyaka ha ghɨna ma ghɨna hi chwûtè chwènu, nê gha kanana ghɨna ni; ghɨna bè hì jûmà fihelò yohnù be a mu yi yet fê jîsà jis tu letu teka ghɨna timè hi jîsà; 18ghɨna kwo nâbi sù ywô nì wo, makə ghɨna yə lef nâ gha yile bê tè gàn ha ghɨna. Ghɨna bè hì lêmà wu wô a ghɨt a yablena tû ghɨna tâ.”

Jisòs kwok a nyə̂

(Lûk 24.50-53; Fêt 1.9-11)

19À hì mô te Bâba Jisòs jìsa mihe ha jùmtìbàmsu wunsu, Yènfù fî ni, wù kwok a nyə̂ ndokò a Yènfù kpen wu wo ta. 20[Jùmtìbàmsu lyi tum yì jùŋ yina hì fôktè yênà nì yinì, Bâba ni gha a ghɨna fùtɨ̂n kə sù chwe hi chwûtì na tum yì jùŋ yina mò kə nâ hamok. Àmèn.]

Currently Selected:

Mâk 16: bmv

Highlight

Copy