Mâk 15

Ghɨ yen nì Jisòs ha Balèt

(Mat 27.1, 2, 11-14; Lûk 23.1-5; Jon 18.28-38)

1Kə te tuku yula bana kə ni ngàŋsu ndâ Fùyènsu chiksu nì chəhsu ghê chichàsu saksu nâ nì ghɨt a sakana à jɨ̀m khɨti yi yûŋtì kum Jisòs, kwut wûn yen fo wun ha Balèt. 2Balèt buf ha wun na, “Wò mò fə̀n ha ghɨt a Jûs agha?” Jisòs fîsì jis na, “Yi mô kə yâ te wò jìsa.” 3Ngàŋsu ndâ Fùyènsu chiksu hì ngane Jisòs a ghâ ghɨ dô kə ni. 4Balèt fî buf kpenhi ha Jisòs na, “Ba wò ti yû gha ghe ghɨ ngane wò atɨ̂n ni?” 5Biyani, Jisòs tê fè fîsì. Balèt hì mô nì kani.

Ghɨ chyâhì yi sâk na ghɨ ywi Jisòs

(Mat 27.15-26; Lûk 23.13-25; Jon 18.39–19.16)

6À ndùku bê tânà wu yu afa ghɨ yə, Yə Daŋa chyalani, Balèt jis ghɨ fihi wùt à ndâ chyâk we ghɨta kòŋà na wù fihi a ndâ chyâk. 7À hì mô kəbi a mu tuk afû wùt lè mô a ndâ chyâk ghɨ toŋte na Bàlabâs. Wù mô afû ghê ghɨt ale te ghɨna tì yime nô yi tèk fî ywi wùt. 8À hì mô te nôn à ghɨta yùŋte hì jîsà ha Balèt na, wù ni kə te wù yè nê. 9Balèt kaha buf ha ghɨna na, “Ghàn kòŋà na mu fihi fə̀n à ghɨt a Jûs ma?” 10Wù buf ya beka wù tì khə na à mò kə ghə̀k, à ngàŋsù ndâ Fùyènsu chiksu na su khɨtè fo wûn ha yi. 11Ngàŋsù ndâ Fùyènsu chiksu nì nôn à ghɨ̂t ghɨ̂n, jis ha Balèt na, wù bɨlà fihi Bàlabàs. 12Balèt fî buf ha ghɨna na, “Ghàn kòŋà na mu fihi wûn ma mu ni ghə nì wùt wunâ ghɨ toŋte na fə̀n à Jûs ni?”

13Ghɨna kaha bwat jis na, “Ghɨ banti wûn a kàkfùtàfù!”

14Wù buf na, “Njwô ghə, wù bobhi nâ ghə?”

Ghɨna fî bwat yên kə ashyə̂ na, “Ghɨ banti wûn a kàkfùtàfù!”

15Balèt fihi Bàlabàs a ndâ chyâk hi nì na nôn à ghɨta tɨna hi saŋlê fo Jisòs na ghɨ sam nì wànsù shyəma ghɨ de wûn ma lyê yê banti a kàkfùtàfù.

Sojàsù hì nyikhè Jisòs

(Mat 27.27-31; Jon 19.2, 3)

16Sojàsù lyi Jisòs lyi nì wûn atɨ̂n à tôk a fə̀n wu wən ghɨ fî toŋa sojàsu lesu nâ sù jɨ̀m. 17Ghɨna mâk njusu a Jisòs wu wùn a mô njumù tùfə̀n su baŋasu, ba a fot nì tûŋtù so a wun a tû, 18yîmì hi tè bɨ̀ŋtè wûn, jîsà na, “Yu chwî satani ghɨt a Jûs.” 19Te ghɨ bɨŋa ni yîmì hì sama to wuna nì mbàŋ, chwule chwâmù a wun wù wùn, kama jyâna ghɨ ngumle wûn. 20Ghɨ nyikhì mihì wûn, chwok njusu baŋa sê ghɨ tì màka a wun wù wùn yâ, kaha mak su wunsu shyəma lyê fwu nì wûn hi yè banti a kàkfùtàfù.

Ghɨ banti Jisòs a kàkfùtàfù

(Mat 27.32-44; Lûk 23.26-43; Jon 19.17-27)

21À hì mô te ghɨna yènà, yen wùt wùlè wu lûm ghɨ toŋte na Simùn a mô bè Àlèksandà nì Lufùs, a mô wùt à Sìlên, ma wù lo a Sù ngun hì kaha kolê. Ghɨna kân na wù beka kâkfùtàfù Jisòs, 22lyi yên nì Jisòs wu lùk ghɨ toŋte na Golgotà, a mô na wu luk wu wok yi tu. 23Te ghɨna yèna ni, fo mu lûk ha wun afû ma ghɨ ti lem wəlâ le atɨ̂n ghɨ toŋte na moy. Biyani, wù tunhi hi nyû. 24Ghɨna banti wun lem njusu wunsu hì tuma byè atɨ̂n hi yen na ghɨ nè shihi jyàtè njusu wunsu ma à khɨti nde ghɨ̀ni bâhà agha? 25Ghɨ banti wun ma yuchwî kə te sata kə ni, 26Ghɨ nyak kəbi gha ye ghɨ tì jìsa na wù ti bobhî a tô bàŋ à shyə̀ ale, banti a wun a tô kàkfùtàfù na, “Fə̀n à ghɨt a Jûs.”#15.26 Ŋwàklù su mwu su dosu kəta wi luk wûn. 27Ghɨ tî bantî kəbi ghɨt a chwoŋa ale à bà a Jisòs a ngwùŋ, banti wù mòk a kàkfùtàfù a wun wu kpen wu wo ta, banti wùlè a tô ghɨ le a wun wu kpen wu wo kôwì. 28Kə wu yu gha ye ghɨ tì nyàka atɨ̂n à ŋwàklù Fùyèn na, ghɨ tî taŋ wûn te wut wù mòk atɨ̂n à ghɨt afa ghɨ khɨma saki.#15.28 Ŋwàklù su mwu su dosu kəta wi luk wûn. 29Ghɨta hì chyâlà wu lum shikà wu tû sûlè wûn, jîsà na, “Ba wò chehì jîsà na wò làwû hi shyàktè ndâ Fùyèn yì chìk hi kaha ba a mu tuk mù tât agha? 30Bònhî lê ngɨŋ yâ chîn, ma chwo a kàkfùtàfù ma ghàh yen!” 31Ngàŋsu ndâ Fùyènsu chiksu nì chichàsu saksu hì boŋa nyikhè kəbi Jisòs, jîsà kə ghɨna fùtɨ̂n jyâna, “Wù chehì bônhè à ghɨ̂t chin wu mô bu hi bònhè ngɨŋ à wûn. 32Ghàhnà yen te we ghɨ chwoka lema te fə̀n à Isalì, chwo a kàkfùtàfù chîn ma ghàh ki bimi ha wûn.” Ghɨt ghe ghɨ ndùku mô ghê Jisòs yâ hì boŋa sûlè kəbi wûn.

Jisòs kpû

(Mat 27.45-56; Lûk 23.44-49; Jon 19.28-30)

33Te chwì bana ta kə ni luktu kaha fin kə tù jɨ̀m, ne fî kaha ban kə a leŋ a mbɨŋlu sù tât a bɨn a bonana. 34Jisòs bwat jis kə nâ a jyə̂ yì tâ wu yu afû na, “Èli, Èli, lamasàbàtanì?” Ma wù ya jis na, “Yèn famfu, Yèn famfu, njwô ghə te wò yìta mu?” 35Ghɨt ale ghe ghɨ ndùku mô afû, yu ni jis na, “Ghàn yu te wù hì toŋte Ìlajà.” 36Wùt lè nyiŋ yen lyi kùncha chwu a mu lùk ma mù ti tâ, fahe a jwô fùkàk hì fo kokhe yê na wù nyu, jîsà na, “Ghàhnà yen na Ìlajà nè bê chwohelò wun agha?” 37Jisòs khək jyə̂ tum a yohnà gokhena. 38Bâh à sù nju ghe a ghɨ tì ghaŋhe na ghɨ jyahi ndâ Fùyèn yì chìk wu bàh wù bwà, bâhà kə fùtɨ̂n, fùtɨ̂n hi yìmì a tô, hi chwo fwu a yi sah. 39To sù sojà ghe ghɨ ndùku mô afû yen lum we Jisòs kpo atɨ̂n ni, ki jîs na, “Hamok wùt wunâ ndùku mô kə nâ Wâ Fùyèn.” 40À ndùku mô yâ ywen ale ke bênà ha ghaf, a mô Mèli wù Màtalà nì Mèli nè Jêms wù tetana wâ nè Jisòs kəbi nì Sàlmonè. 41A ghɨna ndùku gâmtè Jisòs te wù ndùku mô a Galìlî, jûmtì bên nì wûn a Jèlusalèm. Ywen ale ndùku mô nâbi afû ma ghɨ lo Jèlusalèm kwok a Jisòs yi bàm dô kə ni.

Ghɨ gumà Jisòs

(Mat 27.57-61; Lûk 23.50-56; Jon 19.38-42)

42-43À ndùku mô yê te wu yu kolô wu tuk afû, a ghɨ ndùku bakte na tuku yu ma ghɨ yə tuk wu laku atɨ̂n, Josèf a wut wù Àlìmàtiyà ben kwut a təm yen jis ha Balèt na, yi khɨŋa hi lyè gun yi Jisòs hi gùmà. Josèf wuna tì tâ atɨ̂n à ghɨt a tihena, chyə gbûtè yu we Yènfù bè yîmè hi saka mbyî atɨ̂n. 44Balèt hì mô ni kani nâ Jisòs mò ma wù shyə kpû agha, wù tum toŋa to sù sojà buf ha wun na, Jisòs ti kpû hamok agha. 45Wù bimî. Balèt fo a jyak na Josèf lyi gun yi Jisòs. 46Josèf yun a mbalaŋ, yen chwohi gun yi Jisòs a kàkfùtàfù, lɨm nì ghɨna, gumàlò a yi sì yile ma ghɨ chuf yi wo, gumà yâ bɨŋhi yi ti yile baŋ yi jwo yi sì tɨni. 47Mèli wù Màtalà ghê Mèli nè Josìs hì ke yênà luk we ghɨ guma Jisòs atɨ̂n.

Currently Selected:

Mâk 15: bmv

Highlight

Copy