Lûk 3

Yiki Jon Fo Mòlû

(Mat 3.1-12; Mâk 1.1-8; Jon 1.19-28)

1-2À ndùku mô te Tàbeliyùs saka te fə̀n wù chìk a Lûm, à hì kwoka yênà lɨ̂m njwòsù tân, tum à Fùyèn ben ha Jon wâ Sàkàliyà, a lak yi Sùsi. À ndùku mô ni, ma ghɨ ti lem Bontiyùs Balèt na wù hi saka bâh à lak ale ghɨ ndùku toŋte na Jùdiyà, Helòd hì saka Galìlî, wâ nè wûn Filîp hì saka bâh à lak ale ghɨ toŋte na Ìtulìyà nì Tìkanotìs, Làsinàs hì saka Àbilèn. À hì mô a mu tuk afû, ngàŋsù ndâ Fùyènsu su ngaŋte su ghɨt a Jûs mô Anàs ghê Kàyafàs. 3“Jon fwu yen a bi jwô à Jodàn, hì gbê kata kə lak tu tɨntu tù jɨ̀m, fôktè tum à Fùyèn yinâ, jîsà na ghɨna kahi təm a ghɨna, ma ghɨ fyi mòlû ma Yènfù nê lehêfo besu ghɨna su. 4Yi mô kə yi ghəl te fòktì Ìsayà tì nyàka na:

Wùt lè toŋa jîsà yi lak yi Sùsi na,

Ghàn fati lumu Bâba;

ghàn fati lumlà mù wûn, ma mù hi nânà.

5Nâbi ghɨ̀ni foŋlana kəta hi lûn,

kunsu chiksu nì su tetasu chwo.

Lumtu ngonletu kəta hì nàntì,

na ghɨ lunhi bùklàmù a tu lum nâ tù jɨ̀m ma luk tù jɨ̀m hì mô yi bat.

6Ma nâbi nde bê yen bôn yê Yènfù bè bê nì yini.”

7À hì mô te nôn à ghɨta fwo bena hi fye mòlû, Jon njaŋ ha ghɨna jyâna, “Ywosu be sîn, a ghàn tobhi nde na ghàn momhi hi teta ngə̂k ye Yènfù khɨŋa hi tum ha ghàn? 8Ghàn mu tamu a ghàn a sù chyənà hi chwùtì na ghàn ti kahi təm ghana a ghàn a sùbe. Kə ghàn hi kwâktè na ghàn làhi tet a ngə̂k à Fùyèn yina beka ghàn jìsà na, ghàn mò wana wana Ablàhâm. Mu fòktè ha ghàn na, Yènfù làhi nì ti ghɨ̂n kahi ha mwəlà, ma wù fo ha Ablàhâm. 9Ghàn hi khə na njàm làwû a sah à mù kàk kə nâ chîn ma à faŋ nâbi fùni kâk fù hi mo tamu jûŋù, ma ghɨ bê gbet à mak wu wùs.”

10Nôn à ghɨt ghe buf ha wun nâ, “Ghàh ti nê nâ ghə chîn?”

11Wù jis ha ghɨna na, “À hì kəta nâ nâbi nde nju sùbà, wu fo sù mòk ha wùt we wù kəta wijə hakoh, à hì kəta nâbi nde mwə̀ mù yə̂mù, wu jyatì fo ghɨt ale.”

12Ghɨt ghe ghɨ ndùku fenà ŋwàklànà boŋ ben hi fye mòlû buf ha wun nâ, “Ghàh ti nê nâ ghə a Chichà?”

13Wù boŋ jis ha ghɨna na, “Kə ghàn fi ni na wùt lak ka ŋwàklànù wu chyâ te wu kəta hi tè mò.”

14Sojàsù boŋ ben hì bufa na, “Nâbi ghàh ni ghə?”

Wù jis na, “Kə ghàn fî fyi shyə ha wùt ha jyak, kə ghàn fi jis na wùt ti ni gha teka wù ni njwô ghàn khɨŋa shyə ale. Ghàn hi yə kə ka we ghɨ lâkà ghàn atɨ̂n.”

15À nê hì mô te ghɨta hì ke Jon hì nyama kana kə ghɨna ngɨŋ nâ a mò wun we a ghɨ chwoka lema ma. 16Jon kahi jis ha ghɨna à jɨ̀m na, “Mu fo mòlû ha ghàn kə nì mòlû mu jwò, biyani wùt bènàlò a mu yi bàm chyâ mu, mu kpene wi hi tè fèt te kwôs ghe ghɨ mô hi yèntè kùlsù gwusu wùsu wunsu, wù mô hi bè fo mòlû ha ghàn nì Yohnà Yulena, nì wusu. 17Nâ chîn, wù kəta khət à khɨ̀ŋa à wûn, a wun a wô hi febti a saŋ hi lèm a wun wu tân, biyani ma wù nyok kpûlànù wu wùs wu bame limne wi.”

18Wù jis ni, hì fôktè tum yì jùŋ ha ghɨta kaha tobhe ghɨta a tu lum tu dô kə ni. 19À ndùku mô ni, ma Jon ti njâŋ ha Helòd we wù ndùku saka bâh à laka ale, a mô te wù khɨte fye Hèlodiyà, ywê wâ nè wûn, fî ni gha be ale. 20À hì mô te Jon njaŋa ha wun ni, wù fî ni kə yile kwo fa Jon a ndâ chyâk.

Jisòs fyi mòlû

(Mat 3.13-17; Mâk 1.9-11)

21Gha mɨ ghɨ̂n ndùku shihi gàn ni, ma Jon ti fo mihì mòlû ha ghɨta, wu tuk wule Jisòs bên, wù boŋ fo mòlû ha wûn, wù hì jə̂mà. Kə ni, nyə jîmì. 22Yohnà Yulena chwo ben a wun a tû kə te fùlàtà, jyə̀ fwo a nyə̂ jyana, “Wò mò kə nâ Wâ mù wù kòŋ, mu saŋle kum wò hanɨ̂ŋ.”

Be Jisòs ghɨ shyə

(Mat 1.1-17)

23Jisòs ti shihi yìmì fêt yi wuni a chyə afân, mô wu lɨ̂m mtât, mô wâ Josèf nâ te ghɨta ndùku kwâktè, ma bè Josèf ndùku mô Helì, 24Helì mô wâ Matàt, Matàt mô wâ Lefì, Lefì mô wâ Melkì, Melkì mô wâ Janay, Janay mô wâ Josèf, 25Josèf mô wâ Màtàtiyàs, Màtàtiyàs mô wâ Emòs, Emòs mô wâ Nawùm, Nawùm mô wâ Èsilì, Èsilì mô wâ Nagày, 26Nagày mô wâ Mât, Mât mô wâ Màtàtiyàs, Màtàtiyàs mô wâ Simùn, Simùn mô wâ Josèk, Josèk mô wâ Jodà, 27Jodà mô wâ Jùwanàn, Jùwanàn mô wâ Lesà, Lesà mô wâ Sèlobabèl, Sèlobabèl mô wâ Shetlèl, Shetlèl mô wâ Nelì, 28Nelì mô wâ Melkì, Melkì mô wâ Adì, Adì mô wâ Kosàm, Kosàm mô wâ Èmadàm, Èmadàm mô wâ Êl, 29Êl mô wâ Joshwà, Joshwà mô wâ Èliyesà, Èliyesà mô wâ Yolìm, Yolìm mô wâ Matàt, Matàt mô wâ Lefì, 30Lefì mô wâ Simùn, Simùn mô wâ Judà, Judà mô wâ Josèf, Josèf mô wâ Jonàm, Jonàm mô wâ Èliyakìm, 31Èliyakìm mô wâ Mìliyà, Mìliyà mô wâ Menà, Menà mô wâ Màtatà, Màtatà mô wâ Natàn, Natàn mô wâ Defìt, 32Defìt mô wâ Jesì, Jesì mô wâ Obèt, Obèt mô wâ Bowàs, Bowàs mô wâ Salmùn, Salmùn mô wâ Nashòn, 33Nashòn mô wâ Àminadàb, Àminadàb mô wâ Adɨ̀mîn, Adɨ̀mîn mô wâ Anì, Anì mô wâ Hesilòn, Hesilòn mô wâ Belìs, Belìs mô wâ Judà, 34Judà mô wâ Jakòb, Jakòb mô wâ Isìk, Isìk mô wâ Ablàhâm, Ablàhâm mô wâ Telà, Telà mô wâ Nawò, 35Nawò mô wâ Selùk, Selùk mô wâ Lû, Lû mô wâ Belèk, Belèk mô wâ Ebà, Ebà mô wâ Shelà, 36Shelà mô wâ Kenàn, Kenàn mô wâ Afasàt, Afasàt mô wâ Shêm, Shêm mô wâ Nuwà, Nuwà mô wâ Lamèk, 37Lamèk mô wâ Mètuselà, Mètuselà mô wâ Enòk, Enòk mô wâ Jalèt, Jalèt mô wâ Malalè, Malalè mô wâ Kenàn, 38Kenàn mô wâ Enòs, Enòs mô wâ Sêt, Sêt mô wâ Adàm, Adàm mô wâ Fùyèn.

Currently Selected:

Lûk 3: bmv

Highlight

Copy