Акълова 19
19
19 къаьм
1Аᵸцона эᵸкье-гогьцас мискин-сукӀо кӀетӀо гей,
сикӀаъ гьилла-макрояб мицна, къаьмиъ аᵸкълона гаьчча сукӀогъа.
2Илмо-лъайлил гьино гаьччо къаьмна кӀетӀо гаьъа,
хаьба йилӀа багъоцас хих тӀотӀечӀена,
хаьба на̄ди мехечӀена гьихлъаъас.
3Гьинилазу аьнтлъила инсан угъолца,
амма гьолцола йакӀи БетӀергьалликьа симо бо̄с.
4Бечелъила вацца̄на тели бовагьца,
амма мискинлъила гьоᵸс га̄ьгьийо ваццана ата̄кӀца.
5ОᵸтӀолана нуьълъи йо̄йо сукӀо тамбигьлиъис тиса уьᵸхаъаш,
мекъаб йаьже нисоцас сукӀона хъосар ахъаъас.
6Телила гургьел-раьгьмо гьарзи бо̄с, гьаькимла̄дой аьᵸйда̄на бечена,
тели сайгъатла нийаццала̄сна гьалмагълъилаъ сукӀоназу ахъца.
7Мискин-сукӀо къацӀцӀола исна̄нна атӀаъас,
вацца̄на гьолцодойс йилӀазу ата̄ боьчош.
НилӀийо йаьже гьоᵸсна тӀубази йоваъцала
гьоллогъой муьгъалӀна гьихлъос гьули.
8Гьинил жу аццала аᵸкъло-лъай тӀалаб бо̄с,
гьинилзу кӀетӀослъилал аᵸкъиллъилаъна цӀодорлъилаъна эчеш гьули.
9ОᵸтӀолана нуьълъи йо̄йо сукӀо тамбигьлиъис тиса уьᵸхаъаш,
мекъаб йаьже нисоцас сукӀона хеллиъис тиса уьᵸхаъаш.
10Аьбдалликьа гьарзалъи-бечелъи кьухъаъас,
йилӀазу кьухъаъас гьаькимла̄кьа кьодо лагъли ханлъи йо̄йолъи.
11Инсаллила аᵸкълола гьолцос сабру букъкӀис,
аьйибликьас кьодос тилӀкийо инсан ца̄ᵸ йеᵸкьейо ахъца.
12Пачалис симо бӣйолъи йеᵸлъейо йахъца гъалбацӀлила хъаьлӀейалъ,
гьолцос кӀетӀо говацӀо̄йолъи йеᵸлъейо йахъца бохакьа йекийа хидалалъ.
13Аьнтаб оьжо ахъийолъи абос талигь бугъойолъи гей,
сикӀо чикейо ахъо – гьоᵸсна йолъечӀе кьамакьас гугьцас ахатӀо гей.
14БилӀо-аᵸхна маъишатна ийо-абохъас йиᵸхъойо ирс гей,
амма цӀодораб ахъо БетӀергьаллис сайгъат гей.
15КӀаълъила милӀаъ бовахца,
огьда̄л атӀаъцалас оᵸх нукона гьихлъос.
16БетӀергьаллила амролакьа уьᵸхо-аьᵸхецала гьинис руьгь цӀуми бо̄с,
Гьолцос гьино йохеэшна угъос.
17Мискиллил нилӀийо садакъа йахъца БетӀергьаллил нагьлъилаъ нилӀийо окко,
йо̄йо кӀетӀослъи Гьолцо йоцӀечӀе йечаннейаъас.
18Укълъал аьᵸйда̄ бова оьждил адло, бетана аьдада угъос гьули.
19Симо бигьцалал тамбигь бовал нуцӀос,
вагьаллийа сукӀокьа дибо йакӀо йугъона йилӀазу нигъади йахъда,
букъо тамбигь бовал нуцӀас.
20Нисо̄ йоха, насигьат аьᵸдалаъ мейа,
дулзу аᵸкъло мокъал.
21Инсаллила йакӀиъ тели къасдла йа̄хъца,
амма БетӀергьалли чахийова̄ъ йахъаъас.
22Йолъаъцала гургьел-раьгьмоли инсаллис йакӀо рази йо̄с,
оᵸтӀола̄лъилагъа мискинлъизу ахо гей.
23БетӀергьаллихъа гьичӀейа оьмро цӀуми бо̄с,
оᵸх йоцӀнана ахъца гьули, кешлъина йеᵸхаъас гьолцолъ.
24КӀаъабли ко̄ хаьтӀаъ йечаннеш,
амма кьа̄ь сикӀадой гьули йезал гьолцол загьмат йахъца.
25Йаьгь-ламус гаьччо сукӀо зукӀна-аькьелда кьолла̄ аьдамла цӀодорабла ба̄хъца,
аᵸкъло гаьгьийал малъзи йова – гьолцол илмо-лъай михъос.
26Абос адаб боваъцаласна, ийо гиса йоццаласна
оьжо инжит-гьаькъир ахъца.
27Малъилахъа энекзи ахъаъда
илмо-лъайлидойс ата̄кца, дие оьжо.
28Гьилла-макро гаьгьийо нуьъ битӀараб гьоькмо бо̄вакьа кьодо лъоᵸвас,
лъаькъейа сукӀос сикӀо кӀортӀолла̄с йоцӀийо йахъца.
29Йаьгь-ламус гаьчча сукӀоба̄л тамбигь-жаза кьодо йоᵸкъал гьаьдурса йахъца,
аьбдалла̄ла михъа̄кьа йаькьелал кӀобала̄на гьаьдурса йа̄хъца.
Currently Selected:
Акълова 19: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
