Акълова 20
20
20 къаьм
1Гъино йаьгь-ламус гаьччо жо бахъца,
чӀаъа гьалагаб жо бахъца.
Гьолло къонина къосси о̄васна аᵸкъло болъос.
2Пачалис симо бӣйолъи йеᵸлъейо йахъца гъалбацӀлила хъаьлӀейалъ;
гьолцос симо бийиллицала сукӀона хел кьодо кьисас.
3Даьъба йаьжиъис ата̄ эчелъ инсаллис къадро кьодда̄кца,
амма аьбдаьллихъа гьоᵸсна йахъаъас гьинилзу йогъо гунна.
4КӀаъабли муькъо гьинила замаллиъ йиᵸзаъас,
муькъо-бох йуьгьчалаъ,
гьули муькъо йиᵸзал уьᵸхолъча, амма гьоьшшона йиᵸхъаъас.
5Инсаллила йакӀис ният-къас гилъилло ралъад гей, цӀодорабли сукӀол гьолълъос оᵸкьо йиᵸхъос.
6ЙакӀо-божи гаьгьийа̄ сукӀоба жуво̄л гейлӀо нисона илӀелабацас аьдаьмла тели ба̄хъца,
амма божи гаьгьийо сукӀо иᵸхъонна лъо̄хъад ахъца?
7Муъмин-сукӀо гьаьлаллъилаъ эᵸкье-го̄с,
гьардарабла гаьъад гьолцоъкьа̄ ба̄хъийа̄ къована.
8БитӀараб гьоькмо бовал тахликьа къе̄ эчейа пачали,
гьаьй йеᵸхенна, къацӀцӀо кешлъи лъацаййацой исиъца.
9Лъо̄хъад нисона йахъца до дие йакӀо йаᵸцонна цӀуми йогьналӀо нисона,
до мунагьлиъис аᵸцойо гейлӀо?
10Ахо йаᵸсалаба̄ъцас гирийана, йаьᵸшекӀийо йокьна БетӀергьаллил йа̄тӀаъас.
11ИтӀина̄кьа бехъхъа гьолцола ишла̄хъана говацӀона йикъеш –
йаᵸцо̄ди, ритӀухъабди гей гьолцос уьᵸхо-аьᵸхейолъи.
12Тухъал аьᵸгъана йега̄л гьаьйна БетӀергьалли йахъилло гей.
13Дул малӀо йатӀа̄къа – мизу мискин ахъца,
гьаьйда йеᵸйагьенна йечабаннейа – баьба-цаᵸ телилъца.
14Йиᵸсона йохцалаъ нӣйоди гейлӀо, нӣйоди гейлӀо нисос,
амма гьули йохна муьгъатта̄ кӀетӀо гейлӀо нисос.
15Меседна гей, жавгьар-якъутна тели гей,
амма цӀодораб сикӀо нигъади-судийа̄ъ йиᵸхъаъас.
16Йагъа кьодос лъицӀо сукӀола сукӀос жо кьодо йохийа сукӀохъас.
Багъа балӀо гулло къай сукӀола сукӀос жо кьодо бохийа сукӀохъас.
17Гьаьрамаб баьба аьдамлил нийалъца,
амма бета гьолцос сикӀо кӀаьчлис йоцца.
18Аᵸкъло мелъелда, мурадлиъ оᵸкъас;
аᵸкъилла̄гъой ургъизи ахъна̄ъ, рагъна бова̄къа.
19Мицахъалли божилъи йугъолца;
сикӀо тели йеᵸгьцаладойс ата̄ эче.
20Ийо-абол наьъана ниццала сукӀос
лампа бишун колӀлӀа мицаъ йедца.
21Гьех михъова боцӀи-ризкъилакьа ахирна баркат гулаъас.
22«Ми йо̄йо кешлъи до йоцӀал», – лӀо ниса̄къа.
БетӀергьалликьа тӀутӀна йечаннейа, Гьолцо комак бовас дул.
23Ахо йаᵸсалаба̄ъцас гирийана БетӀергьаллил йа̄тӀаъас,
гьилла-макрова гагьийа̄ сайцӀорийана Гьолцол йа̄тӀаъас.
24БетӀергьаллис амро гаьчӀел инсалли хаьба багъаъас.
Нигъад гьолцол йикъеш гьинила гьиноли гьули на̄ эжецасна?
25Пикро бойчӀе гьоᵸс жо БетӀергьаллил назрона йогьна,
бета до сийод йо̄йолӀо нисоваъкьа̄ инсаллил къор гулца.
26Аᵸкъилабли пачали лъаькъейа̄ аьдамла лъацаййацой исибаъца,
бета гьоллокьа кьодо йал йолца.
27БетӀергьалли инсаллис руьгь лампаладцой бабалокӀца,
гьолцола йакӀила оᵸкьаъ гаьгьийасна гьаьл бикъелца.
28Гургьел-рагьмолана божилъилана цӀуми о̄с пача,
кӀетӀослъилана гьолцос тах цӀуми бо̄с.
29Оьлохъалла̄л машгьурлъи гьидела къуват-жалли йиᵸхъолца,
ицила̄на гьаьлдийа кеᵸйа̄ кьухъийа̄ бовагьца.
30ЗукӀна-аькьеллахъа лъаькъейо сукӀо кӀетӀлъис,
лаьхъла̄на гьолцос йакӀо йаᵸцойо йо̄с.
Currently Selected:
Акълова 20: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
