Акълова 21
21
21 къаьм
1Пачалис йакӀо БетӀергьаллила ихтийарлиъ гей.
ЙатӀа̄цо эᵸхейа йеᵸйагьцалаъцой,
Гьолцо пачана гьинил атӀгъа уьᵸхо-аьᵸхелца.
2Шибабли сукӀол гицца гьинис гьино йаᵸкъойцӀойо гейлӀона,
амма БетӀергьалли йаᵸсас гьолцола йакӀиъ гаьгьийо жо.
3Къурбан муховагъана хирияб гей БетӀергьаллидой аьᵸйда̄
ритӀухълъи цӀуми йо̄йолъина
аᵸцогъа уьᵸхо-аьᵸхейолъина.
4Гьаьйда̄ш чӀугьина йакӀис пахрулъина –
гьула лъаькъейа сукӀоба̄с лампа, вагьлина мунагьаб гей.
5КӀаълъи гаьчча̄ пикро-къасла̄ пайда-хайирлиъ бейажеш,
эдеъзи ахъийолъила мискинлъилаъ бейажеш.
6ОᵸтӀолана бокӀолло хазина – залӀи бежена мекьецас готӀ гей.
Вагьаллийа хазинали хел кьодо кьисас.
7Лъаькъейа аьдамла гьидела зулмо-гьаьлли пасад бовагьца,
йаᵸкъойцӀова гьидкьа̄ мекьаъцас гаьлълъо гьолло̄л.
8Аьйиб гаьгьийас гьино чӀикӀ-чӀекӀдийо йахъца,
аьйиб гаьччаш ишла кӀетӀа̄ йа̄хъца.
9Кьамала кьохъкьа оьмро бо̄йолъи ахо гей,
сикӀо чикейа ахъхъагъой къацӀо сид билӀоъ эчейагъа.
10Лъаькъейа сукӀоба̄ла йакӀиъ чикейа къасла йа̄хъца,
мадугьаллинна михъаъас гьолцоъкьа̄ гургьел-раьгьмо.
11Йаьгь-ламус гаьчча сукӀол тамбигь богьцас бегада,
кьолло сукӀона цӀодор ахъца.
ЦӀодораблила малъилахъа энекзи ахъда,
илмо-лъай михъос.
12Лъаькъейа сукӀола билӀоъ йахъцассинаб йегацас
ритӀухъабли Аллагьли гьули пасад о̄с.
13Мискиллис аьгьи тухъечӀе бахъалъгъа аьᵸгъалакьа ко̄ гулцас сукӀо ахирна жузу илӀела̄л уьᵸхолъча,
амма лъона гьолцол жаваб нилӀаъас.
14Бадлол бикъелечӀе нилӀийа сайгъатли симо болъолца,
аᵸгъаъна гунна бакъова ришватли симолис цӀо йедилца.
15БитӀараб гьоькмо бо̄лъ муъмилла рази ба̄хъца,
кешлъи йогьцалал гьинкъи йоᵸкъолца.
16Аᵸкъиллъила гьидсо оьчойо сукӀо бувагъова̄ла агьлолаъ эᵸдо ахъца.
17Ихтилат-кеп баццас сукӀо язихлъилаъ оᵸкъос,
гъинона маьгь кӀетӀо йеᵸлъна йаццас сукӀо бечед ахъаъас.
18Лъаькъейа сукӀолъ хуьжона муъмин-сукӀо иᵸхъас,
хийанат-сукӀолъ хуьжона ритӀухъаб сукӀо иᵸхъас.
19БоьчӀчӀа авлахълиъ оьмро бо̄йолъи ахо гей
сикӀо чикейана симахъоцалана ахъхъадой шеблаъ эчейагъа.
20Аᵸкъилаблила билӀоъ йокӀолло жо йолъаъцас йахъца,
аьбдаллилӀо нисода билӀоъ гаьгьийо жо залӀил йуьᵸхолча.
21РитӀухъабна гургьел гаьгьийона ахъал икье-аькьецала сукӀос
бетӀербахъи кӀетӀлъис, къадро-къимат кьодда̄кца.
22Аᵸкъилабли кьодо огицӀна багъос къуватаб тушмалла̄ш шагьар,
гьоглол билӀа̄ гейлӀо гицӀийо хъалана пасад бо̄с.
23Гьинис сикӀона сикӀаъ гаьгьийо мицна цӀуми бо̄ва сукӀо,
гьинис руьгьна балагьла̄кьас цӀуми бо̄с.
24Букъо аьмална ницна гаьччо инсаллихъа̄ъ нисос йаьгь-ламус гаьччо сукӀолӀо,
оьрхъилаъас гиса гӯйо чӀугьи-пахрулъи йахъцас йикъе гьолцола йакӀиъ.
25Хийал-пикрула̄ кӀаъаб сукӀо угъолца,
йикье-йаькьечӀе йейачеш гьолцос ко̄дана.
26Гьаьйл йатӀийосинаб йиᵸхъассаъдилӀона пикрола̄ъ ахъца гьули хискьабехъхъа,
муъмин-сукӀо гьинил йиᵸхъо̄назу ко̄ йеᵸццакна нилӀал гьаьдураб ахъца.
27Лъаькъейа сукӀоба̄с къурбан сурукъабна къаьбигьабна жо гей,
гьоло йилӀазу нигъади бахъца йакӀиъ чикейо къасна бахъна мухос зогъда.
28ОᵸтӀолана нуьълъи йогьцас сукӀо пана ахъца,
нуьъла̄хъа энекзи ахъна къадийа бо̄йо гьоькмо муьгъатта̄ гьихлъос.
29Лъаькъейа сукӀола мотӀолиъ ниц бахъаъас,
ритӀухъабли сукӀо пикро богьна̄ъ хаьба багъаъас.
30БетӀергьаллигъа йижецас аᵸкъиллъина гаьъа, цӀодорлъина гаьъа, ният-къасна гаьъа.
31Рагълиъ йежеллал шуго̄л гьаьдур йовагьца,
амма бергьенлъи БетӀергьаллиъис йахъца.
Currently Selected:
Акълова 21: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
