Акълова 18
18
18 къаьм
1Ата̄ огицӀна эчейо сукӀо гьинил пайда мизцас сукӀо гей;
бадло нисойо жо гьолцо гьоᵸсна аьᵸдалаъ йеᵸйаъас.
2Биджи йахъанна йикъанна йатӀаъас аьбдаллил,
гьолцол йацца йакӀиъ гаьгьийо жо гиса йагъал.
3Иман гаьччолъиладда̄ла муьгъалӀ гьаькъирлъи йоᵸкъос,
инжитабла ишла̄гъа муьгъалӀ рогьо-ницна мокъос.
4Инсаллила сикӀаъ аᵸкъилабла йаьжбо гилъилло ралъадлъилаъ йийакъелца,
аᵸкъиллъина зарпилаъ йеᵸкьецас эᵸхеш лъилъилаъ йикъелца.
5Гьоькмо бо̄слаъ, аьйиб гаьгьийона иженна,
аьйиб гаьччо уьволлолъи кӀетӀо жо гаьъа.
6Аьбдаллила мица даьъба-йаьжиъ бейажеш,
сикӀадда̄ла гьолцола михъа̄л кӀобала̄на йеᵸйахеш.
7Аьбдаллила сикӀаъас миц – жу угъолцас жо гей,
гьолцола порова̄ нисойона гьули эᵸдо экилцас хъаранди гей.
8Мицахъаллис йаьжбо энекзи ахъцалал – бисун кӀетӀо кен гей,
лазатликьа йаьᵸчиба̄цӀилца гьолцо гьолло̄л.
9КьодтуцӀо билӀо йогьцас сукӀо ахъца гьули йугъолцала̄с ис.
10БетӀергьаллис ца̄ᵸ – билӀа̄ хъала гей;
муъмин-сукӀо гьулиъ эᵸдокца,
гьолцол гьоьшшона гьинкъи гаьъа.
11Бечедаблис боцӀи-ризкъи – вагьли гьолцос билӀа̄ хъала бахъца,
гьолцол йакӀил пикро бахъца гьоло гьиндой гугьна бахъаъцас кало гейлӀона.
12Экал аьᵸйда̄ инсаллис йукъо йакӀо йахъца,
ца̄ᵸ йеᵸкьал аьᵸйда̄ аьдамлис сабру-мутӀиълъи телилъца.
13Нисона гикьа йоᵸкъал аьᵸйда̄ жаваб нилӀийолъи –
аьбдаллъина инжитлъина гей.
14Инсаллила ругь-жанли унти буьволча,
амма йакӀо йекийолъи лъо̄хъад йохна йахца?
15ЦӀодораб сукӀола йакӀил илмо-лъай михъос,
аᵸкъилаблила аьᵸгъали аᵸкъло тӀалаб бо̄с.
16Сайгъатла нийаццала гьинил дунийал къекъе ме̄ш,
укъа гьаькимлъилаъна оᵸкъос гьули.
17Суд йо̄слаъ, аьᵸйдда̄ икълашецас битӀараб гейлӀо гицца,
оᵸкъона гьолцол данде эчейа сукӀо суалла нийаццал.
18ЦӀула йагъова жойла даьъба-йаьже йолъолца,
ба̄хъаъаслӀо нисона бечейаъ балӀо маслаъатна бо̄с.
19Ишелдана симахъойо ис багъона бахъаъцала шагьарбалъ эᵸлъейо ахъца,
даьъба-йаьжена йелъейо йахъца хъалалила гъешейа кавлилъ.
20Инсаллила икълашейана оᵸхал кен йиᵸзца,
гьолцола сикӀаъкьа̄ гувагьийа йаьжла̄на гьолцол баьба-цаᵸ йиᵸхъолца.
21Мица аьдамна икьеш чӀагона о̄с,
тели икълашецалал йикъал нуцӀос гьули.
22КӀетӀо ахъо йиᵸхъовал кӀетӀослъи йиᵸхъос,
БетӀергьаллис баркатна михъос.
23Мискин-сукӀо гьеренна гьалимна бовагьца,
амма бечедабли хъачӀаб жаваб ницца.
24ВаццалӀо нисоцас сукӀо ваццана ахъаъас,
амма гьоᵸсо-гьоᵸс вацца истӀигъана кӀетӀо ахъца.
Currently Selected:
Акълова 18: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
