Maqkuv 10
10
Miqzaq Khof-eu Garkawv
Mt 19:1-2; Lk 16:18
1Khoernar-aq, Yeqsur khoergar nae dov-ir-awr, Yawrdaq lawrbaq-euq khoerpaw baq-anr nae Yurdav mirkhanq-euq mirkaq-anr irkeuv-euq mae. Tsawrhaq armaf mafma, aqyawf jawr-eu gar par uiqlar-awr, aqmyanmyan lof-aer aqyawf, aqyawf maf-anr parmaeq par tsovnaeq-euq mae.
2Khoerngae, aqyawf-anr tsermr haw-eu laer Paqliqsaer tiqpavnav deuq lar-awr narhaq-eu, “Khaqdzerzaq tiq ghaq yawqha-euq miqzaq-anr khofkhmq mae lor?” 3Yeqsur, aqyawf maf-anr aerkhof naeq-eu lafkhoer aer-eu, “Morseq nae nawmaf-anr dawq aqjox-aer biftaq-euq la?”
4Khoerngae, aqyawfmaf aerkhof-eu,
“Khof-eu sanqbof tiq taf bofnaeq-euq nar-aq, khofnya taef-a laer Morseq dawq biftaq-euq mae.” (Dm 24:1,3)
5Yeqsur, aqyawf maf-anr aerkhof naeq-eu lafkhoer heulof-aer aer-eu mae, “Nawmaf nuima ghanr-eu mirnae, Morseq, nawmaf-anr zanrtaq khoftaq khoerlof-aer taqyaf-euq mae.
6Aerkhawf, mqbae mirbae bae ngae, Miqyaer-aq, ‘Zaqyo aqli hawr-eu zaqmiq aqbur laer bae-euq mae. (Adb 1:27; 5:2)
7 Khoermirnae, zaqyo aqli-aq, yawqha-euq aqma aqda-anr yaghawq-ir-awr, yawqha-euq miqzaq naeq-aer yagawf-ir-eu mae.
8 Khoernar-aq, nyiq ghaq khawf tiq ghaq taef-aer pyeuflar taef-a.’ (Adb 2:24)
Tox-aer mar-iq, aqnyaf dzerzaq-aq, nyiq ghaq maqpar ngeur-aer, tiq ghaq taef-aer pyeuflar-euq mae. 9Khoermirnae, Miqyaer nae yurgawf-euq gar tsawrhaqzaq tiqghaq-iq maq lavghawq khmq-a.”
10Aqyawfmaf irkanr-euq lafkhoer jawr ngae, zaqlanr deuq khawf garkawv khoer Yeqsur-anr par narhaq-eu mae. 11Khoerngae, Yeqsur, aqyawf maf-anr heulof-aer aernaeq-euq mae, “Yawqha-euq miqzaq khof-awr, yawqghaqyawq sheuqpar nar-aq, yawqha-euq miqzaq-anr mrbanq-euq mae. 12Zaqmiqzaq khawf yawqha-euq khaqdzerzaq-anr byaerdzae-awr, yawqghaq yawq-anr danqdzaq-ir nar-aq, banq-awr joe-euq jeq pyeuf-eu mae.”
Yeqsur, Zaqdeuq-anr Dawq Ngaeqghae Naeq-euq
Mt 19:13-15; Lk 18:15-17
13Khoerngae, tsawrhaq tiqdeuq, Yeqsur nae zaqdeuq-anr bi toeqciv-eu laer zaq sheuq-awr Yeqsur jawr-eu gar lar-euq mae. Aerkhawf, zaqlanr deuq, zaq sheuqlaf-euq khoerdeuq-anr daeqnaeq-euq mae. 14Yeqsur khoer-anr ya’mawr ngae, nuikhanr tiqpawf-iq maqshir-aer, aqyawf maf-anr heulof-aer aernaeq-euq mae, “Zaqdeuq-anr taq lavtsoeq, aqyawfmaf, ngar jawr-eu gar bilar-awq. Aqjeq mirnae aernar-aq, Miqyaer uvlanr-eu jeq-aq, heulof-aer ghae-eu tsawrhaq deuq-euq gharduq mae. 15Ngar, nawmaf-anr aqdirma-aer aernaeq nyar, zaq yawnyir tiq ghaq lof-aer Miqyaer uvlanr-eu jeq-anr maq hageuf-eu aqsur ghaq maqkaq, Miqyaer uvlanr-eu jeq-anr tiqjeq ghaenae-iq maqya urler-ar.”
16Khoernar-aq, aqyawf, zaq khoerdeuq-anr aqyawf-euq aqlaf nae ciq-awr, aqyawf maf-euq khoertav aqlaf bafdav-awr nae, dawq ngaeqghae naeq-euq mae.
Smrmuiq Smrbaw Hawr-eu Miqyaer-euq Mirkhanq
Mt 19:16-30; Lk 18:18-30
17Khoernar-aq, Yeqsur garma dov-ir-eu laer luv-ir ngae, tsawrhaq tiq ghaq caevghae laf-awr, aqyawf-euq maeqshi pawqtsuif pawqdmq gadmq-awr nae Yeqsur-anr narhaq-eu, “Muiq-eu saqlaq-or! Ngar mqmaq maqbyav yarzir daef-eu jeqbir za’ni aqjeq yajanr-eu la?” 18Khoerngae, Yeqsur, aqyawf-anr heulof-aer aernaeq-euq mae, “Aqjeq mirnae nawr, ngaq-anr muiq-eu ghaq laer kur-eu le? Miqyaer tiq ghaq maqngeur nar-aq, yawmuiq tiqghaq-iq maqjawr-a. 19Nawr, zanrdawq khofdawq-anr siqnya mae,
‘Tsawrhaq-anr taqsaef, taqbanq taqjoe, smrkhoeq taqkhoeq, maqtsaq maqdawr-eu sarkir taqkamq, aqcawq-euq myawq-anr taqmyawf taq shuirgeuf, nawqma nawqda-anr yawzeu baw-awq.’ ” (Di 20:12-16; Dm 5:16-20)
20Khoerngae, tsawrhaq khoerghaq, Yeqsur-anr aernaeq-eu, “Saqlaq-or! Ngar yawnyir ngae nae heudeuq dawqtawv luf-anr mrcaw laf-euq ma.”
21Khoerngae, Yeqsur, aqyawf-anr haw-awr, aqyawf-anr gaq-eu lafkhoer aernaeq-eu, “Nawr tiqjeq maqjir nga siq. Nawr kharjav-eu jeq dawqtawvluf anqdzae-awr, irshaqzaq-anr birnaeq-awq, mq-euq khoertav nawq-euq pyurshuir myawqganq javlar taef-a. Khoernar-aq, lafyaq baf-awr ngaq-euq maeqnan cantae lar-awq.”
22Tsawrhaq khoerghaq dawq khoerdawq-anr yagaq ngae, aqyawf myawqganq ghawqmya’ni jav-eu mirnae, myavpyawq nyoeqkheurni pyeuf-ir-awr, noeqshaq duidui-eu lafkhoer dov-ir-euq mae.
23Khoerngae, Yeqsur tiqjawq haw-awr zaqlanr deuq-anr aernaeq-eu, “Pyurshuir jav-eu tsawrhaq-aq, Miqyaer uvlanr-eu jeq-euq lafkhoer urler-eu arnavni shaq-eu nga.”
24Zaqlanr deuq, aqyawf aer-eu dawq yagaq ngae zanq duidui ler-eu mae. Khoerngae, Yeqsur heulof-aer paraer-eu mae, “Zaqdeuq-or! Pyurshuir-anr ghoe-eu deuq, Miqyaer uvlanr-eu lafkhoer urler-eu arnavni shaq-eu nga. 25Lawtaw, aqghawf-euq lafnaq-anr urler-eu-aq, smrmuiq smrbaw deuq, Miqyaer uvlanr-eu lafkhoer urler-eu navmaqtser awqdzaeq-eu mae.”
26Zaqlanr deuq parzanq duidui ler-awr, aqyawf maf-euq yawkaq narhaq-eu, “Tox-aer mar-iq, aqsur ghaq kakhof-eu jeq za’nya-eu paq nga?”
27Yeqsur, aqyawf maf-anr haw-awr aernaeq-eu, “Tsawrhaq maq janrnya-eu khawf, Miqyaer maq janrnya-eu maqngeur-a. Aqjeq mirnae aernar-aq, Miqyaer-aq, yawqjeq navluf janrnya-eu mae.”
28Khoerngae, Beqtuvluv, Yeqsur-anr aernaeq-eu, “Hawsher-eq, nga’maf yawqjeq navluf byaerdzae yaf-awr nawq-euq maeqnan cantae luf-eu ma!”
29Yeqsur heulof-aer aerkhof naeq-euq mae, “Ngar, nawmaf-anr aqdirma-aer aernaeq nyar, ngaq-euq gharduq hawr-eu guiqlanq dawq-euq gharduq, nymr, maernmr, dmrma, aqma aqda, zaqmiq zaqyo hawr-eu daeyar byaerdzae yaf-euq tsawrhaq deuq-aq, 30heuzir-euq lafkhoer, nymr, maernmr, dmrma, aqma, zaqmiq zaqyo hawr-eu daeyar, heudeuq aryar bymr za taef-a. Khoeruqtaf, khaeq-awr khav-eu jeq-anr yadaq taef-a. Aqkar karzir-anr khawf, mqmaq maqbyav yarzir daef-eu jeq za taef-a. 31Aerkhawf, aqcawq-euq maeqhu jawr-eu tsawrhaq ghawqmya’ni, aqcawq-euq maeqnan yajawr taef-a. Aqcawq-euq maeqnan jawr-eu tsawrhaq ghawqmya’ni, aqcawq-euq maeqhu yajawr taef-a.”
Yeqsur Yashir-eu Mae Laer Paraer-eu
Mt 20:17-19; Lk 18:31-34
32Aqyawfmaf, Yeqlursaqlaeq-anr le-eu laer garpaer-anr leluf-eu mae. Yeqsur maeqhu paw canluf-eu mirnae, zaqlanr deuq zanq duidui ler-awr, maeqnan cantae luf-eu tsawrhaq deuq khawf guv-eu mae. Khoerngae, Yeqsur, ghaqkhaer 12 ghaq-anr kur-awr, aqyawf-euq khoertav keuvle-eu laer ghae-eu jeq, aqyawf maf-anr heulof-aer aernaeq-euq mae, 33“Hawsher-eq, aqduimaf, Yeqlursaqlaeq-anr leluf-eu ma. Tsawrhaq-euq Zaqyo-aq, pirma aqyuif deuq hawr-eu zanr maeq-eu deuq-euq aqlaf-euq lafkhoer yabi a’naeq taef-a. Aqyawfmaf, aqyawf shirni yarkhaq dar-awr, aqcawq tsawrjeuq tsawrca-euq aqlaf-anr a’naeq taef-a. 34Aqyawfmaf, aqyawf-anr yaeqbawq saerlu-aer aerdoer naeq taef-a, aqyawf-anr duqkhaq khashaeq-awr, yanqcav nae juifghaq-euq nar-aq, aqyawf-anr saef taef-a. Khoernar-aq, smq nan keuvlar ngae, aqyawf ghofdaeflar taef-a.”
Yaqkov Hawr-eu Yorhaq Nuirduq Shar-eu
Mt 20:20-28
35Khoerngae, Zeqbeqdaer-euq zaqyo Yaqkov hawr-eu Yorhaq, Yeqsur jawr-eu gar lar-awr aer-eu, “Saqlaq-or! Nga’nyaf aqjeq shar-eu maqkaq, nawq nae nga’nyaf-anr bi janrnaeqlaf mawf mir-a.”
36Khoerngae, Yeqsur narhaq-eu, “Ngaq nae nawnyaf-anr aqjeq bi janrnaeq mawf-eu nya?”
37Aqyawfnyaf aer-eu, “Nawr, yawshaef khanqsaer mirkhanq-euq lafkhoer dzoeqdzaq mr ngae, nga’nyaf-anr nawq-euq armar paw tiq ghaq, arcar paw tiq ghaq laer binuir naeqlaf.”
38Khoerngae, Yeqsur aernaeq-eu, “Nawnyaf aqjeq sharluf-eu le laer maq siqnya-a. Ngar dawr-eu khmqmaq, nawnyaf dawrnya ma lor? Ngaq nae hageuf-eu bartirsaq-anr nawnyaf hageufnya ma laq?”
39Aqnyafnmr aer-eu, “Euq, nga’nyaf dawrcoer-awr hageufcoer ma.” Khoerngae, Yeqsur heulof-aer aernaeq-euq mae, “Ngaq nae dawr-euq khmqmaq, nawnyaf yadawr-awr, ngaq nae hageuf-euq bartirsaq-anr nawnyaf khawf ya hageuf taef-a. 40Aerkhawf, ngaq-euq arcar paw hawr-eu armar paw ya’nuir ni-aq, ngar bi nuirnya-eu maqngeur, nuirduq khoer-aq, Miqyaer nae aqsur ghaq-euq gharduq laeqhmq taq-euq nar-aq, khoerghaq ya’nuir-eu mae.”
41Zaqlanr tser ghaq, garkawv khoer-anr yagaq ngae, Yaqkov hawr-eu Yorhaq-anr nuikhanr tiqpawf-iq maqshir-a. 42Khoerngae, Yeqsur, aqyawf maf-anr kur-awr, aqyawf maf-anr heulof-aer aernaeq-euq mae: “Aqcawq tsawrjeuq tsawrca, sanqpaq laer sawx-eu deuq-aq, mirkhanq-euq zaqdeuq-anr zuiv-awr aqyuif geuf-eu deuq, aqyawf maf-euq khoertav aryaq yawkhav-aer zmq-eu mae laer nawmaf siqnya-eu mae. 43Aerkhawf, nawmaf-euq lafkhoer-aq, khoerlof-aer taqbi pyeuf. Nawmaf-euq lafkhoer huiqmawf manrmawf-eu aqgeu ghaq maqkaq, nawmaf-euq kuirlaf zaqkhav yageuf-eu mae.
44Nawmaf-euq lafkhoer aqyuif geufmawf-eu aqgeu ghaq maqaer, tsawrhaq dawqtawv luf-euq zaqkhav yageuf taef-a. 45Aqjeq mirnae aernar-aq, Tsawrhaq-euq Zaqyo-aq, aqcawq, aqyawf-euq gharduq kuirlaf bigeuf-eu laer oe-euq maqngeur-aer, aqcawq-euq kuirlaf geuf-awr, tsawrhaq ghawqmya ni-euq gharduq aqyawf-euq daefzir bif-awr zeurkhof-eu laer oe-euq mae.”
Baqtirmaer-euq Myavnuiv Mawrnya Lar-euq
Mt 20:29-34; Lk 18:35-43
46Khoernar-aq, aqyawfmaf, Yeqlirkor-anr irkeuv-euq mae. Yeqsur hawr-eu zaqlanr deuq, tsawrhaq armaf mafma naeq-aer Yeqlirkor-anr nae dov-ir luf ngae, Tirmaer-euq zaqyo Baqtirmaer laer kur-eu myavbaef tiq ghaq garma gardzer nuir-awr, hawqshar sharluf-eu mae. 47Naqzaqlaer-euq Yeqsur mae laer aqyawf yagaq ngae, gurdanq baelar-awr aer-eu, “Daqbir-euq Zaqyo Yeqsur-or! Ngaq-anr ghawqshaq gaqnaeq laf-awq!”
48Khoerngae, tsawrhaq ghawqmya ghaq, aqyawf-anr ciqcurni jawr-awq laer daeq-euq mae. Aerkhawf, aqyawf-anr ngaeq-aer aernaeq nar-aq ngaeq-aer gurkhav dzaeqlar-eu, “Daqbir-euq Zaqyo-or! Ngaq-anr ghawqshaq gaqnaeq laf-awq!”
49Yeqsur naqler-awr, aqyawf-anr kurlaf-awq laer dawq bif-euq mae. Khoerngae, aqyawfmaf, myavbaef khoerghaq-anr aernaeq-eu, “Laqkhaq caertavni tur-awq, aqyawf, nawq-anr kurluf-eu nga.” 50Myavbaef khoerghaq maeqtsoeq bafdzae yaf-awr, tsawqtur-awr nae Yeqsur jawr-eu gar lar-euq mae.
51Yeqsur, aqyawf-anr narhaq-eu, “Ngaq nae nawq-anr aqjeq bi janrnaeq mawf-eu nya?”
Khoerngae, myavbaef khoerghaq, aqyawf-anr aernaeq-eu, “Ngaq-euq Laqbornir-or! Ngar mawrnyalar mawf mir-a.”
52Khoerngae, Yeqsur, aqyawf-anr aernaeq-eu, “Nawr ghof-ir-awq, nawr jan-eu jeq, nawq-anr bi taqler-euq mae.” Myavbaef khoerghaq tiqpov taef-aer mawrnya lar-awr, garma tiqcawq Yeqsur-euq maeqnan cantae ghae-euq mae.
Currently Selected:
Maqkuv 10: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
