Maqkuv 11
11
Yeqsur, Yeqlursaqlaeq-anr Urler-euq
Mt 21:1-11; Lk 19:28-40; Yh 12:12-19
1Yeqsur hawr-eu zaqlanr deuq, Yeqlursaqlaeq-euq dawqpae cankeuv laf-awr, Saqloq gawqjawq-anr jav-eu Baerpaqjeq pu hawr-eu Beqtaqnir pu-anr larkeuv ngae, Yeqsur, zaqlanr nyiq ghaq-anr khaer-awr, 2aqyawf nyaf-anr heulof-aer aernaeq-euq mae, “Nawnyaf maeqhu paw jav-eu pu-anr le-awq. Nawnyaf pu-anr urler-eu naeq-aer, khoergar tsawrhaq tiqghaq-iq maq dziqhaw-euq manq tanqlavzaq tiq mawr paftawf taq-euq gar ya’mawr taef-a. Tseuvpuir-awr tsanrlef-awq. 3Tsawrhaq tiqghaqnav, nawnyaf-anr, ‘Aqjeq mirnae tox-aer janr-eu le?’ laer narhaqlar nar-aq, nawnyaf, ‘Sanqpaq mawf-eu nya jer, nymrno yawkawr-aer tsanrkhofha le ma’ ” laer aernaeq-awq.
4Aqyawfnyaf irkeuv ngae, kmrcaer-euq ghaqkhaeq-euq lafnyir paw, garma-euq dawqpae manq tanqlavzaq tiq mawr paftawf taq-euq gar ya’mawr-awr, arcav tseuvpuir-euq mae. 5Aerkhawf, khoergar yawfluf-eu tsawrhaq tiqpavnav deuq, aqyawf nyaf-anr narhaq-eu, “Nawnyaf aqjeq mirnae manq tanqlavzaq-euq arcav tseuvpuir-eu le?” 6Khoerngae, aqyawfnyaf, Yeqsur nae aernaeq taq-euq lof-aer aerkhofnaeq ngae, khoerdeuq maq lavtsoeqni aqyawf nyaf-anr bi tsanrghae-euq mae. 7Khoernar-aq, aqyawfnyaf, manq tanqlavzaq khoermawr Yeqsur jawr-eu gar tsanrlaf-euq mae. Manq tanqlavzaq khoermawr-anr aqyawf maf-euq maeqtsoeq laevdav-awr, Yeqsur dziqler-euq mae. 8Tsawrhaq ghawqmya’ni yawqha-euq maeqtsoeq garma-anr khawq-awr, tiqpavnav deuq-aq, arbawr uqpyaq coer-awr, garma-anr khawq-euq mae. 9Khoerngae, Yeqsur-euq maeqhu maeqnan-aer canluf-eu tsawrhaq deuq heulof-aer gur-eu mae,
“ Hosa’na! ‘Sanqpaq Miqyaer-euq tsawrmyanr-euq uqmov oeluf-eu ghaq-aq, guiqlanqhuiq luf-ur!’
10 Sanqpaq Miqyaer-euq tsawrmyanr-euq uqmov keuvle luf-eu aqdui-euq aqda yawdzanr Daqbir-euq mirkhanq guiqlanqhuiq luf-ur! Gor duidui-eu gar hosa’na!” (Jc 118:25-26)
11Yeqsur, Yeqlursaqlaeq-anr lekeuv-awr, uqduq tanqnymr nymrma-euq lafkhoer urler-awr nae, yawqjeq navluf-anr hawdoe-euq mae. Khoerngae, uqcif cifle-euq mirnae, ghaqkhaer 12 ghaq naeq-aer Beqtaqnir pu-anr ir-euq mae.
Siqguq Arbawr-anr Yaqkhaer Yaq-euq
Mt 21:18-19
12Nishawq ngae nan, aqyawfmaf, Beqtaqnir pu-anr nae dovle ngae, Yeqsur hawq maeflar-euq mae. 13Aqyawf garmanr kaq-eu gar oeluf ngae nae, arpaf maer-eu siqguq arbawr tiq bawr-anr mawr-euq mae. Aqyawf, arbawr khoerbawr arsiq maqsiq nga laq laer dawqpae irkeuv-awr haw ngae, arsiq siq-eu aryamq maqngeur-eu mirnae, arpaf taef-aer tsof-eu gar ya’mawr-euq mae. 14Khoerngae, Yeqsur, arbawr khoerbawr-anr aernaeq-eu, “Iqnan nae nar-aq, nawq-euq arsiq-anr tiqghaq-iq maqpar yadzaq-ar!” Aqyawf khoerlof-aer aernaeq-eu gar aqyawf-euq zaqlanr deuq yagaq-euq mae.
Uqduq Tanqnymr Nymrma Lavshawr-euq
Mt 21:12-17; Lk 19:45-48; Yh 2:13-22
15Khoernar-aq, aqyawfmaf, Yeqlursaqlaeq-anr lekeuv-euq mae. Yeqsur, uqduq tanqnymr nymrma-euq lafkhoer urler-awr danqbae-awr nae, uqduq tanqnymr nymrma-euq lafkhoer myawq anqluf-awr myawq zeurluf-eu tsawrhaq deuq-anr taedov-awr, pyur dawqnaeq parnaeq-eu tsawrhaq deuq-euq hawqje hawr-eu khaqkhoeq anq-eu tsawrhaq deuq-euq nuirbov-anr ngawqdzae-euq mae. 16Yeqsur, uqduq tanqnymr nymrma-euq povka-anr, myawq tiqjeq-iq yur-awr nae maqbi cantsaev-a.
17Khoerngae, Yeqsur, aqyawf maf-anr maeqnaeq-eu,
“ ‘Ngaq-euq nymr-anr mirkhanq-euq tsawrjeuq dawqtawvluf guiqlanq shar-eu nymr laer yakur taef-a’ laer boftaq-euq maqngeur-a lor? Aerkhawf, nawmaf, nymr heunymr-anr, ‘Smrkhoeq tanrjoe-euq jawrduq bi pyeuflar taq-euq nga!’ ” (Isy 56:7)
18Pirma aqyuif deuq hawr-eu zanr maeq-eu deuq dawq khoerdawq-anr yagaq ngae, aqjox-aer ghae-awr nae Yeqsur-anr ya lavsaef-eu nga laer jawqluf-eu mae. Tsawrhaq dawqtawvluf Yeqsur maeq-awr tsov-eu gar zanq duidui ler-euq mirnae, aqyawfmaf, aqyawf-anr guv-eu mae. 19Uqcif cifle ngae, aqyawf, meuq-anr nae dov-ir-euq mae.
Siqguq Arbawr-anr Nae Dzawgeuf-eu
Mt 21:20-22
20Nishawq ngae nan, uqshawq paw, aqyawfmaf garma khoerkanr-anr nae par cantsaev ngae, siqguq arbawr khoerbawr duqcir-anr nae bawrgur gur-ir taq-euq gar ya’mawr-euq mae. 21Khoerngae, Beqtuvluv, Yeqsur nae aer-euq dawq-anr noeqdovlar-awr, Yeqsur-anr aernaeq-eu, “Saqlaq-or! Hawsher-eq. Nawq nae yaqkhaer yaq-euq siqguq arbawr khoerbawr bawrgur gur-ir taq-euq ngar-a.” 22Khoerngae, Yeqsur, aqyawf maf-anr heulof-aer aerkhof naeq-euq mae: “Nawmaf, Miqyaer-anr jan-awq. 23Ngar, nawmaf-anr aqdirma-aer aernaeq nyar, aqsur ghaq maqkaq, yawqha nae aer-euq lof-aer pyeuflar taef-a laer jan-awr, nuima povpov lavlav-aer maqghaeni, gawqjawq heujawq-anr, ‘Nawq-euq jawrduq-anr nae dov-ir-awr, iqmalavshav-anr gapuf-ir-awq’ laer aernaeq ngae, aqyawf nae aer-euq lof-aer pyeuflar taef-a. 24Khoermirnae, ngar, nawmaf-anr aernaeq nyar, nawmaf guiqlanq kharshar ngae, aqjeq shar-eu maqkaq, za’ma laer nawmaf jan-awr shar nar-aq, nawmaf za taef-a.
25“Nawmaf yawf-awr guiqlanq sharluf ngae, tiqghaq nav-anr iqbax taqluf-eu gar nawmaf noeqdovlar nar-aq, aqyawf-anr iqbax pyaeqnaeq-awq. Nawmaf iqbax pyaeqnaeq nar-aq, mq-euq khoertav jawr-eu nawmaf-euq Aqda khawf, nawmaf nae mrbanq mrlaeq-euq iqbax-anr pyaeqnaeqlaf taef-a. 26Nawmaf, aqcawq-anr iqbax maq pyaeqnaeq nar-aq, mq-euq khoertav jawr-eu nawmaf-euq Aqda khawf, nawmaf nae mrbanq mrlaeq-euq iqbax-anr maq pyaeqnaeq laf-ar.”
Yeqsur-euq Aryaq-euq Garkawv Narhaq-eu
Mt 21:23-27; Lk 20:1-8
27Khoernar-aq, aqyawfmaf, Yeqlursaqlaeq-anr tiq pov par ghoflar-awr, Yeqsur, uqduq tanqnymr nymrma-euq lafkhoer canluf ngae, pirma aqyuif deuq, zanr maeq-eu deuq hawr-eu aqyuif aqtsu deuq, aqyawf jawr-eu gar lar-awr, aqyawf-anr narhaq-eu, 28“Nawr aqgeugar nae aryaq za-awr heudeuq mrluf-eu le? Aqsur ghaq nae nawq-anr heudeuq mrni aryaq bifnaeq laf-euq la?” 29Khoerngae, Yeqsur, aqyawf maf-anr heulof-aer aerkhof naeq-euq mae, “Ngar, nawmaf-anr tiq dawq narhaq la, nawmaf, ngaq-anr aerkhof naeqlaf nar-aq, ngar aryaq aqgeugar nae za-awr heudeuq mrluf-eu le laer nawmaf-anr aernaeq ma. 30Yorhaq bartirsaq mrnaeq-eu jeq khoer, mq-euq khoertav nae oe-euq la lor? Maqngeur nar-aq, tsawrhaq-anr nae lar-euq la laq laer nawmaf, ngaq-anr aerkhof naeqlaf-awq.” 31Khoerngae, aqyawf maf-euq yawkaq jasawx-eu lafkhoer aer-eu, “ ‘Mqtav-euq Miqyaer nae bimr-euq mae’ laer aqdui aernar-aq, aqyawf heulof-aer aerlar taef-a, ‘Tox-aer mar-iq, nawmaf aqjeq mirnae aqyawf-anr maqjan-eu le?’ 32Aqduimaf, ‘Tsawrhaq nae bimr-euq mae’ ” laer aernar-aq khawf tsawrhaq dawqtawvluf, Yorhaq-aq, Miqyaer gharduq ngaeqdan-eu tiq ghaq mae laer sawxtaq-euq mirnae, tsawrhaq armaf-anr guv-eu mae. 33Khoermirnae, aqyawfmaf, Yeqsur-anr aerkhof naeq-eu, “Nga’maf maqsiq.” Khoerngae, Yeqsur aer-eu, “Tox-aer mar-iq, ngar khawf, ngar aryaq aqgeugar nae za-awr heudeuq mrluf-eu le laer nawmaf-anr maq aernaeq.”
Currently Selected:
Maqkuv 11: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
