Lurkaf 13
13
Iqbax Maq Noeqpov Nar-aq, Yacawv-ir Taef-a
1Aryamq khoer-euq lafkhoer, tsawrhaq tiqpavnav deuq, Yeqsur jawr-eu gar lar-awr, Pirlav-aq, Gaqliqlaer tsawrhaq-euq shiq hawr-eu aqyawfmaf nae lawrnaeq-euq shiq bi yoerkeuq-euq garkawv ja’naeq-euq mae. 2Yeqsur heulof-aer aernaeq-euq mae: “Gaqliqlaer tsawrhaq khoerdeuq khoerlof-aer khaeqdui khav duidui-eu gar yadaq-euq mirnae, Gaqliqlaer tsawrhaq nuideuq dawqtawvluf navmaqtser iqbax huiq-eu nga laer nawmaf noeq-eu nya lor? 3Ngar, nawmaf-anr aernaeq nyar, khoerlof-aer maqngeur-a. Nawmaf khawf maq noeqpov maq noeqpar nar-aq, nawmaf dawqtawvluf khoerlof-aer yacawv-ir taef-a. 4Sirloq lan-anr jav-eu irlaq-euq khawrzeur gapyav le-awr bi daetaeq saef-euq tsawrhaq 18 ghaq-aq, Yeqlursaqlaeq-anr jawr-eu tsawrhaq dawqtawvluf navmaqtser mrbanq-euq mirnae nga laer nawmaf noeq-eu nya lor? 5Ngar, nawmaf-anr aernaeq nyar, khoerlof-aer maqngeur-a. Nawmaf khawf maq noeqpov maq noeqpar nar-aq, dawqtawvluf khoerlof-aer yacawv-ir taef-a.”
Arsiq Maq Siqle-eu Siqguq Arbawr
6Khoerngae, Yeqsur yawjeq majeq dawq-anr nae heulof-aer maeqnaeq-euq mae: “Tsawrhaq tiq ghaq, aqyawf-euq aqgaf yarkmr-anr siqguq arbawr tiq bawr kataq-euq mae. Arsiq maqsiq nga lor laer aqyawf hawle ngae, arsiq maqsiq-a. 7Khoerngae, aqyawf aqgaf yarkmr mr-eu ghaq-anr aernaeq-eu, ‘Smr khof byanni ngar siqguq heubawr arsiq siqle-euq nga laq laer hawle-euq khawf siq-eu maqmawr-aq. Arbawr heubawr-anr turdzae-awq. Aqjeq mirnae mirtsaq-anr yawqngaef-aer bi daeftsoeq-eu le?’ 8Aerkhawf, yarkmr mr-eu ghaq heulof-aer aerkhof naeq-euq mae, ‘Sanqpaq-or! Tsuifnuiv khof bidaef siq. Ngar dawqpaeq jawqjawq-aer duqpoq-awr jeqkeuq dawvhaw la. 9Aqkar arsiq siqle nar-aq, yawmuiq taef-a. Maq siqle nar-aq, khoerngae nawr turdzaenya taef-a.’ ”
Zaqmiq Aqbur Tiq Ghaq-anr Bi Taqler-euq
10Landaw jawrnan ngae nan, Yeqsur, zanrdawq khawqnymr-euq lafkhoer maeqnaeq tsovnaeq luf-eu mae. 11Khoergar, 18 khof byanni naef ur-awr narluf-eu zaqmiq aqbur tiq ghaq jawr-eu mae. Aqyawf dartsuif khof-ir-awr, tiqpawf-iq maq mrcawq nya-a. 12Yeqsur, aqyawf-anr ya’mawr ngae, kurlaf-awr aernaeq-eu, “Zaqmiq-or! Nawq-euq nargawr-anr nae puirpyaeq naeq-euq ma.”
13Yeqsur, aqyawf-euq khoertav aqlaf bafdav ngae, tiqpov taef-aer aqyawf-euq dartsuif mrdawrnya lar-awr, Miqyaer-anr ciqhuiq ciqmanr-eu mae. 14Landaw jawrnan ngae nan, Yeqsur nargawr lavtaq naeq-euq mirnae, zanrdawq khawqnymr-euq aqyuif ghaq nuima paer duidui lar-awr, tsawrhaq armaf mafma-anr aernaeq-eu, “Gar mrnya-eu kof nan jav-eu mae. Khoer kof nan-euq lafkhoer nargawr bi lavtaq lar-awq. Aerkhawf, landaw jawrnan ngae nan mardir-aq taqlar.”
15Khoerngae, Sanqpaq Yeqsur, aqyawf-anr heulof-aer aerkhof naeq-euq mae, “Yawmuiq janrgeuf-eu tsawrhaq-or! Landaw jawrnan ngae nan, nawmaf yawqghaq navluf yawqha-euq mawrner hawr-eu manq tanqlav-anr, kuv-anr nae puir-awr, ircuf maqtsanr dawr-ir-eu le laq? 16Aqbyaqhaq-euq zaqmiq heughaq-anr naef Saqdaq nae 18 khof byanni paftawf taq-euq gar sharnoeq sher-eq, landaw jawrnan ngae nan shmrcav deuvtsaev-awr puirpyaeq naeq-eu maqtsaq-a lor?”
17Yeqsur khoerlof-aer aernaeq ngae, aqyawf-anr muir-eu tsawrhaq dawqtawvluf shafdawr-ir-euq mae. Aerkhawf, tsawrhaq armaf dawqtawvluf, Yeqsur nae yawshaef khanqsaer huiq-eu jeq mr-euq gar laqkhaq caer-eu mae.
Ghawqpaf Arnuiv-euq Garkawv
Mt 13:31-32; Mk 4:30-32
18Khoerngae, Yeqsur heulof-aer aer-eu mae, “Miqyaer uvlanr-eu jeq aqgeu jeq-anr dur-eu nga? Ngar aqgeu jeq-anr sheucaev-eu paq nga? 19Miqyaer uvlanr-eu jeq-aq, tsawrhaq tiq ghaq, ghawqpaf arnuiv yur-awr aqyawf-euq yarkmr-anr saeq-euq gar dur-eu mae. Arnuiv khoer daeflar-awr, arbawq bawqma malar ngae, mqtav zaw-eu arjir deuq uqpyaq-anr banq banqle-eu mae.”
Daeqtseq-euq Garkawv
Mt 13:33
20Yeqsur heulof-aer paraer-eu mae, “Ngar, Miqyaer uvlanr-eu garkawv aqgeu jeq naeq-aer sheucaev-eu paq nga? 21Miqyaer uvlanr-eu jeq-aq, daeqtseq-anr dur-eu mae. Zaqmiq aqbur tiq ghaq daeqtseq yur-awr, caermeu smr puq-euq lafkhoer dawvzaf taq-awr nae, dawqtawv luf-anr bi poqlar-eu gar dur-eu mae.”
Ghovkhaeq Yawsuf
Mt 7:13-14,21-23
22Yeqsur, meuqdeuq pudeuq-anr maeqmaeq-aer can-awr, Yeqlursaqlaeq-anr le-euq mae. 23Khoerngae, tsawrhaq tiq ghaq, Yeqsur-anr narhaq-eu, “Sanqpaq-or! Yabuq-ir-eu tsawrhaq uicuiv taef-a lor?” Khoerngae, Yeqsur, tsawrhaq armaf mafma-anr heulof-aer aernaeq-euq mae:
24“Nawmaf ghovkhaeq yawsuf-anr ya urlerni laejae-awq. Ngar, nawmaf-anr aernaeq nyar, tsawrhaq ghawqmya ghaq urler-eu laer laejae-eu khawf, maq urler nya-ar. 25Nymrsanr ghaq tur-awr, larghov piqtaeq shaw-euq nar-aq, nawmaf lafnyir paw yawf-awr, larghov-anr khovkhov-aer danqbae-awr aer taef-a, ‘Sanqpaq-or! Sanqpaq-or! Nga’maf-anr larghov pannaeqlaf sher-eq.’ Khoerngae, ‘Ngar, nawmaf-anr maq siqnya nya. Nawmaf aqgeugar nae lar-euq maqsiq lawr’ laer aqyawf aerkhof naeqlaf taef-a.
26Khoerngae, nawmaf heulof-aer aer taef-a, ‘Nga’maf, nawq naeq-aer dzaqtaf dawrtaf-awr, nawr, nga’maf-euq garma-anr cancan-aer maeqnaeq tsovnaeq laf-euq mae lawr.’
27Aerkhawf, aqyawf heulof-aer aernaeq taef-a, ‘Ngar, nawmaf-anr aernaeq nyar, nawmaf aqgeugar nae lar-euq laer ngar maq siqnya nya. Nawmaf yawlaeq yawca kharmr-eu tsawrhaq dawqtawvluf ngar jawr-eu gar nae dov-ir-awq.’
28Aqbyaqhaq, Irtsav, Yaqkov hawr-eu Miqyaer gharduq ngaeqdan-eu tsawrhaq dawqtawvluf, Miqyaer uvlanr-eu jeq-euq lafkhoer jawrluf-eu gar nawmaf ya’mawr taef-a. Aerkhawf, nawmaf-anr-aq, lafnyir paw taedzae naeqlaf taef-a. Nawmaf khoergar jawr-awr, ngoer-awr seuq yateuf taef-a. 29Khoerngae, nanrma dovkhaeq, gakhaeq, guikhaeq, nyakhaeq paw jawr-eu tsawrhaq lar-awr, Miqyaer uvlanr-eu jeq-euq lafkhoer hawqjawq ya jawqtaf taef-a. 30Aqcawq-euq maeqnan jawr-eu tsawrhaq deuq-aq, aqcawq-euq maeqhu yajawr-awr, aqcawq-euq maeqhu jawr-eu tsawrhaq deuq-aq, aqcawq-euq maeqnan yajawr taef-a.”
Yeqlursaqlaeq-euq Gharduq Noeqshaq-eu
Mt 23:37-39
31Khoerngae nan nyiqpav-aer, Paqliqsaer tiqpavnav deuq lar-awr Yeqsur-anr aernaeq-eu, “Nawr heugar nae dov-ir-awr, irdov ghae-awq. Aqjeq mirnae aernar-aq, Heqlor, nawq-anr saefmawf-eu mae.”
32Yeqsur, aqyawf maf-anr heulof-aer aernaeq-euq mae, “Nawmaf, byaqhir khoermawr-anr heulof-aer tsafgaq-ir-awq, ‘Iqnan hawr-eu nishawq, ngar, naef-anr taedov-awr, nargawr lavtaqnaeq le siq, sarpaeq ngae nan mrluivjir ma.’ 33Aerkhawf, iqnan, nishawq hawr-eu sarpaeq-aq, ngar yale-a siq. Aqjeq mirnae aernar-aq, Yeqlursaqlaeq-euq lafnyir, Miqyaer gharduq ngaeqdan-eu tsawrhaq-anr maqya bisaef-ar.
34“Yeqlursaqlaeq-or! Or, Yeqlursaqlaeq, nawr, Miqyaer gharduq ngaeqdan-eu tsawrhaq deuq-anr saef-awr, nawr jawr-eu gar bi’oe-euq deuq-anr khawf, khaqlo nae biqsaef-eu mae. Yaciv ya’ma, yazaq deuq-anr danrkhawv khawvuiq-eu lof-aer, ngar, nawq-euq zaqdeuq-anr armyav pov khawvuiq mawf-eu khawf, nawmaf maqbi khawvuiq naeqlaf-a. 35Hawtaq-awq. Nawmaf-euq nymr, nymrtsoeq tsoeq-ir taef-a. Ngar, nawmaf-anr aernaeq nyar,
‘Sanqpaq Miqyaer-euq tsawrmyanr-euq uqmov oeluf-eu ghaq-aq, guiqlanqhuiq luf-ur!’ (Jc 118:26)
laer ya’aer-eu aryamq maq keuvlar-euq nmrkaq, nawmaf, ngaq-anr maqya mawr-ar.”
Currently Selected:
Lurkaf 13: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
