Lurkaf 14
14
Mawrdo Puq-eu Tiq Ghaq-anr Bi Taqler-euq
1Landaw jawrnan ngae nan heulof-aer pyeuflar-euq mae. Paqliqsaer armur-euq lafkhoer aqyuif geuf-eu tiq ghaq-euq irkanr, Yeqsur urler-awr hawq dzaqluf ngae, aqyawfmaf, Yeqsur-anr khoeqsho hawluf-eu mae. 2Aqyawf-euq maeqshi mawrdo puq-awr nar-eu tiq ghaq jawr-eu mae. 3Khoerngae, Yeqsur, zanrdawq siqzaq deuq hawr-eu Paqliqsaer deuq-anr narhaq-eu, “Landaw jawrnan ngae nan nargawr lavtaq naeq-eu, zanrdawq khofdawq-anr banq-a lor?”
4Aerkhawf, aqyawfmaf ciqcurni jawr-eu mae. Khoerngae, Yeqsur, khoerghaq-anr nyaeftaeq-awr lavtaq naeq-awr nae bighof-ir-euq mae.
5Khoernar-aq, Yeqsur, aqyawf maf-anr narhaq-eu, “Nawmaf-euq lafkhoer tiqghaqnav, landaw jawrnan ngae nan, yawqha-euq manqtanqlav maqngeur nar-aq mawrner, duqkhanq-anr ga’anr nar-aq, tiqpov taef-aer maq gheudov naeq-eu aqsur ghaq jawr-eu le?” 6Aqyawfmaf dawq khoerdeuq-anr maq aerkhofnaeq nya-a.
Daqyan Geuf-eu Hawr-eu Hageuf-eu
7Kurtaq-euq tsawrhaq deuq khanqsaer jav-eu nuirduq-anr tserluf-eu gar Yeqsur ya’mawr ngae, aqyawf maf-anr yawjeq majeq dawq-anr nae heulof-aer ja’naeq-euq mae: 8“Tsawrhaq tiqghaqnav oermr bar-eu yawbui bui-eu gar nawq-anr kur ngae, khanqsaer jav-eu nuirduq-anr taqnuir. Nawq-euq navmaqtser khanqsaer jav-eu tsawrhaq-anr aqyawf kurtaq-euq baw-mr. 9Nawnyaf nyiq ghaq luf-anr kur-euq ghaq lar-awr aer-eu, ‘Nuirduq teu heughaq-anr binuir-awq.’ Khoerngae, nawr shafdawr-ir-awr, teqdzaeq-eu nuirduq-anr ya’nuir-ir taef-a. 10Tsawrhaq tiqghaqnav nawq-anr kur ngae, teqdzaeq-eu nuirduq-anr nuir-awq. Khoerlof-aer nuir nar-aq, nawq-anr kur-euq ghaq lar-awr heulof-aer aer taef-a, ‘Cawq-or! Yawgor-anr nuirdav ler-awq.’ Khoerngae, nawr, nawq naeq-aer hawqjawq jawqluf-eu tsawrhaq-euq maeqshi khanqsaer za taef-a. 11Aqjeq mirnae aernar-aq, yawqhar yawqha taqhuiq-eu aqsur ghaq maqkaq, taqnyir-eu gar yadaq-awr, yawqhar yawqha taqnyir-eu aqgeu ghaq maqkaq, taqhuiq-eu jeq yaza taef-a.”
12Yeqsur, aqyawf-anr kur-euq ghaq-anr khawf heulof-aer aernaeq-euq mae, “Nawr, aqcawq-anr kur-awr, ghanrhawq maqngeur nar-aq cifhawq bidzaq ngae, nawq-euq cawqdeuq, nawq-euq maernmr deuq, nawq-euq aqyuif aqnyir deuq hawr-eu nawq-euq dawqpae jawr-eu smrmuiq smrbaw deuq-anr taqkur. Khoerdeuq-anr kur nar-aq, aqyawfmaf khawf nawq-anr kur-awr, guiqlanq janrkhof naeqlaf taef-a. 13Nawr hawqbyawr lawr ngae, irshaqzaq, arsaer cawv-ir-euq tsawrhaq, kuircawv deuq hawr-eu myavbaef deuq-anr kur-awq. 14Khoerdeuq-anr kur nar-aq, nawr guiqlanq za taef-a. Aqjeq mirnae aernar-aq, aqyawfmaf, nawq-anr guiqlanq maq janrkhof naeqlaf nya-a. Tsaq-awr dawr-eu tsawrhaq ghofdaef lar-eu aryamq keuvlar ngae, nawr guiqlanq za taef-a.”
Huiq-eu Hawqbyawr Lawr-eu
Mt 22:1-10
15Yeqsur naeq-aer hawqjawq jawqluf-eu tiq ghaq dawq khoerdeuq-anr yagaq ngae Yeqsur-anr aernaeq-eu, “Miqyaer uvlanr-eu lafkhoer yadzaq-eu tsawrhaq guiqlanq huiq-eu mae.”
16Khoerngae, Yeqsur, aqyawf-anr heulof-aer aernaeq-euq mae: “Tsawrhaq tiq ghaq zawr huiq-eu hawqbyawr tiq byawr lawr-eu laer laeqhmq-awr, tsawrhaq ghawqmya ni-anr kurtaq-euq mae. 17Hawqbyawr lawr-eu aryamq keuvlar ngae, aqyawf-euq kuirlaf zaqkhav-anr khaer-awr kurtaq-euq tsawrhaq-anr, ‘Lar-awq de-eq. Yawqjeq navluf laeqhmqjir taq-euq ma’ laer bi aergaq-ir-euq mae.
18Aerkhawf, aqyawfmaf yawqghaq navluf tiqghaq tiqjeq-anr daeqlaef daeqlaef-aer maq larnya nga laer aer-eu mae. Yawbae ghaq aer-eu, ‘Ngar daeyar tiq kawq zeurtaq-euq mirnae ir-awr yahaw-ir nga, ngar, nawq-anr yashar-eu ngar-a.’
19Yawqghaqyawq aer-eu, ‘Ngar, mawrner ngaq gu zeurtaq-awr yatsaeq haw-ir-eu mirnae, ngar, nawq-anr yashar-eu ngar-a.’
20Tiq ghaq paraer-eu, ‘Ngar miqzaq sheuq-euq mirnae, ngar maq larnya nga.’
21Kuirlaf zaqkhav khoerghaq ghoflar-awr, garkawv khoerdeuq nymrsanr ghaq-anr dzawrnaeq lar-euq mae. Khoerngae, nymrsanr ghaq nuima paer duidui lar-awr aqyawf-euq kuirlaf zaqkhav-anr aernaeq-eu, ‘Meuq-euq lafkhoer danr-eu garjawq hawr-eu garma deuq-anr yawkawr-aer ir-awr, irshaqzaq, arsaer cawv-ir-euq deuq, myavbaef deuq, kuircawv deuq-anr sheuqlaq-ir-awq.’
22Khoerngae, kuirlaf zaqkhav khoerghaq aer-eu, ‘Sanqpaq-or! Nawq nae khaer-euq lof-aer mrjir-euq ma. Aerkhawf, jawrduq ngaef nga siq.’
23Khoerngae, nymrsanr ghaq, kuirlaf zaqkhav khoerghaq-anr heulof-aer aernaeq-euq mae, ‘Meuqdzer, garjawq, garma hawr-eu, kmrcaer bawduv-euq uqmov jawr-eu deuq, maqlar-ar-aq maqjuqni katir-awr, ngaq-euq nymr-anr bi jawrbyan-awq. 24Aqjeq mirnae aernar-aq, ngar, nawmaf-anr aernaeq nyar, yawbae kurtaq-euq tsawrhaq khoerdeuq tiqghaq-iq ngaq-euq hawqbyawr-anr maqya myeufhaw-ar.’ ”
Yeqsur-euq Zaqlanr Geuf-eu Arpoeq
Mt 10:37-38
25Tsawrhaq armaf mafma, Yeqsur naeq-aer canluf-eu mae. Khoerngae, Yeqsur ciqpyawr lef-awr, aqyawf maf-anr heulof-aer aernaeq-euq mae, 26“Ngaq-euq maeqnan cantae lar-eu aqsur ghaq maqkaq, yawqha-euq aqma aqda, miqzaq, zaq, maernmr dmrma hawr-eu yawqha-euq daefzir-anr maqbyae nar-aq, ngaq-euq zaqlanr maq geufnya-a. 27Aqsur ghaq maqkaq, yawqha-euq lafyaq baf-awr, ngaq-euq maeqnan maq cantaelar nar-aq, ngaq-euq zaqlanr maq geufnya-a.
28Nawmaf-euq lafkhoer tiqghaqnav, lofpir-eu nymrgor tiq nymr tsov-eu laer ghae ngae, nymr khoernymr tsovghaq nya’ni, pyur armyavni jirler-eu nga laer nuir-awr jeqhu maqsawx haw-eu tsawrhaq jawr mae laq? 29Khoerlof-aer maqsawx hawni tsov nar-aq, zeurdanr taef-aer danrtaq-awr, maq tsovsaq nya-euq gar kharya mawr-eu tsawrhaq deuq, aqyawf-anr aqjaf jafnaeq taef-a, 30‘Heughaq nymr tsovdanq bae-euq gar nae maq tsovsaq nya-euq beu laq?’
31Maqngeur nar-aq, sanqpaq aqgeu ghaq maqkaq, sanqpaq yawqghaq yawq-anr tanqpuq ler-eu laer ghae ngae, aqcawq-euq guirzaq 20,000 ghaq lar-eu gar, yawqha-euq guirzaq 10,000 ghaq taef-aer, deuv maq deuvghaq nya-eu nga lor laer nuir-awr jeqhu maq sharsawx haw-ar lor? 32Maq ghaqler luf-a laer siqnya nar-aq, sanqpaq yawqghaqyawq garmanr kaq-eu gar larluf ngae nae, aqyawf-euq danzar khaerghae-awr bi jatsaq-ir taef-a. 33Khoerlof-aer durni, nawmaf aqgeu ghaq maqkaq, yawqha kharjav-eu dawqtawvluf maq byaerdzaeyaf nar-aq, ngaq-euq zaqlanr maq geufnya-a.
Gardanr Maqtsoeq-eu Saqdeuf
Mt 5:13; Mk 9:50
34“Saqdeuf-aq, yawmuiq mae. Aerkhawf, saqca tav-eu byov-ir nar-aq, aqjox-aer parbi tavlarnya nmr-mq? 35Saqdeuf khoer-aq, mirtsaq-anr dawv khawf, jeqyaev-anr keuq khawf, gardanr maqtsoeq-eu mirnae, lafnyir shaevdzae-eu mae. Naqbawr tsof-awr khar gaqnya-eu tsawrhaq narhaq-awq.”
Currently Selected:
Lurkaf 14: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
