Jònə 15

Yěsû a ngotə àtɨ̀ghə mɨ̀ntàamə mɨ mɨ̀lùʼù

1Yěsû a chi ndàŋə̀ nɨ mbyə̀ nshwəŋə̀ lo “Mɨ̀ŋə̌ ngotə àtɨ̀ghə mɨ̀ntàamə mɨ mɨ̀lùʼù, Tǎ ɨwəə a pə ŋònə̀ nɨ à wa nnaŋə̀ mɨ̀tɨ̀ghə mèrə mə. 2À wa ntserə̀ mɨ̀fàa ma aŋunə mɨ̀ŋə̀ nɨ mèrə ma ka zumə̀ e mɨ̀ntàamə ngwaʼà, mmə nshàbə̀ a myə̀ nɨ mèrə ma ndzumə̀ mɨ̀ntàamə njiilo mèrə tsùŋə̀ ndzumə̀ mɨ̀ntàamə mɨ̀noʼnə. 3Àshwəŋnə̀ za nɨ ǹshwəŋə̀nə ambo pɨghə la a ghɨ̀rə̀ mə nɨ̀ laanə̀. 4Nɨ̀ ghoŋə̀ mbə taʼà ŋwùə̀ pə̀ənə̀. Mbə̀ʼnə ka nɨ̀fàa nɨ àtɨ̀ghə nɨ zumə̀ e mɨ̀ntàamə tsèrə nɨ tsèrə. Tsèrə chyə̂ zumə̀ mɨ̀ntàamə mbə̀ʼə nɨ ghoŋə̀ aŋunə ma àtɨ̀ghə. Nɨ ndwuumə̀ wə̀, mbə̀ʼə nɨ̀ kɨ ndzùmə̀ a wɨghə mɨ̀ntàamə apə̀, ndàŋə̀ e lo nɨ̀ ghoŋə̀ mbə taʼà ŋwùə̀ pə̀ənə̀.

5“Mɨ̀ŋə̌ àtɨ̀ghə mɨ̀ntàamə mɨ mɨ̀lùʼù, nɨ̀ pə mɨ̀fàa. Ŋònə̀ wa nɨ à ghoŋə̀nə mbə taʼà ŋwùə̀ pəə ze la, ǹkɨ ngoŋə̀ mbə taʼà ŋwùə̀ pəə ze, à ghǎ zumə̀ mɨ̀ntàamə mɨ àtɨ̀ghə mɨ̀noʼnə ntiinə à tə pwuə̀ e mɨ̀ŋə̀, nɨ̀ ghɨ̀rə̀ a wɨghə ànwùə̀ àtse apə̀. 6Ŋwùə̀ à tə ka ghoŋə̀ e lo pə taʼà ŋwùə̀ pəə ze, Tǎ ɨwəə a waʼà e la tsaʼa nɨ̀fàa nɨ àtɨ̀ghə nɨ pɨ tserə̀nə. Mbuurə̀ mɨ̀fàa za chyə̂ e pə a nɨ shwatə̀ ntòonə̀ lo mɨ sɨghə̀. 7Nɨ̀ tɨ ghoŋə̀ mbə taʼà ŋwùə̀ pə̀ənə̀, àshwəŋnə̀ mə̀ a kɨ ngoŋə̀ amwuə pɨghə, yi àzwuumə̀ àtsùmə̀ za nɨ nɨ̀ pyiitə̀nə, nɨ̌ pə nɨ zèrə. 8Tǎ ɨwəə à wa mbə nɨ àghuʼtə̀ nkwùə̀ nɨ nɨ̀ zumə̀nə mɨ̀ntàamə mɨ̀noʼnə. Nɨ ndwuumə̀ wə̀, nɨ̌ tyiʼə̀ nèrə̀ ɨ̀pɨ̀ŋmə̀ ɨ̀wɨghə lo pɨghə la ɨ̀zùŋə̀ ndzùmə̀ ɨ̀pâ. 9Ǹkòŋə̀ a wɨghə tyìʼə̀ tsaʼnə Tǎ à kòŋə̀nə mə̀. Nɨ̀ ghoŋə̀ amwuə ɨ̀kòŋnə̀ mə̀. 10Nɨ̀ tə mə ndzuʼnə̀ mɨ̀ntə̌ ɨ̀mâ, yi nɨ̌ ghoŋə̀ amwuə ɨ̀kòŋnə̀ mə̀, tyìʼə̀ tsaʼnə ǹdzuʼnə̀nə mɨ̀ntə̌ mɨ Tǎ ɨwəə nkɨ ngoŋə̀ amwuə ɨ̀kòŋnə̀ e.

11“Ǹshwəŋə̀ a wɨghə nɨ mɨ̀nwùə̀ mə mɨ̀tsùmə̀ la lo nɨ̀ghaʼà mə̀ a pə amwuə pɨghə. Lenəla, nɨ̀ghaʼà ɨwɨghə â lẅenə̀. 12Ntə̌ mə̀ ambo pɨghə ɨ chyə̂ la lo nɨ̀ kòŋə̀ mbɨ̀ŋmə̀ ɨ̀zɨghə tyìʼə̀ tsaʼnə ǹkòŋə̀nə a wɨghə. 13Ŋwùə̀ à tə pəla mbî a nɨ̀chyə̂mbyə̂ e ntii ɨ̀swùə e, yi zèrə zə a nèrə̀ la lo à kòŋə̀ e ndàŋə̀ àndànə̀ wa nɨ mbə̀ʼə ŋwùə̀ a kòŋə̀ a ghùtse ŋwùə̀. 14Nɨ̀ chyə̂ mbə la pɨ̀swùə ɨ̀pâ mbə̀ʼə nɨ̀ pəla mmə ngɨ̀rə̀ mɨ̀nwùə̀ nɨ ǹshwəŋə̀nə a wɨghə lo nɨ̀ ghɨ̀rə̀ la. 15Ka ǹchi mbirə̀ nfuŋə̀ a mə̀ a wɨghə nɨ ngàŋə àfàʼà, ntiinə mbə̀ʼə ka ngàŋə àfàʼà zhyə̂ a ghobə ànwùə̀ za nɨ masàa ɨghobə à wə̀ ngɨ̀rə̀. La m̀mə nfuŋə̀ a wɨghə nɨ pɨ̀swùə ɨ̀pâ, ntiinə ǹshwəŋə̀ mə a wɨghə nɨ mɨ̀nwùə̀ mɨ̀tsùmə̀ nɨ ǹdzuʼnə ambo Tǎ ɨwəə. 16Ka à lə̀ tsoʼò e pɨghə ntsoʼò mə̀ tsaʼa masàa ɨwɨghə. À lə̀ tsoʼò mɨ̀ŋə̀ ntsoʼò a wɨghə mmə ŋŋâ a wɨghə nɨ àfàʼà lo nɨ̀ lèrə̀ ngə̀ mbìʼnə̀ a nɨ zumə̀ mɨ̀ntàamə; mɨ̀ntàamə nɨ mɨ ghoŋə̀ nɨ nkuŋə̀. Lenəla, Tǎ a ŋâ a wɨghə nɨ àzwuumə̀ àtsùmə̀ nɨ nɨ̀ pyiitə̀nə aŋunə nɨ̀linə̀ ɨ̀tsâ. 17Lə̌ ànwùə̀ nɨ ǹtàʼnə lo nɨ̀ ghɨ̀rə̀ la: Nɨ̀ kòŋə̀ mbɨ̀ŋmə̀ ɨ̀zɨghə.

Kɨpaanə pànə̀ pɨ àtwuə̀ ɨ̀shyə̂

18“Pànə̀ pɨ àtwuə̀ ɨ̀shyə̂ tə pəla mbàanə̀ a wɨghə, nɨ̀ kẅuumə̀ lo pobə lə̀ pyə̀ mbàanə̀ la a gha. 19Nɨ̀ tə pə tsaʼa pànə̀ pɨ àtwuə̀ ɨ̀shyə̂, yi pànə̀ pɨ àtwuə̀ ɨ̀shyə̂ kòŋə̀ a wɨghə tsaʼa ɨ̀pobə pə̀ənə̀. La ndə̀ tsoʼò mə a wɨghə nfuukə̀ amwuə pànə̀ pɨ àtwuə̀ ɨ̀shyə̂. Ka pobə chi ndòo a ghobə a wɨghə tsaʼa ɨ̀pobə pə̀ənə̀. La ɨ̀sùmə nɨ ka pobə chi nkòŋə̀ a ghobə a wɨghə la. 20Nɨ̀ kẅuumə̀ ànwùə̀ nɨ ndə̀ shwəŋə̀ mə ambo pɨghə: ‘Ka ngàŋə̀ àfàʼà a tsàarə̀ e a masàa e.’ Pobə lə pəla nnyàŋə̀ mə̀, yi pobə ghǎ kɨ nyàŋə̀ a wɨghə. Pobə lə̀ pəla ngɨ̀rə̀ ànwùə̀ nɨ ndə̀ shwəŋə̀nə ambo pobə, yi pobə ghǎ kɨ ghɨ̀rə̀ a zhyə̀ nɨ nɨ̀ shwəŋə̀nə ambo pobə. 21La pobə ghǎ ghɨ̀rə̀ mɨ̀nwùə̀ mə mɨ̀tsùmə̀ aŋunə pɨghə ntiinə nɨ̀ pənə pə̀ənə̀ ɨ̀pâ. Pobə ghǎ ghɨ̀rə̀ a lenə ntiinə ka pobə zhyə̂ a ghobə a ŋònə̀ nɨ a lə̀ twuumə̀nə mə̀. 22Ndə̀ pəla ngwaʼà tɨ tô nshwəŋnə̀ ambo pobə, yi ka pobə lə̀ zhyə̂ a ghobə lo pobə ghɨ̀rə̀ ànwùə̀ tɨ̀pòŋə̀. La tɨ̀tsòŋə̀ wanə, ka àlàŋə a pə e ghu nɨ mbə̀ʼə pobə shwəŋə̀ lo pobə lə̀ mə ngɨ̀rə̀ a tɨ̀pòŋə̀ la ka zhyə̂ a ghobə. 23Ŋònə̀ wa nɨ à pàanə̀nə mə̀, à kɨ mbàanə̀ a Tǎ ɨwəə. 24Ndə̀ pəla mbirə̀ tɨ tô ngɨ̀rə̀ ànwùə̀ nɨ ŋwùə̀ à pirə̀ mə e tɨ tô ngɨ̀rə̀ a ɨ̀myə̂ pobə, yi ka pobə ghɨ̀rə̀ a ghobə ànwùə̀ tɨ̀pòŋə̀. La tɨ̀tsòŋə̀ wanə, pobə zəənə̀ mə mɨ̀nwùə̀ mə ntyiʼə̀ mbàanə̀ mə̀ pəə Tǎ ɨwəə.

25“La zə̀ chyə̂ a nɨ lẅenə̀ ànwùə̀ nɨ a pənə amwuə àŋwàʼnə̀ mbòomə àzobə lo ‘pobə lə̀ pàanə̀ mə̀ àfǐfǐ.’

26“Ẅùə̀ nɨ ǎ yèmpə̀ a wɨghə à ghǎ tô la nɨ Àzhwùə̀ nɨ a za nnèrə̀ a nkǔŋə nkuŋə, nfurə̀ ambo Tǎ. Mbɨ tsàa e, a furə̀ ambo Tǎ ntô shwəŋnə̀ mbə̀ʼə mə̀. 27Nɨ̌ kɨ pə pànə̀ pyə̀ nɨ nɨ̌ kɨ shwəŋnə̀ àzɨghə mbə̀ʼə mə̀, ntiinə nɨ̀ lə̀ pənə pə̀ənə̀ a nɨ̀pìʼnə̀.”

Currently Selected:

Jònə 15: pny

Highlight

Copy