Jònə 14
14
Yěsû a lə̀ʼtə̀ mɨ̀ntɨŋmə̀ mɨ ɨ̀zùŋə̀ ndzùmə̀ ɨ̀pe
1Yěsû à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Kò mɨ̀ntɨŋmə̀ ɨ̀mɨghə kɨ nnə̀ʼnə̀. Nɨ̀ nùŋə̀ mɨ̀ntɨŋmə̀ ɨ̀mɨghə aŋunə Nẅùə̀, nkɨ nnùŋə̀ aŋunə mɨ̀ŋə̀. 2Mɨntaŋə mɨ̀noʼnə ma a ndâ Tǎ ɨwəə. A tə mbəla ngoŋə̀ e tɨ pə a lenə yi ka ǹshwəŋə̀ mə̀ ambo pɨghə lo ngwə̀ ndèrə̀ ghə̀ tsùŋə̀ alyiʼə ambo pɨghə. 3Ǹtə ghə̀ ntsùŋə̀ yi mbɨ tô lòo a wɨghə mbə̀ʼə nɨ̀ tô nnwuunə̀ a nɨ̀pwùnə mɨ̀ŋə̀, njiilo alyiʼə nɨ m̀bənə ghu nɨ̌ kɨ pə ghu. 4Nɨ̀ zhyə̂ àlàŋə nɨ a za ndèrə̀ a alyiʼə nɨ ngwə̀ ndèrə̀.”
Yěsû la àlàŋə a nɨ lèrə̀ ambo Tǎ
5Thomas a shwəŋə̀ ambo ze lo, “Ndòʼnə̀mbyə̂, ka pəə zhyə̂ wəə alyiʼə nɨ wə̀ wə̀ ndèrə̀, ntyiʼə̀ mbə zhyə̂ àlàŋə nɨ a za ndèrə̀ alyiʼə ghu la ɨghə?”
6Yěsû a kẅùə̀ lo, “Mɨ̀ŋə̌ àlàŋə, mbə nkǔŋə nkuŋə, nkɨ mbə nɨ̀chyə̂mbyə̂. Mbə̀ʼə ŋwùə̀ a tô e ambo Tǎ tɨghu a làŋə̀ ambo mɨ̀ŋə̀ apə̀. 7Nɨ̀ tə mbəla nzhyə̂ mə̀, yi nɨ̀ kɨ nzhyə̂ a Tǎ. La a nɨ pìʼnə̀ tɨ̀tsòŋə̀ nɨ̀ zhyə̂ e nkɨ ndzəənə̀ e.”
8Filibə̀ a tyiʼə̀ nshwəŋə̀ ambo Yěsû lo “Ndòʼnə̀mbyə̂, ndàʼà ànwùə̀ nɨ pəə tàʼnə ambo ghò tɨ̀tsòŋə̀ a chyə̂ pə lo wə̀ nèrə̀ a Tǎ ambo pəə, njiilo mbɨ̀ŋmə̀ ɨ̀zəə pòŋə̀.”
9Yěsû a kẅùə̀ ambo ze lo, “Filibə̀, pùu lanə nchyə̂ aŋunə ntyə̌ sàa lə wə̀ tyiʼə̀ ka zhyə̂ o a gha? Ŋònə̀ nɨ à zəənə̀nə mə̀, à zəənə̀ a Tǎ. Wə̀ tyiʼə̀ ndàŋə̀ lə ɨla nshwəŋə̀ lo n̂nèrə̀ a Tǎ ambo pɨghə? 10Filibə̀, ka wə̀ pyiimə̀ o lo mɨ̀ŋə̌ taʼà ŋwùə̀ pəə Tǎ, Tǎ a kɨ mbə taʼà ŋwùə̀ pəə ze? Ka ǹshwəŋə̀ mə̀ mɨ̀nwùə̀ mə mɨ̀tsùmə̀ ambo ghò la àtwuə̀ nɨ mɨ̀ŋə̀. À fàʼà Tǎ nɨ à pənə amwuə mɨ̀ŋə̀ nfàʼà. 11Nɨ̀ pyiimə̀ lo mɨ̀ŋə̌ taʼà ŋwùə̀ pəə Tǎ, Tǎ a kɨ mbə taʼà ŋwùə̀ pəə ze. Kə̀, nɨ̀ pyiimə̀ ntii mɨ̀nwùə̀ nɨ nɨ̀ wa ndzəənə̀ ǹgɨ̀rə̀.” 12Yěsû a chi nshwəŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ à nùŋə̀nə ntɨŋmə̀ e aŋunə mɨ̀ŋə̀, ǎ tô tə ghɨ̀rə̀ mɨ̀nwùə̀ ma nɨ ngwa ngɨ̀rə̀ la. Ghɨ̀rə̀ farə a myə̀ nɨ mɨ tsàarə̀nə, ntiinə ngwə̀ ndèrə̀ mə̀ a nɨ̀pwùnə Tǎ. 13Mbɨ ghɨ̀rə̀ ɨ̀nwùə̀ ɨ̀tsùmə̀ nɨ nɨ̀ pyiitə̀nə aŋunə nɨ̀linə̀ ɨ̀tsâ mbə̀ʼə pànə̀ ghuʼtə̀ a Tǎ ndàŋə̀ a ndzùmə̀ moonə̀ e. 14Nɨ̀ tə pyiitə̀ ànwùə̀ àtsùmə̀ aŋunə nɨ̀linə̀ ɨ̀tsâ, ǹgɨ̀rə̀ a zèrə.”
Yěsû a kàʼà a nɨ tsàa Àzhwùə̀ Nẅùə̀
15Yěsû a chi nshwəŋə̀ lo, “Nɨ̀ tə pəla nkòŋə̀ a mə̀, yi nɨ̌ nùŋə̀ mɨ̀ntə̌ ɨ̀mâ. 16Mbɨ pyiitə̀ a Tǎ a tsàa a wɨghə nɨ ngàŋə̀ àyèmpə̀ ghù nyàanə, nɨ à pɨ pə pɨghə pɨ pobə nkwùə̀ ɨ̀tsùmə̀. 17Ngàŋə̀ àyèmpə̀ wə̀ la Àzhwùə̀ nkǔŋə nkuŋə nɨ mbə̀ʼə ka pànə̀ pɨ àtwuə̀ ɨ̀shyə̂ kẅiirə̀ e a ye ntiinə ka pobə pə ndzəənə̀ a ghobə a ye, ka kɨ zhyə̂ a ghobə a ye, la nɨ̀ zhyə̂ e ntiinə à wa amwuə pɨghə, nɨ̀ kɨ mbə amwuə ze.
18“Ntiinə ngǎ lèrə̀ la mmyàʼtə̀ mə̀ a wɨghə pɨghə nɨ pɨghə apə̀; ngǎ kẅirə̀ tô ambo pɨghə. 19Â kɨ pə aŋunə mətùmə nkwùə̀ pànə̀ pɨ àtwuə̀ ɨ̀shyə̂ chi ndzəənə̀ a ghobə a gha apə̀, la nɨ̀ pə ndzəənə̀ mə̀ ntiinə tsaʼnə ngwə̀ nchyə̂ ghù ntɨ̀ŋnə̀ la, nɨ̌ kɨ pə chyə̂ àzɨghə. 20A ghǎ pə njyə̂ ghu nɨ̀ zhyə̂ lo mɨ̀ŋə̌ taʼà ŋwùə̀ pəə Tǎ, nɨ̀ kɨ mbə taʼà ŋwùə̀ pə̀ənə̀ tsaʼnə ǹkɨnə mbə taʼà ŋwùə̀ pə̀ənə̀. 21Ŋònə̀ wa ntsùmə̀ nɨ à zuʼnə ànwùə̀ nɨ ǹshwəŋə̀nə nkɨ mmə ngɨ̀rə̀ a zèrə la ŋònə̀ nɨ à kòŋə̀nə mə̀. Tǎ ɨwəə ǎ kòŋə̀ a ŋwùə̀ ntsùmə̀ nɨ à kòŋə̀nə mə̀, n̂kɨ nkòŋə̀ a ghobə nnèrə̀ ɨ̀pɨ̀ŋmə̀ mə̀ ambo pobə.”
22Yudà (ka pə e Yudà Iskaryòtə̀) a tyiʼə̀ mbyiitə̀ ambo ze lo, “Ndòʼnə̀mbyə̂, wə̀ ghǎ làŋə̀ ɨla ghu nèrə̀ ɨ̀pɨ̀ŋmə̀ o ambo pəə la nèrə̀ o ambo pànə̀ pɨ àtwuə̀ ɨ̀shyə̂ apə̀?”
23Yěsû a kẅùə̀ ambo ze lo, “Ŋònə̀ wa ntsùmə̀ nɨ à kòŋə̀nə mə̀ ǎ ghɨ̀rə̀ ànwùə̀ za àtsùmə̀ nɨ ngwa nshwəŋə̀ la. Tǎ ɨwəə ǎ kɨ kòŋə̀ e, pəə Tǎ ɨwəə tô ambo ze pəə pɨ pobə chyə̂. 24Ŋònə̀ wa nɨ ka à kòŋə̀ e a gha la, ka à ghɨ̀rə̀ e ànwùə̀ nɨ ngwa nshwəŋə̀. Ɨ̀shwəŋnə̀ pa nɨ nɨ̀ zuʼnə la ka pə e ɨ̀shwəŋnə̀ ɨ̀pâ. A ɨ̀shwəŋnə̀ Tǎ ɨwəə nɨ à tsàanə mə̀.
25“Ǹtiitə̀ a wɨghə nɨ mɨ̀nwùə̀ mə nkwùə̀ nɨ m̀birə̀nə pə̀ənə̀. 26La ngàŋə̀ àyèmpə̀ nɨ à pənə Àzhwùə̀ Nẅùə̀ nɨ Tǎ ǎ tsàa aŋunə nɨ̀linə̀ ɨ̀tsâ, ǎ tô nèrə̀ a wɨghə nɨ ɨ̀nwùə̀ ɨ̀tsùmə̀ kɨ kẅuumə̀ a wɨghə nɨ ɨ̀nwùə̀ ɨ̀tsùmə̀ nɨ ndə̀ shwəŋə̀ mə ambo pɨghə.
27“M̀myàʼtə̀ a wɨghə nɨ àporə̀porə̀; A àporə̀porə̀ mə̀ nɨ ngwə̀ ŋŋâ ambo pɨghə. Ka m̀mə ŋâ mə̀ la tsaʼnə pànə̀ pɨ àtwuə̀ ɨ̀shyə̂ pa ŋŋâ. Kò nɨ̀ pə nɨ ntòmnə̀ kə̀ nɨ àkẅàrə̀ amwuə mɨ̀ntɨŋmə̀ ɨ̀mɨghə. 28Nɨ̀ lə̀ zuʼù tsaʼnə ndə̀ shwəŋə̀nə ambo pɨghə lo, ‘Mbɨ lèrə̀, la kẅirə̀ tô ambo pɨghə.’ Nɨ̀ lə̀ pəla nkòŋə̀ mə̀, yi nɨ̀ pə nɨ nɨ̀ghaʼà lo ngwə̀ ndèrə̀ ambo Tǎ ɨwəə, ntiinə Tǎ à tsàarə̀ a mə̀. 29Ǹtiitə̀ a wɨghə nɨ zə̀ tɨ̀tsòŋə̀ ntiinə a pirə̀ mə e tɨ lòo alyiʼə, njiilo a gha ndòo alyiʼə, nɨ̀ pyiimə̀. 30Ka mbə shwəŋnə̀ mə̀ pə̀ənə̀ tɨsɨŋnə ntiinə ɨ̀fò àtwuə̀ ɨ̀shyə̂ à wə̀ ntô. Ka à pə e nɨ ɨ̀tɨ̀ŋnə̀ a nɨ ghɨ̀rə̀ ànwùə̀ àtse aŋunə mɨ̀ŋə̀, 31la ngwə̀ ngɨ̀rə̀ mɨ̀nwùə̀ tyìʼə̀ tsaʼnə Tǎ ɨwəə à shwəŋə̀nə njiilo pànə̀ pɨ àtwuə̀ ɨ̀shyə̂ zhyə̂ lo ngwa nkòŋə̀ a Tǎ.
“Nɨ̀ ghɨ̀rə̀ pə̀ənə̀ furə̀ ndèrə̀.”
Currently Selected:
Jònə 14: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
