Jònə 13
13
Yěsû a sùu mɨ̀kwùə̀ mɨ ɨ̀zùŋə̀ ndzùmə̀ ɨ̀pe
1A lə̀ pə njyə̂ nɨ njyə̂ ɨ̌ laanə̀ pɨ̀ zɨghə̀ mɨ̀zɨghə̀ mɨ Nɨ̀ghaʼà Àlàŋə̀ Mmyàʼtə̀, Yěsû à lə̀ zhyə̂ mə lo nkwùə̀ ɨ̀ kùʼù ambo ze a nɨ myàʼtə̀ àtwuə̀ ɨ̀shyə̂ zə̀ kẅirə̀ lèrə̀ ambo Tǎ ɨghobə. Tsaʼnə à lə̀ kòŋə̀nə pə̀ənə̀ ɨ̀pe nɨ pənə àtwuə̀ ɨ̀shyə̂ ghə, à lə̀ kòŋə̀ a ghobə tə mmyàanə̀.
2A lə̀ kɨ pə nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ pə ndzɨghə̀ mɨ̀zɨghə̀ mɨ nkwə̌, Satàanə̀ à lə̀ chyâ mə àkwàŋə̀ amwuə ntɨŋmə̀ Yudà Iskaryòtə̀, moonə̀ Shimùnə̀, lo â shwùunə̀ a Yěsû. 3Yěsû à lə̀ zhyə̂ lo Tǎ à ŋâ mə ɨ̀pwuumə̀ ɨ̀tsùmə̀ ambo ze, nkɨ nzhyə̂ lo à lə̀ furə̀ la ambo Nẅùə̀ nkɨ mə ndèrə̀ ambo Nẅùə̀. 4Lenəla, à lə̀ lòo alyiʼə mɨ̀zɨghə̀ ghu, ntsoʼtə̀ ɨtsəʼə ɨ̀pe ndòo a tawùrə̀ nkorə̀ a ɨ̀sə̂ ze, 5nchyâ nchyə amwuə àkaŋə̀ yè sùunə mbɨ̀ŋmə̀, mbìʼnə̀ a nɨ sùu mɨ̀kwùə̀ mɨ ɨ̀zùŋə̀ ndzùmə̀ ɨ̀pe, ntyiʼə̀ ndòo a tawùrə̀ wa nɨ à lə̀ korə̀nə a ɨ̀sə̂ ze la ndòo ndzə̀ə ghu. 6Nkwùə̀ nɨ à lə̀ tônə a nɨ sùu mɨ Shimùnə̀ Pità, Shimùnə̀ Pità à lə̀ pyiitə̀ ambo ze lo, “Ndòʼnə̀mbyə̂, ǎ sùu ghò sùu mɨ̀kwùə̀ ɨ̀mâ?”
7Yěsû a kẅùə̀ ambo ze lo, “Ka wə̀ zhyə̂ o ànwùə̀ nɨ ngwə̀ ngɨ̀rə̀ tɨ̀tsòŋə̀, la wə̀ ghǎ zhyə̂.”
8Pità a shwəŋə̀ ambo ze lo, “Mbə̀ʼə ka wə̀ laʼa nsùu o mɨ̀kwùə̀ ɨ̀mâ!”
Yěsû a kẅùə̀ ambo ze lo, “Ǹtə ngoŋə̀ mə̀ mɨ̀kwùə̀ ɨ̀mô tɨ sùu, wə̀ laʼa mbə o nɨ ànwùə̀ àtse a nɨ ghɨ̀rə̀ pùu apə̀.”
9Shimùnə̀ Pità a shwəŋə̀ ambo ze lo, “Ndòʼnə̀mbyə̂, kò wə̀ sùu o pə ndàʼà mɨ̀kwùə̀ ɨ̀mâ, kɨ nsùu mbô ɨ̀mâ pobə àtwuə̀ mə̀.”
10Yěsû a shwəŋə̀ ambo ze lo, “Ŋònə̀ nɨ à sùu mə mbɨ̀ŋmə̀ e ntsùmə̀, ka à chyə̂ mbə e a nɨ sùu mbɨ̀ŋmə̀. À chyə̂ pə a nɨ sùu ndàʼà mɨ̀kwùə̀ ɨ̀me. La mbɨ̀ŋmə̀ e ntsùmə̀ ɨ̀ laanə̀. Nɨ̀ laanə̀, ndàŋə̀ e taʼà ŋwùə̀ ɨwɨghə.” 11A lə̀ kɨ pə la nɨ à zhyə̂ mə a ŋònə̀ nɨ à shwùunə̀nə e. La ɨ̀sùmə nɨ à lə̀ shwəŋə̀nə lo, “Ka a laanə̀ e pɨghə pɨ̀tsùmə̀.”
12À lə̀ myàanə̀ a nɨ sùu mɨ̀kwùə̀ mɨ ɨ̀zùŋə̀ ndzùmə̀ ɨ̀pe pa la, nkẅirə̀ ngẅî a gàanə̀ e nkẅirə̀ nnwuunə̀ aŋunə alyiʼə e, mbyiitə̀ ambo pobə lo, “Nɨ̀ zhyə̂ ɨ̀sùmə ànwùə̀ zə̀ nɨ ǹgɨ̀rə̀nə aŋunə pɨghə la?” 13Nshwəŋə̀ ambo pobə lo, “Nɨ̀ wa nfuŋə̀ mə̀ nɨ Ɨ̀nèrə̀, nkɨ mmə nfuŋə̀ mə̀ nɨ Ndòʼnə̀mbyə̂. Nɨ̀ wa nfuŋə̀ a lenə la mmə nshwəŋə̀ tyìʼə̀ nkǔŋə nkuŋə ntiinə ǹchyə̂ mbə la ẅèrə. 14Ǹtə pəla mbə Ndòʼnə̀mbyə̂ ɨwɨghə nkɨ mbə Ɨ̀nèrə̀ ɨwɨghə, nkɨ nsùu mɨ̀kwùə̀ ɨ̀mɨghə, a kùʼnə̀ lo nɨ̀ kɨ mmə nsùu mɨ̀kwùə̀ mɨ ŋwùə̀ moʼo moʼo. 15Ǹnèrə̀ a wɨghə la nɨ àlènə̀ ànwùə̀, njiilo nɨ̀ kɨ mmə ngɨ̀rə̀ tsaʼnə ǹgɨ̀rə̀nə aŋunə pɨghə la. 16Ǹshwəŋə̀ a wɨghə tyìʼə̀ nkǔŋə nkuŋə lo ka ngàŋə̀ àfàʼà a tsàarə̀ e a masàa àfàʼà e. Ka ngàŋə̀ ntwuumə̀ a kɨ ntsàarə̀ e a ŋònə̀ nɨ à twuumə̀nə e. 17Tsaʼnə nɨ̀ zhyə̂nə ɨ̀nwùə̀ pə la, mborə̀ ɨ̀ za aŋunə pɨghə mbə̀ʼə nɨ̀ pəla mmə ngɨ̀rə̀ a lenə. 18Ka ǹshwəŋə̀ mə̀ la a wɨghə pɨ̀tsùmə̀; Ǹzhyə̂ mə pə̀ənə̀ pa nɨ ǹtsoʼnə. La zə̀ chyə̂ a nɨ lẅenə̀ ànwùə̀ nɨ àŋwàʼnə̀ Nẅùə̀ a shwəŋə̀ mə lo, ‘Ŋònə̀ wa nɨ à lə̀ zɨghə̀nə àpaanə̀ pəə ze la, à pə̀ŋə̀ ntyiʼə̀ ngàŋə̀ mbwùunə̀ mə̀.’ 19Ngwə̀ nshwəŋə̀ a wɨghə nɨ zə̀ tɨ̀tsòŋə̀ wə̀ zaʼà â pòŋə̀ lòo alyiʼə. Mbə̀ʼə a tənə mbəla ndòo alyiʼə, nɨ̀ pyiimə̀ lo mɨ̀ŋə̌ ŋònə̀ nɨ m̀bənə ẅèrə. 20Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ à kẅiirə̀nə a ŋònə̀ wa nɨ ǹtwuumə̀nə e la à kẅiirə̀ la a gha; ŋònə̀ nɨ à kɨnə nkẅiirə̀ mə̀, à kẅiirə̀ la ẅùə̀ wa nɨ à lə̀ twuumə̀nə mə̀ la.”
Yěsû a tiitə̀ tsaʼnə ŋònə̀ ɨ̀tse ǎ shwùunə̀ e
(Mat 26.20-25; Mrk 1.17-21; Luk 22.21-23)
21Tsaʼnə Yěsû à lə̀ shwəŋə̀nə a lenə la, à lə̀ pə nɨ ntòmnə̀ amwuə ze ka mɨ̀zùŋə, ntyiʼə̀ nshwəŋə̀ a sàŋə̀ sàŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo taʼà ŋwùə̀ ɨwɨghə ghùtse ǎ shwùunə̀ mə̀.”
22Ɨ̀zùŋə̀ ndzùmə̀ ɨ̀pe pə̀ŋə̀ nnaŋə̀ mbɨ̀ŋmə̀ ɨ̀zobə a tyiʼə̀ nkə̀ʼnə̀ a ghobə aŋunə ŋònə̀ nɨ mbə̀ʼə a ghɨ̀rə̀ ntii ànwùə̀ ghu. 23Taʼà àzùŋə̀ ndzùmə̀ Yěsû nɨ à lə̀ kòŋə̀nə e ka mɨ̀zùŋə a lə̀ nwuunə̀ a nɨ̀pwùnə Yěsû.
24Shimùnə̀ Pità a tyiʼə̀ nkẅàa àzùŋə̀ ndzùmə̀ Yěsû za nshwəŋə̀ ambo ze lo, “Pyiitə̀ e nɨ ŋònə̀ nɨ à wə̀ nshwəŋnə̀ mbə̀ʼə ze la.”
25Tsaʼnə à lə̀ pənə a nɨ̀pwùnə Yěsû la, a tyiʼə̀ mbə̀ŋə̀ mbyiitə̀ a Yěsû lo “Ndòʼnə̀mbyə̂, ŋònə̀ wə̀ nɨ wə̀ wə̀ nshwəŋə̀ lə a ɨ̀wə̌?”
26Yěsû a kẅùə̀ ambo pobə lo, “La ŋònə̀ wa nɨ mbɨ tô tsìnə̀ àpaanə̀ amwuə ɨ̀chyàanə ŋŋâ ambo ze la.” Lenəla, a tsìnə̀ àpaanə̀ amwuə ɨ̀chyàanə ŋŋâ ambo Yudà moonə̀ Shimùnə̀ Iskaryòtə̀. 27Tsaʼnə Yudà à lə̀ kẅiirə̀nə àpaanə̀ za, Satàanə̀ à lə̀ kwuunə̀ a ntɨŋmə̀ ze, Yěsû a shwəŋə̀ ambo ze lo, “Faʼa ngɨ̀rə̀ ànwùə̀ za nɨ wə̀ tàʼnə ghɨ̀rə̀ la.” 28Ka taʼà ŋwùə̀ amwuə àpwùʼə̀ pànə̀ nɨ a lə̀ nwuunə̀nə a ɨ̀shyə̂ mmə ndzɨghə̀ la a lə̀ zhyə̂ e ɨ̀sùmə ànwùə̀ nɨ Yěsû à lə̀ shwəŋə̀nə a lenə la ambo ze. 29Tsaʼnə Yudà à lə̀ pənə ŋònə̀ nɨ à twuʼtə̀nə àpàamə̀ nkabə̀ la, pobə pɨ̀tse lə̀ pə nkwàŋə̀ lo Yěsû à shwəŋə̀ ambo ze pə lo â ghə̀ ndzwuunə̀ ɨ̀pwuumə̀ pɨ̀tse nɨ pobə puŋə̀nə mbə̀ʼə njyə̂ nɨ̀ghaʼà zə̀, kə̀ lo â ghə̀ ŋŋâ ɨ̀pwuumə̀ ambo ngàŋə àfumə̀. 30Yudà a kɨ nkẅiirə̀ àpaanə̀ ghu nkwurə̀, ndzùŋə̀ mmyàʼtə̀ nfurə̀ ndèrə̀ e. Ɨ̀twuʼə̀ sinə̀.
Yěsû a ŋâ ntə̌ ghù shwuə̀
31Tsaʼnə Yudà à lə̀ furə̀nə la, Yěsû a shwəŋə̀ ambo pobə lo, “Tɨ̀tsòŋə̀, nɨ̌ zəənə̀ a àghuʼtə̀ Moonə̀ Ŋwùə̀, mbə̀ʼə kɨ làŋə̀ a ndzùmə̀ ze zəənə̀ a àghuʼtə̀ Nẅùə̀ 32Tsaʼnə Nẅùə̀ à pənə nɨ àghuʼtə̀ ndàŋə̀ a ndzùmə̀ Moonə̀ Ŋwùə̀ la, Nẅùə̌ tô lòo e nnùŋə̀ a nɨ̀pwùnə ze, ghuʼtə̀ e nɨ nkuŋə̀. 33Ɨ̀poonə̀ ɨ̀pâ, ka mbə chi pə mə̀ pə̀ənə̀ aŋunə ntyə̌ sàa. Nɨ̀ ghǎ tyiʼə̀ tàʼà mə̀; la tsaʼnə ndə̀ shwəŋə̀nə ambo pɨ̀Jew la, mbɨ shwəŋə̀ a wɨghə tɨ̀tsòŋə̀ lo, ‘Alyiʼə nɨ ngwə̀ ndèrə̀ ghu, mbə̀ʼə nɨ̀ tô a wɨghə apə̀.’ 34Ngwə̀ ŋŋâ a wɨghə nɨ ntə̌ ghù shwuə̀ lo nɨ̀ tə nkòŋə̀ mbɨ̀ŋmə̀ ɨ̀zɨghə. Tsaʼnə ǹkòŋə̀nə a wɨghə la, nɨ̀ tə nkòŋə̀ mbɨ̀ŋmə̀ ɨ̀zɨghə a lenə. 35Nɨ̀ tə mə nkòŋə̀ mbɨ̀ŋmə̀ ɨ̀zɨghə, yi ŋwùə̀ ntsùmə̀ ǎ zhyə̂ lo pɨghə la ɨ̀zùŋə̀ ndzùmə̀ ɨ̀pâ.”
Yěsû a shwəŋə̀ lo Pità à ghǎ twuunə̀ e
(Mat 26.31-35; Mrk 14.27-31; Luk 22.31-34)
36Tsaʼnə Yěsû à lə̀ myàanə̀nə nshwəŋə̀ a zə ànwùə̀ la, Shimùnə̀ Pità à lə̀ pyiitə̀ ambo ze lo, “Ndòʼnə̀mbyə̂, wə̀ lèrə̀ ɨghə?”
Yěsû a kẅùə̀ lo. “Ngwə̀ ndèrə̀ a alyiʼə àtse nɨ mbə̀ʼə wə̀ zùŋə̀ o a gha tɨ̀tsòŋə̀ apə̀. La wə̌ tyiʼə̀ zùŋə̀ mə̀ amwuə yɨ̀tse nkwùə̀.”
37Pità a pyiitə̀ ambo ze lo, “Ndòʼnə̀mbyə̂, mbə̀ʼə ka ǹdzùŋə̀ mə̀ a ghò tɨ̀tsòŋə̀ ntii àkə? A tə mbə pə nɨ̀wɨghə̀ yi mbɨ ŋâ nɨ̀chyə̂mbyə̂ mə̀ mbə̀ʼə o.”
38Yěsû a pyiitə̀ ambo ze lo, “Wə̀ lanə nchwuʼtə̀ mbɨ̀ŋmə̀ a nɨ pî nɨ̀chyə̂mbyə̂ o mbə̀ʼə mə̀? Ǹshwəŋə̀ tyìʼə̀ nkǔŋə nkuŋə ambo ghò lo, ankəʼə à ghǎ kɨ toŋə̀ nɨ ɨ̀twuʼə̀ wə̀ twuunə̀ mə̀ nkwùə̀ ɨtarə.”
Currently Selected:
Jònə 13: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
