Jònə 16
16
1“Ǹshwəŋə̀ a wɨghə nɨ mɨ̀nwùə̀ mə la lo mbə̀ʼə nɨ̀ kaŋə myàʼtə̀ àpyiimə̀ ntɨŋmə̀ àzɨghə. 2Pobə ghǎ kantə̀ a wɨghə amwuə mɨ̀ndâ mɨ àshwatə̀ ɨ̀mobə. Tsaʼnə a pənə lə, nkwùə̀ ɨ̀ zə ntô nɨ mbə̀ʼə ŋònə̀ ɨ̀tse à tə mə nzhwuutə̀ o a mə nkwàŋə̀ pə lo à wə̀ nfàʼà pə àfàʼà Nẅùə̀. 3Pobə ghǎ ghɨ̀rə̀ mɨ̀nwùə̀ mə ntiinə ka pobə zhyə̂ a ghobə a Tǎ kə̀ a gha. 4La ǹtiitə̀ a wɨghə nɨ mɨ̀nwùə̀ mə, mbə̀ʼə nkwùə̀ nɨ pobə pìʼnə̀nə a nɨ ghɨ̀rə̀ a mèrə ambo pɨghə, nɨ̌ kẅempə̀ lo ndə̀ tiitə̀ a wɨghə.
Àfàʼà Àzhwùə̀ Nẅùə̀
“Ka ndə̀ tiitə̀ mə̀ a wɨghə nɨ mɨ̀nwùə̀ mə nkwùə̀ ntsàambyə̀ ntiinə ndə̀ pənə pə̀ənə̀. 5Tɨ̀tsòŋə̀ wə̀ nɨ ngwə̀ nkẅirə̀ ndèrə̀ ambo ze wa nɨ à lə̀ twuumə̀nə mə̀ la, ka ŋwùə̀ ɨwɨghə ghùtse a mə mbyiitə̀ e a gha nɨ alyiʼə nɨ ngwə̀ ndèrə̀. 6La tsaʼnə ǹshwəŋə̀nə mɨ̀nwùə̀ mə mɨ̀tsùmə̀ ambo pɨghə la, mɨ̀ntɨŋmə̀ ɨ̀mɨghə mə ndẅenə̀ nɨ àsòmnə̀. 7La ngwə̀ nshwəŋə̀ tyìʼə̀ nkǔŋə nkuŋə ambo pɨghə: a pòŋə̀ ambo pɨghə lo n̂dèrə̀ ntiinə ǹtə ka lèrə̀ mə̀, ngàŋə̀ àyèmpə̀ ɨwɨghə a tô e apə̀. La ǹtə pəla ndèrə̀, ngə̀ tsàa e ambo pɨghə. 8Nkwùə̀ nɨ à ghǎ tô, à ghǎ ghɨ̀rə̀ â laanə̀ ambo pànə̀ pɨ àtwuə̀ ɨ̀shyə̂ lo mɨ̀nwùə̀ nɨ pobə kwàŋə̀nə mbə̀ʼə tɨ̀pòŋə̀, ghobə mɨ̀nwùə̀ mɨ təəmə̀nə, farə tsaʼnə Nẅùə̀ à ghǎ tsoʼtə̀ mɨ̀sàʼa ka mɨ kùʼnə̀ e. 9Àkwàŋə̀ àzobə mbə̀ʼə tɨ̀pòŋə̀ ka à kùʼnə̀ e ntiinə ka pobə nùŋə̀ a ghobə ntɨŋmə̀ ɨ̀ghobə aŋunə mɨ̀ŋə̀; 10àkwàŋə̀ àzobə mbə̀ʼə mɨ̀nwùə̀ mɨ təəmə̀nə ka à kùʼnə̀ e ntiinə ngwə̀ ndèrə̀ ambo Tǎ, nɨ̀ chi ndzəənə̀ a wɨghə a gha apə̀. 11Àkwàŋə̀ àzobə aŋunə ndwuumə̀ nɨ Nẅùə̀ à pɨ tsoʼtə̀ mɨ̀sàʼa ka à kùʼnə̀ e ntiinə pɨ tsoʼtə̀ mə ɨ̀sàʼa ŋwùə̀ nɨ à puʼtə̀nə àtwuə̀ ɨ̀shyə̂ zə̀.
12“M̀birə̀ mbə nɨ mɨ̀nwùə̀ mɨ̀noʼnə a nɨ shwəŋə̀ ambo pɨghə, la mèrə tɨ̀ŋnə̀ ntsàarə̀ a wɨghə a nɨ zuʼù tɨ̀tsòŋə̀. 13La nkwùə̀ nɨ a ghǎ tô, Àzhwùə̀ za nɨ a za nnèrə̀ a nkǔŋə nkuŋə ǎ ghɨ̀rə̀ nɨ̀ zhyə̂ a nkǔŋə nkuŋə ntsùmə̀. Ka à pə ghǎ shwəŋnə̀ e pə àtwuə̀ nɨ ze, à ghǎ shwəŋə̀ pə ànwùə̀ nɨ à zuʼnə kɨ tiitə̀ a wɨghə nɨ mɨ̀nwùə̀ ma mɨ̀tsùmə̀ nɨ mèrə ghǎ tô. 14À ghǎ ghuʼtə̀ mə̀ ntiinə à ghǎ lòo a zhyə̀ za nɨ m̀bənə shwəŋə̀ ambo pɨghə tô tiitə̀ a wɨghə. 15Àzwuumə̀ àtsùmə̀ nɨ Tǎ ɨwəə à twuʼtə̀nə a àzâ. La ɨ̀sùmə nɨ ǹshwəŋə̀nə lo Àzhwùə̀ ghu a pɨ lòo a zhyə̀ nɨ a pənə àzâ tiitə̀ a wɨghə.
Nɨ̀ghaʼà ghobə àsòmnə̀
16“Ǎ kɨ pə aŋunə mətùmə nkwùə̀ nɨ̀ chi ndzəənə̀ a wɨghə a gha apə̀, la nkwùə̀ ɨ kɨ chi làŋə̀ nɨ̀ zəənə̀ mə̀.”
17Ɨ̀zùŋə̀ ndzùmə̀ ɨ̀pe pɨ̀tse lə̀ pyiitə̀ a tɨ̀tɨ̀rə̀ pobə lo, “Zèrə zə̀ ànwùə̀ a chyə̂ lə lo àkə a nɨ shwəŋə̀ lo, ‘Ǎ kɨ pə aŋunə mətùmə nkwùə̀ nɨ̀ chi ndzəənə̀ a wɨghə a gha apə̀, la nkwùə̀ ɨ kɨ chi làŋə̀ nɨ̀ zəənə̀ mə̀,’ farə a nɨ shwəŋə̀ lo, ‘Ntiinə ngwə̀ ndèrə̀ ambo Tǎ ɨwəə?’ 18Pobə shwəŋə̀ lo, ‘Mətùmə nkwùə̀’ à chyə̂ lo àkə? Ka pəə zhyə̂ a wəə ànwùə̀ nɨ à wə̀ nshwəŋnə̀.”
19Yěsû à lə̀ zhyə̂ lo pobə pə ntàʼà a nɨ pyiitə̀ mɨ̀nwùə̀ mɨ̀tse ambo ze, ntyiʼə̀ nshwəŋə̀ ambo pobə lo, “Nɨ̀ wə̀ mbyiitə̀ lə ɨ̀sùmə ànwùə̀ nɨ ndə̀ shwəŋə̀nə ambo pɨghə lo, ‘A kɨ pə aŋunə mətùmə nkwùə̀ nɨ̀ chi ndzəənə̀ nɨ wɨghə a gha apə̀, la nkwùə̀ ɨ kɨ chi làŋə̀ nɨ̀ zəənə̀ mə̀’? 20Ǹshwəŋə̀ tyìʼə̀ nkǔŋə nkuŋə ambo pɨghə lo nɨ̀ ghǎ yìi tə yìi, la pànə̀ pɨ àtwuə̀ ɨ̀shyə̂ pə ngaʼà a ghobə ghaʼnə. Nɨ̌ pə nɨ àsòmnə̀, la àsòmnə̀ àzɨghə a pə̀ŋə̀ ntyiʼə̀ nɨ̀ghaʼà. 21Nkwùə̀ nɨ mə̀ngyə̌ à mənə ntàʼà pyə̂ a moonə̀, ǎ pə nɨ àndzaŋə yè noʼnə ntiinə nkwùə̀ nɨ̀pyə̂ e ɨ̀ kùʼnə̀nə; la nkwùə̀ nɨ à pyə̂nə a moonə̀ ghu, a chi nkẅempə̀ e àndzaŋə nɨ à lə̀ zuʼnə a zèrə apə̀ ntiinə à wə̀ ngaʼà a moonə̀ e nɨ à pyə̂nə amwuə àtwuə̀ ɨ̀shyə̂ zə̀. 22Lə̌ tsaʼnə a pənə ambo pɨghə: nɨ̀ pə nɨ àsòmnə̀ tɨ̀tsòŋə̀ wə̀. La nkwùə̀ nɨ mbɨ ghǎ kẅirə̀ tô a nɨ zəənə̀ a wɨghə nɨ̀ ghǎ pə nɨ nɨ̀ghaʼà, nɨ à pənə nɨ̀ghaʼà wa ẅùə̀ nɨ mbə̀ʼə ŋwùə̀ a fuukə̀ e a ẅèrə amwuə mɨ̀ntɨŋmə̀ ɨ̀mɨghə apə̀. 23A ghǎ pə nkwùə̀ ghu, nɨ̀ chi mbyiitə̀ a wɨghə a gha nɨ ànwùə̀ àtse apə̀. Ǹshwəŋə̀ tyìʼə̀ nkǔŋə nkuŋə ambo pɨghə lo Tǎ ɨwəə ǎ ŋâ a wɨghə nɨ àzwuumə̀ àtsùmə̀ nɨ nɨ̀ pyiitə̀nə aŋunə nɨ̀linə̀ ɨ̀tsâ. 24A nɨ pyàa tɨ̀tsòŋə̀ wə̀, nɨ̀ pirə̀ mə a wɨghə tɨ pyiitə̀ àzwuumə̀ àtse aŋunə nɨ̀linə̀ ɨ̀tsâ. Nɨ̀ pìʼnə̀ a nɨ pyiitə̀, nɨ̌ kɨ kẅiirə̀. Lenəla, nɨ̀ tyiʼə̀ ngaʼà ka mɨ̀zùŋə.
Yěsû à tsàarə̀ àtwuə̀ ɨ̀shyə̂
25“Ǹshwəŋə̀ a wɨghə nɨ mɨ̀nwùə̀ mə amwuə ɨ̀shwəŋnə̀ pɨ̀nàanə nàanə. La nkwùə̀ ɨ̀ zə ntô nɨ ka mbə chi shwəŋnə̀ mə̀ amwuə ɨ̀shwəŋnə̀ pɨ̀nàanə nàanə, mbə tyiʼə̀ shwəŋnə̀ pə sàa sàa mbə̀ʼə Tǎ. 26Aŋunə njyə̂ ghu, nɨ̀ ghǎ tyiʼə̀ pyiitə̀ ambo Tǎ aŋunə nɨ̀linə̀ ɨ̀tsâ; ka m̀mə nshwəŋə̀ mə̀ lo mbɨ ghǎ pyiitə̀ ambo Tǎ ambo pɨghə, à ghǎ pyiitə̀ pɨghə, 27mbə̀ʼnə Tǎ àtwuə̀ mbɨ̀ŋmə̀ e à kòŋə̀nə a wɨghə ntiinə nɨ̀ kòŋə̀nə mə̀, ǹkɨ mbyiimə̀ lo ǹfurə̀ ambo Nẅùə̀. 28Ndə̀ furə̀ ambo Tǎ ntô amwuə àtwuə̀ ɨ̀shyə̂; la tɨ̀tsòŋə̀, ngwə̀ mmyàʼtə̀ àtwuə̀ ɨ̀shyə̂ nkẅirə̀ mmə ndèrə̀ ambo Tǎ.”
29Tsaʼnə à lə̀ shwəŋə̀nə a lenə la, ɨ̀zùŋə̀ ndzùmə̀ ɨ̀pe shwəŋə̀ lo, “Wə̀ wə̀ nshwəŋnə̀ sàa sàa tɨ̀tsòŋə̀ ka mə nshwəŋnə̀ o amwuə ɨ̀shwəŋnə̀ pɨ̀nàanə nàanə. 30Tɨ̀tsòŋə̀ pəə zhyə̂ lo wə̀ zhyə̂ ànwùə̀ àtsùmə̀, ka ɨ̀sùmə ɨ̀ pə e ghu ambo ŋònə̀ ɨ̀tse a nɨ chi mbyiitə̀ o nɨ ɨ̀pyiitə̀ ɨ̀shwəŋnə̀. Zə̀ ghɨ̀rə̀ pəə pyiimə̀ lo wə̀ lə̀ furə̀ ambo Nẅùə̀.”
31Yěsû a pyiitə̀ ambo pobə lo, “Nɨ̀ pyiimə̀ tɨ̀tsòŋə̀ wanə? 32La nkwùə̀ ɨ̀ zə ntô; zèrə ɨ̀ tô mə, a nɨ tâ a wɨghə nsapə̀, ŋwùə̀ moʼo moʼo â lèrə̀ a ɨmwuə alyiʼə ze, n̂tyiʼə̀ ngoŋə̀ mɨ̀ŋə̀ nɨ mɨ̀ŋə̀. La ka mbə pə mə̀ mɨ̀ŋə̀ nɨ mɨ̀ŋə̀ ntiinə Tǎ ɨwəə à wə̀ pəə ze. 33Ǹtiitə̀ a wɨghə nɨ mɨ̀nwùə̀ mə lə njiilo pə̀ənə̀ pwuutə̀ mbə taʼà ŋwùə̀ nɨ̀ kɨ mbə nɨ àporə̀porə̀. Nɨ̌ zəənə̀ ngəʼə̀ amwuə àtwuə̀ ɨ̀shyə̂ zə̀, la nɨ̀ təəmə̀ ntɨ̀ŋnə̀! Ǹtsàarə̀ mə mɨ̀tɨ̀ŋnə̀ mɨ àtwuə̀ ɨ̀shyə̂ zə̀.”
Currently Selected:
Jònə 16: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
