Апостолхэм ашӀэгъэ Ӏофхэр 27

ЯТӀОКӀЫРЭ БЛЫНЭРЭШЪХЬ

Рим къэлэшхом кӀонэу Паул къухьэ горэм зэритӀысхьагъэр

1Италием къухьэкӀэ тэ#27:1 тэ – еплъ 20:5. тызэрэкӀощтым, Ӏэшъхьэтет Фест зытыреубытэм, Паули нэмыкӀрэ хьапсчӀэс купи Кайсарым идзэ ыцӀэкӀэ заджэхэу, нэбгырэ шъих хъурэ дзэлӀ купым ипащэхэм ащыщэу, Иулый зыцӀэм ыӀэ рилъхьагъэх. 2Адрамит къалэм къикӀырэ къухьэу Асие хэкум ихыӀушъо Ӏут къалэхэм анэсыщтым титӀысхьи, тежьагъ. Аристарх зыцӀэу Македоние хэкум ит Фессалоникэ къалэм щыщыр тигъусагъ.

3ЯтӀонэрэ мафэм къалэу Сидон тынэсыгъ. Иулый нэшӀукӀэ Паул къеплъи, Паул иныбджэгъухэу ащ дэсхэм Паул ищыкӀагъэхэр къыратынхэм пае, ахэмэ адэжь кӀонэу фит ышӀыгъ. 4Ащ тыщежьи, жьыбгъэр къызэрэтпеорэм пае, Кипр хыгъэхъунэм ылъэныкъоу жьыбгъэ къызыщемыпщэрэм тыготэу тыкӀуагъ. 5Киликие хэкумрэ Памфилие хэкумрэ афэзэнкӀэ хым тызэпырыкӀи, Ликие хэкум икъалэу Мирэ тынэсыгъ. 6Ащ Александрие къалэм къикӀэу, Италием кӀонэу къухьэ горэ дзэ пащэм къыщигъоти, тыригъэтӀысхьагъ. 7Мэфэ заулэрэ мэкӀэ-макӀэу тыкӀозэ, къинкӀэ Книд къалэм пэчъынатӀэ тыхъугъ. Ау жьыбгъэм занкӀэу тигъэкӀуагъэпти, хым къыхэщэикӀыгъэ чӀыгу къуапэу Салмонэ зыцӀэм тыблэкӀызэ, Крит хыгъэхъунэм ылъэныкъоу жьыбгъэр къызыщемыпщэрэм тыготэу тыкӀуагъ. 8Хы гъунэм тыготэу къинкӀэ тыкӀозэ, Ласей къалэм пэгъунэгъоу «КъухьэуцупӀэшӀухэр» зыфаӀорэ чӀыпӀэм тынэсыгъ.

9Охътабэ тешӀэгъагъ, къухьэкӀи узекӀоныр щынагъо хъугъагъэ, сыда пӀомэ, нэкӀ мафэри#27:9 нэкӀ мафэр – джуртхэм ямэфэкӀ мэфэшхоу «Иом Киппур» зыцӀэр ары. Ар зытефэрэр ябгъонэрэ е япшӀэнэрэ мазэр ары, къухьэкӀэ укӀоныр щынагъо зыхъурэ уахът. А мэфэкӀ мэфэшхом джуртхэм анэкӀы. блэкӀыгъэхагъ. Арыти, Паул лӀыхэм агуригъаӀозэ, 10моущтэу ариӀуагъ:

– Шъо, лӀы купыр, сэ зэрэслъэгъурэмкӀэ, тигъогу щынагъо хэлъ, хьылъэхэмрэ къухьэмрэ ямызакъоу, тпсэхэри тшӀокӀодынхэкӀэ щынагъо щыӀ.

11Ау дзэ пащэр Паул къыӀуагъэхэм анахьи, къухьэм итхьэматэми къухьэр зиеми къаӀуагъэхэм нахь ядэӀущтыгъ. 12КӀымафэр ащ дэжьым щыдгъэкӀонэу зэрэкъухьэмыуцупӀэшӀум пае, а чӀыпӀэм тыкъыщежьэжьынышъ, амал иӀэмэ, Финик зыцӀэ къухьэуцупӀэм тынэсынышъ, кӀымафэр ащ щыдгъэкӀонэу нахьыбэр зэгурыӀуагъ. Финик зыцӀэ къухьэуцупӀэр Крит хыгъэхъунэм икъухьэуцупӀэхэм ащыщыгъ, къыблэ тыгъэ къохьэпӀэ лъэныкъомкӀи, темыр тыгъэ къохьэпӀэ лъэныкъомкӀи фэгъэзагъ.

Хым жьыбгъэшхо зэрэщыхъугъэр

13КъыблэмкӀэ къикӀэу жьыбгъэ тӀэкӀу къепщэ зэхъум, агу хэлъыр къадэхъугъэу ашӀошӀи, ежьагъэх Крит хыгъунэм готхэу. 14Ау бэ темышӀэу, «Темыр тыгъэ къокӀыпӀэмкӀэ къикӀырэ жьыбгъэшхор» хыгъэхъунэм ылъэныкъокӀэ къикӀэу къапеуагъ. 15Жьыбгъэшхом къухьэр зэкӀиубытагъ. Къухьэр жьыбгъэшхом пэдгъэуцужьын тымылъэкӀ зэхъум, ыуж тикӀыжьыгъ, псыорхэм къухьэр къырахьакӀэу жьыбгъэм тырифыжьагъ. 16Клаудэ зыцӀэ хыгъэхъунэ цӀыкӀу горэм ылъэныкъоу жьыбгъэ къызыщемыпщэрэм тыготэу тыкӀозэ, къинкӀэ къухьэм икъуашъо мыкӀодэу къэдгъэнэжьыгъ. 17Къуашъор къаӀэти, къухьэм ыкӀоцӀ къызырагъэуцом ыуж, кӀэпсэшхохэр къухьэм къыращэкӀыгъ жьыбгъэшхом зэпкъыримыутыным пае. Къухьэр Сыртис зыцӀэ щэнджыпӀэм къытенэнкӀэ щынагъэхэти, чэтэнхэр къырагъэхыгъ, аущтэуи жьыбгъэшхом зырагъэфыщтыгъ. 18ЯтӀонэрэ мафэми жьыбгъэр щынэгъошхуагъэти, хьылъэхэр хым хадзэу аублагъ. 19Ящэнэрэ мафэм къухьэм иӀэмэ-псымэхэм ащыщхэр тэр-тэрэу тӀэхэмкӀэ хым хэтыдзагъ. 20Мэфэ заулэрэ тыгъи жъуагъуи къэмылъагъохэу, жьыбгъэшхор зэпыугъэпти, тымыкӀодэу тыкъэнэжьыным игугъапӀэ тиӀэжьыгъэп.

21ЛӀыхэр мышхэхэу бэ зытешӀэм, Паул ахэмэ апашъхьэ къиуцуи, къыӀуагъ:

– Шъо, лӀы купыр, сэ шъукъысэдэӀоу Крит шъукъыщемыжьэгъагъэмэ, зэрар зи шъуиӀэщтыгъэп, шъуащыщэу зи кӀодыщтыгъэп. 22Ау джы шъугу шъумыгъэкӀоды, къышъосэӀо, шъуащыщэу зи кӀодыщтэп. Къухьэр ары ныӀэп кӀодыщтыр. 23Тхьэу зибын сыщыщэу, сызыфэлажьэрэм имэлэӀич нычэпэ къысфэлъагъуи, 24къысиӀуагъ: «Умыщын, Паул! Кайсарым ыпашъхьэ уиуцон фае. Къухьэм исхэу къыбдакӀохэрэ пстэури о уихьатыркӀэ Тхьэм ынэшӀукӀэ мыкӀодхэу къыгъэнэжьыщтых». 25Арышъ, шъо, лӀы купыр, шъугу шъумыгъэкӀоды. Тхьэм къызэрэсиӀуагъэм фэдэу зэрэхъущтымкӀэ ежь сыщэгугъы. 26Ау жьыбгъэшхом хыгъэхъунэ горэм тырифылӀэн фае.

27ЯпшӀыкӀуплӀэнэрэ чэщым Адриэ хым тытетэу жьыбгъэшхом къухьэр ыфызэ, чэщныкъом лӀыхэм чӀыгу горэ гъунэгъу къызэрэхъугъэм гу лъатагъ. 28Хым икуугъэ зашым, ӀэплӀэкӀу тӀокӀ хъугъэ. ТӀэкӀу джыри тыкӀуи, етӀани икуугъэ зашым, ӀэплӀэкӀу пшӀыкӀутф хъугъэ. 29Жьыбгъэшхом къухьэр мыжъошхохэм ашӀуигъэнэнкӀэ щынагъэхэти, къухьэм ыкӀэкӀэ гъурзиплӀ радзыхыгъэу, нэф къэшъыным гузажъохэу паплъэщтыгъэх. 30Шъэфэу хэхьажьынхэр ягухэлъэу къухьэр зыфыхэрэм ащ ыпэкӀэ гъурз заулэ радзыхырэм фэдэ зашӀи, къуашъор хым ратӀупщэхыгъ. 31Джащыгъум Паул дзэ пащэмрэ дзэлӀхэмрэ ариӀуагъ:

– А лӀыхэр къухьэм къимынэхэмэ, шъупсэхэр мыкӀодхэу къэжъугъэнэжьынхэ шъулъэкӀыщтэп.

32Паул аущтэу зареӀом, дзэлӀмэ къуашъом икӀэпсэшхохэр зэпаупкӀыхи, къуашъор рагъэфэхыгъ.

33Нэф зэшъым, Паул зэкӀэми шхэнхэу ялъэӀуи, къыӀуагъ:

– Непэ мэфэ пшӀыкӀуплӀ мэхъу гузэжъогъум шъухэтэу зи зышъумышхыгъэр. 34Арышъ, шъушхэнэу лъэшэу сышъолъэӀу, шъумыкӀодэу шъукъэнэжьыным пае, ар шъуищыкӀагъ. Шъуащыщэу зыми ышъхьац налъэ кӀодыщтэп.

35Паул аущтэу къызеӀом, хьалыгъу къышти, зэкӀэмэ апашъхьэ Тхьэм щытхъу щыфишӀи, хьалыгъур зэгуичи, ышхэу ыублагъ. 36ЗэкӀэми гу къызыӀэпашӀыхьажьи, ахэри шхагъэх. 37Тэ къухьэм ис пстэури нэбгырэ шъитӀурэ тӀокӀищырэ пшӀыкӀухырэ тыхъущтыгъ.

38Ахэмэ зызагъэшхэкӀыжьым, коц хьылъэхэр хым хадзэхэзэ, къухьэр нахь псынкӀэ ашӀыгъ.

Къухьэр зэрэзэхэкъутагъэр

39Нэф къызэшъым, хыӀушъор ашӀэжьыгъэп, ау пшахъо Ӏулъэу зы хытӀуалэ#27:39 хытӀуалэ – псэу чӀыгум къыхахьэрэр ары. горэ алъэгъугъ. Амал иӀэмэ, ащ къухьэр рафылӀэнэу тыраубытагъ. 40Гъурзыхэм якӀэпсэшхохэр зэпаупкӀи, хым къыханагъэх. Ардэдэм къухьэр зыгъэӀорышӀэрэ хьанцэхэм якӀэпсэшхохэри атӀэтагъэх. ЕтӀанэ чэтэн цӀыкӀур жьыбгъэм щагъаӀи, хыӀушъом фаузэнкӀыгъ. 41Ау къухьэр пшэхъолъэ чӀыпӀэ горэм хахьи, къытенагъ. Къухьэр мыхъыешъоу щэнджыпӀэм ыпэкӀэ хэнагъ, хыор лъэшхэми ыкӀэ зэпкъыраутэу аублагъ.

42ХьапсчӀэсхэм ащыщэу зыгорэ есызэ хэмыхьажьыным пае, дзэлӀхэм ахэр аукӀынхэ агу хэлъыгъ. 43Дзэ пащэм Паул мыкӀодэу къыгъэнэжьынэу фэягъэти, дзэлӀхэр зэтыриӀэжагъэх ягухэлъ аримыгъашӀэу, есыкӀэ зышӀэхэрэм апэ псым зыхадзэнышъ, хыӀушъом Ӏусыхьанхэу унашъо афишӀыгъ. 44Къэнагъэхэри пхъэмбгъухэмрэ къухьэм щыщ къутафэхэмрэ ателъхэу хыӀушъом зынагъэсынэу ариӀуагъ. Аущтэу зэкӀэри хыӀушъом нэсхи, псаухэу къэнэжьыгъэх.

Currently Selected:

Апостолхэм ашӀэгъэ Ӏофхэр 27: AdgNT14

Highlight

Copy