Апостолхэм ашӀэгъэ Ӏофхэр 28

ЯТӀОКӀЫРЭ ИНЭРЭШЪХЬ

Мелит хыгъэхъунэм Паул къыщехъулӀагъэхэр

1Тыпсаоу тыкъызэнэжьым, а хыгъэхъунэм МелиткӀэ#28:1 Мелит – Мальтэ ары. зэреджэхэрэр зэдгъэшӀагъ. 2Хыгъэхъунэм исхэр шӀугъэшхокӀэ къытпэгъокӀыгъэх. Ощхышхо къещхэу, чъыӀэшхоти, машӀо ашӀи, зэкӀэми тырагъэблэгъагъ. 3Паул чы гъугъабэ къыугъоий, машӀом зыпелъхьэм, машӀом блэ горэ чыхэм къахифи, ыӀэ къеуи, къыпынагъ. 4Хыгъэхъунэм исхэм блэр Паул ыӀэ къыпылэлэу залъэгъум, зэраӀожьыгъ:

– Мы лӀыр укӀэкӀо горэн фае; сыда пӀомэ, хым псаоу къыхэкӀыжьыгъэми, Тхьэм ишъыпкъагъэ псэунэу фит ышӀыгъэп.

5Ау Паул ыӀэ ыгъэсыси, блэр машӀом хидзи, блэм иягъэ Паул къекӀынэу хъугъэп.

6«А лӀыр бэгыщт е ошӀэ-дэмышӀэу зэхэфэнышъ, лӀэщт», – аӀуагъ ахэмэ, ау бэрэ пэплъагъэхэу, Паул зи къыщымышӀыгъэу залъэгъум, ягупшысакӀэ зэблахъуи, «Мыр тхьэ гор», – аӀуагъ.

7А чӀыпӀэм игъунэгъоу, хыгъэхъунэм итхьэматэу Публый зыцӀэм чӀыгушхохэр щыриӀагъ. Ащ тыригъэблагъи, мэфищэ игуапэу тихьэкӀагъ. 8Публый ятэ плъыр-стырымрэ ныбэузымрэ зыкӀаубытагъэу пӀэм хэлъыгъ. Паул сымаджэм дэжь ихьи, Тхьэм фелъэӀуи, ыӀэхэр тырилъхьи, ыгъэхъужьыгъ. 9Аущтэу зэхъум, хыгъэхъунэм щыӀэ нэмыкӀ сымаджэхэри Паул дэжь къакӀохи, ахэри ыгъэхъужьыгъэх. 10Лъытэныгъэ къытфашӀэу тын пчъагъэхэр къытатыгъ, тыкъызежьэжьыми, тищыкӀагъэхэр къытфахьыгъ.

Рим къэлэшхом Паул зэрэнэсыгъэр

11Мэзищ зытешӀэм, Александрие къалэм щыщэу, «Тхьэ ЗэтӀуазэхэр»#28:11 Тхьэ ЗэтӀуазэхэр – Зевс зыфаӀорэ тхьэ нэпцӀым ыкъоу тӀуазэхэу, Касторрэ Поллуксрэ ары. Къухьэ зыфыхэрэм а тхьэ нэпцӀитӀур агъэлъапӀэщтыгъ. зыфаӀорэ къухьэу, а хыгъэхъунэм кӀымафэм щыӀагъэм титӀысхьи, ащ тыкъыщежьэжьыгъ. 12Сиракуз къалэм тыӀухьи, мэфищэ ащ тыщыӀагъ. 13Ащ тыкъыщежьэжьи, Ригие къалэм тынэсыгъ. Зы мафэ зытешӀэм, къыблэмкӀэ къикӀырэ жьыбгъэр къепщэу къыубли, ятӀонэрэ мафэм Путеол къалэм тынэсыгъ. 14Ащ тшы заулэ къыщыдгъотыгъ, ахэмэ адэжь мэфиблэ тыщыӀэнэу къытэлъэӀухи, тырагъэблэгъагъ. Ащ нэужым Рим къэлэшхом тыкӀонэу гъогум тытехьажьыгъ. 15Рим дэс тшыхэм тыкъызэрэкӀощтыр зэхахыгъагъэти, «Аппый ЗэхэхьапӀ»#28:15 «Аппый ЗэхэхьапӀ» зыцӀэ къалэр – Рим къэлэшхом километрэ 70-кӀэ пэчыжьэу, икъыблэ лъэныкъомкӀэ итыгъ. зыцӀэ къалэмрэ «ХьэкӀэщыпӀищ»#28:15 «ХьэкӀэщыпӀищ» зыцӀэ къалэр – Рим къэлэшхом километрэ 55-кӀэ пэчыжьэу, икъыблэ льэныкъомкӀэ итыгъ. зыцӀэ къалэмрэ анэс къытпэгъокӀынхэу къэкӀуагъэх. Паул ахэр зелъэгъум, Тхьэм щытхъу фишӀыгъ, гу къызыӀэпишӀыхьажьыгъ. 16Рим тыкъызынэсым, рим тетыгъо зиӀэхэм Паулрэ ежь икъэрэгъул дзэлӀымрэ шъхьафэу язакъоу дэсынхэу фит ашӀыгъэх.

Рим къэлэшхом Паул КъэбарышӀур зэрэщигъэӀущтыгъэр

17Мэфищ зытешӀэм, Паул джуртхэм ятхьэматэхэр къаригъэщагъ. Ахэр къызызэрэугъоихэм, ариӀуагъ:

– Сшыхэр, тэ тлъэпкъ мыхъун зи есымышӀагъэу, тятэжъхэм яхабзэхэми сатемыкӀыгъэми, Ерусалим сыщаубыти, рим цӀыфхэм саӀэкӀалъхьагъ. 18Ахэр сиӀоф зыхэплъэхэм, укӀ зифэшъошэ мыхъун зи къысагъотылӀагъэпти, сыкъатӀупщыжьынэу фэягъэх. 19Ау джуртхэр рим цӀыфхэм сызэратӀупщыжьыщтым зыпэуцужьхэм, Кайсарым сиӀоф хьыкум тыришӀыхьанэу сылъэӀон фаеу хъугъэ. Ау слъэпкъ седэоныр арэп аущтэу зыкӀэсшӀыгъэр. 20Ӏофхэр аущтэу зэрэхъугъэхэр ары шъуслъэгъунэуи сыкъыжъудэгущыӀэнэуи шъукъызкӀязгъэщагъэр. Шъыпкъэ, израиль цӀыфхэр зыщыгугъыхэу, зыпаплъэхэрэм#28:20 израиль цӀыфхэр зыщыгугъыхэу, зыпаплъэхэрэр – Христос ары. пае Ӏэхъухэр стелъых.

21– О уикъэбар зэрыт тхылъ горэ Иудей хэкум къикӀэу къытфэкӀуагъэп, – къыраӀожыгъ ахэмэ. – Ащ дэжьым къикӀыхэу, мыщ къэкӀогъэ тшыхэми ощ пае къэбар Ӏае гори къытфахьыгъэп ыкӀи къытаӀуагъэп. 22Ау о уигупшысэхэр къапӀохэзэ, тябгъэдэӀу тшӀоигъу; сыда пӀомэ, цӀыфхэр тыдэкӀи а дин пхэнджым зэрэщыпэуцухэрэр тэ тэшӀэ.

23Мафэ горэ агъэнафи, Паул зэрыс унэм цӀыф купышхо къэкӀуагъ. Пчэдыжьым щегъэжьагъэу пчыхьэм нэс Тхьэм и Тетыгъошхо икъэбар Паул агуригъаӀозэ, а тетыгъошхом шыхьат фэхъугъ. Пегъымбар Мусэ и Тэурат хабзэ итхэмрэ пегъымбархэм атхыгъэ тхылъхэм арытхэмрэ#28:23 пегъымбар Мусэ и Тэурат хабзэм итхэмрэ пегъымбархэм атхыгъэ тхылъхэм арытхэмрэ – еплъ 13:15. ащыщхэм къяджэзэ, Паул Исус ехьылӀагъэу къыӀохэрэр ашӀошъ ыгъэхъуным пылъыгъ. 24Паул къыӀуагъэхэр зы куп ышӀошъ хъугъэ, нэмыкӀхэм ашӀошъ хъугъэп.

25А джуртхэр зэгурымыӀохэу зэбгырыкӀыжьынхэм ыпэкӀэ, Паул мы гущыӀэхэр къыӀуагъ:

– Тхьэм ы Псэ ЛъапӀэ пегъымбар Ешайа шъуятэжъхэм яхьылӀагъэу шъыпкъэр къыригъэӀуагъ#28:25-27 къыригъэӀуагъ – еплъ Пегъымбар Ешайа тхылъэу ытхыгъэм 6:9-10.:

26«Мы лъэпкъым дэжь кӀуи, моущтэу еӀу: Шъо егъашӀэм зэхэшъух зэпытыщт, ау къыжъугурыӀощтэп; шъо егъашӀэм шъулъэгъу зэпытыщт, ау гу лъышъутэщтэп.

27Сыда пӀомэ, мы цӀыф лъэпкъым щыщхэм агухэм гулъытэ ямыӀэ хъугъэ. Ахэмэ атхьакӀумэхэм жъажъэу зэхахы, анэхэри упӀыцӀагъэх. Аущтэу щымытыгъэмэ, анэхэмкӀэ алъэгъущтыгъ, атхьакӀумэхэмкӀи зэхахыщтыгъ, агухэмкӀи къагурыӀощтыгъ, садэжьи къагъэзэжьыгъэмэ, ахэр згъэхъужьыщтыгъэх».

28– Арышъ, цӀыфхэр мыкӀодхэу Тхьэм къызэригъэнэжьхэрэм икъэбар хымэ лъэпкъхэм Тхьэм къызэралъигъэӀэсыгъэр зэжъугъашӀэ. Ахэри а къэбарым едэӀущтых!

29Паул а гущыӀэхэр къызеӀом, джуртхэр лъэшэу зэнэкъокъухэзэ, унэм икӀыжьыгъэх.

30Паул фэтэрэу ыубытыгъэм илъэситӀум щыпсэугъ, ыдэжь къакӀорэ цӀыф пстэури ригъэблагъэщтыгъ. 31Зы цӀыфи зыкӀи къыпэмыуцоу, Тхьэм и Тетыгъошхо икъэбар ыгъэӀущтыгъ, Зиусхьан Исус Христос икъэбари гушхокӀэ цӀыфхэм аригъашӀэщтыгъ.

Currently Selected:

Апостолхэм ашӀэгъэ Ӏофхэр 28: AdgNT14

Highlight

Copy