Апостол Якъубэ тхылъэу ытхыгъэр 1

АПЭРЭШЪХЬ

ШӀуфэс

1Сэ сы Якъуб, Тхьэмрэ Зиусхьан Исус Христосрэ сафэлажьэ. Шъо, дунаим щитэкъухьагъэу щыпсэурэ лӀэкъо пшӀыкӀутӀум шӀуфэс шъосэхы.

ШӀошъхъуныгъэмрэ акъылышӀуагъэмрэ

2Сшыхэр, шъуишӀошъхъуныгъэ ишъыпкъагъэ зыгъэунэфырэ къин зэфэшъхьафхэм шъуахафэмэ, шъугушӀу, 3сыда пӀомэ, мы къинхэм шъуишӀошъхъуныгъэ ишъыпкъагъэ загъэунэф ужым, а къинхэм теубытагъэ къазэрыкӀэкӀырэр шъошӀэ. 4Теубытагъэми иӀоф рерэгъэкъу, лъэныкъо пстэумкӀи зишъыпкъагъэ щыкӀагъэ зимыӀэ цӀыф икъугъэхэу шъухъуным пае. 5Ау шъуащыщ горэм иакъылышӀуагъэ щыкӀагъэ иӀэмэ, Тхьэм ерэлъэӀу, ащи акъылышӀу къыритыщт. Сыда пӀомэ, зыми емыгыеу, игуапэу Тхьэм зэкӀэми аретышъ ары. 6Ау емыхъырэхъышэу, шӀошъхъуныгъэкӀэ ерэлъэӀу, сыда пӀомэ, Тхьэм ехъырэхъышэрэр хыорэу жьыбгъэм адыкӀи мыдыкӀи ыфызэ, зэридзэрэм фэд. 7Тхьэм зыгорэ къыритынкӀэ ащ фэдэ цӀыфыр орэмыгугъэ. 8Ар темыубытагъэу, акъыл тӀуанэ зиӀэ цӀыф, ышӀэрэ пстэумкӀи теубытагъэ иӀэп.

ТхьамыкӀагъэмрэ баиныгъэмрэ

9Къош тхьамыкӀэр Тхьэм зэриӀэтыгъэмкӀэ орэгушӀо. 10Ау баир Тхьэм зэригъэцӀыкӀугъэмкӀи орэгушӀо, сыда пӀомэ, уцым икъэгъагъ фэдэу кӀодыжьыщт. 11Тыгъэр къыкъокӀы, къыдэкӀуае, фэбэ дэдэ мэхъу, фэбаем уцыр егъэгъу, икъэгъагъ пэтэкъу, идэхагъэ мэкӀодыжьы. Джащ фэдэу лӀы баир иӀофхэм апылъызэ кӀодыжьыщт.

Шъыпкъагъэр зыгъэунэфырэ къинхэмрэ псэкӀодшӀэным дэзыхьыххэрэ Ӏофхэмрэ

12Зишъыпкъагъэ гъэунэфыгъэу, теубытагъэ зиӀэ цӀыфыр гъогу мафэ теуцуагъ, сыда пӀомэ, ишъыпкъагъэ гъэунэфыгъэ зыхъурэ ужым, мыкӀодыжьын щыӀэныгъэ танджэу ежь шӀу зылъэгъухэрэр къызэригъэгугъагъэхэр Тхьэм а цӀыфым къыритыщт.

13Ишъыпкъагъэ зыгъэунэфын къин цӀыф горэ хафэмэ, «Тхьэр ары сызгъэунэфэу сыдэзыхьыхырэр» ерэмыӀу. Бзэджагъэм Тхьэр зыӀэпищэшъущтэп. Бзэджагъэ ышӀэнэу зы нэбгыри Тхьэм дихьыхыщтэп. 14Хэти ежь ихъопсэ Ӏаехэр ары зыӀэпызыщэхэу, зыгъэнацӀэхэу дэзыхьыххэрэр. 15Хъопсэ Ӏаер лъэрмыхь хъумэ, псэкӀодшӀэныр къелъфы; псэкӀодшӀэнри икъугъэ зыхъукӀэ, лӀэныгъэр къелъфы.

16Сшы лъапӀэхэр, зыми зешъумыгъэгъапцӀ. 17Сыдрэ тын дэгъуи тын шъыпкъи уашъом къекӀы, уашъом щыӀэ нэфынэхэм я Тэ лъапӀэ дэжь къекӀы. ЗызэзыхъокӀырэ жьаухэм афэдэу ащ зызэблихъужьырэп. 18Ежь шӀоигъуагъэти, шъыпкъэм игущыӀэхэмкӀэ тыкъыгъэхъугъ, къыгъэхъугъэ пстэуми ащыщэу апэрэу тыхъуным пае.

Тхьэм игущыӀэхэм уядэӀунымрэ бгъэцэкӀэнхэмрэ

19Сшы лъапӀэхэр, мыр зэжъугъашӀэ. Хэти дэӀонымкӀэ псынкӀэу орэхьазыр, ау шӀэхэу орэмыгущыӀ, псынкӀэуи орэмыгубж. 20Сыда пӀомэ, цӀыфым игубж Тхьэм дэжькӀэ шъыпкъагъэр ыгъэцакӀэрэп. 21Арышъ, къышъухэнэгъэ гу шӀоигъэ пстэури бзэджэгъэ пстэури хэшъунэжь. Тхьэм шъугухэм къарилъхьэгъэ гущыӀэхэу шъупсэхэр мыкӀодхэу къэзгъэнэжьын зылъэкӀыщтхэр гушъэбагъэкӀэ шъуубытых.

22Тхьэм игущыӀэхэм шъуядэӀу къодыекӀэ хъущтэп, ахэр жъугъэцэкӀэнхэ фае. Армырмэ зышъогъэпцӀэжьы. 23Сыда пӀомэ, а гущыӀэхэм ядэӀоу зымыгъэцакӀэрэр, гъунджэм иплъэу ынапэ изэхэлъыкӀэ еплъыжьрэ цӀыфым фэд. 24Ар зэплъыжьышъ, ӀокӀыжьы, итеплъи зыфэдагъэр ащ лъыпытэу щэгъупшэжьы. 25Ау цӀыфэу ышӀэрэ пстэумкӀэ гъогу мафэ теуцуагъэр мыры: Тхьэм иунашъохэу щыкӀагъэ зимыӀэхэу, икъугъэхэу, цӀыфхэм шъхьафитыныгъэ яӀэ зыгъэхъухэрэм дэгъоу ахэплъэ зэпытэу, Ӏофхэу зэдэӀугъэри щымыгъупшэжьэу зыгъэцакӀэрэр ары.

26«Тхьэм шӀолӀыкӀ фысиӀэу сэпсэу» зыфиӀожьэу, ау етӀани ыбзэгу зымыубытырэм зегъэпцӀэжьы, идини пкӀэ иӀэп. 27Ау Тхьэу Ты лъапӀэм дэжькӀэ шӀолӀыкӀ къабзэу щыкӀагъэ зимыӀэр мары: гузэжъогъум хэтхэу ибэхэмрэ шъузабэхэмрэ уалъыплъэнри, лажьэ уимыӀэнэу мы дунаим ибзэджагъэ зыщыудзыенри ары.

Currently Selected:

Апостол Якъубэ тхылъэу ытхыгъэр 1: AdgNT14

Highlight

Copy