Апостолхэм ашӀэгъэ Ӏофхэр 26
26
ЯТӀОКӀЫРЭ ХЫНЭРЭШЪХЬ
Пачъыхьэ Агриппэ ыпашъхьэ Паул зызэрэщиухыижьыгъэр
1Ащ нэужым Агриппэ Паул риӀуагъ:
– Зыуухыижьэу укъэгущыӀэн уфит. Паул ыӀэ къыӀэти, зиухыижьэу къыӀуагъ:
2– Пачъыхьэ Агриппэ, джуртхэм сызэрагъэмысэрэ Ӏоф пстэумкӀи о уапашъхьэ зызэрэщысыухыижьырэр насыпышӀуагъэу зыфэсэлъытэжьы. 3Анахьэу, джуртхэм яхабзэхэри зэрызэнэкъокъурэ Ӏоф пстэури дэгъоу зэрэпшӀэхэрэм паешъ ары. Арышъ, сэ къасӀохэрэм щэӀагъэ уиӀэу укъядэӀункӀэ сыолъэӀу.
4– СикӀэлэгъу къыщегъэжьагъэу, слъэпкъ сыхэсэу Ерусалим сызэрэщыпсэурэр джурт пстэуми дэгъоу ашӀэ. 5Ахэмэ сызашӀэрэр бэшӀагъэ. Диныр зылэжьырэ цӀыф купхэм ащыщэу анахь пытэу, фарисей купкӀэ заджэхэрэм игъогу сызэрэрыкӀощтыгъэр, ахэр фаехэмэ, къаушыхьатын алъэкӀыщт. 6Тхьэм тятэжъхэр къызэригъэгугъэгъэ Ӏофым#26:6 Тхьэм тятэжъхэр къызэригъэгугъэгъэ Ӏофыр – лӀагъэхэр къызэрэтэджыжьы-щтхэр ары (еплъ 23:6; 24:15). сызэрэщыгугъырэм пае, джы хьыкумэшӀым ыпашъхьэ сыкъыращагъ. 7Тхьэм тятэжъхэр къызэригъэгугъэгъэ дэдэр ары тлъэпкъ илӀэкъо пшӀыкӀутӀур чэщи мафи агу етыгъэу, Тхьэм фэлажьэхэзэ, къагъотынэу зыщыгугъыхэу зыпаплъэхэрэр. О пачъыхь, сэри ащ сызэрэщыгугъырэр ары джуртхэр къызкӀысэдаохэрэр. 8Тхьэм лӀагъэхэр къызэригъэтэджыжьыщтхэр къэмыхъун Ӏофэу сыд пае шъулъытэрэ?
9– ЗэрэслъэкӀэу Назарет щыщ Исус ыцӀэ сыпэуцужьын фаеу сэри сшӀошъ хъущтыгъэ. 10Ерусалим аущтэу щысшӀыщтыгъ. Дин пэщэшхохэм фитыныгъэ къаӀысхыти, сицӀыфхэм Тхьэм ицӀыф лъапӀэхэм ащыщхэу бэхэр хьапсым чӀязгъадзэщтыгъэх. Тетыгъо зиӀэхэм ахэмэ укӀ хьыкум затыралъхьэм, сэри ар игъоу слъытагъэ. 11Синэгогу пстэуми ахэмэ бэрэ къин щязгъэщэчыщтыгъ, Исус езгъэхъонынхэуи сыпылъыщтыгъ. Лъэшэу сафэгубжэу, къин язгъэщэчынэу хымэ къалэхэми анэс сакӀэлъыкӀощтыгъ.
Зиусхьан Исус игъогу Паул зэрэтехьагъэм икъэбар къызэриӀотэжьыгъэр
(Апостол. 9:1-19; 22:6-16)
12– Аущтэу дин пэщэшхохэм фитыныгъэ къаӀысхыгъэу, пшъэрылъи къысатыгъэу, Дамаск гъогум сытетыгъ. 13Щэджагъом гъогум сырыкӀозэ, тыгъэм нахьи нахь лыдырэ нэфынэ горэ уашъом къехэу, сигъусэхэмрэ сэррэ тыкъиуцухьэу слъэгъугъэ, типачъыхь. 14Тэ зэкӀэ чӀыгум тытефагъэу, джуртыбзэкӀэ макъэ горэм моущтэу къыӀоу зэхэсхыгъ:
– «Шаул, Шаул, сыд пае къин сэбгъэщэчыра? Цур зием ибэщ кӀыхьэ папцӀэ цур ылъакъокӀэ къызэрешъутырырэм фэдэу ошӀымэ, уиягъэ зэогъэкӀыжьы».
15– «О ухэта, Зиусхьан?» – сӀуагъэ.
– «Исусэу къин зэбгъэщэчырэр сэры», – къыӀожьыгъ Зиусхьаным. – 16«Ау джы къэтэджи, о плъакъомэ къатеуцожь. Сэ къысфэлажьэрэ лӀы ухъунэу, Ӏофхэу плъэгъугъэхэмрэ озгъэлъэгъущтхэмрэ къэуушыхьатынхэуи узгъэнэфагъ, зыозгъэлъэгъугъ. 17О плъэпкърэ хымэхэу узфэзгъэкӀощтхэмрэ укъаӀэпысхыжьыщт. 18Ахэр шӀункӀым къыхэкӀынхэшъ, нэфынэм зыкъыфагъэзэным паий, шэйтаным итетыгъо къычӀэкӀынхэшъ, Тхьэм зыкъыфагъэзэным паий, ахэмэ анэхэр къэбгъэплъэжьынхэу адэжь усэгъакӀо. Аущтэу сэркӀэ шӀошъхъуныгъэ зэряӀэм пае, япсэкӀодшӀагъэхэр афэгъущтых, Тхьэм ицӀыфхэу ежь зыкъезытыгъэхэм ӀахьышӀоу къалъыӀэсыщтри ахэми къалъыӀэсыщт».
Паул джуртхэмрэ хымэ лъэпкъхэмрэ апашъхьэ Исус шыхьат зэрэщыфэхъугъэр
19– Арышъ, пачъыхьэ Агриппэ, уашъом щыӀэу зыкъысэзгъэлъэгъугъэм сыпэуцужьыгъэп. 20Апэу Дамаск къалэм дэсхэм, етӀанэ Ерусалим дэсхэм, Иудей хэкум зэкӀэ исхэми, хымэ лъэпкъхэм ащыщхэми язгъэӀущтыгъ, япсэкӀодшӀагъэхэм афыкӀэгъожьынхэшъ, Тхьэм игъогу техьанхэу зэрэфаери, япсэкӀодшӀагъэхэм зэрафыкӀэгъожьыгъэм фэшъошэ ӀофышӀухэр агъэцэкӀэнхэ зэрэфаери. 21Джары джуртхэм Тхьэм иунэшхо сыщаубыти, саукӀыным зыкӀыпылъыгъэхэр. 22Ау непэ нэсыфэкӀэ Тхьэр ӀэпыӀэгъу къысфэхъузэ, цӀыкӀуми инми апашъхьэ мыщ дэжьым сыщытэу шъыпкъэм шыхьат сыфэхъу. Пегъымбархэмрэ пегъымбар Мусэрэ къэхъун фэе Ӏофхэу зыфаӀуагъэхэм анэмыкӀхэр къасӀохэрэп; 23Христос къин ыщэчын зэрэфэягъэри, апэрэу лӀагъэхэм къахэтэджыкӀыжьыгъэу, ежь илъэпкърэ хымэ лъэпкъхэмрэ нэфынэм икъэбар къаригъэӀун зэрэфэягъэри ары зыфасӀохэрэр.
Агриппэ шӀошъхъуныгъэ зыригъэӀэнэу Паул зэрелъэӀугъэр
24Паул аущтэу зиухыижь зэхъум, Фест мэкъэшхокӀэ къыӀуагъ:
– Паул, уиакъыл уиежьэп о. УишӀэныгъэшхо пшъхьэ зэригъэкӀокӀыгъ.
25– Сэ сшъхьэ зэкӀокӀыгъэп, лъытэныгъэ зиӀэ Фест, – къыӀожьыгъ Паул, – сэ къасӀохэрэр гущыӀэ шъыпкъэх, гущыӀэ губзыгъэх. 26Пачъыхьэм мы Ӏофхэр ешӀэ, ащ ыпашъхьи гушхокӀэ сыкъыщэгущыӀэ. Ащ гу зылъимытэгъэ Ӏоф а Ӏофхэм зэрахэмытым сицыхьэ телъ, сыда пӀомэ, мы Ӏофхэр зэкӀэ зы къогъу горэм къыщыхъугъэхэп. 27Пачъыхьэ Агриппэ, пегъымбархэм атхыгъэхэмкӀэ шӀошъхъуныгъэ уиӀа? ШӀошъхъуныгъэ зэрэуиӀэр сэшӀэ.
28– Аущтэу псынкӀэу Христос игъогу сытебгъэхьанэу огугъа? – къыриӀуагъ Агриппэ Паул.
29– ПсынкӀэми мыпсынкӀэми о уимызакъоу, ау непэ сэ къасӀохэрэр зэхэзыхырэ пстэури сэ сфэдэ хъунхэу Тхьэм селъэӀу, ау Ӏэхъу-лъэхъу атерэмылъ, – къыӀожьыгъ Паул.
30Ащ нэужым пачъыхьэр, Ӏэшъхьэтетыр, Вереникэ, ахэмэ ягъусэхэу щысыгъэхэр къэзэрэгъэтэджыжьыгъэх. 31Унэм зекӀыжьхэм, зэраӀожьыгъ:
– УкӀ е хьапс зифэшъошэ Ӏоф мы лӀым зи ышӀагъэп.
32ЕтӀанэ Агриппэ Фест риӀуагъ:
– Мы лӀым иӀоф Кайсарым хьыкум тыришӀыхьанэу мылъэӀуагъэмэ, шъхьафитэу ттӀупщыжьын тлъэкӀыщтыгъэ.
Currently Selected:
Апостолхэм ашӀэгъэ Ӏофхэр 26: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
