Апостолхэм ашӀэгъэ Ӏофхэр 24

ЯТӀОКӀЫРЭ ПЛӀЫНЭРЭШЪХЬ

Ӏэшъхьэтет Феликс ыпашъхьэ джуртхэр Паул зэрэщедэуагъэхэр

1Мэфитф зытешӀэм, дин пэщэшхоу Ананый, нахьыжъхэм ащыщ купрэ гъэмысэкӀо Тертуллрэ игъусэхэу, Кесарие къалэмкӀэ къехыгъэх. Паул зэрагъэмысэхэрэр Ӏэшъхьэтетым ыпашъхьэ къыщаӀотагъ. 2Паул пчэгум къызыращэм, Тертулл ар къыгъэмысэу моущтэу игущыӀэ къыублагъ:

– Лъытэныгъэшхо зиӀэ Феликс, о уитетыгъокӀэ мамырныгъэшхо тиӀэу тэпсэу; унаӀи тебгъэтызэ, мы хэгъэгур нахь зэтегъэпсыхьагъэ хъугъэ. 3Арышъ, сыдигъуи, тыдэ тыщыӀэми, щытхъу къыпфэтэшӀы. 4Бащэрэ усымыгъэулэунэу, зэрэуихабзэу, гушъэбагъэ пхэлъэу тилъэӀу кӀэкӀ укъедэӀунэу сыкъыолъэӀу.

5– Мы лӀыр, къызэрэтшӀагъэмкӀэ, емынэ гор, дунаим тет джурт пстэуми зыкъарегъэӀэты, диныр зылэжьырэ цӀыф купэу Назарет купкӀэ заджэхэрэм#24:5 диныр зылэжьырэ цӀыф купэу Назарет купкӀэ заджэхэрэр – зымышӀэхэрэм чыристан диныр джурт диным щыщэу ашӀошӀыщтыгъ. ятхьэмат. 6Тхьэм иунэшхуи мыкъабзэ ышӀыным пылъыгъ. Ар къызытэубытым, тэ тихабзэ тетэу хьыкум тетшӀыхьанэу тыфэягъ, 7ау дзэ пэщэшхо Лисый къакӀуи, лӀыгъэкӀэ ттырихыжьи, уадэжь дзэлӀхэм къаригъэщагъ. 8ЕтӀанэ Лисый тэ а лӀым тыридэогъоу уадэжь тыкъэкӀонэу унашъо ышӀыгъ. Ор-орэу ащ уеупчӀымэ, зэрыдгъэмысэхэрэм яшъыпкъагъэ зэбгъэшӀэн плъэкӀыщт.

9ГъэмысэкӀо Тертулл а гущыӀэхэу къыӀуагъэхэр джуртхэм шъыпкъэхэу аӀозэ, ащ ӀэпыӀэгъу фэхъугъэх.

Ӏэшъхьэтет Феликс ыпашъхьэ Паул зызэрэщиухыижьыгъэр

10Ӏэшъхьэтетым Паул Ӏэ зыфешӀым, Паул къыӀуагъ:

– Илъэсыбэ хъугъэу мы лъэпкъым ихьыкум Ӏоф о ппшъэ зэрилъыр сшӀэзэ, зысыухыижьэу, сиӀоф сигуапэу уапашъхьэ къисэлъхьэ. 11Мэфэ пшӀыкӀутӀум нахьыбэ темышӀагъэу Ерусалим Тхьэм сыщелъэӀунэу сыкъызэрэкӀуагъэм ишъыпкъагъэ зэбгъэшӀэн плъэкӀыщт. 12Тхьэм иунэшхуи цӀыф горэм сыщенэкъокъоу, синэгогуми, къалэми цӀыфхэр щызгъэбырсырыгъэп. 13Сидэогъухэм сызэрагъэмысэрэ Ӏоф пстэуми ащыщэу зи къагъэшъыпкъэжьын алъэкӀыщтэп. 14Ау тятэжъхэм я Тхьэ сыфэлажьэзэ, мы цӀыфхэм пхэнджэу зыфаӀорэ гъогум сызэрэрыкӀорэм сеуцуалӀэ. Тэурат хабзэм ит пстэумкӀи пегъымбархэм атхыгъэ тхылъхэм арыт пстэумкӀи#24:14 Тэурат хабзэм ит пстэумкӀи пегъымбархэм атхыгъэ тхылъхэм арыт пстэумкӀи – еплъ 13:15. шӀошъхъуныгъэ сиӀ. 15Шъыпкъагъэ зиӀэхэмрэ зимыӀэхэмрэ Тхьэм къызэригъэтэджыжьынхэу мо щыт лӀыхэр Тхьэм зэрэщыгугъыхэрэм фэдэу, сэри Тхьэм сыщэгугъы. 16Арышъ, Тхьэми цӀыфхэми апашъхьэ гукъэбзагъэкӀэ мыхъун зи зыдэсымышӀэжьэу сызэрэпсэуным сыдигъуи ыуж сит.

17– Илъэсыбэ Ерусалим сыщымыӀагъэу, сэдакъэхэр слъэпкъ фэсхьынхэуи къурмэн сшӀынэуи джыри зэ сыкъэкӀуагъ. 18Аущтэу сшӀэ пэтзэ, Тэурат хабзэм иунашъо тетэу зызгъэкъэбзэжьыгъэу, Тхьэм иунэшхо сычӀэтэу сыкъыщагъотыгъ. ЦӀыф купышхоми сахэтыгъэп, бырсыри щыӀагъэп. 19Ау Асие хэкум щыщ джурт куп а чӀыпӀэм щыӀагъ. Ахэмэ сызэрагъэмысэн щыӀэмэ, джы уапашъхьэ къыщылъагъохэу ар къаӀон фэягъ. 20Е мо щытхэм къарэӀу, сэ Тхьэмэтэ Хэсэшхом ыпашъхьэ сызыращэм, бзэджагъэу сшӀагъэу къагъотыгъэр. 21«ЛӀагъэхэр къызэрэтэджыжьыщтхэмкӀэ шӀошъхъуныгъэ зэрэсиӀэм пае, непэ хьыкумэшӀым ыпашъхьэ сишъущагъ» сӀуи, мы цӀыфхэм сахэтэу мэкъэшхокӀэ къызэрэсӀогъагъэр арыщтын сызэрагъэмысэрэр.

22Джащыгъум Зиусхьаным игъогу икъэбар тэрэзэу зышӀэщтыгъэ Феликс, яӀоф зыщыхэплъэщт пӀалъэр лъигъэкӀуатэзэ, къыӀуагъ:

– Дзэ пэщэшхо Лисый къызэрэкӀоу, шъуиӀоф хьыкум тесшӀыхьан.

23ЕтӀанэ Феликс дзэ пащэм унашъо фишӀыгъ Паул къагъэгъунэнэу, ау къин рамыгъэлъэгъунэуи, къыпэблэгъэ цӀыфхэу игъусэхэри лъыплъэнхэ фит ышӀынхэуи.

Феликсрэ Друзиллэрэ Паул зэрадэгущыӀагъэр

24Мэфэ заулэ тешӀагъэу, Феликс ишъхьэгъусэ Друзиллэ#24:24 Друзиллэ – Ирод Агриппэ ЯтӀонэрэмрэ Вереникэрэ ашыпхъугъ. Еплъ 25:13. игъусэу къэкӀуагъ. Друзиллэ джуртыгъ. Феликс ицӀыфхэм Паул къаригъащи, Паул Христос ИсускӀэ шӀошъхъуныгъэм къызэрэтегущыӀэрэм едэӀугъ. 25Ау шъыпкъагъэм, зыпщыӀэным, къэкӀощт ахърэт мафэм Паул къызатегущыӀэм, Феликс къащти, къыӀуагъ:

– ДжырэкӀэ кӀожь, игъо сифэмэ, етӀанэ укъязгъэщэщт.

26Паул ахъщэ къыритынкӀэ ар гугъэщтыгъ. Арыти, бэрэ къаригъащэзэ дэгущыӀэщтыгъ.

27ИлъэситӀу зытешӀэ ужым, Феликс ычӀыпӀэ Порцый Фест#24:27 Порцый Фест – Исус къызэхъу нэужым я 60-62 илъэсхэм къакӀоцӀ Иудей хэкум ирим Ӏэшъхьэтетыгъ. зыцӀэр къытехьагъ. Ау Феликс джуртхэм шӀугъэ горэ афишӀэнэу фэягъэти, Паул хьапсым къычӀигъэнэгъагъ.

Currently Selected:

Апостолхэм ашӀэгъэ Ӏофхэр 24: AdgNT14

Highlight

Copy