Апостолхэм ашӀэгъэ Ӏофхэр 23

ЯТӀОКӀЫРЭ ЩЫНЭРЭШЪХЬ

1Паул Тхьэмэтэ Хэсэшхом хэтхэм ахаплъи, ариӀуагъ:

– Сшыхэр, сэ непэрэ мафэм нэс Тхьэм ыпашъхьэ мыхъун зи зыдэсымышӀэжьэу гукъэбзагъэкӀэ сыщыпсэугъ.

2Дин пэщэшхоу Ананый#23:2 Ананый – Исус къызэхъу нэужым я 47-59 илъэсхэм къакӀоцӀ дин пэщэшхуагъ. Паул дэжь щытхэм ыӀупашъо еонхэу ариӀуагъ. 3Джащыгъум Паул ащ риӀуагъ:

– Тхьэр къыоожьыщт, фыжьэу къэлъэгъоным пае, агъэлэгъэ дэпкъым уфэд! Хабзэм тетэу хьыкум къыстепшӀыхьанэу ущыс, ау щытми, ор-орэу хабзэм утекӀэу къысэогъаоха?

4Ащ дэжьым щытхэм Паул къыраӀуагъ:

– Тхьэм идин пэщэшхом уехъона?

5– Сшыхэр, ар зэрэдин пэщэшхор сшӀэщтыгъэп, – ыӀуагъ Паул. – Сыда пӀомэ, Тхьэм игущыӀэ тхыгъэхэм арыт#23:5 Тхьэм игущыӀэ тхыгъэхэм арыт – еплъ Пегъымбар Мусэ ятӀонэрэ тхылъэу ытхыгъэм 22:28.: «О плъэпкъ итхьэматэ ӀаекӀэ утегущыӀэ хъущтэп».

6Тхьэмэтэ Хэсэшхом хэт зы купыр саддукейхэу#23:6 саддукейхэр – еплъ 4:1., адрэ купыри фарисейхэу#23:6 фарисейхэр – еплъ 5:34. Паул ышӀэщтыгъэти, Тхьэмэтэ Хэсэшхом хэтэу ариӀуагъ:

– Сшыхэр, сэ сыфарисей, сяти фарисеигъ. ЛӀагъэхэр къызэрэтэджыжьыщтхэм сызэрэщыгугъырэм пае, хьыкумэшӀым ыпашъхьэ сыращагъ.

7Аущтэу къызеӀом, фарисейхэмрэ саддукейхэмрэ зэщыхьэхэу аублагъ, лъэныкъуитӀоуи загощыгъ; 8сыда пӀомэ, саддукейхэм «ЛӀагъэхэр къэтэджыжьхэрэп, мэлэӀич щыӀэп, псэ щыӀэп» – аӀо, ау саддукейхэм афэмыдэхэу фарисейхэм а зэкӀэхэмкӀэ шӀошъхъуныгъэ яӀ.

9Джащыгъум Тхьэмэтэ Хэсэшхом хэтхэр мэкъэшхокӀэ къэзэрэгъэкуохэу къаублагъ. Фарисейхэм ащыщхэу Тэурат егъэджэкӀо пэщэ заулэ къэтэджи, адрэхэм янэкъокъухэу къаӀуагъ:

– Мы лӀым мыхъун горэ етлъэгъулӀэрэп. Псэ горэ е мэлэӀич горэ къыдэгущыӀэгъэнкӀи мэхъу. Тхьэм тыпэшъумыгъэуцу.

10Лъэшэу зэрэзэщыхьагъэхэм пае, ахэмэ Паул зэпкъыратхъыным дзэ пэщэшхор щыщыни, Паул къахащынышъ, пытапӀэм#23:10 пытапӀэр – еплъ 21:34. ащэнэу дзэлӀхэм унашъо афишӀыгъ.

11ЯтӀонэрэ чэщым Зиусхьаным Паул къыфэлъагъуи, къыриӀуагъ:

– Угу умыгъэкӀод! Ерусалим шыхьат укъыщызэрэсфэхъугъэм фэдэу, Рим къэлэшхоми шыхьат укъыщысфэхъун фае.

Паул шъэфэу аукӀынэу джуртхэм гухэлъ зэрашӀыгъэр

12КъыкӀэлъыкӀорэ пчэдыжьым джурт заулэ зэгурыӀуи, тхьэ аӀуагъ:

– Паул тэукӀыфэ, тышхэщтэп ыкӀи тешъощтэп.

13Тхьэ зыӀуагъэхэр нэбгырэ тӀокӀитӀум нахьыбэ хъущтыгъэх. Ахэр дин пэщэшхохэмрэ нахьыжъхэмрэ адэжь кӀохи, араӀуагъ:

14– Паул тэукӀыфэ, тымышхэнэу тхьэ тӀуагъэ. 15Арышъ, «Паул иӀоф нахь тэрэзэу тыхэплъэным пае, тадэжь къащэ» шъуӀуи, шъоррэ Тхьэмэтэ Хэсэшхом хэтхэмрэ дзэ пэщэшхом шъуелъэӀу. Паул мыщ дэжьым къэмысызэ, тыукӀынэу тэ тыхьазыр.

16Ау Паул ышыпхъу ыкъо ахэмэ ягухэлъ къышӀи, пытапӀэм кӀуи, Паул а къэбарыр ригъэшӀагъ.

17Паул дзэ пащэхэм ащыщ горэм къеджи, риӀуагъ:

– Дзэ пэщэшхом дэжь мы кӀалэр щэ. Зыгорэ риӀонэу фай.

18Дзэ пащэм кӀалэр зыдищи, дзэ пэщэшхом дэжь кӀуи, риӀуагъ:

– ТихьапсчӀэсэу Паул зыцӀэр къысаджи, мы кӀалэм зыгорэ къыуиӀонэу фаешъ, уадэжь къэсщэнэу къысэлъэӀугъ.

19Дзэ пэщэшхом кӀалэм ыӀэ ыубыти, лъэныкъомкӀэ Ӏуищи, еупчӀыгъ:

– КъысэпӀонэу сыда узыфаер?

20– «Паул иӀоф нахь тэрэзэу тыхэплъэным пае, неущ Тхьэмэтэ Хэсэшхом ыпашъхьэ къащэ» аӀонышъ, джуртхэр къыолъэӀунхэу зэгурыӀуагъэх, – ыӀуагъ кӀалэм. 21– Ау ахэмэ уямыдэӀу; сыда пӀомэ, ахэмэ ащыщ нэбгырэ тӀокӀитӀум ехъу, Паул аукӀыным пае, шъэфэу пэсых. Ахэмэ ар аукӀыфэ, мышхэнхэуи емышъонхэуи тхьэ аӀуагъ. Загъэхьазырыгъэу уиунашъо къыпэплъэх ныӀэп.

22Дзэ пэщэшхом кӀалэр къыгъэкӀотэжьызэ, къыриӀуагъ:

– Мыр къызэрэсэпӀуагъэр зыми емыӀу!

Паул Ӏэшъхьэтет Феликс дэжь зэращагъэр

23ЕтӀанэ дзэ пэщэшхор дзэ пащэхэм ащыщхэу нэбгыритӀумэ къяджи, ариӀуагъ:

– ДзэлӀ нэбгырэ шъитӀу, шыухэу нэбгырэ тӀокӀищырэ пшӀырэ, пчыхэр зыӀыгъ дзэлӀхэу нэбгырэ шъитӀу нычэпэ сыхьатыр бгъум Кесарие къалэм#23:23 Кесарие къалэр – еплъ 8:40. кӀонхэу жъугъэхьазырых. 24Шыхэри Паул фэжъугъэхьазырхи, шы горэм тежъугъэтӀысхьи, Ӏэшъхьэтет Феликс#23:24 Феликс – Исус къызэхъу нэужым я 52-60 илъэсхэм къакӀоцӀ Иудей хэкум ирим Ӏэшъхьэтетыгъ. дэжь шъущэ.

25Дзэ пэщэшхом мыщ фэдэ гущыӀэхэр зэрыт тхылъыри ытхыгъ:

26«Сэ, Клаудый Лисый, о лъытэныгъэшхо зиӀэ Ӏэшъхьэтет Феликс, шӀуфэс осэхы. 27Мы лӀыр джуртхэм аубыти, аукӀынэу фежьэгъагъэх, ау сидзэлӀхэр сигъусэхэу сыкӀуи, рим цӀыфхэм зэращыщыр сшӀагъэти, къаӀэкӀэсхыжьыгъ. 28Зэрагъэмысэрэр зэзгъэшӀэнэу сыфаеу, я Тхьэмэтэ Хэсэшхо ыпашъхьэ дзэлӀхэм къырязгъэщагъ. 29Ахэмэ зэрагъэмысэхэрэр яхабзэ епхыгъэх нахь, е укӀ, е хьапс зифэшъошэ Ӏоф а лӀым зи ымышӀагъэу зэзгъэшӀагъ. 30Ау джуртхэм мы лӀыр шъэфэу аукӀынэу агу зэрэхэлъыр зыгорэм сигъэшӀагъэти, дзэлӀхэм уадэжь занкӀэу къязгъэщагъ. Къедаохэрэми зэрагъэмысэрэ Ӏофхэр уапашъхьэ къыщаӀонхэу макъэ язгъэӀугъ. Отхъэжь!»

31Аущтэу яунашъо тетэу дзэлӀхэм Паул зыдащи, чэщым Антипатридэ къалэм#23:31 Антипатридэ къалэр – Ерусалим километрэ 60-кӀэ пэчыжьэу, итемыр тыгъэ къохьэпӀэ лъэныкъомкӀэ итыгъ. нагъэсыгъ. 32ДзэлӀхэм ятӀонэрэ мафэм Паул Кесарием ащэнэу шыухэм къафагъани, ежьхэм пытапӀэм агъэзэжьыгъ. 33Шыухэр Кесарие къалэм зынэсхэм, Ӏэшъхьэтетым тхылъыр ратыгъ, Паули ащ фагъэзагъ. 34Ӏэшъхьэтетыр тхылъым еджи, Паул зыщыщ хэкумкӀэ къеучӀыгъ. Киликие хэкум щыщэу зызэхехым, къыӀуагъ:

35– Къыодаохэрэр къызысхэкӀэ, тэрэзэу сыоупчӀыщт. ЕтӀанэ Ӏэшъхьэтетым Ирод пачъыхьэ унэшхоу преторие зыцӀэу ыгъэуцугъагъэм дзэлӀхэм Паул щаухъумэнэу унашъо ышӀыгъ.

Currently Selected:

Апостолхэм ашӀэгъэ Ӏофхэр 23: AdgNT14

Highlight

Copy