Апостолхэм ашӀэгъэ Ӏофхэр 18

ЯПШӀЫКӀОЕНЭРЭШЪХЬ

Коринф къалэм Тхьэм игущыӀэхэр Паул зэрэщигъэӀущтыгъэхэр

1Ащ нэужым Паул Афинэ къалэм дэкӀыжьи, Коринф къалэм кӀуагъэ. 2Паул а къалэм Акилэ зыцӀэ джурт горэу, Понт хэкум къыщыхъугъэр къыщигъоти, зыӀуигъэкӀагъ. Ежьыррэ ишъхьэгъусэ Прискиллэрэ Италие хэгъэгум къикӀыгъэкӀагъэх; сыда пӀомэ, Кайсар Клаудый#18:2 Клаудый – еплъ 11:28. Исус къызэхъу нэужым я 49-рэ илъэсым Клаудый джуртхэр Рим къэлэшхом къыдифыгъэх. джуртхэр зэкӀэ Рим къэлэшхом дэкӀыжьынхэу унашъо афишӀыгъагъ. Паул Акилэрэ Прискиллэрэ адэжь кӀуагъэ. 3Ясэнэхьэтхэр зэрэзэфэдэм къыхэкӀэу, Паул ахэмэ адэжь къэнагъэу адэлажьэщтыгъ. Ахэмэ ясэнэхьат чэтэнгъэӀэгъэ шӀыныр арыгъэ. 4Шэмбэт мафэ къэс Паул къыӀохэрэр джуртхэмрэ алыджхэмрэ ашӀошъ ыгъэхъуным ыуж итэу, синэгогум щянэкъокъущтыгъ.

5Силэрэ Тимофейрэ Македоние хэкум къикӀыхи, къызэкӀохэм, Паул ыгу етыгъэу Тхьэм игущыӀэхэр цӀыфмэ ариӀотэным пылъзэ, Исус зэрэ Христосыр джуртмэ апашъхьэ къыщиушыхьатыщтыгъ. 6Ау джуртхэр Паул пэуцужьхи, зехъонхэм, ищыгъынхэр ахэмэ апашъхьэ щиутхыпкӀыхи, моущтэу ариӀуагъ:

– Шъо шъулъы шъушъхьэ къытерэфэжь! Сэ лажьэ сиӀэп. Джы щегъэжьагъэу хымэ лъэпкъхэм зафэзгъэзэщт.

7Аущтэу Паул синэгогум къычӀэкӀыжьи, Тхьэр зыгъэлъэпӀэрэ лӀэу Иуст иунэ кӀуагъэ. Ащ иунэ синэгогум бгъодэтыгъ. 8Синэгогум ипащэу Крисп, зэкӀэ иунагъо игъусэу, ЗиусхьанымкӀэ шӀошъхъуныгъэ иӀэ хъугъэ. Коринф къалэм дэсхэу Паул едэӀухэрэм ащыщхэу цӀыфыбэми шӀошъхъуныгъэ яӀэ хъуи, зырагъэумэхъыгъ.

9Чэщ горэм Зиусхьаным Паул зыкъыригъэлъэгъуи, къыриӀуагъ:

– Умыщын, зымыушъэфэу, гущыӀэ зэпыт, 10сыда пӀомэ, сэ сыуигъусэщт. О лые къыуихынэу зыми ыӀэ къыбнэсыщтэп. Сэ сицӀыфхэм ащыщыбэ мы къалэм дэс.

11Аущтэу Паул цӀыфхэм Тхьэм игущыӀэхэр аригъашӀэхэзэ, илъэсырэ ныкъорэ а къалэм дэсыгъ.

12Галлион#18:12 Галлион – Исус къызэхъу нэужым я 51-рэ илъэсым Галлион Рим къэралыгъошхом щыщ Ахаие хэкум иӀэшъхьэтетэу агъэнэфагъ. Ахаие хэкур джырэ Грецием икъыблэ Ӏахьыгъ. Коринф а хэкум икъэлэшхуагъ. Ахаие хэкум иӀэшъхьэтет зэхъум, джуртхэр зэгъусэ хъухи, Паул тебанэхи, хьыкумэшӀым ыпашъхьэ ращагъ.

13– Хабзэм иунашъо темытэу Тхьэр агъэлъэпӀэнэу мы лӀым цӀыфхэм арегъашӀэ, – къаӀуагъ ахэмэ.

14Паул къэгущыӀэнэу къызщыригъэжьэщтым, Галлион джуртхэм ариӀуагъ:

– Шъо, джуртхэр, мы лӀым мыхъун горэ е бзэджагъэ горэ ышӀагъэмэ, сигуапэу сышъодэӀущтыгъ. 15Ау джы гущыӀэхэмкӀи, цӀэхэмкӀи, шъуи Тэурат хабзэкӀи шъузэрэзэнэкъокъурэм пае, шъор-шъорэу мы Ӏофым шъухаплъ. Сэ мы Ӏофым хьыкум тесшӀыхьанэу сыфаеп.

16Ащ нэужым Галлион ахэр хьыкумэшӀ унэм къычӀигъэкӀыжьыгъэх. 17ЕтӀанэ зэкӀэ ахэмэ синэгогум ипащэу Сосфен аубыти, хьыкумэшӀ унэм ипчъэӀупэ щеуагъэх. Ау Галлион ащ ынаӀэ тыридзагъэп.

Паул Сирие хэкум щыщ Антиохие къалэм зэригъэзэжьыгъэр

18Паул Коринф къалэм мэфэ пчъагъэрэ дэсыгъ. ЕтӀанэ зэшхэм аӀапэ ыубытыжьи, Прискиллэрэ Акилэрэ игъусэхэу, Сирие хэкум кӀонэу къухьэ горэм итӀысхьагъ. Кенхрей къалэм#18:18 Кенхрей къалэр – Коринф къалэм епхыгъэу, къухьэуцупӀэ иӀэу, хыӀушъом Ӏутыгъ. Паул ышъхьэ джашъоу щаригъэупсыгъ; сыда пӀомэ, тхьэрыӀо ышӀыгъагъэти ары#18:18 тхьэрыӀо ышӀыгъагъэти ары – тхьэӀуагъэ горэ зэрагъэцэкӀагъэм инэшанэ фэдэу джуртхэм ашъхьэ джашъоу аупсыныр хабзэу яӀагъ.. 19Ефес къалэм къызынэсхэм, Паул Прискиллэрэ Акилэрэ къыгъанэхи, синэгогум чӀахьи, джуртхэм гущыӀэгъу афэхъузэ щянэкъокъугъ. 20Паул ахэмэ адэжь нахь баӀорэ щыӀэнэу къызелъэӀухэм, ыдагъэп. 21Ау ежьэжьынэу аӀапэ зеубытыжьым, ариӀуагъ:

– КъэкӀощт мэфэкӀ мэфэшхом Ерусалим сыщыӀэн фае, ау Тхьэм ыӀомэ, шъуадэжь къэзгъэзэжьыщт. ЕтӀанэ Ефес къалэм къухьэкӀэ щежьэжьыгъ.

22Кесарие къалэм зынэсым, ЕрусалимкӀэ дэкӀоягъ. Чылыс зэӀукӀэм щыщхэм шӀуфэс арихи, етӀанэ Антиохие къалэмкӀэ ехыгъ. 23Зы тӀэкӀурэ Антиохием зыдэс нэужым, Паул гъогум техьажьи, ИсускӀэ шӀошъхъуныгъэ зиӀэ пстэуми агухэр ыгъэпытэхэзэ, зэкӀэлъыкӀоу Галатиерэ Фригиерэ яхэку къыкӀухьагъ.

Тхьэм игущыӀэхэр Аполлос Ефес къалэм зэрэщигъэӀущтыгъэхэр

24А мафэхэм Александрие къалэм щыщэу, Аполлос зыцӀэ джурт горэ Ефес къэкӀуагъ. Ар жэшӀуагъ, Тхьэм игущыӀэ тхыгъэхэмкӀи шӀэныгъэшхо иӀагъ. 25Зиусхьаным игъогу икъэбар ащ рагъэшӀэгъагъ. Ыгу етыгъэу къэгущыӀэзэ, шъыпкъэм тетэу Исус икъэбар цӀыфхэм аригъашӀэщтыгъ. Ау щытми, умэхъыныгъэу Иуан зигугъу ышӀыщтыгъэм нэмыкӀ#18:25 умэхъыныгъэу Иуан зигугъу ышӀыщтыгъэм нэмыкӀ – Аполлос чыристанхэм цӀыфхэр зыкӀаумэхъыхэрэр ышӀэщтыгъэп. Еплъ 19:2-5. умэхъыныгъэр зэрэщыӀэр ышӀэщтыгъэп. 26Ар гушхокӀэ синэгогум къыщыгущыӀэу ригъэжьагъ. Прискиллэрэ Акилэрэ Аполлос къэгущыӀэу зызэхахым, яунэ ащи, Зиусхьаным игъогу икъэбар нахь дэгъоу гурагъэӀуагъ.

27Аполлос Ахаие хэкум кӀонэу гухэлъ зешӀым, зэшхэм а къалэм дэс шӀошъхъуныгъэ зиӀэхэм тхылъ афатхыгъ, «Аполлос къызыкӀокӀэ ежъугъэблагъ» аӀозэ. Аполлос ащ зынэсым, Тхьэм ынэшӀу къызэращифагъэм пае, шӀошъхъуныгъэ зиӀэ хъугъэхэм инэу адэӀэпыӀэщтыгъ. 28Сыда пӀомэ, Тхьэм игущыӀэ тхыгъэхэм арытхэмкӀэ Исус зэрэ Христосыр къафигъэшъыпкъэжьызэ, гущыӀэ лъэшхэмкӀэ цӀыфхэм апашъхьэ джуртхэм щатекӀуагъ.

Currently Selected:

Апостолхэм ашӀэгъэ Ӏофхэр 18: AdgNT14

Highlight

Copy