Апостолхэм ашӀэгъэ Ӏофхэр 19

ЯПШӀЫКӀУБГЪОНЭРЭШЪХЬ

Тхьэм игущыӀэхэр Паул Ефес къалэм зэрэщигъэӀущтыгъэхэр

1Коринф къалэм Аполлос щыӀэ зэхъум, Паул ыпшъэрэ хэкухэм апхырыкӀи, Ефес къалэм#19:1 Ефес къалэр – Асие хэкоу Рим къэралыгъошхом щыщым икъэлэшхуагъ. нэсыгъ. Ащ ИсускӀэ шӀошъхъуныгъэ зиӀэ нэбгырэ куп къыщигъоти, яупчӀыгъ:

2– ШӀошъхъуныгъэ шъуиӀэ зэхъум, Тхьэм ы Псэ ЛъапӀэ шъугухэм арылъ хъугъа?

– Тхьэм ы Псэ ЛъапӀэ щыӀэуи тэ зэхэтхыгъэп, – къыраӀожьыгъ ахэмэ.

3– Сыд умэхъыныгъа#19:3 умэхъыныр – еплъ 1:5 шъузэраумэхъыгъэр? – яупчӀыгъ Паул.

– Умэхъыныгъэу Иуан зигугъу ышӀыгъэр ары, – къаӀожьыгъ ахэмэ.

4– ЗипсэкӀодхэм афыкӀэгъожьыгъэхэр Иуан ыумэхъыщтыгъэх, – къыӀуагъ Паул. – Иуан ежь ыуж къэкӀощтымкӀэ, Христос ИсускӀэ цӀыфхэм шӀошъхъуныгъэ яӀэн фаеу ариӀуагъ.

5Ар зызэхахым, Зиусхьан Исус ыцӀэкӀэ зарагъэумэхъыгъ. 6Паул ыӀэхэр затырелъхьэм, Тхьэм ы Псэ ЛъапӀэ къафехи, амышӀэрэ бзэхэмкӀэ къэгущыӀагъэх. Тхьэм игущыӀэхэри ахэмэ агухэм къарилъхьэхи, ахэр къаригъэӀуагъэх. 7Купыр нэбгырэ пшӀыкӀутӀу фэдиз хъущтыгъэ.

8ЕтӀанэ Паул синэгогум чӀахьи, цӀыфхэм гушхокӀэ янэкъокъузэ, ашӀошъ ыгъэхъузэ, Тхьэм и Тетыгъошхо икъэбар мэзищэ аригъэӀущтыгъ. 9Ау зы куп къаигъагъэкӀэ зекӀуагъэ, цӀыфхэм апашъхьэ Зиусхьаным игъогу ӀаекӀэ щытегущыӀэу, шӀошъхъуныгъэ иӀэ хъуныр ыдагъэп. Джащыгъум Паул ахэмэ къахэкӀыжьи, ИсускӀэ шӀошъхъуныгъэ зиӀэхэр къахищыжьыгъэх, мафэ къэси Тиранн иеджапӀэ Тхьэм игущыӀэхэр щигъэӀущтыгъ. 10Асие хэкум ис алыджхэри джуртхэри зэкӀэ Зиусхьанэу Исус ехьылӀэгъэ КъэбарышӀум ригъэдэӀухэзэ, Паул илъэситӀо ыкъудыигъ.

ДжынапцӀэхэр цӀыфхэм ахафынхэм Скевэ ыкъохэр зэрэпылъыгъэхэр

11Тхьэм Паул Ӏофышхо гъэшӀэгъон дэдэхэр ышӀэнхэу ригъэлъэкӀыщтыгъ. 12Паул ыкӀышъо нэсыгъэ ӀэплъэкӀхэри кӀыӀутелъхэри сымаджэхэм атыралъхьащтыгъэх. ЗатыралъхьэхэкӀэ, ахэр хъужьыщтыгъэх, ахэс джынапцӀэхэри ахэкӀыжьыщтыгъэх.

13Ау джурт купэу цӀыфхэм джынапцӀэхэр ахэзыфыхэу къэзыкӀухьэщтыгъэхэм Исус ыцӀэ къаӀозэ, джынапцӀэхэр цӀыфхэм ахафыным пылъыгъэх.

– Исусэу зикъэбар Паул ыгъэӀурэм ыцӀэкӀэ мы цӀыфым шъухэкӀынэу унашъо къышъуфэсэшӀы, – аӀощтыгъ ахэмэ.

14Джурт дин пэщэшхоу Скевэ ыкъуибли аущтэу ашӀыщтыгъ.

15– Исус сэшӀэ, Паул икъэбари зэхэсхыгъ, ау шъо хэт шъущыщ? – пэгъокӀ упчӀэ къаритыжьыгъ джынэпцӀэ Ӏаем. 16ЕтӀанэ джынапцӀэр зыхэс цӀыфыр атебани, зэкӀэми атекӀуагъ. Ахэмэ лыешхо зэрарихыгъэм пае, пцӀанэхэу, уӀагъэхэу унэм ичъыжьыгъэх.

17Мы къэбарыр зэкӀэ Ефес дэс алыджхэми джуртхэми зызэхахым, зэкӀэри щынэгъошхом хэфагъэх. Джаущтэу Зиусхьан Исус ыцӀэ щытхъу фашӀыщтыгъ. 18ШӀошъхъуныгъэ зиӀэ хъугъэхэм ащыщыбэхэр къакӀохэзэ, цӀыфмэ зэхахэу бзэджагъэу ашӀагъэхэм яуцолӀэжьыщтыгъэх. 19Ушхъухьаным хэт цӀыф Ӏаджыми ятхылъхэр къаугъоихи, цӀыф пстэумэ апашъхьэ щагъэстыгъэх. А тхылъхэм ауасэхэр залъытэхэм, тыжьын ахъщэ#19:19 тыжьын ахъщ – зы тыжьын ахъщэр а уахътэм лэжьакӀом имэфапкӀэщтыгъ. мин шъэныкъо хъугъэ. 20Аущтэу Зиусхьаным игущыӀэхэр цӀыф нахьыбэхэм анэсэу, инэу зыщаубгъущтыгъ.

Ефес къалэм дэсхэм бырсырышхо зэрашӀыгъэр

21Мы Ӏофхэр зэкӀэ къызэхъухэ ужым, Паул хэкухэу Македониерэ#19:21 Македоние хэкур – еплъ 16:9. Ахаиерэ#19:21 Ахаие хэкур – еплъ 18:12. апхырыкӀынышъ, Ерусалим кӀонэу ыгу риубытагъ.

– Ерусалим сызыкӀуахэкӀэ, Рим къэлэшхоми сыкӀон фае, – ыӀуагъ. 22Паул иӀэпыӀэгъухэм ащыщэу нэбгыритӀу, Тимофейрэ Эрастрэ, Македоние хэкум ежь ыпэ ыгъэкӀуагъэх. Ежь Асие хэкум охътэ кӀэкӀыкӀэ къэнагъ.

23А мафэхэм Зиусхьаным игъогу пае бырсырышхо къэхъугъ. 24Сыда пӀомэ, Димитрый зыцӀэ тыжьынашӀэ горэ а къалэм дэсыгъ. Артемидэ#19:24 Артемидэ – алыджыбзэкӀэ Ефес къалэм итхьэ нэпцӀым ыцӀэ Артемидэ, римыбзэкӀэ ыцӀэр Дианэ. зыфаӀорэ бзылъфыгъэ тхьэ нэпцӀым итхьэлъэӀупӀэ унэ цӀыкӀужъыехэр тыжьыным хишӀыкӀыхэзэ, адрэ тыжьынашӀэмэ федабэ Димитрый къафихьыщтыгъ. 25Димитрый а тыжьынашӀэхэри ащ фэдэ ӀэшӀагъэ Ӏоф зиӀэхэри ыугъоихи, моущтэу къыӀуагъ:

– Тиныбджэгъухэр, мы Ӏофым тибаиныгъэ къызэрэхэкӀырэр шъошӀэ. 26Ефес къалэм имызакъоу, Асие хэкум нахьыбэрэми, «ЦӀыфхэм ӀэкӀэ ашӀыгъэхэр тхьэ шъыпкъэхэп» ыӀозэ, цӀыфыбэхэм ашӀошъ ыгъэхъузэ, мы Паул зэрэщигъэгъощагъэхэр шъолъэгъу, зэхэшъохы. 27Тэ тиӀэшӀэгъэ Ӏофыр цӀыфхэм зэрэзэрамыпэсыщтым изакъоп щынагъор, Артемидэ бзылъфыгъэ тхьэшхом итхьэлъэӀупӀэ унэшхоуи пхъатэ зэрэпамыхьыжьыщтри, зэкӀэ Асие хэкуми зэрэдунаеуи щыдгъэлъэпӀэрэ Артемидэ ищытхъушхо зэрэкӀодыжьыщтри ары щынагъор.

28Ар зызэхахым, ахэр лъэшэу губжи, куощтыгъэх:

– Ефес къалэм и Артемидэ лъэпӀэ дэд!

29Бырсырышхо къалэм къыщыхъугъ. Македонием щыщхэу Паул игъогогъухэу Гайрэ Аристархрэ аубытхи, зыдащэхэзэ, зэкӀэ зэхэтхэу зэӀукӀэпӀэ пчэгум илъэдагъэх. 30Паул цӀыфмэ ахэхьанэу фэягъ, ау ИсускӀэ шӀошъхъуныгъэ зиӀэхэм фадагъэп. 31Асие хэкум итхьэматэхэм ащыщхэу, Паул къыпэблагъэу щытхэм макъэ къырагъэӀуи, «ЗэӀукӀапӀэм умыкӀу» аӀозэ, къелъэӀугъэх.

32Джащыгъум зым зыр, адрэми нэмыкӀ аӀозэ, цӀыфхэр зэрэгъэкуощтыгъэх, сыда пӀомэ, зэӀукӀэгъэ цӀыфхэм бырсырышхо къахэхъухьагъэти ары. Нахьыбэми зыкӀызэӀукӀагъэхэр ашӀэщтыгъэп. 33Джуртмэ Александрэ купышхом къыхащи, цӀыфхэм апашъхьэ къырагъэуцуагъ. ЦӀыфхэм апашъхьэ къыщыгущыӀэ шӀоигъоу, Александрэ ыӀэ къыӀэтыгъ. 34Ау ар зэрэджуртыр зашӀэм, зэдырагъаштэу зы макъэкӀэ сыхьатитӀо зэкӀэри кууагъэх:

– Ефес къалэм и Артемидэ лъэпӀэ дэд!

35Аужыпкъэм къалэм итхакӀо цӀыф купышхор ыгъэсамбыри, къыӀуагъ:

– Ефес лӀыхэр! Бзылъфыгъэ тхьэшхоу Артемидэрэ ащ исурэтэу уашъом къефэхыгъэмрэ Ефес къалэр зэряухъумакӀор зымышӀэрэ цӀыф щыӀа? 36Ефес къалэр ахэмэ зэряухъумакӀом щэч хэлъэпышъ, шъо зыжъугъэсамбыр, шъхьэпсынкӀэуи шъумызекӀу. 37Мы лӀыхэр тхьэлъэӀупӀэ унэшхохэм ямытыгъуагъэхэу, титхьэу бзылъфыгъэм къемыхъоныгъэхэу, шъо мыщ къэшъущагъэх. 38Димитрыйрэ ежь игъусэу ӀэшӀэгъэ Ӏоф зиӀэхэмрэ цӀыф горэм дэон Ӏоф фыряӀэмэ, Ӏэшъхьэтетхэр цӀыфхэм ядэон Ӏофхэм зыщахаплъэрэ мафэхэр щыӀэх. Дэон Ӏоф азыфагу дэлъмэ, зэрэдаох. 39Ащ нэмыкӀэу зыгорэм шъуфаемэ, къалэм дэсхэм яхасэу хабзэм тетым а Ӏофыр зэшӀуихын фае. 40Ӏофхэу непэ хъугъэхэм апае, «ЗыкъэшъоӀэты» аӀонышъ, рим тетыгъо зиӀэхэм тагъэмысэнэу щынагъо щыӀ. Сыда пӀомэ, мы бырсырышхор къызэрэтӀэтыгъэм пае, къытфагъэгъунэу ушъхьагъу тшӀын зи тиӀэп. А гущыӀэхэр къызеӀом, цӀыфхэр зэбгыригъэкӀыжьыгъэх.

Currently Selected:

Апостолхэм ашӀэгъэ Ӏофхэр 19: AdgNT14

Highlight

Copy