Апостолхэм ашӀэгъэ Ӏофхэр 17

ЯПШӀЫКӀУБЛЭНЭРЭШЪХЬ

Фессалоникэ къалэм ицӀыфхэм Паулрэ игъусэхэмрэ къин зэрарагъэщэчыгъэр

1Паулрэ игъусэхэмрэ Амфипол къалэмрэ Аполлоние къалэмрэ къаблэкӀхи, Фессалоникэ къалэм къэкӀуагъэх. Джуртхэм а къалэм синэгогу щыряӀагъ. 2Паул ихабзэ тетэу ахэмэ адэжь синэгогум чӀахьи, зэкӀэлъыкӀорэ шэмбэт мэфищым Тхьэм игущыӀэ тхыгъэмэ ащыщ къафеджэзэ, янэкъокъугъ. 3Христос къин ыщэчынышъ, лӀагъэхэм къахэтэджыкӀыжьын зэрэфэягъэр зэхаригъэшӀыкӀызэ, къафигъэшъыпкъэжьыгъ.

– Исусэу зикъэбар сэ къышъозгъэӀурэр Христос ары, – ариӀуагъ Паул. 4Джуртхэм ащыщхэм шӀошъхъуныгъэ яӀэ хъуи, Паулрэ Силэрэ гъусэ къафэхъугъэх. Ащ нэмыкӀэу Тхьэр зыгъэлъапӀэрэ алыджхэм ащыщхэу бэхэми, зэлъашӀэрэ бзылъфыгъэмэ ащыщхэу бэхэми шӀошъхъуныгъэ яӀэ хъугъэ.

5Ау шӀошъхъуныгъэ зиӀэ мыхъугъэ джуртхэр мэшъугъохэти, цӀыф зэхэхьапӀэм къырамыдзэрэ хъулъфыгъэхэр къыщагъотхи, цӀыф купышхо аугъоий, къалэр къагъэбырсырыгъ. ЕтӀанэ Иасон иунэ Ӏулъадэхи, Паулрэ Силэрэ къыращынхэшъ, цӀыфхэм апашъхьэ къыращэнхэу ауж итыгъэх. 6Ахэр замыгъотхэм, Иасонрэ зэш заулэ къалэм итхьэматэхэм апашъхьэ ралъашъохи, куохэзэ, моущтэу аӀуагъ:

– Дунаир зэкӀэ зэӀэзгъэхьэрэ цӀыфхэр мыщи къэкӀуагъэх. 7Иасон ахэр иунэ ригъэблэгъагъэх. «НэмыкӀ пачъыхьэу Исус зыцӀэр щыӀ» аӀозэ, Кайсарым иунашъохэм апэуцужьых.

8Ахэмэ аущтэу аӀозэ, а гущыӀэхэр зэхэзыхыгъэ цӀыф купышхомрэ къалэм итхьэматэхэмрэ къагъэбырсырыгъэх. 9Ащ нэужым къалэм итхьэматэхэм Иасонрэ игъусэхэмрэ шэсы ахъщэр къаӀахи, атӀупщыжьыгъэх.

Берие къалэм ицӀыфхэм ащыщхэу бэхэр Исус игъогу зэрэтехьагъэхэр

10Чэщ зэрэхъоу, зэшхэм Паулрэ Силэрэ Берие къалэм агъэкӀуагъэх. Ахэр зынэсхэм, джуртхэм ясинэгогу чӀэхьагъэх. 11Фессалоникэ къалэм дэсхэм анахьи Берие къалэм дэсхэм нахь шъыпкъагъэ яӀагъ. Тхьэм игущыӀэхэр ягуапэу аштагъэх. Паул къыӀуагъэхэр Тхьэм игущыӀэ тхыгъэхэм арытхэм атефэхэмэ алъэгъуным пае, мафэ къэс Тхьэм игущыӀэ тхыгъэхэм ахэплъыхьэщтыгъэх. 12Джуртхэм ащыщхэу бэхэми, лъытэныгъэ зиӀэ алыдж бзылъфыгъэхэмрэ хъулъфыгъэхэмрэ ащыщ купхэми шӀошъхъуныгъэ яӀэ хъугъэ.

13Паул Берие къалэми Тхьэм игущыӀэхэр зэрэщигъэӀурэр Фессалоникэ щыщ джуртхэм зашӀэм, ащ къакӀохи, цӀыф купышхор зэкӀагъэплъыхьагъ ыкӀи агъэбырсырыгъ. 14Ардэдэм зэшхэм Паул хыӀушъом агъэкӀуагъ, ау Силэрэ Тимофейрэ Берие къалэм къыдэнагъэх. 15Паул зыгъэкӀуатэхэрэр къалэу Афинэ дынэсыгъэх. Силэрэ Тимофейрэ ыдэжь шӀэхэу къэкӀонхэу Паул зыщагъэхэм унашъо зафешӀым, ахэмэ агъэзэжьыгъ.

Паул къалэм дэс цӀыфхэм апашъхьэ къызэрэщыгущыӀагъэр

16Паул къалэу Афинэ Силэрэ Тимофейрэ щапаплъэзэ, тхьэ нэпцӀ сурэтхэр къалэм дизэу зелъэгъум, ыгу къеуагъ. 17Аущтэу Паул джуртхэмрэ Тхьэр зыгъэлъапӀэхэрэмрэ синэгогум гущыӀэгъу афэхъузэ щянэкъокъущтыгъ, мафэ къэс зэхэхьапӀэм цӀыфхэу щызэӀукӀэхэрэм щянэкъокъущтыгъ. 18Философхэу эпикурейхэмрэ#17:18 эпикурей философхэр – алыдж философэу Эпикурей зыцӀэр Исус къэхъуным ыпэкӀэ, я 270-рэ илъэсым дунаим ехыжьыгъ. Ащ зэриӀуагъэмкӀэ, щыӀэныгъэмкӀэ анахьышӀоу щыӀэр утхъэжьэу упсэуныр ары. стоикхэмрэ#17:18 стоик философхэр – ахэмэ алыдж философэу Сено зыцӀэм ыӀогъагъэхэр цӀыфхэм зэхарагъэшӀыкӀыщтыгъ. (Сено зылӀагъэр Исус къэхъуным ыпэкӀэ я 265-рэ илъэсыр ары) Стоик философхэм зэраӀуагъэмкӀэ, утхъэжьыныр зыфаӀорэр къин плъэгъуми, шӀу плъэгъуми, узыфаер къыбдэхъуми, къыбдэмыхъуми гупсэфэу ущыӀэныр ары. ащыщхэу зы куп Паул къенэкъокъоу ыублагъ.

– Сыда къыӀонэу мы шъхьаубатэр зыфаер? – аӀуагъ заулэмэ.

– Мы лӀым хымэ тхьэхэм якъэбар зэрехьэ, – аӀуагъ адрэхэм. Аущтэу зыкӀаӀуагъэр Паул Исус ехьылӀэгъэ КъэбарышӀумрэ лӀагъэхэр къызэрэтэджыжьыщтхэм#17:18 лӀагъэхэр къызэрэтэджыжьыщтхэр – «Къэтэджыжьыныгъ» зыфаӀорэ гущыӀэр алыджыбзэкӀэ къаӀомэ, ар бзылъфыгъэ тхьэ горэм ыцӀэу пхэнджэу къагурыӀогъэнкӀи мэхъу. ехьылӀэгъэ КъэбарышӀумрэ зэраригъэӀущтыгъэхэр ары.

19ЕтӀанэ а философхэм Ареопаг#17:19 Ареопаг – «Ареопаг» гущыӀэм къикӀырэр «Арес иӀуашъхь». Алыджхэм ятхьэхэм ащыщ заом итхьэу Арес зыфаӀорэр. Афинэ къалэм дэсхэм яхасэ а Ӏуашъхьэм щызэӀукӀэщтыгъ. Ӏуашъхьэм щызэӀукӀэрэ хасэм дэжь Паул зыдащи, къыраӀуагъ:

– КъэбарыкӀэхэу о цӀыфхэм ябгъашӀэхэрэр зэхэтэбгъэшӀыкӀынха? 20Сыда пӀомэ, гущыӀэ гъэшӀэгъонхэр ттхьакӀумэхэм о къареогъадзэх. Ахэмэ къарыкӀырэр тшӀэ тшӀоигъу.

21Афинэ къалэм щыщ пстэуми, хымэхэу ащ дэсхэми къэбарыкӀэхэр къаӀонхэмрэ ядэӀунхэмрэ нэмыкӀыкӀэ мафэхэр агъакӀощтыгъэхэп.

22ЕтӀанэ Паул Ареопаг Ӏуашъхьэм щызэӀукӀэрэ хасэм ыпашъхьэ къиуцуи, моущтэу къыӀуагъ:

– Шъо, Афинэ лӀыхэр! Лъэныкъо пстэумкӀэ шъо тхьэ Ӏаджыхэр инэу жъугъэлъапӀэхэу сэлъэгъу; 23сыда пӀомэ, къэскӀухьэзэ, шъуитхьэлъэӀупӀэхэм сызяплъым, моущтэу зытетхэгъэ къурмэншӀыпӀэ#17:23 къурмэншӀыпӀэ – алыджхэм тхьабэ агъэлъапӀэщтыгъ. Ау амышӀэрэ тхьэ щыӀэмэ, ари агъэлъэпӀэным пае, амышӀэрэ тхьэхэм апае къурмэншӀыпӀэхэр агъэуцугъэх. горэ къэзгъотыгъ: «ТымышӀэрэ Тхьэм пае». Джа шъо шъумышӀэрэ Тхьэу жъугъэлъапӀэрэм икъэбар ары шъо къышъозгъэӀурэр.

24– Тхьэу дунаири дунаим тетхэри къэзгъэшӀыгъэр уашъоми чӀылъэми я Зиусхьан. Ар цӀыфхэм аӀэкӀэ ашӀыгъэ тхьэлъэӀупӀэ унэшхохэм арысэп. 25Ащ щыкӀагъэ горэ иӀэм фэдэу, цӀыфхэр ӀэкӀэ фэлэжьэнхэу ищыкӀагъэп. Ежьыр ары псэ зыхэт пстэури щызгъаӀэрэри, жьы къязгъащэрэри, ящыкӀэгъэ пстэури къязытырэри. 26Тхьэм зы цӀыф закъом цӀыф лъэпкъ пстэури къытыригъэкӀыгъ, дунаим тыдэкӀи щыпсэунхэм пае. Ятетыгъохэмрэ япсэупӀэхэмрэ гъунэу афэхъущтхэр къыгъэнэфагъ. 27Тхьэм цӀыфхэр къызфигъэхъугъэр ежь лъыхъухэзэ, Ӏэбэ-лъабэхэзэ, зыгорэущтэу къагъотыныр ары. 28Ау щытми, Тхьэр тэ хэти тпэчыжьэп.#17:28 зыгорэм зэриӀуагъэм фэдэу – Крит хыгъэхъунэм щыщ тхакӀо Епименид арыгъэнкӀи мэхъу. «Тэ тырибын», шъо шъуитхакӀохэм#17:28 шъуитхакӀохэр – е Арат зыцӀэр е Клеант зыцӀэр ары. ащыщ заулэхэм къызэраӀуагъэм фэдэу.

29– Арышъ, Тхьэм тызэрибыным пае, цӀыфхэм яӀэпэӀэсагъэрэ яакъылыгъэрэкӀэ ашӀыгъэхэу дышъэм, тыжьыным, мыжъом ахашӀыкӀыгъэхэм Тхьэр афэдгъадэ хъущтэп. 30БлэкӀыгъэ лъэхъанхэм цӀыфмэ шӀэныгъэ зямыӀэм, Тхьэр наекӀэ ахэмэ къяплъыгъагъэп, ау джы цӀыф пстэури, тыдэ щыӀэхэми, япсэкӀодшӀагъэхэм афыкӀэгъожьынхэу унашъо къафешӀы; 31сыда пӀомэ, Тхьэм зы мафэ къыгъэнэфагъ. А мафэм Тхьэм ежь ыгъэнэфэгъэ лӀым иӀэмыркӀэ дунаим ицӀыф пстэуми шъыпкъагъэкӀэ хьыкум атыришӀыхьащт. Ащ фэдэу зэрэхъущтыр Тхьэм цӀыф пстэуми къафигъэшъыпкъэжьыгъ а лӀыр лӀагъэхэм къызэрахигъэтэджыкӀыжьыгъэмкӀэ.

32ЛӀагъэхэр къызэрэтэджыжьыщтхэм икъэбар Паул къыӀоу зызэхахым, зы куп Паул дэхьащхыгъ, ау адрэ купым ыӀуагъ:

– О къэбарэу къэпӀуатэрэм етӀанэ тедэӀущт.

33Аущтэу Паул ахэмэ ахэкӀыжьыгъ. 34Ау цӀыф заули Паул гъусэ фэхъуи, шӀошъхъуныгъэ яӀэ хъугъэ. Ареопаг Ӏуашъхьэм щызэӀукӀэрэ хасэм щыщ Дионисый, Дамар зыцӀэ бзылъфыгъэ гори, анэмыкӀхэри а шӀошъхъуныгъэ зиӀэ хъугъэхэм ащыщыгъэх.

Currently Selected:

Апостолхэм ашӀэгъэ Ӏофхэр 17: AdgNT14

Highlight

Copy