Апостолхэм ашӀэгъэ Ӏофхэр 16

ЯПШӀЫКӀУХЭНЭРЭШЪХЬ

Паулрэ Силэрэ Тимофей гъусэ зэрафэхъугъэр

1Ащ нэуж Паул къалэхэу Дербие, етӀанэ Листрэ анэсыгъ. Тимофей зыцӀэу ИсускӀэ шӀошъхъуныгъэ зиӀэ лӀы горэ а къалэм дэсыгъ. Ащ янэ шӀошъхъуныгъэ зиӀэ джуртыгъ, ятэ алыджагъ. 2Къалэхэу Листрэрэ Икониерэ адэс зэшхэм а лӀым лъытэныгъэ фыряӀагъ. 3Паул Тимофей зыдищэнэу фэягъ. Джуртхэу а лъэныкъом щыпсэухэрэм апае Паул Тимофей сунэт аригъэшӀыгъ#16:3 сунэт аригъэшӀыгъ – Тимофей янэ зэрэджуртым пае, Тимофей джуртэу алъытэн фаягъ. Ау ар сунэт амышӀымэ, Паул синэгогухэу Тхьэм игущыӀэхэр зыщигъэӀухэрэм щыдэлэжьэн ылъэкӀыщтыгъэп.; сыда пӀомэ, Тимофей ятэ зэрэалыджыр зэкӀэми ашӀэщтыгъэти ары. 4Къалэхэр къакӀухьэхэу, Ерусалим дэс апостолхэмрэ нахьыжъхэмрэ ашӀыгъэ унашъохэм ядэӀунхэм пае, шӀошъхъуныгъэ зиӀэхэм а унашъохэр араӀуагъэх. 5Аущтэу чылыс зэӀукӀэхэм ащыщхэм нахь шӀошъхъуныгъэшхо яӀэ хъузэ, мафэ къэс шӀошъхъуныгъэ зиӀэхэм япчъагъэ хахъощтыгъ.

Троадэ къалэм Тхьэм Паул зыгорэ къызэрэщыфигъэлъэгъуагъэр

6Паулрэ игъусэхэмрэ Асие хэкум Тхьэм игущыӀэхэр щагъэӀунхэу Тхьэм ы Псэ ЛъапӀэ фит ымышӀыхэзэ, Фригиерэ Галатиерэ яхэку зэпырыкӀыгъэх. 7Мисие хэкум зынэсхэм, Битиние хэкум ихьанхэу пылъыгъэх, ау Исус ы Псэ ЛъапӀэ ихьанхэу фит ышӀыгъэхэп. 8Аущтэу Мисие хэкум пхырыкӀыхи, Троадэ къалэмкӀэ#16:8 Троадэ къалэр – къухьэуцупӀэ иӀэу, Эгейскэ хым Ӏутэу (джырэ Тыркуим итыгъэ къохьэпӀэ хыӀушъор ары), Мисие хэкум щыщыгъ. ехыгъэх. 9Чэщым Тхьэм Паул къыфигъэлъэгъуагъ: Македоние хэкум#16:9 Македоние хэкур – Рим къэралыгъошхом щыщ хэкугъ. А хэкур джырэ Грецием итемыр Ӏахь. Македонием икъэлэшхуагъэр Фессалоник ары. щыщ лӀы горэ ыпашъхьэ къиуцуи, къелъэӀугъ:

– Македонием къакӀуи, ӀэпыӀэгъу къытфэхъу.

10Паул ар къызэрэфэлъагъоу, КъэбарышӀур а цӀыфхэми ядгъэӀунэу Тхьэр къызэрэтэджагъэм тицыхьэ телъэу, Македоние хэкум тыкӀонэу зыдгъэхьазырыгъ#16:10 зыдгъэхьазырыгъ – Троадэ къалэм щегъэжьагъэу Филиппи къалэм нэс мы тхылъыр зытхыгъэр Паул игъусагъ..

Лидие зыцӀэ бзылъфыгъэр Исус игъогу зэрэтехьагъэр

11Аущтэу Троадэ къалэм къухьэкӀэ тыщежьи, занкӀэу Самофракие хыгъэхъунэм тыкӀуи, ятӀонэрэ мафэми Неапол къалэм тынэсыгъ. 12ЕтӀанэ ащ тыдэкӀи, Филиппи къалэм тыкӀуагъ. Ар Македоние хэкум щыщэу а лъэныкъом икъэлэшхуагъ. А къалэр зыгъэуцугъагъэхэр Рим къэралыгъошхом ицӀыфхэр ары. А къалэм мэфэ заулэ тыдэсыгъ.

13Шэмбэт мафэм къалэм тыдэкӀи, псыхъом тыкӀуагъ. Ащ дэжьым цӀыфхэр Тхьэм зыщелъэӀурэ чӀыпӀэ щыдгъотыщт тӀуи, тытӀыси, зэрэугъоигъэ бзылъфыгъэмэ тадэгущыӀагъ. 14Бзылъфыгъэ горэ, Лидие ыцӀэу, къэдаӀощтыгъ. Ар Тиатирэ къалэм щыщэу, шэкӀ плъыжь чӀэпцӀэ лъапӀэр зыщэхэрэм ащыщыгъ. Ар Тхьэр зыгъэлъэпӀэрэ бзылъфыгъэу къычӀэкӀыгъ. Паул къыӀохэрэм ыгу етыгъэу ядэӀунэу Зиусхьаным ащ ыгу зэӀуихыгъ. 15Ари ащ иунэ исхэри тыумэхъыгъэх. Зытэумэхъхэм, бзылъфыгъэр къытэлъэӀуи, къыӀуагъ:

– ЗиусхьанымкӀэ шӀошъхъуныгъэ зиӀэхэм сащыщэу шъолъытэмэ, сиунэ шъуисынэу шъукъеблагъ. Аущтэу ыӀозэ, тыкъыгъэнагъ.

Паулрэ Силэрэ къалэу Филиппи хьапсым зэрэщычӀадзагъэхэр

16Мафэ горэм цӀыфхэр Тхьэм зыщелъэӀурэ чӀыпӀэм тыкӀозэ, джынапцӀэ зыхэсэу, къэхъущт-къэшӀэщт Ӏофхэр къэзыӀон зылъэкӀырэ унэӀут пшъашъэ горэ къытӀукӀагъ. Къэхъущт-къэшӀэщтхэр къыӀохэзэ, итхьэматэхэм ахъщабэ къафигъахъэщтыгъ. 17А пшъашъэр Паулрэ тэррэ тауж имыкӀэу, кууозэ моущтэу ыӀощтыгъ:

– Мы лӀыхэр Тхьэу анахь Лъагэм илӀыкӀох. ШъумыкӀодэу, Тхьэм шъукъызэригъэнэжьырэ гъогур мыхэмэ къышъуагъэӀу.

18Джаущтэу мэфэ пчъагъэрэ пшъашъэр ауж итыгъ. ЕтӀанэ Паул губжи, зыкъызэригъэзэкӀи, джынапцӀэм риӀуагъ:

– Исус Христос ыцӀэкӀэ мы пшъашъэм ухэкӀынэу унашъо къыпфэсэшӀы. Ардэдэм джынапцӀэр пшъашъэм хэкӀыжьыгъ.

19Ахъщэ къэкӀуапӀэу зыщыгугъыхэрэр зэрэщымыӀэжьыр пшъашъэм итхьэматэхэм залъэгъум, Паулрэ Силэрэ аубытхи, къалэм изэхэхьапӀэм тетыгъо зиӀэхэм апашъхьэ кӀуачӀэкӀэ ралъэшъуагъэх. 20Ӏэшъхьэтетхэм апашъхьэ зыращэхэм, моущтэу къаӀуагъ:

– Мы лӀыхэр джуртых. Тикъалэ инэу зэӀагъахьэ. 21Тэ Рим къэралыгъошхом ицӀыфхэм хабзэхэу зетымыхьапхъэхэри тымышӀапхъэхэри мы лӀыхэм агъэӀух.

22ЦӀыф купышхор ахэмэ ягъусэу Паулрэ Силэрэ атебэнагъэх. Ӏэшъхьэтетхэм Паулрэ Силэрэ ящыгъынхэр зэӀатхъыхи, къамыщкӀэ яонхэу дзэлӀхэм унашъо афашӀыгъ. 23Утыныбэ зарах ужым, хьапсым чӀадзагъэх. Хьапс къэрэгъулэми афэсакъыпэу ыухъумэнхэу унашъо фашӀыгъ. 24Аущтэу унашъо зыфашӀым, къэрэгъулэм ахэр хьапсым иунэ кӀоцӀ дэдэм чӀидзэхи, алъакъохэри пкъэум рипхыгъ.

25Чэщныкъом Паулрэ Силэрэ Тхьэм елъэӀущтыгъэх, тхьэщытхъу орэдхэри къаӀощтыгъ. Адрэ хьапсчӀэсхэри ахэмэ ядэӀущтыгъэх. 26ОшӀэ-дэмышӀэу хьапсым ылъапсэхэр хъыехэзэ, чӀыгур лъэшэу къэсысыгъ. Ардэдэм хьапсым ипчъэхэр зэкӀэ къызэӀукӀыгъэх. ГъучӀ лъэхъухэу хьапсчӀэсхэм ателъыгъэхэри зэкӀэ атезыгъэх. 27Хьапс къэрэгъулэр къэущи, хьапсым ипчъэхэр зэӀухыгъэхэу зелъэгъум, хьапсчӀэсхэр хэхьажьыгъэхэу ыӀуи, ичатэ къырихыгъ, зиукӀыжь шӀоигъоу. 28Ау Паул мэкъэшхокӀэ къэкууи, къыӀуагъ:

– Лые зэмыхыжь! Тэ зэкӀэми мыщ тыщыӀ!

29ЕтӀанэ хьапс къэрэгъулэм остыгъэ нэфынэ къаригъэхьи, хьапсым чӀэлъади, Паулрэ Силэрэ апашъхьэ кӀэзэзэу зыщыридзыхыгъ. 30ЕтӀанэ хьапсым чӀищыхи, моущтэу къыӀуагъ:

– Шъо, тхьэматэхэр, сымыкӀодэу Тхьэм сыкъыгъэнэжьыным пае, сыда сшӀэн фаер?

31– Зиусхьан ИсускӀэ шӀошъхъуныгъэ зигъаӀи, ори уиунагъуи шъумыкӀодэу Тхьэм шъукъыгъэнэжьыщт, – къаӀожьыгъ ахэмэ.

32ЕтӀанэ Паулрэ Силэрэ хьапс къэрэгъулэми, ащ иунэ ис пстэуми Зиусхьаным игущыӀэхэр араӀотагъэх. 33Чэщым а сыхьат дэдэм хьапс къэрэгъулэм Паулрэ Силэрэ унэ горэм рищэхи, яуӀагъэхэр афитхьакӀыгъ. Ащ лъыпытэу ежьыри иунагъо ис пстэуми зарагъэумэхъыгъ. 34Ащ нэужым хьапс къэрэгъулэм ахэр ежь иунэ рищэхи, Ӏанэ къафызэӀуихыгъ. ТхьэмкӀэ шӀошъхъуныгъэ яӀэ зэрэхъугъэм пае, ежьыри иунагъуи гушӀуагъэх.

35Нэф къызэшъым, Ӏэшъхьэтетхэм яӀофтабгэхэм «Мы лӀыхэр тӀупщыжьых» раӀонэу хьапс къэрэгъулэм дэжь агъэкӀуагъэх. 36Хьапс къэрэгъулэм а къэбарыр Паул къыриӀуагъ:

– Ӏэшъхьэтетхэм шъуатӀупщыжьынэу яӀофтабгэхэр къагъэкӀуагъэх. Арышъ, джы шъучӀэкӀыжь. Гъогумафэх.

37– Тэ рим цӀыфхэм#16:37 рим цӀыфхэр – Рим хабзэм тетэу рим цӀыфхэу тетыгъо зиӀэхэм якъэралыгъошхо ицӀыфхэр агъэпщынэнхэм пае, къамыщкӀэ яохэ хъущтыгъэп. тащыщми, хьыкумэшӀым ыпашъхьэ тырамыщэу, цӀыфмэ алъэгъоу къамыщкӀэ къытаохи, хьапсым тычӀадзагъ, – ариӀожьыгъ Паул. – Джы шъэфэу татӀупщыжьы ара? Хьау, ар хъущтэп! Ежьхэр къэрэкӀохи, тыкъычӀарэщыжь!

38Ӏофтабгэхэм а гущыӀэхэр Ӏэшъхьэтетмэ араӀотэжьыгъ. Паулрэ Силэрэ Рим къэралыгъошхом ицӀыфхэм зэращыщхэр Ӏэшъхьэтетмэ зызэхахым, щынагъэх. 39Ахэр къакӀохи, «Губгъэн къытфэшъумылъэгъу» аӀуи, хьапсым къычӀащыжьхи, къалэм дэкӀыжьынхэу къялъэӀугъэх. 40Паулрэ Силэрэ хьапсым къызычӀэкӀыжьхэм, Лидие иунэ кӀуагъэх. Ащ дэжьым зэшхэр щалъэгъухи, агъэгушхуагъэх. ЕтӀанэ къалэм дэкӀыжьыгъэх.

Currently Selected:

Апостолхэм ашӀэгъэ Ӏофхэр 16: AdgNT14

Highlight

Copy