Апостолхэм ашӀэгъэ Ӏофхэр 15

ЯПШӀЫКӀУТФЭНЭРЭШЪХЬ

Апостолхэмрэ нахьыжъхэмрэ Ерусалим зэӀукӀэ зэрэщашӀыгъэр

1ЛӀы горэхэр Иудей хэкум къикӀыхи, Антиохием къакӀохи, зэшхэр агъасэхэу аублагъ, моущтэу аӀозэ:

– Пегъымбар Мусэ и Тэурат хабзэ сунэт шъуашӀын фаеу зэритым пае, сунэт шъуамышӀымэ, шъумыкӀодэу Тхьэм шъукъыгъэнэжьыщтэп.

2Паулрэ Бар-Наббэрэ ахэмэ агурымыӀохэу, лъэшэу янэкъокъугъэх. Арыти, Паулрэ Бар-Наббэрэ цӀыф заулэ ягъусэу, мы Ӏофым ехьылӀагъэу Ерусалим дэс апостолхэмрэ нахьыжъхэмрэ адэжь агъэкӀонхэу зэшхэм тыраубытагъ. 3Аущтэу чылыс зэӀукӀэм щыщхэр Паулрэ Бар-Наббэрэ адэкӀуатэхэзэ, гъогум тырагъэхьагъэх. Паулрэ Бар-Наббэрэ хэкухэу Финикиерэ Самариерэ пхырыкӀыгъэх. ПхырыкӀыхэзэ, хымэ лъэпкъхэм ащыщхэр Тхьэм игъогу зэрэтехьагъэхэм икъэбар афаӀотэжьызэ, ашыхэр зэкӀэ инэу агъэгушӀуагъэх. 4Ерусалим зынэсхэм, чылыс зэӀукӀэм щыщхэми, апостолхэми, нахьыжъхэми ахэр рагъэблэгъагъэх. Тхьэм ахэмэ ашӀэнхэу аригъэлъэкӀыгъэ Ӏоф пстэури араӀотэжьыгъ.

5Ау шӀошъхъуныгъэ зиӀэ лӀы горэхэу диныр зылэжьырэ цӀыф купэу фарисей купкӀэ заджэхэрэм ащыщхэм къэтэджхи, къаӀуагъ:

– Хымэ лъэпкъхэм ащыщхэри сунэт шъушӀынхэ фае, пегъымбар Мусэ и Тэурат хабзэ итхэри яжъугъэгъэцэкӀэнхэ фае.

6А Ӏофым тегущыӀэнхэу апостолхэри нахьыжъхэри зэрэугъоигъэх. 7Бэрэ зызэнэкъокъухэ ужым, Петрэ къэтэджи, адрэхэм ариӀуагъ:

– Сшыхэр, шъори шъошӀэба, хымэ лъэпкъхэм ащыщхэм ЗиусхьанымкӀэ шӀошъхъуныгъэ яӀэ хъуным пае, КъэбарышӀур язгъэӀунэу блэкӀыгъэ мафэхэм Тхьэм шъо сыкъызэрэшъухихыгъэр? 8ЦӀыфхэм агухэм арылъыр зышӀэрэ Тхьэм ежь ы Псэ ЛъапӀэ тэ къызэрэтфыригъэхыгъэм фэдэу, хымэ лъэпкъхэм ащыщхэми къафыригъэхызэ, ахэр зэридэхэрэр къыгъэлъэгъуагъ. 9Тэррэ ахэмрэ Тхьэм тызэхидзыгъэп, сыда пӀомэ, ахэми агухэр шӀошъхъуныгъэмкӀэ ыгъэкъэбзэжьыгъэх. 10Тэри тятэжъхэми тфэмыхьыгъэ хьылъэр ИсускӀэ шӀошъхъуныгъэ зиӀэхэм атешъулъхьэзэ, Тхьэр жъугъэунэфыным сыда ыуж шъузыкӀитыр? 11Ау ти Зиусхьан Исус Христос ынэшӀу щыфэным игъогукӀэ тэ тымыкӀодэу Тхьэм тыкъызэригъэнэжьырэр тшӀошъ мэхъу, ынэшӀу щыфэным игъогукӀэ хымэ лъэпкъхэм ащыщхэри мыкӀодхэу Тхьэм къызэригъэнэжьыхэрэм фэдэу.

12Джащыгъум зэӀукӀэгъэ цӀыф пстэуми заушъэфи, хымэ лъэпкъхэм адэжь Тхьэм Бар-Наббэрэ Паулрэ нэшэнэ гъэшӀэгъонхэу къыщаригъэгъэлъэгъуагъэхэри, Ӏофышхо гъэшӀэгъонхэу щаригъэшӀагъэхэри къызэраӀотэжьырэм ядэӀугъэх. 13ЕтӀанэ ахэмэ якъэӀотэн заухым, Якъубэ#15:13 Якъубэ – еплъ 12:17. игущыӀэ къыублагъ:

– Сшыхэр, къасӀорэм шъукъедэӀу. 14Лъэпкъэу ежь ыцӀэкӀэ зэджэщтыр Тхьэм къыхихыным пае, хымэ лъэпкъхэм ащыщхэм яплъынэу апэу зэрэхъугъэр Симон зэхытигъэшӀыкӀыгъ. 15Пегъымбархэм ягущыӀэхэр Петрэ къыӀуагъэхэм атефэх, Тхьэм игущыӀэ тхыгъэхэм зэрарытым фэдэу#15:15-18 Тхьэм игущыӀэ тхыгъэхэм зэрарытым фэдэу – еплъ Пегъымбар Амос тхылъэу ытхыгъэм 9:11-12; Пегъымбар Ешайа тхылъэу ытхыгъэм 45:21.:

16«ЕтӀанэ къэзгъэзэжьынышъ, пачъыхьэ Даутэ иунэу зэхэуагъэр зэтезгъэуцожьыщт», – Зиусхьаным еӀо. «Зэхэкъутагъэхэри сшӀыжьынхэшъ, а унэр зэтезгъэуцожьыщт,

17дунаим ицӀыфхэу къэнагъэхэмрэ сэ сицӀыф хъунхэу сызэджэгъэ хымэ лъэпкъ пстэумрэ Зиусхьаным лъыхъунхэм пае.

18Моущтэу зыӀуагъэр Зиусхьанэу мы Ӏофхэр бэшӀагъэу цӀыфмэ язгъэшӀагъэр ары».

19Якъубэ етӀанэ къыпигъэхъожьыгъ:

– Арышъ, сэ сызэрэгугъэрэмкӀэ, хымэ лъэпкъхэм ащыщхэу, Тхьэм игъогу техьэхэрэм къин атетлъхьэ хъущтэп. 20Ау цӀыфхэм афэттхын фае тхьэ нэпцӀхэм афашӀыгъэ къурмэным ыл, зинэ шӀэным, атхьэлэгъэ псэушъхьэхэм#15:20 атхьэлэгъэ псэушъхьэхэр – джурт хабзэм иунашъо тетэу, псэушъхьэхэр шӀуабзы зыхъукӀэ, лъыр зэкӀэ кӀагъэчъын фае. ал, лъым#15:20 лъы – джурт хабзэм иунашъо тетэу, лъы зыхэлъ шхын пшхы хъущтэп. зыщадзыенэуи, ежьхэм къарашӀэнэу зыфэмыер нэмыкӀ цӀыфхэм арамышӀэнэуи; 21сыда пӀомэ, пэсэрэ зэманхэм къащегъэжьагъэу пегъымбар Мусэ и Тэурат хабзэм итхэр къэлэ пстэуми ащызгъэӀунхэр щыӀэх, шэмбэт къэси ащ итхэм синэгогухэми ащеджэх.

Апостолхэмрэ нахьыжъхэмрэ хымэ лъэпкъхэм ащыщхэу шӀошъхъуныгъэ зиӀэ хъугъэхэм тхылъэу афатхыгъэр

22Аущтэу чылыс зэӀукӀэр зэрэщытэу ягъусэу апостолхэмрэ нахьыжъхэмрэ тыраубытагъ ежьхэм яцӀыфхэм ащыщхэу лӀы заулэ хахынхэу, Паулрэ Бар-Наббэрэ Антиохие адагъэкӀонхэм пае. Зэшхэм ятхьэматэхэм ащыщхэу Иудэу Бар-ШаббэкӀэ заджэхэрэмрэ Силэрэ хахыгъэх. 23Мыщ фэдэ тхылъи аратыгъ: «Тэ, шъушыхэу, апостолхэри, нахьыжъхэри, шъо хымэ лъэпкъхэм ащыщ тшыхэу Антиохие къалэм дэсхэми, Сирие хэкуми, Киликие хэкуми арысхэми, шӀуфэс къышъотэхыжьы.

24ЦӀыф заулэ тэ къытхэкӀи, „Сунэт шъуашӀын фае, Мусэ и Тэурат хабзэ итхэми шъуядэӀун фае“, – аӀозэ, ягущыӀэхэмкӀэ шъузэӀагъэхьагъэуи шъуагъэгумэкӀыгъэуи зэхэтхыгъ, ау тэ ахэр къэдгъэкӀуагъэхэп. 25Арышъ, тэ тызэӀукӀагъ. ЛӀы заулэ тэ къыхэтхынышъ, шӀу тлъэгъурэ Бар-Наббэрэ Паулрэ ягъусэхэу къышъуфэдгъэкӀонхэу тызэгурыӀуагъ. 26ИтӀур Зиусхьанэу Исус Христос ыцӀэ фэлажьэхэзэ, апсэ еблэжьыгъэхэп. 27Аущтэу Иудэрэ Силэрэ къышъуфэтэгъакӀох. Ахэми ттхыгъэр жэдэкӀэу къыжъугурагъэӀощт. 28Тхьэм ы Псэ ЛъапӀи тэри игъоу тлъытагъэ мы унашъохэу шъузэдэӀун фаехэм анэмыкӀэу, зи къышъутетымылъхьанэу: 29цӀыфхэм тхьэ нэпцӀхэм афашӀыгъэ къурмэным ыл, лъым, атхьэлэгъэ псэушъхьэхэм ал, зинэ шӀэным защышъудзый. Шъо къышъуашӀэнэу шъузыфэмыери нэмыкӀ цӀыфхэм яшъумышӀ. Моущтэу шъупсэумэ, дэгъоу шъушӀэщт. Шъотхъэжь».

30Аущтэу а лӀыхэр гъогум тырагъэхьагъэх. Ахэр Антиохие зынэсхэм, чылыс зэӀукӀэм щыщхэр аугъоихи, тхылъыр аратыгъ. 31Ахэр тхылъым зеджэхэм, къэбарэу ащ итым ыгъэгушхуагъэх ыкӀи ыгъэгушӀуагъэх. 32Иудэрэ Силэрэ, ежьхэр пегъымбархэти, гущыӀабэкӀэ ашыхэм агухэр къагъэпытэхэзэ, агъэгушхуагъэх. 33Ахэр тӀэкӀурэ ащ зыдэсхэм, къэзгъэкӀуагъэхэм адэжь агъэзэжьынэу ашыхэм гъогумафэкӀэ гъогум къытырагъэхьажьыгъэх. 34Ау Силэ Антиохие къыдэнэнэу тыриубытагъ, Иудэ Ерусалим ыгъэзэжьыгъ. 35Паулрэ Бар-Наббэрэ Антиохие къыдэнагъэх. НэмыкӀыбэхэм ягъусэхэу, цӀыфхэм Зиусхьаным игущыӀэхэр арагъашӀэу, къэбарышӀури арагъэӀоу, Антиохие дэсыгъэх.

Паулрэ Бар-Наббэрэ зэрэзэгокӀыгъэхэр

36Зы тӀэкӀу тешӀагъэу Паул Бар-Наббэ риӀуагъ:

– Тхьэм игущыӀэхэр зыщыдгъэӀугъэ къэлэ пстэуми адэс тшыхэм адэжь тэгъэгъэзэжьи, язытет зыфэдэр зэтэгъэгъэлъэгъу.

37Бар-Наббэ МарккӀэ заджэхэрэ Иуан ягъусэу зыдищэнэу фэягъ. 38Ау Паул ар зыдищэныр игъоу ылъытагъэп; сыда пӀомэ, Иуан МарккӀэ заджэхэрэр Памфилие хэкум ахэмэ щагокӀи, Ӏоф адишӀэнэу адэкӀогъагъэп. 39Паулрэ Бар-Наббэрэ лъэшэу зэрэзэнэкъокъугъэхэм къыхэкӀэу, зэгокӀыгъэх. Бар-Наббэ Марк зыдищи, Кипр хыгъэхъунэм къухьэкӀэ кӀуагъэ. 40Ау Паул гъусэ фэхъунэу Силэ къыхихыгъ. Ашыхэм Тхьэм ынэшӀу ахэмэ къащифэнэу зызыфагъазэ ужым, ахэр гъогум техьагъэх. 41Чылыс зэӀукӀэхэм ащыщхэр агъэгушхохэзэ, Сириемрэ Киликиемрэ къакӀухьэщтыгъэх.

Currently Selected:

Апостолхэм ашӀэгъэ Ӏофхэр 15: AdgNT14

Highlight

Copy