Апостолхэм ашӀэгъэ Ӏофхэр 14

ЯПШӀЫКӀУПЛӀЭНЭРЭШЪХЬ

Паулрэ Бар-Наббэрэ къалэу Иконие Тхьэм игущыӀэхэр зэрэщагъэӀущтыгъэхэр

1Иконие къалэм Паулрэ Бар-Наббэрэ зынэсхэм, яхабзэ тетэу, джуртхэм ясинэгогу чӀэхьагъэх. Джуртхэмрэ алыджхэмрэ ащыщхэу бэмэ шӀошъхъуныгъэ яӀэ агъэхъузэ, адэгущыӀагъэх. 2Ау шӀошъхъуныгъэ зиӀэ хъунхэу зымыдэрэ джуртхэм хымэ лъэпкъхэм ащыщхэр зэкӀагъэплъыхьэхи, шӀошъхъуныгъэ зиӀэ зэшхэм къафагъэгубжыгъэх. 3Паулрэ Бар-Наббэрэ Зиусхьаным икъэбар гушхокӀэ цӀыфхэм араӀозэ, а къалэм бэрэ щыӀагъэх. Зиусхьаными ынэшӀу щыфэным ехьылӀэгъэ КъэбарышӀур ыгъэшъыпкъэжьызэ, нэшэнэ гъэшӀэгъонхэр къагъэлъэгъонхэуи Ӏофышхо гъэшӀэгъонхэр ашӀэнхэуи Паулрэ Бар-Наббэрэ лъэкӀ аритыгъ. 4Ау къалэм ицӀыфхэм лъэныкъуитӀоу загощыгъ. Зы купыр джуртхэм агохьагъ, адрэ купри – апостолхэм. 5ЕтӀанэ хымэ лъэпкъхэм ащыщхэри, джуртхэри, ахэмэ ятхьэматэхэри ягъусэхэу зэгурыӀохи, Паулрэ Бар-Наббэрэ лые къарахынэуи мыжъохэмкӀэ къяохэзэ, къаукӀынхэуи гухэлъ ашӀыгъ. 6Паулрэ Бар-Наббэрэ ахэмэ ягухэлъ къызашӀэм, Ликаоние хэкум щыщ къалэхэу Листрэрэ Дербиерэ, ахэмэ яӀэгъо-блэгъо хэкум ылъэныкъокӀи кӀатхъужьыгъ. 7А чӀыпӀэхэми КъэбарышӀур ащагъэӀугъ.

Паулрэ Бар-Наббэрэ къалэу Листрэ Тхьэм игущыӀэхэр зэрэщагъэӀущтыгъэхэр

8Листрэ къалэм лӀы сэкъат горэ дэсыгъ. Къызыхъугъэм щегъэжьагъэу ылъакъохэм атеуцон ымылъэкӀэу, егъашӀэми мызекӀошъоу щысыгъ. 9Паул къыӀорэм а лӀыр едэӀущтыгъ. Паул а лӀым къызеплъым, хъужьынымкӀэ ащ шӀошъхъуныгъэ иӀэу ылъэгъугъ, 10мэкъэшхокӀи къыӀуагъ:

– Зиусхьан Исус Христос ыцӀэкӀэ къыосэӀо: Къэтэджи, плъакъохэм къатеуцу. А лӀыр къызщылъэти, къыкӀухьэу ыублагъ.

11Паул ышӀагъэр цӀыф купышхохэм залъэгъум, мэкъэшхокӀэ Ликаоние хэкум ыбзэкӀэ#14:11 Ликаоние хэкум ыбзэкӀэ – Паулрэ Бар-Наббэрэ Ликаоние хэкум ыбзэ къагурыӀон алъэкӀыгъэп. Рим къэралыгъошхом тыдэкӀэ зэрыщыгущыӀэрэ бзэр алыджыбзэр арыгъэ. къаӀуагъ:

– Тхьэхэр цӀыф плъышъо яӀэу къытфехыгъэх.

12Бар-Наббэ ЗевскӀэ#14:12 Зевс – алыджхэм ятхьэу зыфаӀохэрэм ащыщэу анахь иныр арыгъэ. еджагъэх, къэгущыӀэрэр Паул арыти, ащ ЕрмыйкӀэ#14:12 Ермый – алыджхэм ятхьэу зыфаӀохэрэм ащыщэу адрэ тхьэу зыфаӀохэрэм яӀофтабг арыгъэ. еджагъэх. 13Зевс иунэшхоу къалэм тӀэкӀу дэдзыгъэу щытым идин пащэ цӀыфхэм цухэр къэлапчъэм дэжь къаригъэщагъэх, танджыхэри къаригъахьыгъэх, ежьыри цӀыф купышхори фэягъэх Бар-Наббэрэ Паулрэ къурмэн афашӀынэу.

14Ау апостолхэу Бар-Наббэрэ Паулрэ ар зызэхахым, афамыдэу ящыгъынхэр зэӀатхъыжьхи, цӀыф купышхом хэлъадэхи, куохэзэ къаӀуагъ:

15– Шъо, лӀы купыр, сыда шъушӀэхэрэр? Шъо тышъуфэдэу тэри тыцӀыф. Мы тхьэ нэпцӀхэу зишӀуагъэ къэмыкӀощтхэм шъуакӀыб афэжъугъэзэжьэу Тхьэ шъыпкъэу псаум зыфэжъугъэзэжьыным пае, КъэбарышӀур къышъотэгъэӀу. Тхьэр ары уашъори, чӀыри, хыри, ахэмэ ащыпсэурэ пстэури къэзгъэхъугъэр. 16БлэкӀыгъэ лъэхъанхэм лъэпкъхэр зэкӀэри зэрэфаехэу ягъогу рыкӀонхэу фит ышӀыгъагъэх. 17Ау щытми, Тхьэм шыхьат имыӀэу зыкъыгъэнагъэп. Уашъом къикӀэу ощх къышъуфыригъэщхызэ, игъом гъажъор къышъуфигъэкӀызэ, гъомылэ шъущимыгъакӀэзэ, шъуигъэгушӀозэ шӀугъэ къышъуфишӀагъ.

18Паулрэ Бар-Наббэрэ аущтэу аӀозэ, къурмэн зыфарамыгъэшӀэу, цӀыф купышхор ерагъэу зэтыраӀэжьагъ.

19Ащ нэужым къалэхэу Антиохиерэ Икониерэ къарыкӀыхи, джурт куп къэкӀуагъ. Апостолхэм гушхокӀэ Тхьэм игущыӀэхэр агъэӀухэзэ, а джуртхэм цӀыфхэр апостолхэм агуагъэкӀыгъэх, моущтэу аӀозэ: «Мы лӀыхэм зи шъыпкъэ къаӀорэп, пцӀы къаусы нахь». ЕтӀанэ а джуртхэм цӀыф купышхор зэкӀагъэплъыхьи, Паул мыжъокӀэ къеохэзэ, къаукӀынэу пылъыгъэх, лӀагъэуи аӀозэ, къалэм далъэшъугъ. 20Ау етӀанэ Паул игъусэхэм къызауцухьэм, ар къэтэджыжьи, а къалэми дэхьажьыгъ. ЯтӀонэрэ мафэм Бар-Наббэ игъусэу Паул къалэм Дербие кӀуагъэ.

Паулрэ Бар-Наббэрэ Сирие хэкум щыщ Антиохие къалэм зэрагъэзэжьыгъэр

21Паулрэ Бар-Наббэрэ Дербие къалэми къэбарышӀур щагъэӀузэ, цӀыфыбэхэр Исус игъогу зытырагъахьэхэ ужым, къалэхэу Листрэ, Иконие, Антиохие агъэзэжьыгъ. 22А къалэхэм ИсускӀэ шӀошъхъунгъэ зиӀэ хъугъэхэр щагъэгушхохи, шӀошъхъуныгъэм игъогу темыкӀынхэу афагъэпытэзэ араӀуагъ:

– Тхьэм и Тетыгъошхо ыӀэчӀэгъ къин тщэчызэ тычӀэхьан фае.

23Паулрэ Бар-Наббэрэ тыдрэ чылыс зэӀукӀэм нахьыжъхэр фагъэнафэхи, Тхьэм елъэӀухэзэ, чэщи мафи анэкӀэу, ахэмэ Зиусхьанэу шӀошъхъуныгъэ зыфыряӀэ хъугъэм ынаӀэ къатыригъэтынэу фагъэзагъэх. 24Ащ нэужым Писидие хэкум пхырыкӀыхи, Памфилие хэкум нэсыгъэх. 25Пергие къалэм Зиусхьаным игущыӀэхэр зыщагъэӀухэ ужым, Атталие къалэмкӀэ ехыгъэх.

26А къалэм къыдэкӀыхи, къухьэкӀэ Антиохие къалэм кӀуагъэх. Антиохиер ары чылыс зэӀукӀэм щыщхэм Паулрэ Бар-Наббэрэ джы агъэцэкӀэгъэ Ӏофым пае, Тхьэм ынэшӀу къащифэнэу зыщыфагъэзагъэр. 27Паулрэ Бар-Наббэрэ Антиохием зынэсхэм, чылыс зэӀукӀэм щыщхэр аугъоихи, Тхьэм ахэмэ аригъэгъэцэкӀэгъэ Ӏоф пстэури къаӀотэжьыгъ, хымэ лъэпкъхэм ащыщхэми шӀошъхъуныгъэ яӀэ хъунэу Тхьэм пчъэр зэрафыӀуихыгъэри къаӀотэжьыгъ. 28ЕтӀанэ ИсускӀэ шӀошъхъуныгъэ зиӀэхэм адэжь бэрэ щыӀэнхэу къэнагъэх.

Currently Selected:

Апостолхэм ашӀэгъэ Ӏофхэр 14: AdgNT14

Highlight

Copy