Апостолхэм ашӀэгъэ Ӏофхэр 13

ЯПШӀЫКӀУЩЭНЭРЭШЪХЬ

Антиохием щыӀэ чылыс зэӀукӀэм щыщхэм Бар-Наббэрэ Шаулрэ Тхьэм фэлэжьэнхэу зэрагъэнэфагъэхэр

1Пегъымбархэри, дин гъэсакӀохэри Антиохием щыӀэ чылыс зэӀукӀэм щыщхэм ахэтыгъэх: Бар-Наббэ, «ШӀуцӀэкӀэ» заджэхэрэ Симон, Кириние къалэм щыщ Луцый, Манаил (ар пщы Ирод#13:1 пщы Ирод – Ирод Антипэу Галилей хэкум ипщыгъэр ары. Еплъ Лука 3:1. дапӀугъагъ) ыкӀи Шаул. 2Тхьэм елъэӀухэзэ, чэщи мафи ахэмэ анэкӀы зэхъум, Тхьэм ы Псэ ЛъапӀэ къариӀуагъ:

– Бар-Наббэрэ Шаулрэ сыкъызфяджэгъэ Ӏофым пае къысфыхэшъухых.

3ЕтӀанэ ахэмэ чэщи мафи занэкӀ ужым, Тхьэм елъэӀугъэх, аӀэхэри ашъхьэхэм атыралъхьи#13:3 аӀэхэри ашъхьэхэм атыралъхьи – аущтэу зыфашӀагъэр а Ӏофыр а лӀитӀум апшъэ ралъхьанышъ, ахэмэ а Ӏофыр агъэцэкӀэным пае, Тхьэм ынэшӀу къащифэнри ары., яӀоф ашӀэнэу агъэкӀуагъэх.

Апостолхэм Кипр хыгъэхъунэм Тхьэм игущыӀэхэр зэрэщагъэӀущтыгъэхэр

4Бар-Наббэрэ Шаулрэ, Тхьэм ы Псэ ЛъапӀэ ыгъэкӀуагъэхэр, къалэу Селевкие#13:4 Селевкие къалэр – Антиохием километрэ 20-кӀэ пэчыжьэу щытыгъ. А къалэр къухьэуцупӀэ иӀэу, хыӀушъом Ӏутыгъ. нэсыгъэх. Ащ къухьэм щитӀысхьэхи, Кипр хыгъэхъунэм кӀуагъэх. 5Саламин къалэм зыдахьэхэм, джуртхэм ясинэгогухэм Тхьэм игущыӀэхэр ащагъэӀущтыгъэх. Иуан ахэмэ яӀэпыӀэгъоу ягъусагъ.

6Хыгъэхъунэм икӀыхьагъэкӀэ Пафос къалэм#13:6 Пафос къалэр – Кипр хыгъэхъунэм итыгъэ къохьэпӀэ хыӀушъом Ӏут къэлэшхуагъ. нэс зэкӀохэм, ушхъухьан Ӏофым пылъ джурт пегъымбар нэпцӀ горэм ӀукӀагъэх. А лӀым Бар-Иешуа ыцӀагъ. 7Ар хыгъэхъунэм иӀэшъхьэтет#13:7 Ӏэшъхьэтет – Кипр хыгъэхъунэр зыӀэ илъэу, Рим къэралыгъошхом фэлажьэрэ тхьэматэр ары. Сергый Паул игъусагъ. Сергый Паул цӀыф губзыгъагъ. Ар Тхьэм игущыӀэхэм ядэӀунэу фэягъэти, Бар-Наббэрэ Шаулрэ къаригъэщагъэх. 8Ау ушхъухьаным пылъ Елымэ (Елимэм къикӀырэр «Ушхъухьаным пылъыр» ары) Ӏэшъхьэтетыр шӀошъхъуныгъэм игъогу тыримыгъэхьаным ыуж итыгъэти, Бар-Наббэрэ Шаулрэ апэуцужьыщтыгъ. 9Ау Шаулэу ПаулкӀи заджэхэрэм#13:9 Шаулэу ПаулкӀи заджэхэрэр – апостол Паулым ыцӀэ джуртыбзэкӀэ Шаул мэхъу, римыбзэкӀэ Паул мэхъу. Тхьэм ы Псэ ЛъапӀэ ыгу лъэш дэдэу илъ хъугъэти, ынэхэр Елымэ тыригъэдыкъэхи, къыӀуагъ:

10– О шэйтаным урикъу, о шъыпкъагъэм зэкӀэм урипый. ТхьагъэпцӀыгъэ пстэури, бзэджэгъэ пстэури угу инэу илъ. Тхьэм игъогу занкӀэхэр къуащэ пшӀынхэу упылъыным ыуж уикӀыжьыщтба? 11Джы Зиусхьаным ыӀэ къыптелъ. Заулэрэ тыгъэм инэфынэ умылъэгъоу, нэшъу ухъущт. Ардэдэм пщагъори шӀункӀыри Елымэ къыфехыгъэх. ЕтӀанэ къыкӀухьэзэ, къезыщэкӀын цӀыф горэм лъыхъущтыгъ. 12Ӏэшъхьэтетым хъугъэ-шӀагъэр зелъэгъум, шӀошъхъуныгъэ иӀэ хъугъэ. Бар-Наббэрэ Паулрэ Ӏофхэу Зиусхьаным ехьылӀагъэу Елымэ рагъашӀэхэрэр ыгъэшӀагъощтыгъэх.

Паулрэ Бар-Наббэрэ Писидие хэкум ит Антиохие къалэм зэрэкӀуагъэхэр

13ЕтӀанэ Паулрэ игъусэхэмрэ Пафос къалэм къухьэкӀэ щежьэхи, Памфилие хэкум ит Пергие къалэм кӀуагъэх. Ащ игъусэхэр Иуан къыдинэхи, Ерусалим ыгъэзэжьыгъ. 14Адрэ нэбгыритӀур Пергие къалэм блэкӀхи, Писидие хэкум ит Антиохие къалэм нэсыгъэх. Шэмбэт мафэм#13:14 шэмбэт мафэр – джуртхэм ямэфэ лъапӀ ары. А мафэм хэти Ӏоф ышӀэн фитэп. синэгогум чӀахьэхи, тӀысыгъэх. 15Тэурат хабзэм#13:15 Тэурат хабзэр – пегъымбар Мусэ тхылъитфэу ытхыгъэхэр ары. Тэурат хабзэр джуртхэм ятхылъ лъапӀэхэм ащыщэу апэрэ Ӏахь мэхъу. итхэмрэ пегъымбархэм атхыгъэ тхылъхэм#13:15 пегъымбархэм атхыгъэ тхылъхэр – джуртхэм ятхылъ лъапӀэхэм ащыщхэу ятӀонэрэ Ӏахь мэхъу. арытхэмрэ ащыщ горэхэм зяджэхэ ужым, синэгогу пащэхэм зыгорэ агъакӀуи, арарагъэӀуагъ:

– Тэ тшыхэр, мы цӀыфхэр зэрыжъугъэгушхон гущыӀэхэр шъуиӀэхэмэ, къашъуӀох.

16Паул къэтэджи, Ӏэ афишӀи, къыӀуагъ:

– Шъо, израиль цӀыфхэри, Тхьэм шӀолӀыкӀ фызиӀэхэри, шъукъэдаӀу. 17Израиль лъэпкъым и Тхьэ тятэжъхэр къыхихыгъэх. Тэ тлъэпкъ Мысыр хэгъэгум зесым, лъэпкъышхо ышӀи, лъэкӀышхокӀэ ащ къырищыжьыгъэх. 18ЕтӀанэ илъэс тӀокӀитӀо шъоф нэкӀым щигъэшхагъэх. 19Ханаан хэгъэгум щыпсэурэ лъэпкъиблыр ыгъэкӀоди, ахэмэ яхэгъэгу израиль лъэпкъым иӀахь хъунэу къыфигъэнэжьыгъ. 20А зэпстэур илъэс шъиплӀырэ шъэныкъорэ фэдиз хъугъэ.

– Ащ ыужым, хьыкумэшӀыхэр Тхьэм аритыгъэх, пегъымбар Самуел имафэхэм анэсыфэхэ. 21ЕтӀанэ пачъыхьэ афигъэнэфэнэу израиль цӀыфхэр Самуел елъэӀугъэх. Бен-Ямин илъэпкъ щыщэу, Кис ыкъо Шаул пачъыхьэ афэхъунэу Тхьэм аритыгъ. ЕтӀанэ илъэс тӀокӀитӀурэ ар пачъыхьагъ. 22Тхьэм ар тыригъэкӀыжьи, Даутэ пачъыхьэ афишӀыгъ. Тхьэм Даутэ моущтэу шыхьат фэхъугъ#13:22 Тхьэм Даутэ… шыхьат фэхъугъ – яплъ Орэд ЛъапӀэхэм 88:21; Пегъымбар Самуел икъэбар зэрыт апэрэ тхылъым (1-я Царств) 13:14.: «Ищай ыкъоу Даутэ сыгу зэӀурэ цӀыфэу къэзгъотыгъ. Сэ сызыфаехэр зэкӀэ ащ ыгъэцэкӀэщт». 23Мы лӀым къытекӀыгъэ цӀыфхэм ащыщэу, израиль цӀыфхэр мыкӀодхэу къэзгъэнэжьырэр Исус ары, Тхьэм къафигъэкӀуагъ, ятэжъхэр къызэригъэгугъэгъагъэхэм фэдэу. 24Исус къэкӀоным ыпэкӀэ Иуан, «ШъуипсэдкӀодшӀагъэхэм шъуафыкӀэгъожьи, зысэжъугъэумэхъ» ыӀозэ, зэкӀэ израиль цӀыфхэм макъэ аригъэӀугъ. 25Иуан иӀоф ыухызэ, къыӀуагъ#13:25 Иуан… къыӀуагъ – еплъ Лука 3:16.: «Сэ хэтэу сышъушӀошӀыра? Шъо шъузпаплъэрэр сэрэп. Шъо шъузпаплъэрэр саужкӀэ къэкӀощт, ащ ицокъэ лъэпсхэр фэстӀэтэнхэуи сифэшъуашэп».

26(Паул джыри ипсалъэ къыпидзэжьыгъ:) – Сэ сшыхэу Ибрахьим къытекӀыгъэ цӀыфхэри, шъо къышъухэтхэу нэмыкӀ цӀыфхэу Тхьэм шӀолӀыкӀ фызиӀэхэри, Тхьэм цӀыфхэр мыкӀодхэу къызэригъэнэжьхэрэм икъэбар къызнэсыгъэхэр тэры. 27Ерусалим дэсхэмрэ ахэмэ ятхьэматэхэмрэ цӀыфхэр мыкӀодхэу къэзгъэнэжьырэр зэрэ Исусыр къашӀэжьыгъэп. УкӀ ежь къытыралъхьагъ, ау аущтэу пегъымбархэм ягущыӀэхэу шэмбэт мафэ къэсми синэгогухэм ащызаджэхэрэр къагъэшъыпкъэжьыгъэх. 28УкӀ Исус зыкӀытыралъхьащт Ӏоф амыгъотыгъэми, Ӏэшъхьэтет Пилат ар ыукӀынэу елъэӀущтыгъэх. 29Исус ехьылӀагъэу Тхьэм игущыӀэ тхыгъэхэм арытхэр зэкӀэ ахэмэ загъэцакӀэ ужым, Исус игъусэхэм ихьадэ къащым къытырахыжьи, къэунэм чӀалъхьажьыгъ. 30Ау Тхьэм ар лӀагъэхэм къахигъэтэджыкӀыжьыгъ. 31ЕтӀанэ Исус ежь игъусэхэу Галилей хэкум къикӀыгъэхэу, Ерусалим къэкӀогъагъэхэм мэфэ пчъагъэхэм къакӀоцӀ заригъэлъэгъущтыгъ. Джы ахэр ары тэ тлъэпкъ ыпашъхьэ Исус шыхьат щыфэхъухэрэр.

32– Джы мы къэбарышӀур тэ къышъотэӀо: Тхьэм Исус лӀагъэхэм къызэрахигъэтэджыкӀыжьыгъэмкӀэ тятэжъхэр къызэригъэгугъэгъэ Ӏофхэр къыгъэхъухэзэ, тэ, ахэмэ атекӀыгъэ цӀыфхэм къытфигъэшъыпкъэжьыгъ. 33ЯтӀонэрэ Орэд ЛъапӀэм Тхьэм Исус къызэрэщыриӀорэм фэдэу#13:33 Тхьэм Исус къызэрэщыриӀорэм фэдэу – яплъ Орэд ЛъапӀэхэм 2:7.: «Оры с Къор, непэ ты сыпфэхъугъ».

34Тхьэм Исус лӀагъэхэм къызэрахигъэтэджыкӀыжьыгъэр егъашӀэми мылӀэжьыным пае, мы гущыӀэхэмкӀэ Тхьэм къыӀуагъ#13:34 Тхьэм къыӀуагъ – еплъ Пегъымбар Ешайа тхылъэу ытхыгъэм 55:3.: «СынэшӀу щыфэныгъэ лъапӀэр шъыпкъэмкӀэ шъо къышъулъызгъэӀэсыщт, Даутэ зэрэзгъэгугъэгъагъэм фэдэу».

35Тхьэм игущыӀэ тхыгъэхэм ащыщэу нэмыкӀ чӀыпӀэм зэритым фэдэу#13:35 нэмыкӀ чӀыпӀэм зэритым фэдэу – яплъ Орэд ЛъапӀэхэм 15:10., «О уиӀорышӀэ ихьадэ бгъэшъущтэп».

36– Сыда пӀомэ, Тхьэм игухэлъ тетэу Даутэ имафэхэм Тхьэм фэлажьэщтыгъ, етӀанэ дунаим ехыжьыгъ. Ятэжъхэм адэжь къэунэм чӀалъхьажьи, ихьади шъугъэ. 37Ау Тхьэм лӀагъэхэм къахигъэтэджыкӀыжьыгъэр джыри зэ лӀэжьыгъэп, ихьади шъужьыгъэп. 38Арышъ, сэ сшыхэр, мыр зэжъугъашӀэ, шъо шъуипсэкӀодшӀагъэхэр Исус къызэрэшъуфигъэгъухэрэм икъэбар къышъотэгъэӀу. 39Хэти ИсускӀэ шӀошъхъуныгъэ зиӀэм ипсэкӀод пстэури ежь Исус тырехых, ау пегъымбар Мусэ и Тэурат хабзэ псэкӀодхэр къышъутырихын ылъэкӀырэп. 40Шъузфэсакъыжь, пегъымбархэм мы гущыӀэхэу къаӀуагъэхэр#13:40-41 пегъымбархэм мы гущыӀэхэу къаӀуагъэхэр – еплъ Пегъымбар Хаббакум тхылъэу ытхыгъэм 1:5. къышъорэмыхъулӀэх:

41«ШъукъэдаӀу, шъо Тхьэм къыӀуагъэхэм нэмыплъ языххэрэр,

жъугъэшӀагъуи, шъукӀод;

сыда пӀомэ, шъо шъуимафэхэм Ӏофышхо горэ згъэцэкӀэщт.

А Ӏофышхом икъэбар зыгорэм къышъуиӀуагъэми,

шъо шъушӀошъ хъущтыгъэп».

42Паулрэ Бар-Наббэрэ синэгогум къычӀэкӀыжьхэзэ, къыкӀэлъыкӀорэ шэмбэт мафэм а Ӏофхэм атегущыӀэжьынхэу цӀыфхэр къялъэӀугъэх. 43ЗэӀукӀэр зызэбгырэкӀыжьым, джуртхэм ащыщхэу бэхэри, хымэхэу джурт хъугъэхэм ащыщхэу бэхэри Паулрэ Бар-Наббэрэ ягъусэхэу кӀощтыгъэх. ИтӀур ахэмэ адэгущыӀэхи, Тхьэм ынэшӀу къызэращифэщтым ыуж ит зэпытынхэу афагъэпытагъ.

44КъыкӀэлъыкӀорэ шэмбэт мафэм Тхьэм игущыӀэхэм ядэӀунхэм пае, къалэм дэс цӀыф пстэури къэнэгъэ шӀагъо щымыӀэу зэрэугъоигъэх. 45Ау джуртхэм цӀыф купышхохэр залъэгъум, шъугъоныр агу къихьи, ехъонхэзэ, Паул къыӀохэрэм апэужьыгъэх.

46Джащыгъум Паулрэ Бар-Наббэрэ гушхокӀэ къаӀуагъ:

– Тхьэм игущыӀэхэр ыпэ рапшӀэу шъо къышъотӀонхэ фэягъ. Ау шъо Тхьэм игущыӀэхэр щыжъугъэзыехэу, аущтэу мыкӀодыжьын щыӀэныгъэ шъуиӀэ хъунэу зыфэжъугъэшъуашэрэп. Арышъ, хымэ лъэпкъхэм ащыщхэм тэ зафэтэгъазэ; 47сыда пӀомэ, Тхьэм моущтэу унашъо къытфишӀыгъ#13:47 Тхьэм унашъо къытфишӀыгъ – еплъ Пегъымбар Ешайа тхылъэу ытхыгъэм 49:6.: «Хымэ лъэпкъхэм нэфынэ уафэхъунэу узгъэуцугъ, дунаим ыкъуапэхэм анэсыфэ, цӀыфхэр мыкӀодхэу Тхьэм къыуигъэгъэнэжьынхэм пае».

48Хымэ лъэпкъхэм ащыщхэм ар зызэхахым, гушӀохи, Зиусхьаным игущыӀэхэм щытхъу афашӀыгъ. МыкӀодыжьын щыӀэныгъэ яӀэ хъунэу Тхьэм ыгъэнэфэгъэ цӀыф пстэуми шӀошъхъуныгъэ яӀэ хъугъэ.

49Зиусхьаным игущыӀэхэр а хэкум тыдэкӀи цӀыфхэм анэсхэу хъугъэ. 50Ау джуртхэм лъытэныгъэ зиӀэ бзылъфыгъэхэу Тхьэр зыгъэлъапӀэхэрэмрэ къалэм итхьэматэхэмрэ къызэкӀагъэплъыхьагъэх. ЕтӀанэ цӀыфхэр Паулрэ Бар-Наббэрэ атебэнэнхэу зэкӀагъэблагъэх, яхэкуи къырафыгъэх. 51Паулрэ Бар-Наббэрэ алъакъохэм ателъ сапэр цӀыфхэм апашъхьэ атыраутхыпкӀыкӀыжьи, къалэу Иконие кӀуагъэх. 52Ау ИсускӀэ шӀошъхъуныгъэ зиӀэхэм агухэм гушӀуагъорэ Тхьэм ы Псэ ЛъапӀэрэ инэу арылъ хъугъэх.

Currently Selected:

Апостолхэм ашӀэгъэ Ӏофхэр 13: AdgNT14

Highlight

Copy