Апостолхэм ашӀэгъэ Ӏофхэр 12
12
ЯПШӀЫКӀУТӀОНЭРЭШЪХЬ
Тетыгъо зиӀэхэм Якъубэ зэраукӀыгъэр ыкӀи Петрэ хьапсым зэрэчӀадзагъэр
1А мафэхэм пачъыхьэ Ирод#12:1 пачъыхьэ Ирод – Ирод Агриппэ Апэрэр ары. Исус къызэхъу нэужым я 41-44 илъэсхэм къакӀоцӀ Израиль хэгъэгум ипачъыхьагъ. Ирод Агриппэ Апэрэр Ирод Иным ыкъо ыкъожьыгъ. идзэлӀхэм чылыс зэӀукӀэм щыщхэу нэбгырэ заулэ аригъэубыти, лые араригъэхэу ыублагъ. 2Иуан ышэу Якъубэ#12:2 Якъубэ – Зебедей ыкъуагъ, Исус игъогу рыкӀорэ нэбгырэ пшӀыкӀутӀуми ащыщыгъ. чатэкӀэ аригъэукӀыгъ. 3Ар джуртхэм агу зэрэрихьырэр Ирод зелъэгъум, ащ ыуж идзэлӀхэм Петри аригъэубытыгъ. Ар зыхъугъэр Хьалыгъу мыкӀу-мыпшэ зыщашхырэ мэфэкӀ мэфэшхохэр ары. 4Ирод Петрэ зарегъэубытым, хьапсым чӀаригъадзи, дзэм щыщхэу нэбгырэ плӀырыплӀэу купиплӀмэ ар къагъэгъунэнэу аӀэкӀилъхьагъ. ЕтӀанэ ӀутӀыжъ мэфэкӀ мэфэшхор зыблэкӀыкӀэ, хьыкумэшӀым ыпашъхьэ рищэнэу Ирод ыгу хэлъыгъ.
5Аущтэу Петрэ хьапсым чӀадзэгъагъ, ау чылыс зэӀукӀэм щыщхэр яшъыпкъэу Тхьэм ащ фелъэӀущтыгъэх.
МэлэӀич горэм Петрэ хьапсым къызэрэчӀищыжьыгъэр
6Пачъыхьэ Ирод Петрэ хьыкумэшӀым ыпашъхьэ зыщырищэщт мафэм ыпэрэ чэщым Петрэ ӀэхъуитӀу телъэу, дзэлӀитӀум азыфагу дэлъэу чъыещтыгъ. Пчъэм Ӏутхэу къэрэгъулэхэм хьапсыр къаухъумэщтыгъ. 7ОшӀэ-дэмышӀэу Зиусхьаным имэлэӀич а унэм къыщылъагъуи, унэр къызэпэнэфыгъ. ЫбгъукӀэ етӀыргуи, мэлэӀичым Петрэ къыгъэущыгъ.
– ПсынкӀэу тэдж! – ыӀуагъ. Петрэ ӀэхъуитӀоу телъхэр тезыгъэх.
8– Зыфап, уицуакъэхэри зыщылъ, – риӀуагъ мэлэӀичым Петрэ. Петрэ аущтэу ышӀыгъ. ЕтӀанэ мэлэӀичым къыриӀуагъ:
– Уищыгъын кӀыӀутелъ зыщылъэжьи, сауж уитэу къакӀо.
9Джаущтэу Петрэ мэлэӀичым ыуж итэу хьапсым къычӀэкӀыжьыгъ. Ау мэлэӀичым ышӀагъэхэр шъыпкъэмэ, мышъыпкъэмэ Петрэ ышӀэщтыгъэп, зыгорэ къыфэлъагъоу къышӀошӀыгъ. 10Апэрэ къэрэгъул купми, ятӀонэрэ къэрэгъул купми къаблэкӀхи, къэлэ дэхьапӀэм Ӏулъ гъучӀ къэлапчъэм нэсыгъэх. Къэлапчъэр ежь-ежьырэу къафызэӀукӀыгъ. Къэлапчъэм дэкӀхи, зы урамым икӀыхьагъэкӀэ зырэкӀохэ нэужым, ошӀэ-дэмышӀэу Петрэ къыгъани, мэлэӀичыр ӀукӀыжьыгъ.
11Петрэ зыкъызешӀэжьым, къыӀуагъ:
– Зиусхьаным имэлэӀич къыгъакӀуи, Ирод сыкъыӀэкӀихи, джурт цӀыфхэми къысэхъулӀэнэу зыфаӀорэ Ӏэегъэ пстэури симыгъэлъэгъоу, сымыкӀодэу сыкъызэригъэнэжьыгъэр джы зэрэшъыпкъэр къэсшӀагъ.
12Петрэ къехъулӀагъэр зыздешӀэжьым, Иуанэу МарккӀэ заджэхэрэм янэу Мерэм иунэ кӀуагъэ. ЦӀыфыбэ ащ дэжьым щызэрэугъоигъэх, Тхьэм елъэӀущтыгъэх. 13Петрэ къэлапчъэм зытеом, къызэӀуихынэу Родэ зыцӀэ унэӀут пшъашъэр къыӀухьагъ. 14Петрэ ымакъэ къызешӀэжьым, гушӀом хэтэу къэлапчъэр Ӏуимыхэу унэм илъэдэжьи, Петрэ къэлапчъэм зэрэӀутыр адрэмэ ариӀуагъ.
15– КъапӀорэр пшӀэрэп, – къыраӀожьыгъ ахэмэ. Ау ыӀуагъэм пшъашъэр текӀыгъэп. Джащыгъум къаӀуагъ:
– Ар Петрэ имэлэӀичын фае. #12:15 Ар Петрэ имэлэӀичын фае – джуртхэм яшӀошъхъуныгъэ тетэу, хэтрэ цӀыфи мэлэӀич горэ ухъумакӀоу иӀ.
16Ау Петрэ къэлапчъэм зэпымыоу теощтыгъэ. Къэлапчъэр Ӏуахи, Петрэ залъэгъум, лъэшэу агъэшӀэгъуагъ. 17Заушъэфынэу Петрэ Ӏэ афишӀи, Зиусхьаным хьапсым къызэрэчӀищыжьыгъэр ахэмэ афиӀотэжьыгъ. ЕтӀанэ къыӀуагъ:
– Якъуби#12:17 Якъубэ – Зиусхьан Исус ышхэм ащыщэу, Ерусалим щыӀэ чылыс зэӀукӀэм итхьэматэхэм ащыщыгъ. Еплъ Гал. 1:19. адрэ тшыхэми хъугъэ-шӀагъэр яжъугъашӀ. Ар къызеӀом ыуж, а унэм икӀи, нэмыкӀ чӀыпӀэ горэм кӀуагъэ.
18Нэф къызэшъым, дзэлӀхэр гузэжъогъушхо хэфагъэхэу зэупчӀыжьыгъэх:
– Петрэ сыда къехъулӀагъэр?
19Пачъыхьэ Ирод дзэлӀхэр Петрэ лъигъэхъухи, къызамыгъотым, къэрэгъулэхэм тэрэзэу яупчӀи, а къэрэгъулэхэр аригъэукӀыгъ. Пачъыхьэ Ирод етӀанэ Иудей хэкум икӀи, къалэу КесариекӀэ ехи, ащ къыдэнагъ.
Пачъыхьэ Ирод зэрэлӀагъэр
20Пачъыхьэ Ирод Тир къалэм дэсхэмрэ Сидон къалэм#12:20 Тир къалэм… Сидон къалэм… – ахэр хымэ къалэхэу Галилей хэкум итемыр лъэныкъомкӀэ хыӀушъом Ӏутыгъэхэр арых. дэсхэмрэ губж лъэш афишӀыгъагъ. А къалэхэм адэсхэр зэгурыӀохи, пачъыхьэм дэжь къэкӀуагъэх. Пачъыхьэм фэлэжьэрэ Ӏэшъхьэтет Власт гурыӀохи, пачъыхьэр къаригъэшӀужьынэу елъэӀугъэх. Сыда пӀомэ, пачъыхьэм ихэгъэгу къикӀырэ гъомлапхъэхэр ары ахэр зэрыпсэущтыгъэхэр.
21Ирод ыгъэнэфэгъэ мафэм ипачъыхьэ щыгъынхэр щыгъхэу, пачъыхьэ тӀысыпӀэм тетӀысхьи, ахэмэ апашъхьэ къыщыгущыӀагъ.
22– Мыр цӀыф макъэп, Тхьэм ымакъ нахь, – цӀыфхэм аӀоти, джэщтыгъэх. 23Пачъыхьэ Ирод Тхьэм щытхъушхор зэрэфимышӀыгъэм пае, Тхьэм имэлэӀич горэ ардэдэм ащ къыригъауи, хьамылыухэм ашхызэ, ыпсэ хэкӀыгъ.
24Ау Тхьэм игущыӀэхэр нахь цӀыфыбэмэ анэсхэзэ, зыщаубгъущтыгъ.
25Бар-Наббэрэ Шаулрэ яӀоф заухым, Ерусалим къыдэкӀыжьхи, МарккӀэ заджэхэрэ Иуан ягъусэу Антиохие къалэм агъэзэжьыгъ.
Currently Selected:
Апостолхэм ашӀэгъэ Ӏофхэр 12: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
