Апостолхэм ашӀэгъэ Ӏофхэр 11

ЯПШӀЫКӀУЗЭНЭРЭШЪХЬ

Петрэ Ерусалим ичылыс зэӀукӀэ щыщхэм хъугъэ-шӀагъэр зэрариӀотэжьыгъэр

1Хымэ лъэпкъхэм ащыщхэми Тхьэм игущыӀэхэр зэраштагъэхэр апостолхэмрэ Иудей хэкум ис зэшхэмрэ зэхахыгъ. 2Аущтэу Петрэ ЕрусалимкӀэ зыдэкӀуаем, сунэт ашӀыгъэхэм Петрэ ышӀагъэр амыдэу, 3ащ къыраӀуагъ:

– О сунэт амышӀыгъэхэм яунэ уихьи, уадэшхагъ.

4Джащыгъум Петрэ хъугъэ-шӀагъэхэр хэзыгъэнчъэу къагуригъэӀонэу ыублагъ:

5– Иоппие къалэм сэ Тхьэм сыщелъэӀущтыгъ. Джащыгъум Тхьэм сэ сиакъыл щыригъэхи, шэкӀ фыжь иным фэдэу зыгорэ уашъом къехэу сигъэлъэгъугъ. Ар къопиплӀымкӀэ кӀэшӀагъэу, уашъом къырагъэлэлэхыгъэм фэдэу къысфехыгъ. 6ШэкӀ фыжьым сызеплъым, лъэкъуиплӀыкӀэ кӀорэ былымхэри, хьэкӀэ-къуакӀэхэри, ныбашъокӀэ цуахъорэ псэушъхьэхэри, ошъогу бзыухэри слъэгъугъэх. 7«Петрэ, къэтэдж. ШӀобзи, шхы», – макъэ горэм къысиӀоу зэхэсхыгъ.

8– «Хьау, Зиусхьан, ар хъухэщтэп, мышхыпхъи, хьэрами егъашӀэми зыӀуслъхьагъэп», – есӀожьыгъ.

9– А макъэм ятӀонэрэу уашъом къиӀукӀэу къыӀожьыгъ: «Тхьэм къабзэу, шхыпхъэу зыфиӀуагъэхэр о хьэрам умыӀо». 10Аущтэу гъогогъуищэ хъугъэ. ЕтӀанэ зэкӀэ уашъом дэкӀоежьыгъ.

11– Ардэдэм Кесарие къалэм къикӀыхэу садэжь къагъэкӀогъэ нэбгырищ сызэрыс унэм икъэлапчъэ къыӀууцуагъ. 12Сыгу щэч къисымыгъахьэу ахэмэ садэкӀонэу Тхьэм ы Псэ ЛъапӀэ къысиӀуагъ. Мы зэш нэбгырихыри сигъусэу тыкӀуи, а лӀым иунэ тихьагъ. 13Ащ къытиӀотагъ мэлэӀич горэ иунэ итэу моущтэу ыӀозэ, зэрэщилъэгъугъэр: «ПетрэкӀэ заджэхэрэ Симон къыздащэнэу лӀыкӀохэр гъакӀох. 14Оррэ зэкӀэ уиунагъорэ шъумыкӀодэу, шъукъэзгъэнэжьыщт гущыӀэхэр ащ къыуиӀощт».

15– Сэ сыкъэгущыӀэнэу зысэублэм, Тхьэм ы Псэ ЛъапӀэ ахэмэ къафехыгъ, апэу тэри къызэрэтфехыгъагъэм фэдэу. 16«Иуан псыкӀэ цӀыфхэр ыумэхъыщтыгъ, ау Тхьэм ежь ы Псэ ЛъапӀэкӀэ шъо шъуиумэхъыщт», – къызеӀом, Зиусхьаным къыӀогъэгъэ гущыӀэхэр#11:16 Зиусхьаным къыӀогъэгъэ гущыӀэхэр – еплъ 1:5. джащыгъум сыгу къэкӀыжьыгъэх. 17Зиусхьанэу Исус ХристоскӀэ шӀошъхъуныгъэ тиӀэ зэхъум, Тхьэм ы Псэ ЛъапӀэ къызэрэтфыригъэхыгъэм фэдэу, ахэми къафыригъэхыгъэу, сэ сыхэта, Тхьэм сыпэуцужьынэу?

18Ахэмэ мы Ӏофхэр зызэхаххэм, заушъэфыгъ. Тхьэм щытхъу фашӀэу къаӀуагъ:

– Ащыгъум хымэ лъэпкъхэри япсэкӀодхэм афыкӀэгъожьынхэшъ, мыкӀодыжьын щыӀэныгъэ яӀэ хъунэу Тхьэм игъоу ылъытагъ.

Антиохие къалэм чылыс зэӀукӀэ щыӀэнэу зэрэхъугъэр

19Стефан мыжъокӀэ еохэзэ, заукӀым ыуж, ИсускӀэ шӀошъхъуныгъэ зиӀэхэм къиныбэ зэрагъэщэчыщтыгъэм пае, ахэр зэбгырыкӀыжьыгъэх. Исус ехьылӀэгъэ къэбарышӀур джуртхэм анэмыкӀэу зыми рамыӀуатэу, ахэр Финикие хэкум, Кипр зыцӀэ хыгъэхъунэм, къалэу Антиохие анэс кӀуагъэх. 20Ау ахэмэ ащыщхэу зы купэу Кипр хыгъэхъунэм щыщ лӀыхэри, Кириние къалэм щыщ лӀыхэри Антиохие къалэм#11:20 Антиохие къалэр – рим къэралыгъошхом щыщэу, Сирие хэкум икъэлэшхуагъ. зэкӀохэм, Зиусхьан Исус ехьылӀэгъэ къэбарышӀур алыджхэми араӀуатэщтыгъ. 21Зиусхьаныр ягъусагъ, шӀошъхъуныгъэ яӀэу, цӀыфыбэри Зиусхьаным игъогу техьагъэх.

22Мы Ӏофхэм якъэбар Ерусалим щыӀэ чылыс зэӀукӀэм щыщхэм анэсыгъ. Занэсым, Бар-Наббэ Антиохием агъэкӀуагъ. 23Бар-Наббэ Антиохием кӀуи, Тхьэм ынэшӀу ахэмэ къызэращифагъэр зелъэгъум, гушӀуагъэ, агу етыгъэу, емызэщхэу Зиусхьаным фэшъыпкъэнхэуи афигъэпытагъ. 24Бар-Наббэ цӀыф дэгъугъ. Тхьэм ы Псэ ЛъапӀи шӀошъхъуныгъэри инэу ыгу илъыгъэх. Аущтэу ЗиусхьанымкӀэ шӀошъхъуныгъэ зиӀэ цӀыфхэм япчъагъэ инэу хэхъуагъ.

25ЕтӀанэ Шаул лъыхъунэу Тарс къалэм Бар-Наббэ кӀуагъэ. Шаул къызегъотым, Антиохием зыдищагъ. 26Илъэс псаум икӀыхьагъэкӀэ чылыс зэӀукӀэм щыщхэм ягъусэу зэрэугъоихэзэ, цӀыф купышхом Тхьэм игущыӀэхэр арагъашӀэщтыгъэх. ИсускӀэ шӀошъхъуныгъэ зиӀэхэм «ЧыристанхэкӀэ» апэ дэдэу зыщяджагъэхэр Антиохиер ары.

27А мафэхэм пегъымбар куп Ерусалим къикӀи, Антиохие къэкӀуагъ. 28Ахэмэ ащыщэу Агаб зыцӀэр къэтэджи, зэкӀэ дунаим гъэблэшхо къызэрэщыхъущтыр Тхьэм ы Псэ ЛъапӀэ ащ ыгу къырилъхьи, къыригъэӀуагъ. Кайсар Клаудый#11:28 Клаудый – Исус къызэхъу нэужым я 41-54 илъэсхэм къакӀоцӀ Рим къэралыгъошхом и Кайсарыгъ. Гъэблэшхоу Агаб зигугъу ышӀыгъэр Исус къызэхъу нэужым я 46-рэ илъэсым къэхъугъ. итетыгъоми аущтэу хъугъэ. 29Джащыгъум ИсускӀэ шӀошъхъуныгъэ зиӀэхэм, хэти зэрилъэкӀырэм фэшъуашэу, Иудей хэкум ис ашыхэм ӀэпыӀэгъу афэхъунхэу тыраубытагъ. 30ШӀошъхъуныгъэ зиӀэхэм аущтэу ашӀызэ, аугъоигъэ ахъщэр Бар-Наббэрэ Шаулрэ аӀэкӀалъхьи, ахэми чылыс зэӀукӀэм инахьыжъхэм#11:30 нахьыжъхэр – чылыс зэӀукӀэм Ӏофэу ышӀэрэр зыпшъэ илъ тхьэмэтэ зэкъошхэр ары. афарагъэхьыгъ.

Currently Selected:

Апостолхэм ашӀэгъэ Ӏофхэр 11: AdgNT14

Highlight

Copy