Luka 7

Itaŋida Yesu Apit olo Ajafit Oseŋer Roma

(Mat 8:5-13)

1Ninyia atuhok Yesu ekiana erre hunia 'daŋ jio aati, ette inyi leten Kapernaum. 2Buo diya, owon nyia obo ajafit olo oseŋer Roma iko apit honyi ollo omuno inyi bebe. Ati oŋuai nyia apit alia many imohita. 3Ninyia itaniŋu ajafit lia asayyo Yesu, ette inyi ifahina lahou Yudei jio Yesu jio oŋida ottu itaŋida apit honyi. 4Ninyia afanyi isi jio Yesu, ette isi ittana inyi bebe jio “Osiru iluak iyye ajafit alia, 5nyio, obuor ataji honyi aati hohoi buo fe oduhok jihohoi aaji emojit.”

6Ette Yesu leten ikosi. Ninyia iliaha inyi iger haŋ ajafit alia, inyiak ajafit alia ifahina orriahat honyi jio Yesu, héfuahi jiaran jihonyi jio, “Lettok, hèttigemio ahuan hoi obojiai, nyio obeŋ osiru ittu iyye ihaji hoŋ. 7Obeŋ buo fe osiru jihoŋ ilari jihoye ta ahuan hoŋ, ati ikianai te eetuk ijiai oŋida adi apit hoŋ. 8Orriama ihuo anna aniŋiere ni elettaha hoŋ, buo fe oseŋer hoŋ oniŋie ani. Aremik ni jiaran jio obo, ‘Ilo!’ buo inyi ette leten, buo fe jio lobo, ‘Waŋ!’ buo inyi ette ittuna; buo fe ajio jio apit hoŋ, ‘Ihana enya!’ buo inyi ette ihan.”

9Ninyia itayiru Yesu eram ana, ette inyi illilliha, ette iyito jio eluluŋ waati ninyia ijifatio 'to inyi, ette jiaran jihosi, “Eramak ni itai, habeŋ ni anyurak obo eruk onno obolo ihuo ana, ara duo bu ifau Israele!”

10Attati leyak sayyo hunyia ifahini jio Yesu icaharu ihaŋ ajafit lia, ette inyurana apit honyi aŋida.

Itubuhu Yesu Lonyi obo Aŋotte Ehidak

11Nyia motie#7:11 Nyia motie : ojiori omuk egierita jio, ihalu kuak., olo nyia Yesu jio obo abore gala anna anya Nain, buo lejifak honyi iko eluluŋ waati arriai ette ifuatan ikonyi. 12Ninyia iliaha inyi ikol bore gala, oruaŋanio nyia inyi iko aati ojiŋuni addi, hulla akafunie ayaani inuhiere. Ara nyia ayaani alia eto olobotie jio obo aŋotte ehidak ninyia ofuonni 'to iko eluluŋ waati to tua bore gala. 13Ninyia igonyu Lamonye ehidak ania, ette inyi imehino jihonyi, ette jiaran, “Hèyyoo.” 14Attati Yesu ittuna, ette ittir ekafit hayaani lia, buo akafak ette iwotia. Attati Yesu jiaran, “Illa, ajio ni jihoi totte!” 15Teya, ette ayaani alia idioto, ette itterio ekiana, buo Yesu ette isio inyi jio honyonyi.

16Abaŋi nyia aati 'daŋ bebe; ette isi itahabuyo Hollum ojio, “Adetuno ekianani Hollum elettok ihiji hohoi! Attu buo fe Hollum italahuniere aati honyi!”

17Attati eram ono Yesu isarrahina ifau Yudea iko afauhien hutto onyihari honyi 'daŋ.

Eyak Sayyo hunyia Ifak Yoane Etifuotoni Batisimo

(Mat 11:2-19)

18Ninyia itaniŋu Yoane erre huna 'daŋ jio lejifak honyi, ette inyi iloŋuna lejifak honyi arrihai, 19ette ifahina isi jio Lamonye ifiyere inyi jio, “Iyye atulo linyia ojio Yoane olo adi ittuna, kuyya etila 'tadi hohoi lobo hama?”

20Ninyia afuonni isi jio Yesu, ette isi jiaran, “Ifahu hohoi Yoane etifuotoni Batisimo jihoi ifiyere; kuyya elle ira iyye atulo linyia ojio inyi olo adi ittuna, kuyya etila 'tadi hohoi obo atulo hama?”

21To ninyia tonyia itaŋida nyia Yesu aati arriai te eŋuati hosi, buo fe itaŋida aati miniaŋa, buo ette inyiahina amijio jio aŋodok. 22Attati Yesu itarraŋ eyak sayyo hunyia ifahu Yoane jiojio, “Ifuatta iramana Yoane erre hunne igonyuna itai buo fe itaniŋuna: amijie aŋodok, adahai aŋurak, alibori hullo oŋuai 'to iko eŋuati belelio, itayirie attuhok, ibuhuni ayaak, ittittoye buo fe Asayyo Ayijok jio alociaŋak 23Hotomunohi hia, hullo obeŋi 'to okuayai eram hoŋ!”

24Ninyia acaharai eyak sayyo hulo Yoane, itterio nyia Yesu ekiana jio eluluŋ waati to Yoane ojio: “Ninyia ifuati itai jio Yoane ihidiofo, iwahata nyia itai igonyuna anyio? Igonyuna nyia itai afarawati miyaŋ onno ohucio oyyami? 25Ati ifuatta nyia itai imijio anyio? Atulo elle ihum iŋata? Ahode, aati hulla aŋatai 'to ihuo nyia buo fe ilobiai, amanyai isi ihasik hobuok! 26Ati, iramana ani ifuatta nyia itai imijio anyio? Ekianani Hollum? Hode, igonyuna nyia itai atulo alla agalik 'to ekianani Hollum. 27Yoane nyia linyia ikiana abuk Hollum jio: ‘Ojio Hollum jio, efak adi ni eyani sayyo hoŋ to osiere hoi, ihuhumaniere ekoi hoi.’ 28Eramak ni itai, jio aati hutta fau 'daŋ hobeŋ obo alla agalik 'to Yoane. Ati Ilobie Hollum, inyiak atulo asai igalihina Yoane.”

29 # Mat 21:32; Luk 3:12 Itaniŋuni nyia aati 'daŋ ekiana honyi, ara duadi bu eddudduhak musuru. Isi aati hulia hunyia iruhi 'to awahan Hollum onno obis 'to ette ifuotuna batisimo jio Yoane. 30Ati ihari nyia Farisei iko ettiyanak ifahita ihanio ihuo ojio Hollum jihosi, ette ihara efuotuna batisimo jio Yoane.

31Attati Yesu jiaran, “Etarrijohi adi ni aati hulo ahana iko anyio? Arai isi ihuo anyio? 32Arai isi ihuo aduri hulla abalai 'to isuk buo illilloŋoi ahuattek jiojio, ‘Ehutak hohoi itai aatar, ati ibiaŋata itai ihiati! Edol hohoi afureta tuari, buo itai ibiaŋata iyyooti!’ 33Ottu nyia Yoane Etifuotoni Batisimo ollo oferutta buo fe obeŋ amata afino, buo itai ijiatta jio, ‘Owon inyi iko aminiaŋati!’ 34Lattu Lonyi Tulo, ollo oŋiyo buo fe amata, buo itai ijiatta jio, ‘Ike imijata atulo alia, ara inyi alaŋaru, aharumani buo fe amotte hèddudduhak musuru iko eyyak!’ 35Ati itahutani aati hulle eruhi 'to ofioro Hollum jio obisi ofioro honyi.”

Awanan Yesu Ihaŋ Simone a Fariseitanani

36Iloŋu nyia obo a Fariseitanani Yesu iŋiria. Attati Yesu leten ihaŋ honyi, ette itoŋo iŋiyere. 37#Mat 26:7; Mar 14:3; Yoa 12:3Itua bore gala ania, owon nyia obo aŋotte anna ara 'to aheyyani ta amanya honyi 'daŋ. Ninyia itaniŋu inyi jio Yesu oloŋiyo ihaŋ a Fariseitanani lia, ette inyi iyaŋuno ariaa ta akarajaja, 38ette irigoŋo ifau iger hejek honyi onno oyyoo buo itadohitta eyyoo honyi ihejek Yesu. Attati inyi ifufus eejek Yesu to oofir honyi, ette ijur jur isi, ette buo fe iyal isi ta ariaa. 39Ninyia igonyu a Fariseitanani lia eram ana, ette inyi ikiana hama jiojio, “Ara duo atulo olo luŋa ahekianani Hollum, omijak duo inyi anani ŋotte onno ottir 'to ania inyi; nyio, ara aŋotte ania aheyyani!”

40Attati Yesu jiaran jihonyi, “Simone, ajio ni ekiana obo eram jihoi.”

Buo inyi ette itarraŋ ojio, “Oŋida, ikianai Hettiyanani.”

41Attati Yesu jiaran, “Owon nyia obo atulo iko aati horos honyi arrihai. Owon obotie iko arobiyaa esiha miyet (500), buo ollobo iko arobiyaa atomuana miyet. 42Ati ogol nyia jihosi idumari amonye robiyaa, ette amonye robiyaa ibusana isi 'daŋ, ihuania alali adi tehiji hosi ollo omuno 'to bebe?”

43Itarraŋ Simone ojio, “Egigilo ni lia ollo obusani jihonyi arriai.”

Buo Yesu ette jiaran jihonyi, “Ittenu iyye.” 44Attati inyi iyito jio aŋotte ania ette jiaran jio Simone, “Igonyu iyye aŋotte ana? Noduo attuniere ni ihaŋ hoi, ibeŋ duo iyye isio ani aari illillayere eejek hoŋ, ati illilla inyi eejek hoŋ te eyyoo honyi ette buo fe ifufus to oofir honyi. 45Ibeŋ duo iyye ifony ani ta ahucio 'yaha, ati arasa inyi ijujurio eejek hoŋ many hafany ni ihaŋ hoi. 46Ibeŋ duo iyye iyal ahou hoŋ te eyali, ati iyal inyi eejek hoŋ ta ariaa. 47Tania, eramak ni iyye jio, itahutak abuaran taji honyi onno obolo 'to ania jio, ahohinie eyyata honyi hunno oluaji 'to. Ati jio lia, ollo omuta abuaran taji honyi, itahutak jio omutari eyyata honyi hunno ohohinie 'to.”

48Attati Yesu jiaran jio aŋotte ania, “Ahohinie eyyata hoi.”

49Attati aati hunyia itoŋoi 'to ikonyi imaji ŋiria itterio ikiana isi hama jiojio, “Ŋai buo fe olo, ollo oremik 'to ihohina eyyata?”

50Ati ojio nyia Yesu jio aŋotte ania, “Italahu eruk hoi iyye. Ilo te nelik taji.”

Currently Selected:

Luka 7: EA2003

Highlight

Copy