Luka 8

Aŋoruo Hunyia inyiamarai 'to Yesu

1Teya, olo nyia Yesu totto borejin gala iko amisihi buo ittittoyo Asayyo Ayijok huno Olobie Hollum. Olo nyia inyi iko lejifak honyi hula 'tomon harrihai, 2#Mat 27:55-56; Mar 15:40-41; Luk 23:49buo fe omuk aŋoruo hunyia itaŋida inyi te ŋuati buo fe ifuha addi aminiaŋa jihosi: Maria enne ifurani Madalina inyia ifuhari aminiaŋa hattarik addi jihonyi; 3Yohana ŋoruoi Kusa elettok ilobuore ono Erode; iko Susana, buo fe omuk aŋoruo arriai, hunyia iduhuni 'to esamiti hosi oluahierek bo Yesu iko lejifak honyi.

Etarriamai ono Layani Hinyomo

(Mat 13:1-9; Mar 4:1-9)

4Odulori nyia aati afuonnutta jio Yesu to borejin gala 'daŋ ababo, ati ninyia attuba eluluŋ waati enne ittok, ette Yesu iramana isi etarriamai ana:

5“Olo nyia obo aromoni iyehina enyomo. Ninyia layehi inyi, ofodoŋonie nyia omuk enyomo ihiji ikoi, buo aati adak ette irririe buo fe aheny ette ikukubuna isi. 6Ofodoŋonie nyia buo fe omuk ihiji moruoi; ninyia isuruni isi, ette isi iyohojoro nyio, obeŋi nyia aboro ofuji. 7Ofodoŋonie nyia omuk ihiji hikua, ette isi isuruna arabotie iko nekua, ette nekua itabunara isi. 8Okuahinie nyia omuk jio aboro hunno oyiji 'to ette isi isuruna onno oyyu buo emai abotie ette isuaru esiha abotie (100).” Attati Yesu itisidonia ekiana honyi, ette jiaran, “Itayiriete alla awoni ayyaha jihatai!”

Nyio Ittiyenio Yesu Aati te Etarriamata

(Mat 13:10-17; Mar 4:10-12)

9Attati lejifak Yesu ifiyo inyi anyio woyo hiram enne ikiana etarriamai ania. 10Buo inyi ette itarraŋ isi jiojio, “Isiarani jihatai amijana hirre huno Olobie Hollum hunyia otimoi; buo iramani jio aati hullomuk te etarriamata oŋida isi omijie buo obeŋ igonyuni, itayirai buo obeŋi omijani.

Iramak Yesu Ikiana Etarriamai ono Layani Hinyomo Anyio

(Mat 13:18-23; Mar 4:13-20)

11“Ikiana etarriamai ana ihuo ana: arai enyomo ekiana ono Hollum. 12Nenyomo hunno ofodoŋonie 'to ihiji ikoi, isi aati hulle itaniŋuni 'to ekiana, ati ottu Sittan ette ikuararu inyi addi to tajia hosi oŋida isi obeŋi iruhi ette ibiaŋan italahunie. 13Nenyomo hunno ofodoŋonie 'to imoruoi, isi aati hulle itayiruni 'to ekiana, ette ifuotuna ta namuno. Ati obeŋ inyi ihum ijiŋana ituajin hosi; iruhi isi do, buo alla attu akemio, ette isi 'daŋ ikuaharu addi. 14Nenyomo hunno ofodoŋonie 'to itua hikua, isi aati hulle itayiruni 'to ekiana, ati itabuna isi egigilo te esamiti iko ehawwata buo emuniti huno afau ana, ette eŋijiti hosi ibiaŋan iŋidari. 15Buo enyomo hunno okuahinie iboro hunno oyiji, isi aati hulle itayiruni 'to ekiana ette ittunana itajia hosi ta ayiji iko ta aniŋio, ette isi idihan many oŋijarik.

Allomo onno Owon 'to Itua 'Rany

(Mar 4:21-25)

16 # Mat 5:15; Luk 11:33 “Obeŋ obo atulo itawulohi allomo ette imuhonia ta arrany kuyya ihanak iwoyo ŋeref. Ati oyihak inyi allomo ihide fillili jio oŋida aati hullo ojiŋuni 'to attua igonyuni afaŋan.

17 # Mat 10:26; Luk 12:2 “Obo ariŋ enne idimani, asalani adi, buo fe obo ariŋ enne imuhoni, onyurani adi inyi ette iyaŋuno allet.

18 # Mat 25:29; Luk 19:26 “Ihumatati imijio, itayiriete itai aŋai, nyio, jio atulo ollo owon 'to iko obo ariŋ, ofonihini adi arriai jihonyi, buo atulo ollo obeŋ riŋ jihonyi, iduhuni adi addi jihonyi ara duadi bu obo ariŋ ollo odiha 'to enne igigilo inyi jio owon jihonyi.”

Honye iko Illarak Yesu

(Mat 12:46-50; Mar 3:31-35)

19Ofuonni nyia honye iko illarak Yesu imijio inyi, ati ittallihi nyia isi ifanyan jihonyi nyio, ifudai nyia aati bebe. 20Attati obo atulo jiaran jihonyi, “Honyohoi iko illarak hoi hunno owotiai illet, awahi isi imijio iyye.”

21Ati ojio nyia Yesu jihosi 'daŋ, “Iyaŋ iko illarak hoŋ, isi aati hulle itaniŋie 'to ekiana Hollum buo fe oniŋie inyi.”

Itawoj Yesu Addiŋilla

(Mat 8:23-27; Mar 4:35-41)

22To nobo noloŋ, adak nyia Yesu itogol iko lejifak honyi, ette jiaran jihosi, “Hallaŋata aŋati tafar enne ittokon tole.” Ania ette isi ifuatan. 23Ninyia ayiroroi isi atogol ette inyi ijotoro. Attati oloyyami enne ittok ihutan onno orroho bebe many ojio aari etafutak atogol, many oyeyerari jihosi. 24Ette lejifak Yesu itaheny inyi jiojio, “Hettiyanani, Hettiyanani! Efuo iye!”

Odioto nyia Yesu, ette ihum iramana addiŋilla ania iko afoliahita hari hotoduahi; ette Addiŋilla ania iwotia, buo aari ette idua dee. 25Attati Yesu ikiana jihosi, “Tani buo eruk hatai?”

Ati abaŋi nyia isi buo fe illillihai, ette ikikiana ta ahuattek hosi jiojio, “Eii! Anyio tulo olo! Ihum inyi iramana oloyyami iko afoliahita hari hotoduaniehe, buo isi ette iniŋio!”

Itaŋida Yesu obo Latulo Miniaŋa

(Mat 8:28-34; Mar 5:1-20)

26Attati Yesu iko lejifak honyi illaŋan many ifau Gerasa#8:26 Gerasa: igioroni omuk egierita jio, Gadara (imija Mat 8:28); buo omuk ojiori Gergesa. onno owon 'to ifohor tafar tole to Galilea. 27Ninyia isurok Yesu ilotifor, oruaŋanio nyia inyi iko obo atulo miniaŋa linyia ottu 'to totua bore gala. Adaha nyia atulo alia aŋaturoi aŋasi arriai buo fe obeŋ itoŋo itua haŋ. Ati amanyatio nyia inyi ihiji ilumio. 28Ninyia igonyu inyi Yesu, ette inyi iyyoo bebe, ette irruaŋana ahuan honyi ifau ihosiere Yesu, ette ikiana jihonyi woŋ woŋ ojio, “Yesu, Lonyi Hollum Elle illomohi 'to 'daŋ! Anyio, enne iwak iyye jihoŋ? Hibe awotto, hèttigemio ani!” 29Ikiana nyia inyi ihuo nyia, nyio, ifuhatio nyia Yesu aminiaŋati hételo jihonyi addi. Iniafatio nyia aminiaŋati ania inyi enyiahita arriai, duadi bu irririai inyi buo fe ifiti ahas iko eejek honyi ta aririk, ifufut nyia inyi aririk buo aminiaŋati ania ette itisiabaru inyi itua hidiofo.

30Attati Yesu ifiyo inyi ojio, “Ŋai afure hoi?”

Itarraŋ nyia inyi ojio, “Afure hoŋ iluluŋ!” Nyio, oluaji nyia aminiaŋa hunyia ojiŋani 'to jihonyi; 31ette aminiaŋa hunia ittana Yesu jio hèlaha inyi ifuhak isi itua iwure onno owudo 'to bebe.#8:31 iwure onno owudo 'to bebe: Igigiloi nyia Yudei jio, ifitai nyia aminiaŋa itua fau many iholoŋ ono aŋocio hiram hosi esidi. 32Owoni nyia omuk abataha arriai hunna attaditai ididaf doŋe. Ania, ette aminiaŋa hunia ittana Yesu jio ijiara isi ejiŋak jio abataha, buo yesu ette iŋatana. 33Ette aminiaŋa hunia ijiŋuna addi jio atulo alia otto jiŋana jio abataha, buo abataha hunia so so suoro te didaf doŋe hutu, hutu, hutu, ette ikuahino itua tafar jiojio woo, ette idioro ette ikoddaŋ iye diya.

34Ninyia igonyuni eyyahak bataha eram ana, ette isi ifuho, ette ifuatan itisarrahina asayyo huna itua bore gala iko imatta 'daŋ. 35Attati aati ifuatan imijio anyio nyia onno owon 'to diya, ette isi ifuanna jio Yesu, ette inyurana eduo tulo ifuhari aminiaŋa jihonyi addi itoŋo iger hejek Yesu. Iyyafatio nyia inyi aboŋojin buo fe egigilo honyi nyia abis. Attati isi 'daŋ ibaŋi. 36Buo aati hunyia igonyuni 'to erre huna ihanie, ette ifuatan iyabana jio hullomuk aŋai itaŋida Yesu atulo miniaŋa. 37Attati aati 'daŋ hutta fau Gerasa jiaran jio ijiara Yesu hétolo addi nyio abaŋi nyia isi bebe. Tania, adak nyia Yesu itogol ette icaharu. 38Buo atulo oduo ifuhari aminiaŋa jihonyi addi, ette ittana Yesu jiojio, “Efuo 'daŋ ikoŋ.”

Ati ifuhak nyia Yesu inyi addi, ette jiaran; 39“Acaharu haŋ. Ilo iramak anyio hirre hunne ihan Hollum jihoi.”

Attati atulo alia leten attua bore gala 'daŋ buo iriramaru erre hoduo ihan Yesu jihonyi.

Ŋarri Yayiro iko Aŋotte onno Ottir 'to Aboŋo Yesu

(Mat 9:18-26; Mar 5:21-43)

40Ninyia acohuno Yesu ilotifor tafar enne ittok tole, ette aati irraŋuna inyi nyio itilai nyia isi 'daŋ inyi. 41Attati obo atulo afure honyi Yayiro elettok haji emojit, ittuna jihonyi ette irruaŋana ahuan ihosiere hejek honyi ette ittana jio ijiara Yesu olo ihaŋ honyi, 42nyio, ojio nyia ŋarri honyi nebotie aye. Arai nyia aŋasi honyi 'tomon harrihai.

Ninyia holo Yesu diya, ette aati ifudanio jihonyi nyik nyik. 43Buo jio eluluŋ waati ania, owon nyia obo aŋotte onno oŋuai iko ayaf yaf onno orroho 'to bebe. Otuk nyia aŋuai ania aŋasi 'tomon harrihai, many otuhok aŋotte ania erre honyi 'daŋ#8:43 otuhok aŋotte ania erre honyi 'daŋ : obeŋi ekenita huna owoni jio omuk egierita. jio adiktorat, ati obeŋ nyia obo ollo oremik 'to itaŋida inyi. 44Ette inyi ihihisuno tehiji waati many ihoruoŋ Yesu, ette ittir esidi boŋo Yesu, buo ayaf yaf honyi ette iwotia teya, teya. 45Attati Yesu ifiyo ojio, “Ŋai ottir nani?” Ati orisai nyia aati 'daŋ, buo Petro ette itarraŋ ojio, “Lettok, okudani aati 'daŋ iyye buo fe ifudanie nyik, nyik ajihoi.”

46Ati ojio Yesu, “Ottir obo atulo ani nyio, amijak ni ta aleten duaran jihoŋ addi.” 47Ninyia igonyu aŋotte ania jio amijani inyi, ette inyi ittuna enne ikikiro ette irruaŋana ahuan honyi ihejek Yesu ette ipulonia ihosiere waati 'daŋ jio, inyi attir Yesu buo fe aŋai arumak inyi aŋidari teya teya. 48Buo Yesu ette jiaran jihonyi, “Ŋarri hoŋ, itaŋida eruk hoi iyye. Ilo te nelik taji.”

49Ninyia hekiana Yesu, ottu nyia obo atulo ta haŋ lettok ette jiaran jio, “Yayiro, aye ŋarri hoi, hènyiak ittigemio ettiyanani obojiai.”

50Ati itayiru nyia Yesu ekiana ania, ette inyi jiaran jio Yayiro, “Hèbaŋ iruho buo oŋida adi inyi.”

51Ninyia afany Yesu ihaŋ, obeŋ nyia inyi awak obo atulo ojiŋari ikonyi arari Petro, Yoane, iko Yakobo, buo monye iko honye hito. 52Ililuoi nyia aati 'daŋ buo fe oyyooi eto ania. Ati ojio nyia Yesu jihosi jio, “Hèyyooti, nyio obeŋ neto ana oye…ojoto inyi joto!”

53Ati osuhotierek nyia isi 'daŋ inyi nyio, omijani nyia isi jio, aye nyia neto nyia. 54Ati inef nyia Yesu aani hito ette iloŋ inyi, “Hito, totte!” 55Attati oloholio honyi icohuno ette inyi idioto teya teya, buo Yesu ette iramana isi oŋida isiori jihonyi obo aŋiyo. 56Illillihai nyia esiok honyi, ati ihum nyia Yesu iramana isi jio hèlaha iramana obo atulo eram ania.

Currently Selected:

Luka 8: EA2003

Highlight

Copy