Luka 6

Eram ono Sabatto

(Mat 12:1-8; Mar 2:23-28)

1To obo oloŋ Sabatto, adaharu nyia Yesu ta atua matta, attati lejifak honyi igiluna omuk ossi himma ette ifofo, ette niŋa. 2Attati omuk hulo Farisei ifiyo isi jiojio, “Nyio ihaniete itai ariŋ enne iyimoi efahita hohoi ihaniere to noloŋ Sabatto?”

3Buo Yesu ette itarraŋ isi ojio, “Hèbiaŋata itai ihenuna erre hunyia ihan Dafide iko aati honyi ninyia aniamai isi? 4Ojiŋak nyia inyi ihaji Hollum, ette iduhuna emunio hunyia isiarani jio Hollum ette iŋiyo; ette buo fe isio omuk jio aati honyi. Ati ihuo ojiori efahita hohoi, oduari nyia emunio hunia jio aati asai iŋiyere isi, arari fe ehumak hama.” 5Attati Yesu itisidonia ekiana honyi, ette jiaran, “Ara Lonyi Tulo Lamonye olo Sabatto.”

Atulo ollo Oye Hani

(Mat 12:9-14; Mar 3:1-6)

6To oloŋ Sabatto onnobo ojiŋak nyia Yesu ihaji emojit, ette ittiyenio. Owon nyia obo atulo diya ollo oye aani iŋet honyi. 7Attati omuk hulo ettiyanak ifahita iko omuk Farisei irriria Yesu bebe, imijaniere kuyya itaŋida adi inyi obo atulo to oloŋ Sabatto nyio, awahi nyia isi irumana obo epali jihonyi itisiahiniere inyi. 8Ati omijak nyia Yesu egigilita hosi, ette jiaran jio atulo ollo oye hani, “Totte, waŋ ihosiere.” Odioto nyia atulo lia ette leten iwotia diya. 9Attati Yesu jiaran jihosi, “Efiyo ni itai: anyio anna aŋatani efahita hohoi jio oŋida ehanio to oloŋ Sabatto? Iluahiere kuyya ittarrohojiere, italuahuniere atulo kuyya ittohori inyi?” 10Teya attati inyi imijio jihosi 'daŋ, ette jiaran#6:10 ette jiaran : ojiori omuk egierita jio, ette ta ajore. jio atulo lia “Itabisak aani hoi.” Ette inyi itabisana, buo aani honyi ette inyiak iŋidari. 11Ati ijoriai nyia isi bebe bebe, ette isi iwwaha isi hama jio ehan adi isi Yesu aŋai.

Onyimu Yesu Lefahat 'Tomon Harrihai

(Mat 10:1-4; Mar 3:13-19)

12To oloŋ tonyia olo nyia Yesu imojo idoŋe, ette inyi imojo arue 'daŋ jio Hollum. 13Ninyia afaŋ amotie, iloŋu nyia inyi ejifak honyi ette inyimuna aati 'tomon harrihai tehiji hosi hinyia ifurak inyi lefahat: 14Simone (Linyia ifurak inyi Petro) iko illanyi Andrea; Yakobo iko Yoane, Filipo iko Bartolomeyo, 15iko Matteyo buo Tomaso, Yakobo lonyi Alfeyo iko Simone (linyia iloŋoi Silot#6:15 Silot : Atulo ollo obuor ataji honyi bebe afau hosi.), 16Yuda lonyi Yakobo, iko Yuda Iskariot linyia ottu 'to irahan ahetinyiaŋani Yesu.

Ittiyenio Yesu buo fe Itaŋidario Aati

(Mat 4:23-25)

17Ninyia allu Yesu iko lefahat honyi to hide doŋe, owotia nyia inyi igum doŋe iko lejifak honyi arriai, buo eluluŋ waati arriai hunyia ofuonni 'to ta fau Yudea, to Yerusalem buo fe to broejin gala Taya iko Sidon hutteger hari mile enne ittokon. 18Ofuonni nyia isi 'daŋ itaniŋiere jio Yesu, buo fe awahi oŋida itaŋidari eŋuati hosi. Ofuonni nyia buo fe aati hulle ittigemie aminiaŋa, buo ette itaŋida isi. 19Awahi nyia aati 'daŋ ittir inyi, nyio ottu nyia aduaran to huan honyi ette itaŋida isi 'daŋ.

Amuno Iko Ejiriŋa

(Mat 5:1-12)

20Attati Yesu imijio jio lejifak honyi ette jiaran,

“Omunoti itai alociaŋak,

ara Olobie ono Hollum ahanatai!

21Omunoti buo fe itai hulle iniamati 'to ihuania;

ifuaŋata adi itai!

Omunoti itai hulle iyyooti 'to ihuania;

nyio isuhotiete adi itai!

22“Omunoti itai alla aliwarik aati itai, ihari itai, omorie itai, buo fe ittarrohojie afureta hatai, te eram Lonyi Tulo! 23Omunoti buo fe isahuttati alla afuonni erre hunia irahan hode, nyio, obolo adi esiorio jihatai idou. Nyio, ihanie nyia hohonyiok hosi erre hunia jio ekianak Hollum.

24“Ati, orroho adi bebe jihatai hulle isamata 'to ihuania,

nyio, inyurana itai amuno hatai!

25Orroho adi buo fe bebe jihatai hulle ifuoŋata 'to ihuania;

nyio, ihuriati adi itai!

Orroho adi buo fe bebe jihatai hulle imunoti 'to ihuania;

nyio, ijiriŋati adi itai buo fe iyyooti.

26“Orroho adi bebe jihatai elle itahuye aati itai, nyio, ihanie nyia hohonyiok hosi ihuo nyia jio ekianak enyabak hullo ojiori 'to jio ekiana isi eram Hollum.

Itabuarata Atajia jio Amiorok Hatai

(Mat 5:38-48; 7:12)

27“Ati eramak ni jihatai hulle itaniŋiete 'to jihoŋ: Itabuarata atajia jio amiorok hatai, ihaniete onno oyyu jio hia hullo oliwarik 'to itai, 28Omunoti aati hulle ipice 'to itai, omojoti buo fe to aati hullo omorie 'to itai. 29Alla annaŋ obo atulo amahalio hoi, isiarak buo fe inyi annaŋ ebotie; elle iyaru buo fe obo atulo akout hoi, isiarak buo fe inyi agamis hoi. 30Isiarak obo ariŋ jio lia, ollo omojo 'to jihoi; buo fe elle iyaru obo atulo ariŋ hoi, idehi jihonyi. 31#Mat 7:12Ihaniete jio aati ihuo iwahata itai isi ihanie jihatai.

32“Alla abuori atajia hatai ijiai aati hullo obuori atajia hosi itai, anyio yiji 'tadi enne inyiahata itai irumana! Ara duadi bu eyyak ihanie buo fe isi ihuo nyia. 33Elle ihaniete buo fe itai onno oyyu jio aati hulle ihanie 'to jihatai onno oyyu, anyio yiji 'tadi enne inyiak inyi iyaŋuno jihatai? Ara duadi bu eyyak, ihanie buo fe isi ihuo nyia! 34Elle ihuronia buo fe itai erre jio hia hama hulle iyihina itai jio ofuonni adi inyiahina jihatai, anyio yiji 'tadi enne inyiak inyi iyaŋuno jihatai? Ara duadi bu eyyak, ohurotiai buo fe isi jio eyyak ihuo isi, ifuotuniere onno orriama! 35Ati itabuarata atajia jio amiorok hatai, ihaniete onno oyyu jihosi, ohuronia jihosi buo fe hèyihina jio ofuonni adi isi inyiahina jihatai obo ariŋ. Tania, obolo adi esiorio jihatai; irata adi itai olonyirok Hollum elle Ilomohi 'to 'daŋ. Nyio, omehino inyi jio hia hullo obeŋi 'to ojiori humo iko jio arrohojak. 36Iwatta iko amehino ihuo anna awattari Monyatai.

Aŋocio Hiram Omuk

(Mat 7:1-5)

37“Hèŋototo eram omuk, buo obeŋ adi Hollum oŋot eram hatai. Hèŋotonia epali jio omuk, buo fe Hollum adi obeŋ oŋotok epali jihatai. Idehina epalita huno hullomuk, buo fe Hollum adi idehi epalita hatai. 38Isiatta jio hullomuk, buo isiarak adi Hollum jihatai. Ifuotuna adi itai luŋa ekemit sudu hia eluahiti huno emorot hunne ijuhoni adi ihide hirre huttanatai. Nyio, ekemit ninyia ikemiette itai, inyi adi onno okemierek esiorita jihatai.”

39 # Mat 15:14 Attati Yesu iramana jihosi etarriamai ana: “Ittallik oloŋodo irik oloŋodo: elle ihan inyi ihuo nyia, ofuoi adi isi 'daŋ ikuahino itua wudori. 40#Mat 10:24-25; Yoa 13:16; 15:20Obeŋ obo eyiyanani agalik ettiyanani honyi; ati alla atuk inyi eyiyana honyi, ara adi inyi ihuo ettiyanani honyi.

41“Anyio imijio iyye jio aboroti otto honyek illahoi buo ibeŋ igonyu abeleri otto honyek hoi? 42Aŋai adi ijio iyye jio illahoi, ‘Illa, hadi eduhu ni aboroti otto honyek hoi,’ buo ibeŋ igonyu abeleri otto honyek hoi? Jai! Iyye etihanani huan, iduhu do addi abeleri otto honyek hoi; tania, iremik adi iyye ihum igonyuna buo fe iduhuna addi aboroti otto honyek illa hoi.

Ayyani iko Eŋijiti Honyi

(Mat 7:16-20; 12:33-35)

43“Obeŋ ayyani onno oyyu 'to oŋijak eŋijiti hunno orrohoji, buo fe ayyani onno orroho 'to obeŋ oŋijak eŋijiti hunno oyiji. 44#Mat 12:33Oherunie ayyani 'daŋ te eŋijiti hosi; ittallihoto itai ideuna aŋabolo to ŋarria, ittallihoto itai buo fe ideuna eŋijiti fino to hikua. 45#Mat 12:34Iyaŋuno oloyijio erre ayijok to hirre hunno oyiji 'to hunno ottunai 'to itua taji honyi, buo olorroho iyaŋuno erre arrohojak to hirre hunno orrohoji 'to hunno ottunai 'to itua taji honyi. Nyio, ikiana eetuk erre hunno owoni 'to itua taji.

Aduhok Hasik Arrihai

(Mat 7:24-27)

46“Nyio iloŋoti itai ani ‘Lamonye, Lamonye,’ buo ibiaŋata ihaniete erre hunne eramak ni itai? 47Atulo ollo ottu 'to itaniŋio ekenita hoŋ buo fe oniŋio isi, eramak adi ni itai ara inyi ihuo ŋai. 48Ara inyi ihuo atulo aduhoni haji ollo obok 'to ewurio wir wir many ottuloniere imoruoi ette iduhonia etawojita haji honyi diya. Ninyia ifut olowore many aŋabiere olotifor, ette ibul aaji ania, obeŋ nyia inyi oritihoro nyio, ihum nyia inyi iduho. 49Ati atulo elle itaniŋu 'to ekenita hoŋ buo obeŋ oniŋio isi, ara inyi ihuo atulo ollo oduhok 'to aaji honyi ihide hifuoto buo obeŋ obok ewurio etawojita haji honyi. Ninyia ibul aari aaji ania, ette inyi iritihoro. Orroho nyia ekuahit honyi bebe!”

Currently Selected:

Luka 6: EA2003

Highlight

Copy